ගෝලීය විරෝධතා සහ ධනවාදයට එරෙහි අරගලය

සමාජවාදී සමානතා පක්ෂය (එක්සත් ජනපදය)
13 ජූනි 2020

මෙම ලිපිය ජූනි 8වනදා ඉංග්‍රීසි බසින් පලවිය.

පොලීසිය විසින් ජෝර්ජ් ෆ්ලොයිඩ් ඝාතනය කිරීමට එරෙහි විරෝධතා ව්‍යාප්තිය හා පරිමාවෙන් පෙර නො වූ විරූ පරිමානයේ ගෝලීය ව්‍යාපාරයක් දක්වා වර්ධනය වී තිබේ.

මැයි 25 සිට 07 වන ඉරිදා සවස දක්වා, ලොව පුරා මහ නගර හා නගර 2,000 ට ආසන්න සංඛ්‍යාවක පෙලපාලි පවත්වා තිබේ. මේ සති අන්තයේ ලන්ඩනය, රෝමය, බර්ලිනය, වියානා, මැඩ්‍රිඩ්, පැරිස්, ලිස්බන්, වෝර්සෝ හා තවත් බොහෝ යුරෝපීය නගරවල විශාල පෙලපාලි පැවැත්විනි. සිකුරාදා ඔස්ලෝ හි නෝර්වේ පාර්ලිමේන්තුව ඉදිරිපිට 12,000 කට අධික ජනයා විරෝධතා දැක්වූහ. ඕස්ට්‍රේලියාව, ඉන්දියාව, පකිස්ථානය, ටියුනීසියාව හා මෙක්සිකෝව යන රටවල විරෝධතා සංවිධානය කෙරුනි. පසුගිය සතියේ නවසීලන්තය පුරා දස දහස් ගනනක් උද්ඝෝෂනය කලහ.

ලෝක ව්‍යාපාරයේ කේන්ද්‍රස්ථානය එක්සත් ජනපදයයි. රට පුරා විරෝධතා දෙවන සතියට පිවිසෙමින් තිබේ. සෑම කලාපයකම හා ප්‍රාන්තයකම සැලකිය යුතු මහජන එක්රැස්වීම් පැවතියේ ය. මෙම බහු වාර්ගික හා බහු ජාතික උඝෝෂන අතුරින් විශාලතම ඒවා පැවතියේ කලෙක ජනවර්ග වෙන් කිරීම, නඩු නො විමසා දඬුවම් දීමේ ලින්ච් නීතිය සහ දේශපාලන ප්‍රතිගාමිත්වයේ බලකොටුව වූ පහල දකුනු ප්‍රාන්තවලය.

පොලිස් ප්‍රචන්ඩත්වය පිලිබඳ විරෝධතාවක් අතරතුර 2020 ජුනි 7 වන ඉරිදා ස්පාඤ්ඤයේ බාසිලෝනාහි ජනතාව එක්රැස් වෙති. (ඒපී ඡායාරූපය / එමිලියෝ මොරෙනටි)

 මෙම සමාජ නැගිටීමේ ප්‍රේරක සිදුවීම වූයේ මැයි 25 දා මිනසෝටා ප්‍රාන්තයේ මිනියාපොලිස්  නගරයේ දී ෆ්ලොයිඩ් ඝාතනය කිරීම යි. මෙම අපරාධයේ කුරිරු ම්ලේච්ඡත්වය මහජනයා කම්පනයට පත් කොට මහජන පෙරලිකාරීත්වයේ දැවැන්ත මනෝභාවයක් ජනිත කලේ ය. නමුත් සෑම වසරකම එක්සත් ජනපද පොලිසිය විසින් සිදු කරනු ලබන දහසකට වඩා වැඩි සංඛ්‍යාවක ඝාතනවලින් ඒකක් වූ මෙම නවතම ඝාතනය, එවැනි මහජන කෝපයක් ඇති කිරීමට හේතු වූයේ එක්සත් ජනපදය මේ වන විටත් පිපිරීමක් අවුලුවාලීමේ  සිදුවීමක් පමනක් බලා සිටින්නා වූ සමාජ වෙඩි බෙහෙත් පෙට්ටියක් වන නිසා ය . ලෝකය පුරා රටවල මීට සමාන තත්වයක් පවතී. 

සමාජ හා දේශපාලන කෝපයේ දැවැන්ත පරිමාවට ගෝලීය උද්ඝෝෂන රැල්ල මගින් ප්‍රකාශනයක් ලබා දී තිබේ. එය දශක ගනනාවක නො නවතින යුද්ධය, මූලික ප්‍රජාතන්ත්‍රවාදී අයිතීන් විනාශ කිරීම හා කුඩා පාලක ප්‍රභූ පැලැන්තියකගේ අතේ ධනය විශාල වශයෙන් සංකේන්ද්‍රනය වීමට දක්වන ප්‍රතිචාරය යි.

මෙම වර්ධනයේ වඩාත් ම කැපී පෙනෙන ලක්ෂනවලින් එකක් වන්නේ එහි “නායකත්වයකින් තොර” ස්වභාවය යි. සලකා බැලෙන ඕනෑ ම රටක දැනට කුමන පාලක පක්ෂයක් ආධිපත්‍යය දැරුවත්, කම්කරුවන් හා තරුනයින් අතර සමාජ විරෝධයේ වර්ධනය කෙරෙහි ඔවුන්ගේ ආකල්පය අතිමූලික වශයෙන් සතුරු ය.

එක්සත් ජනපදයේ කිසිදු ඩිමොක්‍රටික හෝ රිපබ්ලිකානු දේශපාලනඥයෙක් විරෝධතා උද්ඝෝෂනය කල මනෝගතීන්ට කතා නො කරයි. පසුගිය සතියේ විරෝධතා ආමන්ත්‍රනය කිරීමට උත්සාහ කල අතලොස්සක් වූ ඩිමොක්‍රටිකයෝ - උදාහරනයක් ලෙස මිනියාපොලිස් හා නිව්යෝර්ක් නගරවල ඩිමොක්‍රටික් නගරාධිපතිවරු - හූ කියා, බාධා කර වේදිකාවෙන් පලවා හරින ලදි.

කම්කරුවන් හා තරුනයින්ගේ ප්‍රජාතන්ත්‍රවාදී අයිතිවාසිකම් සම්බන්ධයෙන් දේශපාලන සංස්ථාපිතයේ ආකල්පය වඩාත් කැපී පෙනෙන ස්වරූපයක් ගත්තේ, ට්‍රම්ප් කුමන්ත්‍රනයක් දියත් කිරීමට හා රට පුරා හමුදාව යෙදවීමට ගත් උත්සාහයට ඩිමොක්‍රටික් පක්ෂයෙන් කිසිදු නිල ප්‍රතිචාරයක් නො ලැබීමෙනි. 

ට්‍රම්ප්ගේ ප්‍රධාන සම-කුමන්ත්‍රනකරුවන්ගෙන් එක් අයෙකු වන නීතිපති විලියම් බාර් ඉරිදා සම්මුඛ සාකච්ඡාවක දී යලිත් කියා සිටියේ, [1807 ] කැරලි මර්දන පනත ක්‍රියාත්මක කිරීමට හා මධ්‍යම හමුදා යැවීමට ජනාධිපතිවරයාට සෑම අයිතියක් ම ඇති නමුත්, ඔහු දැන් එසේ නො කරමින් සිටින බවයි. කඳුලු  ගෑස්, ගම්මිරිස් කුඩු බෝල හා වෙනත් කැරලි මර්දන ආයුධ වලින් සාමකාමී විරෝධතාකරුවන් පලවා හරිමින්, ධවල මන්දිරයට යාබදව ලෆයෙට් චතුරශ්‍රය මුදා ගත් ෆෙඩරල් පොලිසියේ හා ජාතික ආරක්ෂක භටයින්ගේ ක්‍රියාමාර්ග බාර් දැඩි ලෙස ආරක්ෂා කලේ ය.

මිලිටරිය යෙදවීමේ ට්‍රම්ප්ගේ තර්ජනයට ඩෙමොක්‍රටික් පක්ෂයේ ප්‍රතිචාරය සමන්විත වී ඇත්තේ වැදගැම්මකට නැති දෙඩවිලි හා මගහැරීම් වලිනි. එය, ට්‍රම්ප් වාහම තනතුරින් ඉවත් කිරීම සඳහා ඉල්ලා සිටීම කෙසේ වෙතත් ට්‍රම්ප්ගේ ක්‍රියාවන් පිලිබඳ පැහැදිලි හා නිසක හෙලා දැකීම් පවා මගහැර ඇත. යුක්‍රේනයට මිලිටරි ආධාර ලබා දීම සම්බන්ධයෙන් ට්‍රම්ප් දෝෂාභියෝගයට ලක් කල ඩිමොක්‍රටික් කොන්ග්‍රස් නායකත්වය, ට්‍රම්ප් වොෂිංටනයේ මිලිටරි වාඩිලෑම ඉල්ලා සිටින විට ඇඟිල්ලක් හෝ ඔසවන්නේ නැත. 

ට්‍රම්ප්ගේ කුමන්ත්‍රනයට විරුද්ධත්වයක් පැමිනියා නම් එය පැමිනියේ මිලිටරියේ කොටස්වලිනි. හිටපු ජෙනරාල් “පිස්සු බල්ලා” අන්වර්ථ නාම ලත් ජේම්ස් මැටිස් හා විශ්‍රාමික අනෙකුත් නිලධාරීන්ගේ ප්‍රකාශ මාධ්‍ය විසින් වර්නනා කරමින් සිටී. නමුත් ට්‍රම්ප්ට ප්‍රධාන ප්‍රතිචාරය ලැබී ඇත්තේ හිටපු ජෙනරාල්වරුන්ගෙන් පමනක් යන කාරනය දායක වන්නේ, ඇමරිකානු ප්‍රජාතන්ත්රවාදයේ ඉරනමේ බේරුම්කරුවා බවට පත්ව ඇත්තේ මිලිටරිය මිස රජයේ සිවිල් ශාඛා නො වන බව පෙන්නුම් කිරීමට පමනි. නමුත් මිලිටරියේ ඉවසීම මත ප්‍රජාතන්ත්‍රවාදයේ රඳාපැවැත්මට වැඩි ආයුෂ නැත.

අන්තරායෝ බොහෝ සැබෑය. ධවල මන්දිරය ඔවුන්ගේ කුමන්ත්‍රන කිරීම නවතා දමා නැත. හමුදාව සිය කාලය ගත කරමින් එහි විකල්ප සලකා බලමින් සිටී. පොලිසිය යහමින් සන්නද්ධව සිටී.

තව ද, ප්‍රාන්තවල හා නගරවල ඩිමොක්‍රටික් ආන්ඩුකාරවරුන් සහ නගරාධිපතිවරුන්  විරෝධතාකරුවන්ට පහර දීමේ කලහකාරී වැඩ කටයුතු සඳහා  ජාතික ආරක්ෂක භටයින් හා විශාල වශයෙන් සන්නද්ධ පොලිසිය යොදා ගනිමින්, හමුදාවේ මැදිහත්වීමක් අනවශ්‍ය බව පෙන්වීමට උත්සාහ කර ඇත. මේ වන විටත් විරෝධතාවේ යෙදී සිටිය දී දුසිමකට ආසන්න පිරිසක් ඝාතනය කෙරී ඇති අතර 1,000 ක් අත්අඩංගුවට ගෙන තිබේ.

විප්ලවවාදී අර්බුදයක වර්ධනයේ මුල් අවධියේ දී, විරෝධතා දක්වන ජනතාව අරගලයට අවතීර්න  වන්නේ තමන් සටන් කරන්නේ කුමකට එරෙහිව ද එමෙන් ම තමන් සටන් කරන්නේ කුමක් සඳහා ද යන්න පිලිබඳ පැහැදිලි සංකල්පයකින් නොවන නමුත් ඔවුන්ට වර්තමාන තන්ත්‍රය තවදුරටත් ඉවසිය නො හැක යන අවබෝධයකින් පමනක් ය යන්න මුලුමනින් ම ස්වභාවික ය.  එහෙත් ප්‍රජාතන්ත්‍රවාදී අභිලාෂයන් සාක්ෂාත් කරගත හැක්කේ දිග හැරෙන මහජන ව්‍යාපාරයේ ප්‍රමුඛ හා තීරනාත්මක බලවේගය ලෙස කම්කරු පන්තිය ඉදිරියට එන තාක් දුරට පමනි. සතුරා නිසි ලෙස හඳුනාගත යුතු ය. එය හුදෙක් මැර පොලිස් හමුදා හෝ වර්ගවාදී පොලිස් භටයන් පිලිබඳ කාරනයක් නො වේ. ප්‍රජාතන්ත්‍රීය අයිතීන්වලට එරෙහි ප්‍රහාරයේ මූලාශ්‍රය වන්නේ මූල්‍ය කතිපයාධිකාරය සහ එහි ධනය හා බලය පදනම් වී ඇති සමාජ හා ආර්ථික පද්ධතිය වන ධනවාදය තුලයි. 

එබැවින් ප්‍රජාතන්ත්‍රීය අයිතීන් ආරක්ෂා කිරීම, දේශපාලන බලය කම්කරු පන්තියට පැවරීම හා සමාජයේ පුලුල්  ආර්ථික ප්‍රතිව්‍යුහගත කිරීමක් අරමුනු කරගත් සමාජවාදී ක්‍රියාමාර්ගයක් මත පදනම් විය යුතු ය. 

සමාජවාදී සමානතා පක්ෂය පොලිස් ප්‍රචන්ඩත්වයට එරෙහි කම්කරුවන් හා තරුනයින්ගෙන් ඉල්ලා සිටින්නේ තම අත්දැකීම්වලින් අවශ්‍ය නිගමන උකහා ගන්නා ලෙසත් කම්කරු පන්තිය තුල සමාජවාදී නායකත්වයක් ගොඩනැගීමේ සටනට උර දෙන ලෙසත් ය. පොලිස් ප්‍රචන්ඩත්වයට එරෙහි අරගලය එක්සත් ජනපදයේ සහ ලොව පුරා අසමානතාව, සූරාකෑම, යුද්ධය, ඒකාධිපතිවාදය හා  ධනේශ්වර ලාභ පද්ධතියට එරෙහිව වර්ධනය වෙමින් හා වැඩී එමින් තිබෙන කම්කරුවන්ගේ අරගල සමඟ ඒකාබද්ධ කල යුතු ය.

sril floyd meet