லொஸ் ஏஞ்சல்ஸில் உள்ள கலிபோர்னியா பல்கலைக்கழகத்தில் (UCLA) காஸா ஒற்றுமை முகாமில் நள்ளிரவில் தொடங்கிய ஒரு ஒருங்கிணைந்த அரசு தாக்குதலில், 100 க்கும் அதிகமான, பலர் முகமூடி அணிந்திருந்த, சியோனிசவாதிகள் மற்றும் பாசிசவாதிகளைக் கொண்ட ஒரு கும்பல், வளாகத்தில் இருந்த இனப்படுகொலை எதிர்ப்பு போராட்டக்காரர்களின் முகாம்களைத் தாக்கினர், இதனால் பல கணிசமான மாணவர்கள் காயமடைந்தனர். UCLA முகாம் மீதான தாக்குதலுக்கு முன்னதாக கொலம்பியா மற்றும் நியூ யோர்க் நகர கல்லூரி (CCNY) மாணவர்கள் மீது ஒரு பாரிய பொலிஸ்-அரசு ஒடுக்குமுறை கட்டவிழ்த்துவிடப்பட்டது. இதில் செவ்வாய்கிழமை இரவு அண்மித்து 300 போராட்டக்காரர்கள் கைது செய்யப்பட்டனர்.
ஏப்ரல் 25 வியாழனன்று, UCLA இன் மாணவர்களும் ஆசிரியர்களும் Royce Hall இல் முகாமிட்டு, அமெரிக்கா முழுவதிலும், சர்வதேச அளவிலும் உள்ள 100க்கும் மேற்பட்ட பிற கல்லூரி முகாம்களுடன் இணைந்து, இஸ்ரேலுடனான அனைத்து பொருளாதார மற்றும் அரசியல் உறவுகளையும் தங்கள் நிர்வாகங்கள் துண்டித்துக் கொள்ள வேண்டும் என்று அழைப்பு விடுத்தனர்.
காஸாவில் நடந்துவரும் பாரிய படுகொலைக்கு எதிராக பல மாதங்களாக நடந்த ஊர்வலங்களைத் தொடர்ந்து வந்த, இந்த அமைதியான போராட்டங்களுக்கு விடையிறுக்கும் வகையில், ஜனாதிபதி ஜோ பைடன், ஜனநாயகக் கட்சி மற்றும் குடியரசுக் கட்சி அரசியல்வாதிகள், பல மாதங்களாக மாணவர்கள் மற்றும் ஆசிரியர்களை “யூத-எதிர்ப்புவாதிகள்” மற்றும் “பயங்கரவாதிகள்” என்று அழைத்து வந்துள்ளனர்.
முதலாளித்துவ அரசியல்வாதிகள் மற்றும் பொலிசாரின் ஆதரவால் தைரியமடைந்து, சியோனிச மற்றும் பாசிச குண்டர்கள் குழு ஒன்று நள்ளிரவுக்குப் பிறகு UCLA முகாமைத் தாக்கியது. அவர்கள் தடிகளை சுழற்றுவது, இரசாயன மருந்துகளை தெளிப்பது, பட்டாசுகளை வெடிப்பது, போராட்டக்காரர்களை உதைப்பது மற்றும் தாக்குவது ஆகியவற்றை வீடியோ காணொளி காட்டுகிறது. இந்த தாக்குதல் தொடங்கிய உடனேயே அதன் வீடியோக்கள் சமூக ஊடகங்களில் வேகமாக பரவின.
ஒரு பெரிய அமெரிக்க பொது பல்கலைக்கழகத்தில் அமைதியான எதிர்ப்பு போராட்டக்காரர்கள் மீதான தாக்குதலின் தீவிர வன்முறைத் தன்மை இருந்தபோதிலும், ஜனநாயகக் கட்சி மேயர் கரேன் பாஸ் அதிகாலை 1:00 மணி வரை லொஸ் ஏஞ்சல்ஸ் போலீசாரை வளாகத்திற்கு அனுப்பவில்லை. LAPD வந்தவுடன், அவர்கள் மற்றொரு மணி நேரத்திற்கு வன்முறையை நிறுத்த எதுவும் செய்யவில்லை.
அதற்கு பதிலாக, இன்னும் அதிகமான மாணவர்கள் மற்றும் போர்-எதிர்ப்பு ஆதரவாளர்களை காயப்படுத்தவும் அடிக்கவும் வலதுசாரி குண்டர்களுக்கு பொலிஸ் போதுமான வாய்ப்பை வழங்கியது. மொத்தத்தில், வன்முறையில் ஈடுபட்ட வலதுசாரி குண்டர்கள் கிட்டத்தட்ட மூன்று மணி நேரம் கல்லூரி மாணவர்களை அடிக்கவும் முரட்டுத்தனமாக தாக்கவும் அனுமதித்தனர்.
ஜனநாயக உரிமைகளை நசுக்குவதில் பொலிசாரின் பாத்திரம் மிகவும் அம்பலமாகியுள்ளது. மாணவர்கள் தாக்கப்பட்டபோதும் கூட LAPD தலையிட எதுவும் செய்யவில்லை. டெய்லி ப்ரூயின் (Daily Bruin) மாணவர் செய்தித்தாளின் நிருபர்கள் “அவர்கள் தாக்கினார்கள் மற்றும் மறைமுகமாக உடலை எரிய வைக்கும் மருந்துகளை தெளித்தனர். மாணவர்களுக்கு எந்த பாதுகாப்பும் வழங்கப்படவில்லை” என்று எழுதினர்.
உள்ளூர் நேரப்படி அதிகாலை 2:20 மணிக்குப் பிறகு, பொலிசார் இறுதியாக இரு குழுக்களையும் பிரிக்கும் முயற்சியில் ஈடுபடத் தொடங்கினர். மாணவர்களைத் தாக்குவதில் கடைசி இரண்டு மணி நேரத்தைச் செலவிட்ட வன்முறை பாசிஸ்ட்டுக்கள் பொலிசாரால் துன்புறுத்தப்படாமல், மிகக் குறைவாக, கைது செய்யப்படாமல் வளாகத்தை விட்டு வெளியேற அனுமதிக்கப்பட்டனர்.
UCLA மீதான வெறியாட்டத்திற்கு LAPD ஒரு “கையாலாகாத” அணுகுமுறையை எடுத்த அதேவேளையில், செவ்வாய்கிழமை இரவு கொலம்பியா மற்றும் நியூ யோர்க் நகர கல்லூரியில் (CCNY) போர்-எதிர்ப்பு முகாமில் NYPD கலகம் ஒடுக்கும் பொலிஸின் படையணிகள் பாரிய தேடுதல் வேட்டைகளை நடத்தி கைது செய்தன. புதன்கிழமை காலை, கொலம்பியாவில் 109 பேரையும், CCNY இல் 173 பேரையும் கைது செய்ததாக NYPD ஒரு அறிக்கையை வெளியிட்டது.
புதனன்று UCLA இல் போர் எதிர்ப்பு ஆர்ப்பாட்டக்காரர்கள் மீது நடத்தப்பட்ட மிருகத்தனமான தாக்குதல், வளாகத்தில் இருந்த மாணவர்கள், ஆசிரியர்கள் மற்றும் இனப்படுகொலை எதிர்ப்பாளர்கள் மீது இஸ்ரேல்-சார்பு பாசிஸ்டுகளால் தாக்கப்படுவது இது முதல் தடவையல்ல.
ஏப்ரல் 28 ஞாயிற்றுக்கிழமை, இஸ்ரேலிய-அமெரிக்கன் கவுன்சில் தலைமையிலான சியோனிச எதிர்ப்பாளர்கள், அவதூறு எதிர்ப்பு லீக் (ADL) ஆதரவுடன், ஒலிபெருக்கிகள் மற்றும் மாணவர் முகாமை எதிர்கொள்ளும் பெரிய திரையுடன் ராய்ஸ் மண்டபம் வழியாக இனப்படுகொலைக்கு ஆதரவான பேரணியை நடத்தினர். ஆத்திரமூட்டும் நபர்களால் பயன்படுத்தப்படும் மிகப்பெரிய ஆடியோ மற்றும் வீடியோ அமைப்புக்கு பணம் செலுத்த GoFundMe கணக்கு 4 நாட்களில் $90,000 க்கும் அதிகமாக வசூலித்தது.
ஞாயிறன்று நடந்த பேரணியில், தண்டிக்கப்பட்ட பயங்கரவாதி மீர் கஹானே (Meir Kahane) ஆல் ஸ்தாபிக்கப்பட்ட ஒரு அதிதீவிர-தேசியவாத குழுவான, பாசிசவாத யூத பாதுகாப்பு கழகத்தின் (Jewish Defense League) கொடியை அசைக்கும் ஒரு சியோனிசவாதியை ஒரு சுயாதீன நிருபர் புகைப்படம் எடுத்தார்.
ஞாயிறன்று UCLA இல் நடந்த இனப்படுகொலை ஆதரவு பேரணியில் பேசிய ADL இன் தலைமை நிர்வாக அதிகாரி ஜொனாதன் கிரீன்பிளாட் (Jonathan Greenblatt), இனப்படுகொலை எதிர்ப்பு ஆர்ப்பாட்டக்காரர்களை “யூத எதிர்ப்பு” என்று அவதூறு செய்தார். சமூக ஊடகங்களில் பதிவேற்றப்பட்ட காணொளி மற்றும் புகைப்படங்கள், இஸ்ரேல்-சார்பு / அதிவலது எதிர்-போராட்டக்காரர்கள் அமைதியான போராட்டக்காரர்கள் மீது துப்புவதையும், அவதூறான வார்த்தைகளைப் பயன்படுத்துவதையும், சில சந்தர்ப்பங்களில், அவர்களை சரீர ரீதியில் தாக்குவதையும் காட்டின.
அடுத்த நாள் CNN இன் ஆண்டர்சன் கூப்பருக்கு அளித்த பேட்டி ஒன்றில், கிரீன்பிளாட் இஸ்ரேல் சார்பு ஆதரவாளர்களால் மாணவர்கள் மீது நடத்தப்பட்ட தாக்குதல்கள் பற்றி ஏதும் கூறவில்லை. மாறாக, போர் எதிர்ப்பு ஆர்ப்பாட்டக்காரர்களுக்கு எதிராக பொலிஸ் வன்முறையை தீவிரப்படுத்த அழைப்பு விடுத்தார்.
“முதலாவதாக, அவர்கள் சட்டம் ஒழுங்கை மீண்டும் நிலைநாட்ட வேண்டும்... விதிகளை மதிக்க வேண்டும் என்பதை இந்த மாணவர்கள் புரிந்துகொள்வதை நாம் உறுதி செய்ய வேண்டும்.
“முழு முகக் கவசங்கள் இல்லை,” என்று கிரீன்பிளாட் புகார் செய்தார். “நீங்கள் ஒரு ISIS போராளியைப் போல... அவர்கள் அல்-கொய்தாவில் இருப்பதைப் போல ஆடை அணியக்கூடாது என்பது உங்கள் பேச்சு சுதந்திரத்தை பாதிக்காது, இது பொருத்தமானது என்று நான் நினைக்கவில்லை” என்று குறிப்பிட்டார்.
ஏப்ரல் 29 திங்களன்று, உலக சோசலிச வலைத் தள நிருபர்கள் காஸா ஒற்றுமை முகாமிற்கு ஆதரவாக UCLA இல் நடந்த ஒரு பேரணியில் பங்கெடுத்த ஒரு பல்கலைக்கழக உறுப்பினரை பேட்டி கண்டனர்.
வாரயிறுதியில் நடந்த வன்முறை குறித்து பேசுகையில், “முகாமில் உள்ள மாணவர்கள் தங்கள் கோரிக்கைகள் மற்றும் காஸாவில் என்ன நடக்கிறது என்பது பற்றிய விவாதம் மற்றும் ஒழுக்கத்தின் மூலம் இந்த ஆத்திரமூட்டல்களை புறக்கணித்து தங்கள் எதிர்ப்பைத் தொடர முடிந்ததைக் குறித்து நான் மிகவும் பெருமைப்படுகிறேன்” என்று அவர் கூறினார்.
“கடந்த நான்கு நாட்களாக எனது தனிப்பட்ட அவதானிப்புகளிலிருந்து, முகாம்களில் யூத எதிர்ப்புவாதம் எதையும் நான் காணவில்லை, இந்த இயக்கத்தின் தலைவர்களாக இருக்கும் யூதர்கள் உட்பட பல்வேறு மதங்களில் இருந்து பாலஸ்தீனத்திற்கு ஆதரவான ஒரு இயக்கம் இது என்பதை தெளிவுபடுத்த மாணவர்கள் மேற்கொண்ட முயற்சிகள் குறித்து நான் மிகவும் பெருமைப்படுகிறேன்” என்று அவர் மேலும் குறிப்பிட்டார்.
பேரணியில் பங்கேற்ற மற்றொரு பல்கலைக்கழக உறுப்பினரான ஹன்னாவும் வார இறுதியில் UCLA இல் நடந்த சியோனிச தாக்குதல்கள் குறித்தும் பேசினார்.
“இதுவரை நான் பார்த்த பிரதான பத்திரிகை செய்திகளைப் பற்றி எனக்கு மிகவும் கடினமாக இருந்த விஷயம் என்னவென்றால், நிலைமை தீவிரமடையும் போது இந்த வகையான இரு தரப்பு-வாதமும் இருக்கிறது” என்று ஹன்னா கூறினார். அவர் மேலும் கூறியதாவது:
நான் வியாழன் மற்றும் வெள்ளி முகாமில் இருந்தேன். மாணவர்கள் தீவிரத்தை குறைக்கும் பணியை சிறப்பாக செய்தனர், மேலும் அவர்கள் அவ்வப்போது ஆசிரிய உறுப்பினர்களை அழைத்து தீவிரத்தை குறைக்க உதவுவார்கள். எனவே வெளியில் இருந்து வரும் எதிர்ப்பாளர்களிடமிருந்து வரும் இந்த வன்கொடுமைக்கு நானே இலக்காக இருந்தேன். அவர்கள் தெளிவாக வன்முறையைத் தூண்ட முயற்சிக்கிறார்கள்.
மாணவர்கள் பதற்றத்தைத் தணிப்பதற்கு, ஈடுபாடு காட்டாமல் ஒரு அசாதாரண வேலையைச் செய்துள்ளனர். ஊடகங்கள், “ஓ, விஷயங்கள் சூடாகின்றன” என்று பார்ப்பதில் மட்டுமே விஷயங்களை சூடாக்குகின்றன. வெளியில் இருந்து வரும் கிளர்ச்சியாளர்கள் மட்டுமே விஷயங்களை சூடுபடுத்துகிறார்கள், மாணவர்கள் பதற்றத்தை தணிக்கும் ஒரு அற்புதமான வேலையைச் செய்கிறார்கள், நான் அவர்களைப் பற்றி மிகவும் பெருமைப்படுகிறேன்.
காஸா ஒற்றுமை முகாமில் பங்கெடுத்த UCLA மாணவரான கையா (Kaia) உலக சோசலிச வலைத் தளத்திற்கு கூறுகையில், “காஸா இனப்படுகொலையில் இருந்து செயலூக்கத்துடன் இலாபமடைகின்ற பெருநிறுவனங்களிடம் இருந்து UCLA விலகிக் கொள்வதற்காக நாங்கள் போராடி வருகிறோம்.
“சியோனிச எதிர்ப்பை, யூத எதிர்ப்புடன் குழப்பியடிப்பதானது, சியோனிச நிகழ்ச்சி நிரலின் தந்திரோபாயமாகும். உங்களுக்குத் தெரியும், நான் மதிப்பிட்டால், பாலஸ்தீனியர்களை விட எங்கள் முகாமுக்குள் யூதர்கள் அதிகம். மேலும் நமது சொல்லாடல்கள் யூத எதிர்ப்பு அல்ல.”