මීට හැත්තෑ පස් වසරකට පෙර 1940 අගෝස්තු 20 දින ලියොන් ට්‍රොට්ස්කි, එවකට ඔහු පිටුවහලේ ජීවත්ව සිටි මෙක්සිකෝ සිටිහි උප නගරයක් වූ කොයොආකාන්හිදී, ජීපීයූ නමැති සෝවියට් රහස් පොලිසියේ ඒජන්තයෙකු විසින් ඝාතනය කෙරුනි. එමඟින් ලෝක සමාජවාදී විප්ලවයේ ශ්‍රේෂ්ඨ න්‍යායාචාර්යවරයාගේ ද නූතන දේශපාලන ඉතිහාසයේ යෝධ පුරුෂයෙකුගේ ද ජීවිතය අවසන් විය.

ලියොන් ට්‍රොට්ස්කිගේ ඝාතනය, විසිවන සියවසේ දේශපාලනිකව අතිශයින්ම අර්ථභාරී අපරාධ අතරට ගැනේ. එය ලෝක සමාජවාදී ව්‍යාපාරයේ ද ජාත්‍යන්තර කම්කරු පන්තියේ ද වර්ධනය සඳහා දුර දිග යන හා දිගු කල් පවතින ප්‍රතිවිපාක ජනනය කලේය. එහෙත් දශක ගනනාවක් යන තෙක් ට්‍රොට්ස්කි ඝාතනය වටා පැවති වාතාවරනය නිහඬ බව තුල යටපත්ව තිබුනි. ට්‍රොට්ස්කිට එරෙහි ස්ටැලින්වාදයේ දැවැන්ත පරිමාන කුමන්ත්‍රනය, විශේෂයෙන්ම ජීපීයූව විසින් ට්‍රොට්ස්කිවාදී ව්‍යාපාරය විනිවිද ගොස් තිබුනු දුර, ප්‍රවේශමෙන් සැලසුම් කරන ලද යටගැසීමට හේතුව විය.

1975දී හතරවන ජාත්‍යන්තරයේ ජාත්‍යන්තර කමිටුව, 1940 ඝාතනය පිලිබඳව ට්‍රොට්ස්කිවාදී ව්‍යාපාරයේ පලමුවන පෘතුල හා ක්‍රමානුකූල පරීක්ෂනය දියත් කරන ලදී. ආරක්ෂාව හා හතරවන ජාත්‍යන්තරය නමින් දන්නා මෙම පරීක්ෂනය, ට්‍රොට්ස්කිගේ ජීවිතයට එරෙහිව ස්ටැලින්ගේ කුමන්ත්‍රනයෙහි සාර්ථකත්වය සහතික කල, හතරවන ජාත්‍යන්තරය අභ්‍යන්තරයේ ක්‍රියාත්මකවූ, විශේෂයෙන්ම පැරිසියේ, මෙක්සිකෝ සිටි හා නිව් යෝර්ක් නගරවල ජීපීයූ ඒජන්ත ජාලය හෙලිදරව් කිරීමට මුල් විය. ජාත්‍යන්තර කමිටුවේ පරීක්ෂනයට පැබ්ලෝවාදීහු හා ව්‍යාජ වාම සංවිධාන දරුනු ලෙස විරුද්ධ වූහ. ට්‍රොට්ස්කිවාදී ව්‍යාපාරය ඇතුලත පැලපදියම් කර සිටි ඔත්තුකරුවන් හෙලිදරව් කිරීම, “ඒජන්ත ඇම වැනීම” ලෙස ඔවුන්ගේ හෙලා දැකීමට ලක් විය. සෝවියට් සංඟමය විසුරුවා හැරීමෙන් පසුව මුදාහරින ලද රාජ්‍ය ඔත්තු සේවා ලියකියවිලි, ජාත්‍යන්තර කමිටුවේ සොයාගැනීම් තහවුරු කර, ආරක්ෂාව හා හතරවන ජාත්‍යන්තරය සුජාත කර තිබියදීත් ඔවුන්ගේ ආස්ථානය එලෙසම පවතී.

ලෝක සමාජවාදී වෙබ් අඩවියේ ජාත්‍යන්තර කතෘමන්ඬලයෙහි සභාපති වන ඩේවිඩ් නෝර්ත්, ජාත්‍යන්තර ට්‍රොට්ස්කිවාදී ව්‍යාපාරයේ හතලිස් වසරක ඉතිහාසය තුල ප්‍රමුඛ චරිතයක් බවට පත්ව සිටියි. ආරක්ෂාව හා හතරවන ජාත්‍යන්තරය පරීක්ෂනය තුල ඔහු මූලික ක්‍රියාකලාපයක් ඉටු කලේය. මෙම ඔන්ලයින් සම්මුඛ සාකච්ඡාවන්හිදී ලෝසවෙඅ මාධ්‍යවේදී ඇන්ඩ්‍රියා පීටර්ස්, ට්‍රොට්ස්කි ඝාතනයේ අර්ථභාරය, ජාත්‍යන්තර කමිටුවේ පරීක්ෂනයෙහි මූලාරම්භය හා වර්ධනය ද පරීක්ෂනයේ මූලික සොයාගැනීම් ද පිලිබඳව නෝර්ත් සමඟ කතාබහ කරනු ඇත.

ඔක්තෝබර් 03 වන සෙනසුරාදා හා ඔක්තෝබර් 10වන සෙනසුරාදා එක්සත් ජනපද නැගෙනහිර දහවල් වේලාවෙන් පව. 1.00 ට සම්මුඛ සාකච්ඡා ආරම්භ කෙරෙනු ඇත. (කාලවේලා කලාප පරිවර්තන අදාලය - ශ‍්‍රී ලංකා වේලාවෙන් රාත්‍රි 10.30 ට.) සවන් දෙන්නේ හා සහභාගී වන්නේ කෙසේ ද යන්න පිලිබඳ තොරතුරු දැනගැනීම පිනිස කරුනාකර පහත දැක්වෙන පෝරමය යොදාගෙන ලියාපදිංචි වන්න. මෙම වැදගත් සිද්ධිය වෙනුවෙන් දරන වියදම් පියවාගැනීමට මුදල් පරිත්‍යාග කරන ලෙස අපගේ පාඨකයින්ගෙන් අපි ඉල්ලා සිටිමු.

Submitting the registration below will register you for both the October 3 and October 10 events.