தொழிலாள வர்க்க ஐக்கியத்தின் ஒரு சக்திவாய்ந்த வெளிப்பாடாக பொலிஸ் வன்முறைக்கு எதிராக பல இனங்களை சேர்ந்த நூறாயிரக்கணக்கானோர் ஆர்ப்பாட்டங்களை நடத்துகின்றனர்

1 June 2020

மொழிபெயர்ப்பின் மூலக் கட்டுரையை இங்கே காணலாம்

சோசலிச சமத்துவக் கட்சியும் சமூக சமத்துவத்திற்கான சர்வதேச இளைஞர்களும் மாணவர்களும் மினசோட்டாவின் மினியாபோலிஸில் ஜோர்ஜ் ஃபுளோய்ட் இன் பொலிஸ் கொலைக்கு பதிலளிக்கும் விதமாக நாடுமுழுவதும் நடந்த ஆயிரக்கணக்கான உழைக்கும் மக்கள் மற்றும் இளைஞர்களின் பல்லின, பன்முக ஆர்ப்பாட்டங்களை வரவேற்று ஆதரவளிக்கிறது. கடுமையான ஆபத்துகள் இருந்தபோதிலும் தொற்றுநோய்களுக்கு மத்தியில் நடைபெற்று வரும் இந்த ஆர்ப்பாட்டங்கள் ஜனநாயக உரிமைகளைப் பாதுகாப்பதில் ஆழ்ந்த வேரூன்றிய அர்ப்பணிப்பு, பாசிச பொலிஸ் மற்றும் ட்ரம்ப் நிர்வாகத்தின் மீதான வெறுப்பு மீதான ஒரு சக்திவாய்ந்த மற்றும் ஊக்கமளிக்கும் வெளிப்பாடாகும். அத்துடன் தொழிலாள வர்க்கத்தின் அனைத்து பிரிவுகளின் ஐக்கியத்திற்கான ஒரு அர்ப்பணிப்புமாகும்.

மாநில அரசு விதித்த ஊரடங்கு உத்தரவை மீறி வெள்ளிக்கிழமை இரவு, ஆயிரக்கணக்கானோர் மினியாபோலிஸில் தங்கள் போராட்டத்தை தொடர்ந்தனர். மினியாபோலிஸுக்கு வெளியே ஃபுளோய்ட்டின் சொந்த ஊரான டெக்சாஸின் ஹூஸ்டனில் வெள்ளிக்கிழமை குறிப்பிடத்தக்க எதிர்ப்புக்கள் இருந்தன; ஜோர்ஜியாவின் அட்லாண்டாவில் எதிர்ப்பாளர்கள் சி.என்.என் தலைமையகத்திற்குள் நுழைந்தனர். நியூயோர்க் நகரம், அங்கு பொலிஸாரால் தாக்கப்பட்ட பின்னர் டஜன் கணக்கானவர்கள் கைது செய்யப்பட்டனர், மேலும் எதிர்ப்பாளர்கள் புரூக்ளினில் பொலிஸ் வளாகங்களுள் ஊடுருவியதாகக் கூறப்படுகிறது. கென்டக்கியில் லெக்சிங்டன் மற்றும் லூயிஸ்வில்லி இல் மார்ச் மாதத்தில் பொலிஸாரால் கொல்லப்பட்ட பிரோனா டெய்லருக்கு நீதி கோரியது. வெள்ளை மாளிகைக்கு வெளியே வாஷிங்டன், டி.சி., இது தற்காலிகமாக பூட்டப்பட்ட நிலைக்குச் சென்றது. இந்தியானாவில் ஃபோர்ட் வேன் இல் அங்கு கூட்டத்தை கலைக்க போலீசார் கண்ணீர்ப்புகைக் குண்டுகளை வீசினர். மற்றும் லாஸ் வேகாஸ், நெவாடாவில் எதிர்ப்பாளர்கள் லாஸ் வேகாஸ் ஸ்ட்ரிப்பில் போக்குவரத்தை நிறுத்தினர்.

கலிபோர்னியாவின் சான் ஜோஸில்; பாஸ்டன், மாசசூசெட்ஸ்; சிகாகோ, இல்லினாய்ஸ்; ஒமாஹா, நெப்ராஸ்கா; டெட்ராய்ட், மிச்சிகன்; டல்லாஸ், டெக்சாஸ்; டென்வர், கொலராடோ; கன்சாஸ் சிட்டி மற்றும் மிசூரியில் உள்ள செயின்ட் லூயிஸ் மற்றும் நாடு முழுவதும் பல நகரங்களிலும் நூற்றுக்கணக்கான மற்றும் பல சந்தர்ப்பங்களில் ஆயிரக்கணக்கான மக்கள் ஆர்ப்பாட்டங்களை நடத்தியுள்ளனர்.

இந்த விரிவடைந்துவரும் இயக்கம் ஜோர்ஜ் ஃபுளோய்ட்டின் மிருகத்தனமான கொலையால் தூண்டப்பட்டுள்ளது. ஆனால் இது சமூக சமத்துவமின்மை, வறுமை, பாரிய வேலையின்மை, சமூக பாதுகாப்பு பின்னலை அழித்தல் மற்றும் முடிவில்லாமல் போர்கள் ஆகியவற்றின் மீது பெருகிவரும் கோபத்திற்கான வெளிப்பாட்டை கொடுக்கின்றது. தொழிலாள வர்க்கம் எதிர்கொள்ளும் அவநம்பிக்கையான நிலைமை கோவிட்-19 தொற்றுநோயின் தாக்கத்தால் தீவிரமடைந்துள்ளது.

இதற்கு மாநில மற்றும் உள்ளூர் அரசாங்கங்கள் பாரிய பொலிஸ் அணிதிரட்டலுடன் பதிலளித்துள்ளன. மினியாபோலிஸில், மினசோட்டாவின் ஜனநாயகக் கட்சி ஆளுநர் நூற்றுக்கணக்கான தேசிய காவல்படையினரை அணிதிரட்டி, நேற்று நகரம் முழுவதும் நிறுத்தியுள்ளார். ஜோர்ஜியாவில், ஆளுநர் அவசரகால நிலையை அறிவித்த பின்னர் வெள்ளிக்கிழமை இரவு தேசிய காவலர்கள் அட்லாண்டாவுக்கு அனுப்பப்பட்டனர். ஏனைய நகரங்களில் கண்ணீர்ப்புகை மற்றும் இரப்பர் தோட்டாக்களால் ஆர்ப்பாட்டங்களை அடக்கும் முயற்சியில் போலீசார் தோல்வியுற்றனர்.

வெள்ளியன்று, ஆர்ப்பாட்டங்களைக் கட்டுப்படுத்தும் முயற்சியில் மினசோட்டா மாநில அதிகாரிகள், டெரெக் சொவ்வின் (Derek Chauvin) ஐ மூன்றாம் நிலை கொலைக்கான கீழ் மட்டக் குற்றத்தின் பேரில் கைது செய்யப்பட்டு குற்றம் சாட்டப்பட்டதாக அறிவித்தனர். டெரெக் சொவ்வின் என்ற பொலிஸ், கழுத்தை நெரித்து கொலை செய்யும் வரை ஃபுளோய்ட்டின் கழுத்தில் முழங்காலினால் அழுத்திவைத்திருந்தார். சம்பந்தப்பட்ட மற்ற மூன்று போலீசார் இன்னும் வெளியில் உள்ளனர். ஏற்கெனவே, சொவ்வின்னின் செயல்களை இழிவானமுறையில் நியாயப்படுத்துவது முன்னெடுக்கப்பட்டுள்ளன. இதில் ஃபுளோய்ட்டின் மரணம் அவர் மிருகத்தனமாக கைது செய்யப்பட்டதன் விளைவு அல்ல, ஆனால் "உடல்நிலைமைகள் காரணமாகவும்" மற்றும் "சாத்தியமான போதைப்பொருள்கள்" பாவித்திருப்பதாலும் இருக்கலாம் என்ற கூற்றுகள் வெளிப்படுகின்றன.

வியாழக்கிழமை பிற்பகுதியில் ட்ரம்ப் ட்விட்டரில், எதிர்ப்பாளர்களை "குண்டர்கள்" என்று கண்டனம் செய்வதற்கும் வன்முறையான இராணுவத் தலையீட்டினால் அச்சுறுத்தும் கருத்தை தெரிவித்தார். "எந்தவொரு சிக்கலிலும் நாங்கள் கட்டுப்பாட்டை எடுத்துக்கொள்வோம், ஆனால் கொள்ளை தொடங்கும் போது, சூடும் தொடங்குகிறது." என்றும் தெரிவித்தார்.

இந்த மேற்கோள் 1967 ஆம் ஆண்டில் இனவெறி மியாமி காவல்துறைத் தலைவர் வால்டர் ஹெட்லி பயன்படுத்திய இழிவான சொற்றொடரை, இனவெறி பொலிஸ் வன்முறைக்கு எதிரான கறுப்பினத்தவர்களின் பாரிய ஆர்ப்பாட்டங்களின் வன்முறையான ஒடுக்குமுறையைக் குறிக்கிறது. ட்ரம்பின் அச்சுறுத்தல் ஒரு வெறுமையானது அல்ல. வெள்ளிக்கிழமை இரவு, அசோசியேட்டட் பிரஸ், மினியாபோலிஸுக்கு அனுப்ப பல செயல்-கடமையில் ஈடுபடுத்த இராணுவ பொலிஸ் பிரிவுகளை தயார் செய்ய பென்டகன் இராணுவத்திற்கு உத்தரவிட்டுள்ளது என்று செய்தி வெளியிட்டது.

மினியாபோலிஸில் சொவ்வின் மிருகத்தனமான குற்றம் நிகழ்ந்தது தற்செயலானது அல்ல. கடந்த அக்டோபரில், ட்ரம்ப் மினியாபோலிஸில் தலைநகரில் உள்ள Target Center இல் ஒரு உரையில் போலீஸ்காரர்களை புகழ்வதற்கும் சோசலிஸ்டுகளை “தீவிர இடதுசாரிகள்” என்று கண்டிப்பதற்கும் அர்ப்பணித்தார். அந்த பேரணியில் “ட்ரம்ப்பிற்கான பொலிஸ்” என்ற வாசகத்துடன் பொலிஸ் அதிகாரிகள் சட்டைகளை அணிந்துகொண்டு, “சட்டத்திற்கும் ஒழுங்கிற்கும் ட்ரம்பிற்கு வாக்களிக்கவும்” என்ற பாதாகைகளை தாங்கியிருந்தனர்.

"சட்டத்தை அமுல்படுத்துவதில் எங்களுக்கு இருக்கும் மரியாதை வரம்பற்றது" என்று ட்ரம்ப் அப்போது அறிவித்தார். "வரம்பற்ற" மரியாதை என்றால் என்ன என்பதை மினியாபோலிஸ் பொலிஸ் கூட்டமைப்பின் தலைவர் பாப் க்ரோல் தெளிவுபடுத்தினார். அவர், “ஜனாதிபதி ட்ரம்ப் பதவியேற்றபோது செய்த முதல் காரியம்… ஆரம்பமாக, போலீசார் தங்கள் வேலையைச் செய்யட்டும், எங்களுக்கு பதிலாக குற்றவாளிகளுக்கு கைவிலங்கு இடுங்கள்” எனக் கூறினார்.

ஆர்ப்பாட்டங்களை அடக்குவதற்கு, மினியாபோலிஸ் காவல்துறையினரின் கடும் முயற்சிகளை ஒழுங்கமைப்பதில் வெள்ளை மாளிகை தீவிரமாக ஈடுபட்டது. வெள்ளிக்கிழமை அதிகாலையில், சி.என்.என் உடன் ஒரு ஊடகக் குழுவை ஆத்திரமூட்டும் வகையில் போலீசார் கைது செய்தனர், அவர்கள் நேரடியாக ஒளிபரப்பிக் கொண்டிருந்ததால் ட்ரம்பால் அடிக்கடி கண்டிக்கப்பட்டது. இந்த நடவடிக்கை ஊடகங்களுக்குள்ளே உள்ள ட்ரம்பின் எதிரிகளுக்கும் மற்றும் பொதுவாக பரந்த மக்களுக்கும் ஒரு செய்தியை அனுப்பும் நோக்கம் கொண்டதாகும்.

ட்ரம்பின் திருட்டுத்தனங்கள் பாசிச மற்றும் கம்யூனிச எதிர்ப்பு அழைப்புகளின் அடிப்படையில் காவல்துறை மற்றும் இராணுவத்தின் ஆதரவைக் கோருவதை நோக்கமாகக் கொண்டுள்ளன. எதிர்ப்பாளர்களை "குண்டர்கள்" என்று அவர் கண்டனம் செய்வது, கொரோனா வைரஸ் தொற்றுநோயைக் கட்டுப்படுத்தும் நடவடிக்கைகளுக்கு முற்றுப்புள்ளி வைக்கக் கோரி சமீபத்திய வாரங்களில் மாநில தலைநகரங்களில் கடும் ஆயுதமேந்திய போராட்டங்களை நடத்திய வலதுசாரி பாசிஸ்டுகளை அவர் பாராட்டியதற்கு எதிர்மாறானதாகும். மற்ற மாநிலங்களுடன் சேர்ந்து “மினசோட்டாவை விடுவிக்க” என்ற ட்ரம்பின் அழைப்புகளால் அவர்கள் ஊக்குவிக்கப்பட்டனர்.

எப்போதும்போல, ஜனநாயகக் கட்சியின் பதில், சமீபத்திய பொலிஸ் கொலையின் "சோகம்" பற்றிய பாசாங்குத்தனமான சொற்றொடர்களை வெளியிடுவதேயாகும். அதே நேரத்தில் அடிப்படை பொருளாதார, அரசியல் மற்றும் சமூக பிரச்சினைகள் மறைக்கப்படுவதை உறுதிசெய்ய எல்லாவற்றையும் செய்கின்றது. ஜனநாயகக் கட்சியின் ஜனாதிபதி வேட்பாளரான ஜோசப் பைடன் வெள்ளிக்கிழமை ஒரு அறிக்கையை வெளியிட்டார். அதில் ஃபுளோய்ட்டின் கொலை ஒரு "மிருகத்தனமான செயல்", இதற்கு அமெரிக்க மக்களும், குறிப்பாக, வெள்ளையின மக்களும் பொறுப்பாளிகள் என்று அறிவித்தார்.

“எங்கள் உடந்தை, எங்கள் மௌனம் மூலமாக இந்த வன்முறை சுழற்சிகளை நடைமுறைப்படுத்த நாங்கள் உடந்தையாக இருக்கிறோம்”, என்று பைடன் கூறினார். "இதைப் பற்றிய எதுவும் எளிதானது அல்லது வசதியானதாக இருக்காது. ஆனால் அடிப்படை காயத்திற்கு சிகிச்சையளிக்காமல் மீண்டும் ஒரு முறை இந்த காயத்தை துடைக்க அனுமதித்தால், நாங்கள் உண்மையில் ஒருபோதும் குணமடைய மாட்டோம். அமெரிக்காவின் ஆத்மா ஆபத்தில் உள்ளது” என்று முடித்தார்.

ஜோர்ஜ் ஃபுளோய்ட்டின் கொலை மற்றும் எண்ணற்ற பிற அட்டூழியங்கள் "எங்களால்", அமெரிக்க உழைக்கும் மக்களால் செய்யப்படவில்லை. ஆனால் அரசின் ஒரு கருவியான காவல்துறையினரால் செய்யப்பட்டதாகும்.

காவல்துறையினர், அமெரிக்க வாழ்வின் ஒரு மாதிரிவடிவத்தை காட்டவில்லை. அவர்கள் கீழ்-நடுத்தர மற்றும் அரசியல்ரீதியாக பின்தங்கிய தொழிலாளர்களின் மிகவும் பிற்போக்குத்தனமான பிரிவுகளிலிருந்து ஆட்சேர்ப்பு செய்யப்படுகிறார்கள் மற்றும் ஏழைகளையும் ஒடுக்கப்பட்டவர்களையும் வெறுக்கவும் பயிற்சி பெறுகிறார்கள். அவர்கள் நாட்டின் ஒவ்வொரு தொழிலாள வர்க்க குடியிருப்புப் பகுதிகளிலும் ஒரு விரோத ஆக்கிரமிப்பு சக்தியாக உள்ளனர். பல பொலிஸ் பணியாளர்கள் ஈராக் மற்றும் ஆப்கானிஸ்தானில் கடமை சுற்றுப்பயணங்களுக்கு சேவை செய்துள்ளதுடன், அங்கு அவர்கள் வன்முறை மற்றும் மரணத்திற்கும் பழக்கப்பட்டும் இருக்கின்றனர்.

அதிகரித்தளவில், ஒவ்வொரு ஆண்டும் 100 பில்லியன் டாலர் நிதியுதவி பெற்ற காவல்துறை, இராணுவத்துடன் ஒருங்கிணைக்கப்பட்டு, மிகவும் மேம்பட்ட ஆயுதங்களுடன் ஆயுதம் ஏந்தி, துணை இராணுவ அமைப்புகளாக உருவாக்கப்பட்டுள்ளது. ஒவ்வொரு ஆண்டும், அமெரிக்காவில் 1,000 பேர் போலீசாரால் கொல்லப்படுகிறார்கள். கொல்லப்பட்டவர்களில் விகிதாசாரத்திற்கு பொருத்தமற்று ஆபிரிக்க அமெரிக்கர்கள் அதிகமாக இருக்கின்றனர். ஆனால் பொலிஸ் வன்முறை அனைத்து இனங்களையும் இனப்பிரிவுகளையும் சேர்ந்த தொழிலாளர்கள் மற்றும் ஏழை மக்களை குறிவைக்கிறது. மேலும் கொல்லப்பட்டவர்களில் அதிகமான வெள்ளையினத்தவரும் இருக்கின்றனர்.

ட்ரம்ப் நிர்வாகம் பொலிஸ் வன்முறையை திட்டமிட்டு ஊக்குவித்து வரும் நிலையில், ஜனநாயகக் கட்சியினர் உழைக்கும் மக்களுக்கு எதிரான அரசு வன்முறையில் சிக்கியுள்ளனர். ஒபாமா நிர்வாகத்தின் கீழ் பொலிஸ் கொலைகள் தடையின்றி தொடர்ந்தன. இது உச்சநீதிமன்றத்தில் வழக்குகள் வந்த ஒவ்வொரு சந்தர்ப்பத்திலும் காவல்துறையினருக்கு ஆதரவாக இருந்தது.

மினியாபோலிஸைப் பொறுத்தவரை, மேயர் ஒரு ஜனநாயகக் கட்சியாளரகவும், முன்னாள் ஜனநாயகக் கட்சியின் ஜனாதிபதி வேட்பாளரான எமி க்ளோபாக்கர் ஆளுநராக இருக்கின்றார். அவர் முன்னர் ஹென்னெபின் கவுண்டியின் அரசவழக்கறிஞராக இருந்தார். அவர் முந்தைய வழக்கு ஒன்றில் டெரெக் சொவ்வின் உட்பட காவல்துறையினரை பாதுகாத்து, தவறான நடத்தைக்காக அவர்கள் மீது வழக்குத் தொடுத்ததை எதிர்த்தார்.

கடந்த 50 ஆண்டுகளாக, அமெரிக்க சமுதாயத்தில் அடிப்படை பிளவு “வெள்ளை அமெரிக்கா” மற்றும் “கருப்பு அமெரிக்கா” ஆகியவற்றுக்கு இடையில் உள்ளது என வலியுறுத்தி, இனவாத அரசியலை மேம்படுத்துவதில் ஜனநாயகக் கட்சியினர் நிபுணத்துவம் பெற்றவர்கள். இனவெறி உள்ளிட்ட சமூகப் பிரச்சினைகளுக்கு தீர்வு காணப்படுவது, அதிகமான கறுப்பின காவல்துறை அதிகாரிகளை பணியமர்த்துவதிலும், அதிகமான கறுப்பின அரசியல்வாதிகளைத் தேர்ந்தெடுப்பதிலும் காணப்பட வேண்டும் என வாதிடுவதற்கு இனம் பற்றிய அரசியல் பயன்படுத்தப்படுகிறது. இருப்பினும், இந்த 50 ஆண்டுகளில், கறுப்பினத் தொழிலாளர்களின் நிலைமைகள் மோசமடைந்துள்ளன, சமூக சமத்துவமின்மை சாதனை அளவை எட்டியுள்ளதுடன் மற்றும் பொலிஸ் வன்முறை தீவிரமடைந்துள்ளது. மினியாபோலிஸ் உட்பட பல நகரங்களில், பொலிஸ் வன்முறையை கறுப்பு போலீஸ் தலைவர்கள் அல்லது கறுப்பு மேயர்கள் மேற்பார்வையிடுகிறார்கள்.

ஃபுளோய்ட்டின் மிருகத்தனமான கொலையால் தூண்டப்பட்ட அனைத்து இனங்களின் தொழிலாளர்கள் மற்றும் இளைஞர்களின் வெகுஜன ஆர்ப்பாட்டங்கள் வெடித்தது ஒரு மகத்தான சமூக ஒற்றுமையை வெளிப்படுத்தியுள்ளது. இது இனம் பற்றிய கட்டுக்கதைகளை மறுக்கிறது. இது வெள்ளையினத்தவருக்கு எதிரான கறுப்பினத்தவர் பற்றிய கேள்வி அல்ல, ஆனால் பணக்காரர்களுக்கு எதிரான தொழிலாள வர்க்கம் பற்றியதாகும். இது ஒரு மிகப்பெரிய முன்னோக்கிய படியாகும்.

இந்த ஆர்ப்பாட்டங்கள், வர்க்கப் போராட்டத்தின் வளர்ச்சியில் ஒரு புதிய கட்டத்தைக் குறிக்கின்றன.

இந்த இயக்கத்தின் மிக விரைவான வளர்ச்சியும் பரவலும் அமெரிக்காவிலும் சர்வதேச அளவிலும் பரந்த சமூக மற்றும் அரசியல் நெருக்கடியுடன் இணைக்கப்பட்டுள்ளன. கொரோனா வைரஸ் தொற்றுநோய்க்கு ஆளும் வர்க்கத்தின் முழு பதிலும், அதாவது மக்கள்தொகையை பாதுகாக்க எந்தவொரு நடவடிக்கையும் எடுக்க மறுப்பது, பணக்காரர்களுக்கு ட்ரில்லியன் கணக்கான டாலர்களை ஒப்படைத்தல் மற்றும் தொற்றுநோய் பரவும்போதும் இப்போது படுகொலைக்கு ஒப்பான வேலைக்குத் திரும்பும் பிரச்சாரமும் சமூகத்தின் நிதியதன்னலக்குழு குணாம்சத்தை வெளிப்படுத்துகிறது.

முன்னோடியில்லாத பேரழிவு, பல்லாயிரக்கணக்கான தொழிலாளர்கள் மற்றும் இளைஞர்களை வேலையிலிருந்து வெளியேற்றப்பட்டு, வீடுகளை இழப்பதை எதிர்கொள்வும், மற்றும் பெரும் மந்தநிலைக்குப் பின்னர் மிக மோசமான பொருளாதார மற்றும் சமூக நெருக்கடியை எதிர்கொள்வும் செய்துள்ளது. தொற்றுநோய் நாடு முழுவதும் தொடர்ந்து பரவி வருகின்ற நிலையில், ட்ரம்ப் நிர்வாகம் ஒரு படுகொலைக்கு ஒப்பான வேலைக்குத் திரும்பும் பிரச்சாரத்தை முன்னெடுத்து வருகிறது. செல்வந்தர்களின் பைகளை நிரப்புவதற்காக, பரந்த சமூக துயரங்களைப் பயன்படுத்தி தொழிலாளர்கள் தங்கள் உயிருக்கும் அவர்களின் அன்புக்குரியவர்களின் வாழ்க்கையையும் ஆபத்திற்கு உள்ளாக்க கட்டாயப்படுத்துகின்றது.

ஜோர்ஜ் ஃபுளோய்ட்டின் மரணத்திற்கு எவ்வாறு பழிதீர்த்துக்கொள்வது? முன்னோக்கி செல்லும் பாதை என்ன?

பொலிஸ் மிருகத்தனத்திற்கு எதிரான போராட்டம் பாதுகாப்பற்ற வேலை நிலைமைகள், பாரிய வேலையின்மை, சமூக சமத்துவமின்மை மற்றும் பாரிய வறுமை ஆகியவற்றிற்கு எதிராக தொழிலாள வர்க்கத்தின் வளர்ந்து வரும் இயக்கத்துடன் இணைக்கப்பட வேண்டும். இது முதலாளித்துவ அமைப்பிற்கு எதிரான சோசலிசத்திற்கான போராட்டமாகும்.

இந்த போராட்டத்தின் வளர்ச்சிக்கு ஜனநாயகக் கட்சியினருக்கும் குடியரசுக் கட்சியினருக்கும் எதிராக தொழிலாள வர்க்கத்தின் சுயாதீனமான அரசியல் அணிதிரட்டல் தேவைப்படுகிறது.

தொழிலாளர்கள் மற்றும் இளைஞர்கள் தாம் உலகளாவிய நோக்கில் ஒரு போரில் ஈடுபட்டுள்ளனர் என்பதை புரிந்துகொள்வது மிகவும் முக்கியமானது. அமெரிக்காவில் தொழிலாளர்களின் ஐக்கியத்தை நிறுவுவதற்கு அனைத்து தேசிய இனங்கள் மற்றும் இனங்களின் தொழிலாளர்களின் போராட்டங்களின் ஒற்றுமை தேவை. இந்த மூலோபாயத்தின் ஒரு முக்கிய கூறு அமெரிக்காவிற்குள் குடியேறிய அனைத்து தொழிலாளர்களையும் மிருகத்தனமாக நடத்துவதற்கு சமரசமற்ற எதிர்ப்பை காட்டுவதில் உள்ளடங்கியுள்ளது.

இந்த போராட்டத்தை முன்னெடுப்பதில், அரசியல் வேலைத்திட்டத்தின் கேள்வி தீர்க்கமானது. இந்த அறிக்கையில் முன்வைக்கப்பட்ட பகுப்பாய்வு மற்றும் மூலோபாயத்துடன் உடன்படுபவர்கள் சோசலிசத்திற்காக போராடுவதன் அவசியத்தை உணர்ந்து முதலாளித்துவ அமைப்பிற்கு முற்றுப்புள்ளி வைக்க விரும்புபவர்கள் எமது தேர்தல் பிரச்சாரத்தை ஆதரித்து சோசலிச சமத்துவக் கட்சியிலும் எங்கள் இளைஞர் இயக்கமான சர்வதேச இளைஞர்கள் மற்றும் சமூக சமத்துவத்திற்கான மாணவர்கள் இலும் சேர இளைஞர்களை நாங்கள் கேட்டுக்கொள்கிறோம்.

ஆசிரியர் பரிந்துரைக்கும் ஏனைய கட்டுரைகள்:

ஜோர்ஜ் ஃபுளோய்ட்டின் கொலையும் அமெரிக்காவில் பொலிஸ் வன்முறைக்கு எதிரான போராட்டமும்

[28 May 2020]

Cop who killed George Floyd in Minneapolis had record of brutality
[29 May 2020]

Mass protests voice outrage over police murder of George Floyd
[30 May 2020]

Statement of the Socialist Equality Party (US)