ඩොලර් ට්‍රිලියන 2 ක ව්‍යාපාරික ඇපකර සම්බන්ධ මහ ව්‍යාපාරික පක්ෂ එකඟත්වයකට පැමිනෙමින් සිටියදී

පාස්කුදින කොවිඩ්-19 සීමා ඉවත් කරන බව ට්‍රම්ප් කියයි

බැරී ග්‍රේ
26 මාර්තු 2020

මෙම ලිපිය 2020 මාර්තු 25 දින ඉංග්‍රීසි බසින් පලකෙරුනි.

කොවිඩ්-19 ආසාදන හා මරන ඉහල යාමත් සමඟ ඩිමොක්‍රටික සහ රිපබ්ලිකානුවෝ, දැවැන්ත ව්‍යාපාරික ඇපදීමක් පිලිබඳ එකඟතාවකට එලඹෙමින් සිටිති. ජනාධිපති ඩොනල්ඩ් ට්‍රම්ප් 24දා කොරෝනා වෛරස් වසංගතය පැතිරීම වැලැක්වීම සඳහා පනවා තිබූ සීමාවන් ඉවත් කරමින් කම්කරුවන්ට නැවත රැකියාවට යන ලෙස බල කරන කතාව දෙගුන තෙගුන කලේය. 

නගර ශාලාවේදී ෆොක්ස් නිවුස් වෙත  ට්‍රම්ප් ප්‍රකාශ කලේ, තමාට “පාස්කු දින (අප්‍රියෙල් 12) සිට රට විවෘත කිරීමට අවශ්‍ය“ බවයි. ට්‍රම්ප් පැවසුවේ, නිරෝධායන අවසන් කර කම්හල් හා සේවා ස්ථාන විවෘත කිරීමට පාස්කු හොඳ දවසක් වන බවයි. "ඔබ සියලු දෙනා රට පුරා ඇති පල්ලි වලට යා යුතුයි. මම හිතන්නේ එය සුන්දර කාලයක් වනු ඇත කියලාය. ”

එදිනම, එක්සත් ජනපදයේ කොවිඩ්-19 මියගිය සංඛ්‍යාව 700 ක් පමන වූ අතර තහවුරු කල ආසාදන  රෝගීන් 53,000 ඉක්ම වීය. ඉදිරි සති කිහිපය තුල, එනම්, පාස්කු නිවාඩු කාලය වන විට, එක්සත් ජනපදය වසංගතයේ ගෝලීය කේන්ද්‍රස්ථානය බවට පත්වනු ඇතැයි ලෝක සෞඛ්‍ය සංවිධානය අනතුරු අඟවා තිබේ .

ජනාධිපති ඩොනල්ඩ් ට්‍රම්ප් ප්‍රවෘත්ති සාකච්ඡාවකදී කතා කරයි [අනුග්‍රහය: ඒපී ඡායාරූපය / කැරොලින් කැස්ටර්]

දෙපක්ෂයේ ඩොලර් ට්‍රිලියන 2 ක ඇපදීම පිලිබඳ එකඟත්වයත්,  බැංකු හා මූල්‍ය වෙලඳපොලවල් සඳහා අසීමිත සහයෝගයක් ලබා දෙන බවට ෆෙඩරල් මහ බැංකුව නිවේදනය කිරීමත් සමඟ, වසා ඇති ව්‍යාපාර නැවත විවෘත කිරීමට ට්‍රම්ප් දුන් පොරොන්දුව නිසා කොටස් මිල ඉහල ගියේය. වැඩ කරන ජනතාව සඳහා දිග හැරෙන සමාජ හා ආර්ථික ව්‍යසනයක් මධ්‍යයේ කෝටිපති ආයෝජකයින්, සිය වාසනාව සැමරීමත් සමඟ ඩව් ජෝන්ස් දර්ශකය ඒකක  2,112 කින් ඉහල නැඟුන අතර එය වාර්තාගත සියයට 11.3 ක වර්ධනයකි.

මූල්‍ය වංශාධිපතිත්වයට ඇප ලබා දීම සඳහා ආන්ඩුව, සමාජ සම්පත් කොල්ලකා ඇති දැවැන්ත පරිමානය 23දා ට්‍රම්ප්ගේ ප්‍රධාන ආර්ථික උපදේශක ලැරී කුඩ්ලෝගේ කථාවෙන් පෙනී ගියේය. මාධ්‍ය හමුවක් අමතමින් ඔහු කියා සිටියේ, ආන්ඩුව විසින් බලගන්වනු ලබන ආර්ථික උත්තේජනය ඩොලර් ට්‍රිලියන 6 ක් වනු ඇති බවයි. ඩොලර් ට්‍රිලියන හතරක් ෆෙඩරල් මහ බැංකුවේ මුදල් මුද්‍රනය කරන “ප්‍රමානාත්මක ලිහිල් කිරීමේ” වැඩසටහනෙන් ද ඉතිරිය අපේක්ෂා කරන පරිදි, ව්‍යාපාරික ඇපදීමේ පනත බලගැන්වීමෙන් ද ලැබෙනු ඇත.

රටෙන් අඩකට වැඩි ප්‍රමානයක පවතින අගුලු දැමීම් කඩිනමින් අවසන් කරන ලෙසටත්, කම්හල් හා ව්‍යාපාර නැවත විවෘත කරන ලෙසටත් ට්‍රම්ප් කරන ඉල්ලීමට, විද්‍යාඥයෝ සහ වෛද්‍ය විශේෂඥයෝ දැඩි ලෙස විරුද්ධ වෙති. එහි ප්‍රතිපලය මිලියන ගනනකට බලපාන ආසාදන හා මරනවල වේගවත් වැඩිවීමක් බවට ඔවුන් අනතුරු අඟවයි. 

ජෝන්ස් හොප්කින්ස් බ්ලූම්බර්ග් මහජන සෞඛ්‍ය පාසලේ සෞඛ්‍ය සුරක්ෂිතතා මධ්‍යස්ථානයේ අධ්‍යක්ෂ වෛද්‍ය ටොම් ඉන්ගල්ස්බි අනතුරු ඇඟවූයේ, සමාජ දුරස්ථභාවය පවත්වා නොගැනීමෙන් මිලියන ගනනකගේ ජීවිත අහිමි විය හැකි බවයි. “සමාජ දුරස්ථභාවය අවසන් කිරීමට උපදෙස් දෙන ඕනෑම කෙනෙකු, අප එසේ කලහොත් රට කෙබඳු වනු ඇත්ද යන්න සම්පූර්නයෙන්ම වටහා ගත යුතුය” යනුවෙන් ඔහු ට්වීටර් සටහනකින් පැවසීය.  "කොවිඩ්-19 පුලුල් ලෙස ව්‍යාප්ත වනු ඇත, වේගයෙන්, භයානක ලෙස, රට පුරා විශාල සමාජ හා ආර්ථික බලපෑමක් ඇති කරමින් වසර තුල මිලියන ගනනක් මරා දමනු ඇත."

ට්‍රම්ප් මෙන්ම, ඩිමොක්‍රටිකයන් සමඟ පෙලගැසී සිටින නිව්යෝර්ක් ටයිම්ස් සහ වොෂිංටන් පෝස්ට් මාධ්‍ය ඇතුලු, සමාජ දුරස්ථ ක්‍රියාමාර්ග ඉක්මනින් අවසන් කිරීමේ ඔහුගේ සැලසුමට සහාය දක්වන අය දන්නවා එහි ප්‍රතිපලය, ආසාදන හා මරන තියුනු ලෙස ඉහල යනු ඇති බව. ට්‍රම්ප් කතා කරන්නේ මූල්‍ය කතිපයාධිකාරය තුල ඇති ෆැසිස්ට් ඡන්ද පදනමට වන අතර, තවදුරටත් සංගත සඳහා ලාභය පොම්ප නොකරන වයස්ගත කම්කරුවන් ජනගහනයෙන් ඉවත් කිරීම යහපතක් ලෙස ඔවුන් සලකයි.

ඇමරිකානු පාලක පන්තියේ ස්ථාවරය නම්, ලාභ ඉපැයීම නැවත ආරම්භ කල යුතු බවයි. එයින් අදහස් කරන්නේ මිලියන සංඛ්‍යාත කම්කරුවන් ඝාතනය  කිරීමයි.

කම්කරුවන්ට ලැබෙන ආශීර්වාදයක් ලෙස දෙපක්ෂයම හුවාදක්වන ඇපදීම්, දැවැන්ත දේශපාලන වංචාවකි. පාලක පන්තිය විසින් බදු ගෙවන්නන්ගේ මුදල් සොරකම් කිරීම වසංගතයේ ආර්ථික ප්‍රතිවිපාක වලින් කම්කරුවන් ආරක්ෂා කිරීමේ අරමුනෙන් කෙරෙන බවට වන බොරුව ප්‍රවර්ධනය කිරීම සඳහා, මෙම පනත් කෙටුම්පත සම්බන්ධයෙන් ඇතිව තිබෙන දේශපාලන ගැටුම සැලසුම් කර වේදිකා ගතකර ඇත.

රිපබ්ලිකානුවන්ගේ හා ඩිමොක්‍රටිකයන්ගේ අංක එකේ ප්‍රමුඛතාවය වන්නේ, කොටස් වෙලඳපොල අඛන්ඩව කඩා  වැටීම වලක්වා ගැනීම සහ 2008 වෝල් වීදියේ කඩාවැටීමෙන් පසුව, මූල්‍ය වංශාධිපතිත්වයට ධනය කොල්ලකෑම සඳහා, බැංකු වලට ද මෝටර් රථ කර්මාන්තයට ද ඇපදීම ඉක්මවා යන ආකාරයෙන්, සෞඛ්‍ය හදිසි අවස්ථාව ප්‍රයෝජනයට ගැනීමයි. 

සමාජ සේවා නිර්දය ලෙස කප්පාදු කිරීම සඳහා නව කඩතුරාවක් නිර්මානය කරමින්, සංගත හා ධනවතුන්ට ඩොලර් බිලියන සිය ගනනක් ලබා දීමට මෙම පනත මගින් ෆෙඩරල් භාන්ඩාගාරයට  බලපෑම් එල්ල වනු ඇත. වසංගතය පැතිරීම වැලැක්වීමට හෝ අර්බුදයේ සෞඛ්‍ය හා ආර්ථික බලපෑමෙන් වැඩකරන ජනතාව ආරක්ෂා කිරීමට කිසිවක් නොකෙරෙනු ඇත.

වෛරසය වැලැක්වීමේ පලමු අවශ්‍යතාවය වන නිදහස් හා විශ්වීය පරීක්ෂන හෝ ආසාදන වැඩිවීම නිසා  රට පුරා රෝහල්වල දැනටමත් හිඟ, වාතාශ්‍රය සපයන යන්ත්‍ර, උපරිම ප්‍රතිකාරක  ඇඳන්, ආරක්ෂිත ආම්පන්න සහ වෛද්‍ය කාර්ය මන්ඩලයේ හිඟය මඟහරවා ගැනීමට එයින් කිසිවක් සිදු නොවනු ඇත. ලොව පුරා නිෂ්පාදනය නතර වන විට අවපාතයකට ඇද වැටෙන “ආර්ථිකය උත්තේජනය” නොකරනු ඇත.

ඩොලර් 75,000 ට වඩා අඩු ආදායම්ලාභීන්ට එක් වරක් ඩොලර් 1,200 ක් ලබා දීම සහ එයට ඇතුලත් වන බව වාර්තා වන, විරැකියා ප්‍රතිලාභ තාවකාලිකව දීර්ඝ කිරීම, මිලියන සිය ගනනක් කම්කරුවන් මුහුන දෙන රැකියා හා ආදායම් අහිමිවීම සඳහා වන්දි ලෙස කිසිසේත්ම ප්‍රමානවත් නොවේ.

කම්කරුවන්ගේ පාර්ශවකරුවන් ලෙස ඩිමොක්‍රටිකයින්ගේ නරුම මවාපෑමේ යථාර්ථය 24දා පස්වරුවේ එම්එස්එන්බීසීයේ “ඇන්ඩ්‍රියා මිචෙල් වාර්තාව” පිලිබඳව  කථානායක නැන්සි පෙලෝසි කල ප්‍රකාශයේ සාරාංශ ගතකොට ඇත. “කොටස් වෙලඳපොල ඉහල යාම අපගේ මූලික බලාපොරොත්තුවයි. අප සියල්ලන්ම ඒ පිලිබඳව පොදු මතයක සිටියි. මිලියන  ගනනක ශුද්ධ වටිනාකමක් සහිත පෙලෝසි පැවසුවේ එලෙසය.

දෙපක්ෂය එකඟ වූ පනත මූලික වශයෙන්, ධවල මන්දිරය සහ රිපබ්ලිකානුවන් විසින් කෙටුම්පත් කරන ලද හා සෙනෙට් බහුතර නායක මිච් මැක්කොනෙල් විසින් සති අන්තයේ ඉදිරිපත් කරන ලද පනතට සමාන වේ. එහි ප්‍රධාන විධිවිධානවලට ඇතුලත් වන්නේ:

* විශාල සමාගම් සඳහා ඩොලර් බිලියන 500 ක්

* “කුඩා ව්‍යාපාර” සඳහා ඩොලර් බිලියන 350 ක්

* කුටුම්භ සඳහා ඩොලර් බිලියන 300 ක සෘජු ගෙවීම්

* රාජ්‍ය විරැකියා ප්‍රතිලාභ අරමුදල් සඳහා ඩොලර් බිලියන 250 ක් 

* මිලිටරිය සහ ස්වදේශ ආරක්ෂක දෙපාර්තමේන්තුව ඇතුලු ෆෙඩරල් ආයතන සඳහා ඩොලර් බිලියන 136 ක අමතර අරමුදල්

* රෝහල් ප්‍රවීනයන්ගේ පරිපාලනය සහ අනෙකුත් මහජන සෞඛ්‍ය ආයතන වෙත ගෙවීම් සඳහා  ඩොලර් බිලියන 106 ක් .

සෙනෙට් සුලුතර නායක චාල්ස් ෂුමර් සහ සභා කථානායක පෙලෝසි යන අයගේ ප්‍රධාන සහනය වන්නේ ට්‍රම්ප් සහ භාන්ඩාගාර ලේකම් ස්ටීවන් මුන්චින්ගේ එකඟතාවය ලබාගැනීමයි. ස්වාධීන නිරීක්ෂනයක් නැතුවම වාගේ, බදු ගෙවන්නන්ගේ මුදල් වැයකරන්නේ කුමන සමාගම්වලටද සහ කොපමන ප්‍රමානයන්ගෙන් ද යන්න තීරනය කිරීමේ බලය ඔහුට ඇත. මෙය සිදුවන්නේ, පරීක්ෂක ජෙනරාල්වරයකුගේ සහ කොන්ග්‍රස් අධීක්ෂන මන්ඩලයේ ස්වරූපයෙන් ය. මේවා සම්පූර්නයෙන්ම දත් රහිත ලොඹු පියවරයන් වන අතර ඒවා පෙරාගෙන ඇත්තේ, 2008 ඩොලර් බිලියන 700 ක  වොල්වීදියේ අර්බුදයට පත් වත්කම් සඳහාවූ සහන වැඩසටහනෙනි.

මෙයට ඇතුලත්, සමාගම් කම්කරුවන් සේවයෙන් පහ කිරීම හෝ ඔවුන්ගේ වැටුප් කප්පාදු කිරීම තහනම් කිරීමේ විධිවිධානය අර්ථ විරහිත ය, මන්ද මෙම පනතට “ප්‍රායෝගික වනතාක් දුරට” යන කොටස ඇතුලත් වන තතු හමුවේ.

වාසි ලබන ව්‍යාපාර ආන්ඩුවේ සහන භාවිතා කරන ආකාරය පිලිබඳ පලදායී සීමා කිරීම් මෙයට ඇතුලත්වී නොමැත. කොටස් මිලදී ගැනීම් සහ ලාභාංශ ගෙවීම් විධිමත් ලෙස තහනම් කිරීම හුදු ප්‍රදර්ශනයක් පමනි, මන්ද එය මුන්චින්ට ඉවත් කල හැකි නිසාය. විධායක වැටුප් සඳහා සීමාවන් නොමැත.

2008 අර්බුදයෙන් ඉක්බිත්තේ කොටස් යලි මිලට ගැනීම පිනිස ඩොලර් බිලියන ගනන් ගසාකෑ එම සමාගම්ම ඇපදීමේ මුදල් ද අත්කරගනු ඇත. සිය වාසි, කොටස් මිලට ගැටගැසුන ඉහල විධායකයින් පොහොසත් කිරීම  සහ මහ ආයෝජකයින්ට තෑගි පිරිනැමෙන අතර, නිෂ්පාදිත ආයෝජන වලින් හා  යහපත් වැටුප් සහිත රැකියා හිඟකමෙන් ද සමාජ හා සෞඛ්‍ය යටතල පහසුකම් වලින් මුදල් හරවා යැවීම මඟින් ද ආර්ථිකය හිඟමනට ඇද දැමෙනු ඇත. 

මහ සමාගම් වලට පනතෙන් හිමිවන ඩොලර් බිලියන 500 න් ඩොලර් බිලියන 75 ක් පමනක්,  මගී ගුවන් සමාගම් වෙත ඩොලර් බිලියන 50 ක් ද, භාන්ඩ ප්‍රවාහන ගුවන් සමාගම් සඳහා ඩොලර් බිලියන 8 ක් ද, පෙන්ටගනය හෝ බුද්ධි අංශ වලට සැපයුම් කරන  සමාගම්වලට ඩොලර් බිලියන 17 ක් ද වශයෙන් වෙන්කර ඇත.  ඉතිරි කොටස මුන්චින් විසින් තීරනය කරන අංශ වෙත යොමු කෙරේ.  

ඔහුගේ ප්‍රමුඛතා යොමුවනු ඇත්තේ කොතැනටදැයි ඔහුගේම ඉතිහාසය හාරා අවුසන විට පැහැදිලි වනු ඇත. ගෝල්ඩ්මන් සැක්ස්හි ආයෝජන බැංකුකරුවෙකු, සියර්ස් හි අධ්‍යක්ෂ මන්ඩල සාමාජිකයෙකු (වත්කම් පැහැර හැරීම සම්බන්ධයෙන් ඔහුට එරෙහිව නඩු පවරනු ලැබූ) සහ නීතිවිරෝධී ලෙස නිවාස අත්පත් කර ගැනීම් සම්බන්ධයෙන් ඔහුට එරෙහිව නඩු පවරනු ලැබූ වන්වෙස්ට් බැංකුවේ ප්‍රධානියා ලෙස ඔහුගේ ඉතිහාසය ලියවී ඇත. ඔහුගේ ශුද්ධ වටිනාකම ඩොලර් මිලියන 300 ක් ලෙස ගනන් බලා ඇත.

“කුඩා ව්‍යාපාර” සඳහා වන මුදල්, පවුලේ අය විසින් ගෙනයනු ලබන  අවන්හල්, ඩ්‍රයි ක්ලීනර්ස් ව්‍යාපාරයන්ට හෝ ගෑස් මධ්‍යස්ථාන වෙත නොයනු ඇත. “කුඩා ව්‍යාපාර” වර්ග කර ඇත්තේ, සෘජු සේවකයින් 500 කට අඩු සංඛ්‍යාවක් සිටින ව්‍යාපාර ලෙසය. නය වශයෙන් බෙදා හැරෙන ඉතිරි ඩොලර් බිලියන 350 න් විශාල ප්‍රමානයක් බලගතු හෙජ් අරමුදල් සහ බිලියන ගනනක වත්කම් ඇති වෙනත් සමාගම් වෙත යනු ඇත.

ඇපදීමේ පනත් කෙටුම්පතේ අපේක්ෂාව,  අල්ලස් හා සන්තෝෂම් ලබාගෙන ඇති දේශපාලඥයින්ගේ අනුග්‍රහය සඳහා කැපිටල් හි එක්රැස් වන විවිධ ව්‍යාපාරික අවශ්‍යතා නියෝජනය කරන බලපෑම් කරන්නන්ගේ සහ නීතිඥයින්ගේ, උමතුවක් දැනටමත් ඇතිකර තිබේ.

කොවිඩ්-19 වසංගතය මගින් ධනේශ්වර ක්‍රමයේ සහ එහි සියලු දේශපාලන නියෝජිතයින්ගේ ආර්ථික, සමාජීය හා දේශපාලනික බංකොලොත්කම හෙලිදරව් කර තිබේ. එය පෞද්ගලික ලාභය සහ ව්‍යාපාරික කෑදරකම මත පදනම් වූ සමාජයක පුපුරන සුලු පන්ති බෙදීම් ඇති කර තිබේ.

මහා ව්‍යාපාරිකයන්ගේ නවතම ද්විපක්ෂ ඇපදීම සහ වෛරසයෙන් කිසිදු ආරක්ෂාවක් නොමැතිව කම්කරුවන්ට නැවත වැඩ කිරීමට බල කිරීම, කම්කරු පන්තිය තුල විශාල විරෝධයක් ජනිත කරනු ඇත. අයිතිකරුවන්ගේ ලාභය සඳහා තමන්ගේ හා තම ආදරනීයයන්ගේ ජීවිත පරිත්‍යාග කිරීමට නොසූදානම් කම්කරුවන්ගේ වැඩවර්ජන හා විරෝධතා එක්සත් ජනපදයේ සහ ලොව පුරා දැනටමත් පැනනැඟී ඇත. 

වෛරසයට එරෙහිව සටන් කිරීම සහ ජීවිත බේරා ගැනීම සඳහා පලදායී පියවර ගැනීම, ධනවාදයට එරෙහි සටනෙන් වෙන් කල නොහැකි බව කම්කරුවන් වැඩි වැඩියෙන් වටහා ගනු ඇත.

සමාජවාදී සමානතා පක්ෂය සංගතවලට ඇපදීම ප්‍රතික්ෂේප කරයි. මහා බැංකු හා සංගත පොදු අයිතිය යටතේ ප්‍රජාතන්ත්‍රවාදීව පාලනය වන සංවිධාන බවට පරිවර්තනය කරන ලෙස අපි ඉල්ලා සිටිමු. පුද්ගලිකව පොහොසත්වීම වෙනුවෙන් මෙම සමාගම් කොල්ල කෑ විධායකයින්ට ඔවුන් එසේ යටිමඩි ගසාගත් ධනය ආපසු ගෙවන මෙන් නීත්‍යානුකූලව බල කල යුතුය.

අපි විශ්වීය පරීක්ෂන සහ සෞඛ්‍ය සේවා සඳහා නිදහස් හා සමාන ප්‍රවේශයක් ඉල්ලා සිටිමු. එසේම, සියලු අත්‍යවශ්‍ය නොවන නිෂ්පාදන වසා දැමීම; එයින් පීඩාවට පත්වූවන්ට සම්පූර්න ආදායම සහතික කිරීම, සමාජයේ ක්‍රියාකාරීත්වයට අත්‍යවශ්‍ය කර්මාන්තවල ආරක්ෂිත සේවා කොන්දේසි ඇතිකිරීම; සෞඛ්‍ය ආරක්ෂන යටිතල පහසුකම් ගොඩනැගීම සහ සියලුම වෛද්‍ය සේවකයින්ට අවශ්‍ය උපකරන ලබා ගැනීම සහතික කිරීම සඳහා හදිසි වැඩසටහනක්, වෙනුවෙන් අපි පෙනී සිටින්නෙමු.

සමාජවාදී සමානතා පක්ෂයේ ජාතික කමිටුව මාර්තු 17දා සිය ප්‍රකාශයෙන් අවධාරනය කල පරිදි, “අර්බුදයට ප්‍රතිචාර දැක්වීමට මඟ පෙන්විය යුතු අත්‍යවශ්‍ය මූලධර්මය නම් වැඩ කරන ජනතාවගේ අවශ්‍යතා, ව්‍යාපාරික ලාභය සහ පෞද්ගලික ධනය පිලිබඳ සියලු උත්සුකයන්ට වඩා නිරපේක්ෂ හා කොන්දේසි විරහිත ප්‍රමුඛතාවයක් ගත යුතු බවයි. ”