කොරෝනා වෛරස් වසංගතයේ පන්ති ප්‍රශ්න

8 අප්‍රේල් 2020

මෙම ලිපිය අප්‍රේල් 4වනදා ඉංග්‍රීසි බසින් පලවිය.

ලොව පුරා ව්‍යාප්ත වෙමින් පවතින කොරෝනා වෛරසය ජාතිය, ස්ත්‍රී පුරුෂ භාවය, ජාතිකත්වය හෝ ලිංගික දිශානතිය අනුව වෙනස් කොට සලකන්නේ නැත. කෙසේ වෙතත්, ආසාදනය වලක්වා ගැනීමට සහ දිවි ගලවා ගැනීමේ අවස්ථාව වැඩිදියුනු කිරීමට නිසැකව ම වැදගත් වන එක් කරුනක් වන්නේ ධනයයි.

සෑම ස්වාභාවික හෝ වසංගත සිදුවීමක් මෙන් ම, කොරෝනා වෛරසය සමාජ අසමානතාවයෙන් ඉරිතලා ගිය සමාජයක යථාර්ථය සමඟ අන්තර්ඡේදනය වේ. ජනගහනයේ අතිමහත් බහුතරයක ගේ ජීවන තත්වයන් ඔවුන් ආසාදනයට ගොදුරු වීමේ අවදානම වැඩි කරවන අතර පුලුල් වන ආර්ථික ව්‍යසනයේ ප්‍රතිවිපාක පාලනය කල නොහැකි තරම් දුර ගොස් ඇත.

මෙම පන්ති යථාර්ථය මිනිය නොහැකි ආකාරවලින් එහි ප්‍රකාශනය අත්පත් කරගනියි. ස්ථානීය දත්ත සියල්ල පෙන්වාදයි: කොරෝනා වෛරසය හේතුවෙන් නිවසේ රැඳී සිටීම සුඛෝපභෝගී දෙයක්යන හිසින් අප්‍රේල් 03 වන සිකුරාදා නිව් යෝර්ක් ටයිම්ස් පුවත්පතේ ලිපියක් පල කර ඇති අතර එය දැන් වසංගතයේ කේන්ද්‍රස්ථානයක් බවට පත්ව ඇති එක්සත් ජනපදයේ ධනවතුන්ට දුප්පතුන්ට වඩා පහසුවෙන් සමාජ දුරස්ථභාවයේක්‍රියාමාර්ග අනුගමනය කිරීමට හැකි වී ඇති බව වාර්තා කරයි.

පැරගුවේ අසුන්සියොන් හි කෝවිඩ්-19 පැතිරීම පාලනය කිරීම සඳහා පැනවූ නිරෝධායනයක සිව්වන සතිය තුල ඉවතලන එලවලු සඳහා වු කසල බහාලුමක් ආහාර පිනිස අවුස්සන 11 හැවිරිදි ෆේබියන් රමිරෙස් සහ ඔහුගේ පවුලේ සාමාජිකයන්, 2020 අප්‍රේල් 2 වන දින [ස්තූතිය: ඒපී ඡායාරූපය / ජෝර්ජ් සාන්ස් ]

 

“සෑම ආදායම් කාන්ඩයක ම ජනතාව අර්බුදයට පෙර සිටි තත්වයට වඩා අඩුවෙන් සංචරනය කලත්” ටයිම්ස්  සඳහන් කරන්නේ, “දිනපතා රට පුරා මිලියන 15 ක් පමන ජංගම දුරකථන භාවිතා කරන්නන් ආවරනය කරමින් ස්ථානගත වීම් විශ්ලේෂන සමාගමක් වන ක්විබික් ඉදිරිපත් කල සමස්ත දත්ත වලට අනුව ධනවත් අය විශේෂයෙන් ම වැඩ සතිය තුල වැඩිපුර ම නිවසේ රැඳී සිට ඇත. එපමනක් නොව, සෑම ප්‍රාන්තයක ම පාහේ ඔවුන් දුප්පතුන්ට වඩා දින කිහිපයකට පෙර එසේ කිරීමට පටන් ගත් අතර වෛරසය පැතිරීමත් සමඟ සමාජ දුරස්ථභාවය පිලිබඳ මූලික ආරම්භයක් ඔවුන් ලබා දී ඇත. ”

මාර්තු 16 වන විට අවසානයේ දී ට්‍රම්ප් පරිපාලනය ජනතාවට නිවසේ රැඳී සිටින ලෙස උපදෙස් දීම ආරම්භ කරන විට, සෑම ප්‍රදේශයක ම ඒ වන විටත් ගමන් බිමන් පහත වැටී පැවති බව විශ්ලේෂනය සඳහන් කරයි. නමුත් එදින වන විට, ඉහල ම ආදායම් ලබන ස්ථානවල සිටින අයගේ සංචලනය ඒ වන විටත් අඩකින් පමන අඩු වී තිබුනි. දින තුනකට පසුවත් දුප්පත් ප්‍රදේශවල ඊට සමාන අඩුවීමක් දක්නට නො ලැබුනි.

බොහෝ ප්‍රධාන නාගරික ප්‍රදේශවල, ඉහල ම සියයට දහය එහි සංචලනය ශුන්‍යය දක්වා ඵලදායී ලෙස අඩු කර ඇත. කෙසේවෙතත්, පහල ම සියයට දහය සඳහා, එය සති අන්තයේ ශුන්‍යයට ලඟා වී, වැඩ සතිය තුල නැවත ඉහලට ගියේය බොහෝ අඩු වැටුප් සහිත කම්කරුවන්ට සෞඛ්‍යාරක්ෂිත නොවන තත්වයන් යටතේ සහ ප්‍රමානවත් ආරක්ෂාවක් නොමැතිව වැඩ කිරීමට බල කෙරී ඇත.

මාර්තු මස අවසාන සතිය තුල බදාදා නිකුත් කරන ලද [සංගනන සමාගමකින් සිදුකල] සෞඛ්‍ය තොරතුරු සොයාගැනීමේ මත විමසුමකට අනුව එක්සත් ජනපදයේ වැඩිහිටියන්ගෙන් සියයට 57 ක් රැකියාව අතපසු කිරීමට නොහැකි වීම නිසා තමන් නිරාවරනය වීමේ අවදානමට ලක්වනු ඇතැයි කනස්සල්ලට පත්ව සිටිති. වාර්ෂිකව ඩොලර් 40,000 ට වඩා අඩු ආදායමක් උපයන වැඩිහිටියන් සඳහා, එම සංඛ්‍යාව සියයට 72 ක් හෝ හතරෙන් තුනකට ආසන්න වේ.

ඉදින් ඇත්ත වශයෙන් ම මෙහි සෞඛ්‍ය සේවාවක්ද තිබේ. අඩු ආදායම්ලාභී කම්කරුවන්ට බොහෝ විට සෞඛ්‍ය රක්ෂනයක් නොමැති අතර ඉහල සම-ගෙවීම් සහ අඩු කිරීම් සහිත පෞද්ගලික රක්ෂනයක් මිලදී ගැනීමට සිදු වේ. වෛරසය වැලඳීමට පෙර පවා එක්සත් ජනපදයේ දුප්පතුන්ගේ ආයු අපේක්ෂාව වෙසෙසින් ම පන්ති පාදක සෞඛ්‍ය සේවා ක්‍රමය හේතුවෙන් ධනවතුන්ගේ ආයු අපේක්ෂාවට වඩා අවුරුදු 20 කින් පහල පවතී.

පරීක්ෂාව සම්බන්ධයෙන් ගත් කල, කම්කරුවන්ට උන, වියලි කැස්ස, හුස්ම ගැනීමේ අපහසුතා වැනි කෝවිඩ් -19 - රෝග ලක්ෂන තිබුනත් ඔවුන්ට පරීක්ෂනයක් ලබා ගත නොහැකි බව අනාවරනය වී ඇත.

දකුනු ඇලබාමා හි සිල්ලර වෙලඳසැල් සේවකයෙකු වන නේතන් ටෙට්‍රෝල්ට් ජාතික මහජන ගුවන් විදුලියට පැවසුවේ සියලු රෝග ලක්ෂන වලින් පීඩා විඳි නමුත් ඔහු වයසින් අඩු නිසාත් වෙනත් නිර්නායකයන් සපුරා නොමැති නිසාත් ඔහුට පරීක්‍ෂනයක් කර ගැනීමට පවා නොහැකි වූ බවත් ඔව්, ඔබට ඔබේ පිහිට විතරයි යැයි වෛද්‍යවරයා ඔහුට පැවසු බවත් ය. සීමිත අසනීප නිවාඩු ලබා ගැනීමෙන් පසුව, ටෙට්‍රෝල්ට් තමාට රෝගය තිබේද නැතහොත් තවමත් බෝවන්නේදැයි නොදැන නැවත සේවයට පැමිනිය යුතුව තිබේ.

එවැනි කථා දිනකට දහස් වාරයක් යලි යලිත් ඇසෙමින් පවතී.

සංක්‍රමනික කම්කරුවන්, ලේඛනගත නොවූ සැලකිය යුතු කොටසක්, ඔවුන් පිටුවහල් කරනු ඇතැයි හෝ රටින් ඉවත් කිරීමට අදාල තොරතුරු හෙලිවෙතැයි යන බියෙන් පරීක්ෂන හෝ ප්‍රතිකාර ලබා ගැනීමෙන් වැලකී සිටිනු ඇත. ආගමන හා රේගු බලාත්මක කිරීමේ රැඳවුම් කඳවුරුවල රඳවා සිටින අය නිදහස් කරන ලෙස ඉල්ලා විරෝධය පල කර ඇත. රටේ සිරකරුවන් මිලියන දෙකකට වඩා වැඩි ගනනකට එබඳු ම කොන්දේසි පවතී.

මේ අතර, ඉහල ම ධනවතුන් ඔවුන්ගේ මන්දිර, ගිම්හාන නිවාස හෝ සම්පුර්නයෙන් ම අත්‍යවශ්‍ය දෑ ගබඩා කර ඇති දිවි ගලවා ගැනීමේ බංකරවල සුවපහසු සීමාවන් වෙත පලායති. ඔවුන් කොරෝනා වෛරසය වැලඳී පැමිනිය හොත් ධනවතුන්ට කඩිනම් පරීක්ෂන ප්‍රතිඵල අපේක්ෂා කල හැකි අතර අධික තදබදය ඇති රෝහල්වලින් ඈත්ව සැනසිල්ලේ සෞඛ්‍ය සත්කාර ලබා සුවපත් විය හැකිය. බොහෝ ධනවතුන් නිව්යෝර්ක් නගරයෙන් සහ වෙනත් නගරවලින් පලා යාමත් සමඟ පෞද්ගලික ජෙට් සේවයේ හිඟයක් වාර්තා වී තිබේ. ෆෝබ්ස් වාර්තා කරන්නේ බිලියනපති විනෝද වැඩසටහන් විධායක ඩේවිඩ් ජෙෆෙන් කැරිබියන් දූපත් වල ඩොලර් මිලියන ගනනක් වටිනා ඔහුගේ යාත්‍රාවක සුවසේ වෙසෙන බවයි.

වර්තමාන ගෝලීය කේන්ද්‍රස්ථානය වන නිව්යෝර්ක් නගරයේ වඩාත්ම පීඩාවට පත් ප්‍රදේශ වන්නේ ක්වීන්ස්, බෘක්ලින් සහ බ්‍රොන්ක්ස් අවට ඇති දුප්පත්ම ප්‍රදේශයන් ය. දහස් ගනනකට තවමත් තම නිවෙස්වලට ජලය ලබා ගැනීමේ ප්‍රවේශයන් නොමැති ඇමරිකාවේ දුප්පත්ම විශාල නගරය වන ඩෙට්‍රොයිට් හී රෝහල් දැනටමත් ආසාධිතයින්ගෙන් පිරී ගොස් ඇති අතර, ආසාධිතයින් හා මරන සංඛ්‍යාවෙන් නිව්යෝක් සහ නිව් ජර්සි වලට යන්තම් පිටුපසින් ඩෙට්‍රොයිට් නගරය අයත් මිචිගන් ප්‍රාන්තය සිටී.

ඇත්ත වශයෙන් ම, ආර්ථික ප්‍රතිවිපාකවල වැඩි බර කම්කරුවන් මතට පතිත වනු ඇත. ඔවුන්ගෙන් බොහෝ දෙනෙක් ජීවත් වන්නේ යන්තම් එදා වේල පිරිමහගන්නා වැටුපකින් වන අතර සෞඛ්‍ය රැකවරන අවැසි හදිසි අවස්ථාවකට මුහුන දීමට ඉතිරියක් නොමැත.

බැංකු හා මහා ව්‍යාපාරවලට මුක්කු ගැසීම සඳහා කොන්ග්‍රසය ඩොලර් ට්‍රිලියන ගනන් ඇප මුදල් වෝල් වීදියට භාර දී ඇති අතර කම්කරු පන්තියට සොච්චම් මුදලක් ලබා දී ඇත. මිලියන ගනනකට රැකියා අහිමි වද්දී, එක් පුද්ගලයෙකුට ඉතා අඩුවෙන් එමෙන් ම ප්‍රමාද ව ඩොලර් කීප දහසක් බෙදා දෙනු ලබයි.

දැනටමත්, කම්කරුවන්ට තම පවුල්වල ආහාර සඳහා ගෙවනවාද නැත්නම් නිවාස කුලිය ගෙවනවාද යන්න තීරනය කිරීමට සිදුවී ඇත. නිව් යෝර්ක් නගරයේ කුලී නිවැසියන්ගෙන් සියයට 40 ක් මේ මාසයේ කුලිය නොගෙවන බවට ගනන් බලා තිබේ. සෑම නගරයක ම, දහස් ගනන් ජනයා ජංගම සතිපතා ආහාර බැංකු අසල පැය ගනනක් පෝලිම්වල සිටින අතර බොහෝ දෙනෙක් පලමු වරට මෙම සේවාවන් වෙත යොමුව සිටිති.

මෙම තත්වයන් ලොව පුරා විවිධ ස්වරූපවලින් පුනරාවර්තනය වේ. ස්පාඤ්ඤයේ දිනපතා පුවත්පතක් වන එල් පේස්, ධනය මත පදනම් වූ විෂමතා වාර්තාගත කරන ලිපියක මැඩ්රිඩ්හි සිල්ලර වෙලෙඳ සේවකයෙකුගේ ප්‍රකාශය මෙසේ උපුටා දක්වයි: අපි ටයිටැනික් නෞකාවේ තුන්වන පන්තියේ අය වෙමු. අපි අපේ ජීවිත පරදුවට තබන්නේ මුන්ගේ ජරාව වෙනුවෙන්. අපි විකිනෙනවා.

දරිද්‍රතාවයේ වඩාත් ම සංකේන්ද්‍රිත මට්ටම් ඇති රටවල් සහ කලාප වඩාත් අවදානමට ලක්ව ඇත. මැදපෙරදිග හා උතුරු අප්‍රිකාවේ සරනාගත කඳවුරු හරහාත්, දකුනු ඇමරිකාව, අප්‍රිකාව සහ දකුනු ආසියාවේ මුඩුක්කු සහ කම්කරු පන්ති ජනයා තදබදව වෙසෙන ප්‍රදේශ හරහා වෛරසය පැතිරෙන විට එහි ප්‍රතිවිපාක විනාශකාරී වනු ඇත.

වසංගතය වර්ධනය වන විට පන්ති අරගලය පුපුරා යමින් පවතින අතර ඇමසන්, සිල්ලර වෙලඳසැල් සහ කර්මාන්තවල කම්කරුවන්ගෙන් තමන් රෝගයෙන් ආරක්ෂා වන ලෙස ඉල්ලා ව්‍යාපාරයක් නැගෙමින් පවතී. පසුගිය මාසයේ දී මෝටර් රථ කම්කරුවන්ගේ හදිසි වැඩ වර්ජන, කම්කරුවන් කොරෝනා වෛරසය සඳහා ධනාත්මක බව පරීක්‍ෂා කිරීමෙන් පසුව, යූඒඩබ්ලිව් සහ මෝටර් රථ සමාගම් කර්මාන්තශාලා පවත්වාගෙන යාමට දරන ඒකාබද්ධ උත්සාහයක් නොතකා, උතුරු ඇමරිකාවේ බොහෝ වාහන එකලස් කිරීමේ වැඩබිම් සාර්ථකව නතර කිරීමට බල කෙරුනි.

මෙම වැඩෙන කම්කරු පන්ති ව්‍යාපාරය පැහැදිලි ධනේශ්වර විරෝධී හා සමාජවාදී වැඩපිලිවෙලක් සහිත සවිඥානික නායකත්වයක් විසින් මෙහෙයවිය යුතුය.

අඛන්ඩව ක්‍රියාත්මක වන බොහෝ සේවා කර්මාන්ත සමාගම් ඇතුලුව අත්‍යවශ්‍ය නොවන නිෂ්පාදන වහාම වසා දමන ලෙස සමාජවාදී සමානතා පක්ෂය ඉල්ලා සිටී. වැඩ නතර කර දැමූ සියලු කම්කරුවන්ට සම්පූර්න ආදායම ලැබිය යුතුය. සියලුම කුලී, උපයෝගිතා සහ වෙනත් බිල්පත් සඳහා සහන කාලයක් තිබිය යුතුය.

ආදායම හෝ රක්ෂන ආවරනය නොසලකා සෞඛ්‍ය සේවය නොමිලේ හා සැමට සමාන පදනමක් මත ප්‍රවේශයන් තිබිය යුතුය. සංක්‍රමනික කම්කරුවන්ට සියලු කම්කරුවන් හා සමාන අයිතිවාසිකම් සහ සමාන ප්‍රතිලාභ ලැබිය යුතුය.

ධනවතුන් විසින් රැස්කරගෙන ඇති ධනය පවරාගත යුතු අතර අතර, වසංගත සමයේ දිගට ම වැඩ කල යුතු අත්‍යවශ්‍ය සේවකයින්ගේ ජීවිත ආරක්ෂා කිරීමටත්, වාතාශ්‍රක සහ වෙනත් අවශ්‍ය උපකරන නිෂ්පාදනය කිරීමටත්, නිවසේ රැඳී සිටින අයගේ අවශ්‍යතා සැපයීමටත් ඒවා භාවිතා කල යුතුය.

ඒවා සාක්ෂාත් කරගත හැක්කේ ධනේශ්වර පන්තියේ සිට වැඩකරන ජනතාව වෙත දේශපාලන බලය පැවරීම අරමුනු කරගත් සමාජවාදී වැඩපිලිවෙලක් මත පදනම් වූ කම්කරු පන්තියේ පූර්න ආයතනික හා සමාජ ශක්තිය බලමුලු ගැන්වීමෙන් පමනි. ධනවාදයේ අසමානතාවය සමාජවාදයේ සමානාත්මතාවය මගින් ප්‍රතිස්ථාපනය කල යුතුය.

 

නයිල්ස් නීමුත්