மொழிபெயர்ப்பின் மூலக் கட்டுரையை இங்கே காணலாம்.

கடந்த ஞாயிற்றுக்கிழமை, ஜேர்மன் ஜனாதிபதி பிராங்க்-வோல்டர் ஸ்டெய்ன்மயர் (சமூக ஜனநாயகக் கட்சி, SPD) உக்ரேனுக்கு கொத்துக் குண்டுகளை வழங்குவதற்கான அமெரிக்க ஜனாதிபதி ஜோ பைடனின் முடிவை ஆதரித்துள்ளார். ஜேர்மன் அரசாங்கத்தின் உத்தியோகபூர்வ நிலைப்பாடு சர்வதேச ரீதியாக தடைசெய்யப்பட்ட இந்த ஆயுதங்களுக்கு எதிராக பேசுவது இன்னும் சரியானது, “ஆனால் தற்போதைய சூழ்நிலையில் அது அமெரிக்காவின் வழியில் நிற்க முடியாது”என்று தெரிவித்தார்.

வில்னியஸில் நேட்டோ உச்சிமாநாடு தொடங்குவதற்கு சற்று முன்பு கொத்து குண்டுகளை வழங்குவதை ஜேர்மன் அரச தலைவர் ஆதரிக்கிறார் என்பது ஒரு எச்சரிக்கையாகும். இரண்டாம் உலகப் போரின் போது, ​​ஜேர்மன் ஆளும் வர்க்கம் சோவியத் யூனியனுக்கு எதிரான இனப் படுகொலை மற்றும் அழிப்புப் போருடன் வரலாற்றில் மிகப்பெரிய குற்றங்களைச் செய்துள்ளது. இப்போது, ​​மீண்டும், அதன் ஏகாதிபத்திய இலக்குகளைத் தொடர்வதை எதுவும் தடுக்காது.

கொத்துக் குண்டுகளைப் பயன்படுத்துவது சர்வதேச சட்டத்தின் கீழ் சட்டவிரோதமானது மற்றும் அது ஒரு குற்றச் செயலாகும். இவை ராக்கெட்டுகள் மற்றும் குண்டுகள் ஆகும், அவை காற்றில் வெடித்து எண்ணற்ற சிறிய வெடிகுண்டுகளாக சிதறுகின்றன. அவை கண்மூடித்தனமாக மக்களைக் கொல்லவும் ஊனப்படுத்தவும் வடிவமைக்கப்பட்டுள்ளன. ரஷ்ய படையினர்கள் மட்டுமல்ல, குறிப்பாக உக்ரேனிய குடிமக்களும் பல ஆண்டுகளுக்கு ஒரு பயங்கரமான விலையை கொடுக்க வேண்டும்.

வியட்நாம் போரின் போது வான்வழித் தாக்குதல்களில், வியட்நாம், லாவோஸ் மற்றும் கம்போடியாவில் உள்ள இலக்குகள் மீது அமெரிக்கா கொத்துக் குண்டுகளை பரவலாக வீசியது. 1964 மற்றும் 1973 க்கு இடையில், லாவோஸில் மட்டும் 270 மில்லியன் கிளஸ்டர் கொத்துக் குண்டுகள் வானிலிருந்து பொழியப்பட்டன, அவற்றில் 80 மில்லியன் குண்டுகள் வெடிக்கத் தவறியதாக மதிப்பிடப்பட்டுள்ளது. விக்கிபீடியாவின் கூற்றுப்படி, 1964 மற்றும் 2008 க்கு இடையில் கொத்து குண்டுகளால் 50,000 க்கும் அதிகமானோர் கொல்லப்பட்டனர் அல்லது காயமடைந்தனர். போருக்குப் பிறகு 20,000 பேர் உட்பட, பாதிக்கப்பட்டவர்களில் 23 சதவீதமானவர்கள் குழந்தைகள் ஆவர்.

நேட்டோ சக்திகள் சர்வதேச சட்டத்தை மீறி, செர்பியா மற்றும் ஈராக் மீதான ஆக்கிரமிப்புப் போர்களில் கொத்துக் குண்டுகளைப் பயன்படுத்தியுள்ளன. மனித உரிமைகள் கண்காணிப்பு அறிக்கையின்படி, அமெரிக்காவும் பிரிட்டனும் ஈராக் மீது கிட்டத்தட்ட 13,000 கிளஸ்டர் கொத்துக் குண்டுகளை வீசியுள்ளன, இதில் 1.8 முதல் 2 மில்லியன் சிறிய குண்டுகள் இருந்தன. எடுத்துக்காட்டாக, சர்வதேச மன்னிப்புச் சபையின் கூற்றுப்படி, பல இறந்த மற்றும் காயமடைந்த மக்கள் 1 ஏப்ரல் 2003 அன்று ஹில்லாவில் உள்ள உள்ளூர் மருத்துவமனையில் அனுமதிக்கப்பட்டனர், அவர்களின் உடல்களில் கொத்து குண்டுகளால் ஏற்பட்ட வெட்டுக் காயங்கள் காணப்பட்டன.

ஸ்டெய்ன்மையர் தனது அறிக்கையின் மூலம் அவர் என்ன குற்றங்களை ஆதரிக்கிறார் என்பது அவருக்குத் தெரியும். ZDF நேர்காணலில், அவர் கொத்து குண்டுகளைப் பயன்படுத்துவதில் அதற்கு “சார்புடையவர்” என்று அவர் சிடுமூஞ்சித்தனமாக குறிப்பிட்டார், ஏனெனில் அவர் ஜேர்மன் வெளியுறவு அமைச்சராக 2008 இல் இருந்தபோது, ஒஸ்லோவில் கொத்துக் குண்டுகளை தடை செய்யும் சர்வதேச உடன்படிக்கையில் கையெழுத்திட்டுள்ளார்.

ஆகஸ்ட் 1, 2010 இல் நடைமுறைக்கு வந்த இந்த உடன்படிக்கையில் கையெழுத்திட்ட 111 நாடுகளும், “எந்தச் சூழ்நிலையிலும், எவருக்கும் நேரடியாகவோ அல்லது மறைமுகமாகவோ, கொத்துக் குண்டுகளைப் பயன்படுத்தவோ, உருவாக்கவோ, உற்பத்தி செய்யவோ, கையகப்படுத்தவோ, சேமித்து வைக்கவோ அல்லது மாற்றவோ கூடாது” என்று உறுதியளித்தன. கொத்துக் குண்டுகளால் ஏற்படும் “துன்பத்தையும் மரணத்தையும் முடிவுக்குக் கொண்டுவர” அவர்கள் உறுதியாக இருந்தனர். “கொத்து குண்டுகளின் எச்சங்கள் பெண்கள் மற்றும் குழந்தைகள் உட்பட பொதுமக்களைக் கொல்லலாம் அல்லது காயப்படுத்தலாம்” என்று அந்த உடன்படிக்கை கூறுகிறது.

பதினைந்து ஆண்டுகளுக்குப் பிறகு, இவை ஆளும் வர்க்கத்தின் வெற்று வார்த்தைகளாக ஆகியுள்ளன. நிராயுதபாணியாக்கம், ஜனநாயகம், மனித உரிமைகள் போன்றவை எப்போதும் இவர்களின் வாய்ச்சவடால்களாக இருப்பதுடன், மிகவும் பயங்கரமான போர் ஆயுதங்களை நிலைநிறுத்துவதற்கு பெருகிய முறையில்  வெளிப்படையாக வேண்டுகோள்களை விடுக்கின்றன. உக்ரேனியப் போர்த் தாக்குதலின் வீழ்ச்சியை தவிர்க்கவும், ரஷ்யாவை போர்க்களத்தில் தோற்கடிக்கவும், வாஷிங்டனும் பேர்லினும் எந்த வழியையும் பயன்படுத்தத் தயாராக உள்ளன.

ZDF தொலைக்காட்சியில் பேசிய ஸ்டெய்ன்மயர் வெளிப்படையாக போரை விரிவுபடுத்த வேண்டும் என்று வாதிட்டார். தற்போது, போர்நிறுத்தத்திற்கு கற்பனை செய்யக்கூடிய நிலைமைகளை காணவில்லை என்று கூறிய ஜேர்மன் ஜனாதிபதி, “இந்த நேரத்தில், ரஷ்யா உக்ரேனில் வெகுமதி அளிக்கும் நிலத் திருட்டை மேற்கொள்ளுகிறது. உக்ரேனில் இருந்து ரஷ்யா தனது படைகளை வாபஸ் பெறாத வரையில், உக்ரேன் ரஷ்ய துருப்புக்களை முறியடிக்க முயற்சிக்கிறது என்பதை புரிந்து கொள்ள வேண்டும்” என்று அவர் கூறினார்.

அதன் கொடூரமான வரலாற்று குற்றங்கள் இருந்தபோதிலும், ஸ்டெய்ன்மயர் ஆளும் வர்க்கத்திற்காக பேசுகிறார். ரஷ்யாவை அடிபணியச் செய்யும் இலக்கை மேலும் தொடர, அதன் பரந்த மூலப்பொருட்களைக் கொள்ளையடித்து, ஒரு முன்னணி இராணுவ சக்தியாக உயரும் நோக்கில், மீண்டும் ரஷ்யாவை அடிபணியச் செய்யும் இலக்கை ஜேர்மன் ஆளும் வர்க்கம் தொடர்கிறது. பல நாட்களாக, அரசியலில் உள்ள போர்வெறியர்களும், ஊடகங்களும் போர் முயற்சியை அதிகரிக்க தங்கள் கோரிக்கைகளுடன் போட்டி போட்டுக் கொண்டிருக்கின்றனர். அனைத்து தடைகளும் கைவிடப்படுகின்றன.

உலக சோசலிச வலைத் தளம் ஏற்கனவே ஸ்பீகல் (உக்ரேனுக்கு தேவையான அனைத்தையும் கொடுங்கள் - புடினுக்கு எதிரான வெற்றி நமக்கு என்ன அர்த்தம்) மற்றும் Frankfurter Allgemeine Zeitung (கவுன்டர்-குட்டன்பெர்க்கின் திட்டம்) ஆகியவற்றின் சமீபத்திய வர்ணனைகள் குறித்து ஏற்கனவே கருத்து தெரிவித்துள்ளது. உக்ரேனுக்கு வரம்பற்ற ஆயுத விநியோகமானது, ஐரோப்பா முழுவதும் “டாங்கிகளின் போர்களுக்கான” தயாரிப்புகளை பரிந்துரைக்கிறது. உள்ளடக்கம் மட்டுமல்ல, இதில் பயன்படுத்தப்படும் சிடுமூஞ்சித்தனம் மற்றும் பொய்களும் நாஜிக்களின் போர்ப் பிரச்சாரத்தை மீண்டும் நினைவூட்டுகின்றன.

“பல அரசுகளால் தடைசெய்யப்பட்ட கிளஸ்டர் கொத்துக் குண்டுகளை உக்ரேனுக்கு அமெரிக்கா இப்போது வழங்க விரும்புகிறது என்ற தார்மீக சீற்றம் நியாயமற்றது” என்று Die Welt பத்திரிகையின் தலைமை வெளியுறவு செய்தியாளர் க்ளெமென்ஸ் வெர்ஜின், “கிளஸ்டர் கொத்துக்குண்டுகள் ஏன் தார்மீக ரீதியாக உக்ரேனுக்கு நியாயமானவை” என்ற தலைப்பில் ஒரு வர்ணனையில் உற்சாகப்படுத்துகிறார். “போரின் தொடக்கத்தில் இருந்து ரஷ்யா இந்த வகையான வெடிகுண்டுகளை, பொதுமக்கள் உட்பட இலக்குகளுக்கு எதிராக பெருமளவில் பயன்படுத்தியிருந்தாலும், சர்வதேச போர் சட்ட விதிகளை தொடர்ந்து மதிக்க முயற்சிக்கும் உக்ரேனியர்களின் நிலை இதுதான் என்று கருத முடியாது” என்று அவர் மேலும் குறிப்பிடுகிறார்.

வெறுக்கத்தக்கது எது என்று ஒருவருக்கு தெரியாது என்பது ஏற்றுக்கொள்ள முடியாதது. போர்க்குற்றங்கள் மீதான வெர்ஜினின் இரட்டை நிலைப்பாடு, பாசிச சக்திகளால் அமுல்படுத்தப்பட்ட உக்ரேனிய ஆட்சியை மகிமைப்படுத்துதல் அல்லது வலது கரங்களில் சர்வதேச சட்டத்தை மீறும் ஆயுதங்கள் “சர்வதேச போர்ச் சட்டங்களுக்கு” இணங்கி, பொதுமக்களைப் பாதுகாக்கின்றன என்ற வெளிப்படையான கூற்று அபத்தமானதாகும்.

அதே நேரம், மற்றவர்கள் வெளிப்படையாக அணுசக்தி விரிவாக்கத்தை ஆதரிக்கின்றனர். 2006 முதல் 2020 வரை நேட்டோவின் தலைமைச் செயலகத்தில், ஜேர்மனி சார்பாக உயர் பதவியில் இருந்த ஸ்டெபானி பாப்ஸ்ட் என்பவர், உக்ரேனை வில்னியஸில் உடனடியாக “உறுப்பினர்களின் வட்டத்திற்குள்” நேட்டோ ஏற்றுக்கொள்ள வாய்ப்பில்லை என்று ஒரு வர்ணனையில் புகார் கூறினார். எவ்வாறாயினும், நேட்டோவின் அணுசக்தி பகிர்வு ஏற்பாட்டிற்கு வார்சோவில் உள்ள அரசாங்கம் சில காலமாக அனுமதி கோரி வருவது, நம்பிக்கையின் “ஒரு மிளிர்ச்சியாகும்” என்று கூறினார்.

பாப்ஸ்டின் நேர்மையற்ற திட்டத்தின்படி, அமெரிக்கா போலந்து மற்றும் அதன் தலைநகர் வார்சோவில் “B61 ரக அணுகுண்டுகள், தற்போதுள்ள F-16 மற்றும் அமெரிக்காவால் ஆர்டர் செய்யப்பட்ட F-35 போர் விமானங்கள் அணுவாயுதத்தை ஏவுகின்ற திறன் கொண்ட அமைப்புகளுடன்” நிலைகொள்கிறது. “இருதரப்பு பாதுகாப்பு ஒப்பந்தத்தின் கீழ் உக்ரேனை அப்போது இருக்கும் அணுசக்தி குடையின் கீழ் வைக்க வார்சோ ஒப்புக்கொண்டால், கிரெம்ளின் இந்த புதிய மூலோபாய வலிமை பற்றி ஆழமாக சிந்திக்க வேண்டிய கட்டாயம் ஏற்படும்” என்று பாப்ஸ்ட் குறிப்பிட்டார்.

Die Welt பத்திரிகையின் அதன் பிரஸ்ஸல்ஸ் நிருபர் கிறிஸ்டோப் பி. ஷில்ட்ஸ் எழுதிய மற்றொரு வர்ணனையும் உக்ரேனின் இராணுவத்தை “போரை வெல்லும் அளவிற்கு” மேம்படுத்த வேண்டும் என்று வாதிடுகிறது. இப்போது, “எல்லாவற்றிற்கும் மேலாக, நீண்ட தூர கண்டம் விட்டு கண்டம் பாயும் ஏவுகணைகள் (ATACMS), கண்ணிவெடிகளை அழிக்கும் டாங்கிகள், F-16 போர் விமானங்கள், விமான எதிர்ப்பு அமைப்புகள் (பட்ரியோய்ட், ஐரிஸ்-டி ரகம்) மற்றும் பீரங்கி குண்டுகள் ஆகியவை உக்ரேனிடம் இல்லை” என்று ஷில்ட்ஸ் குமுறுகிறார். துரதிர்ஷ்டவசமாக, “கிரெம்ளின் சர்வாதிகாரி புட்டினை அதிகமாகத் தூண்டிவிடக் கூடாது என்பதில் பைடன், ஸ்கோல்ஸ் & கோ இன்னும் பந்தயம் கட்டுகின்றனர்” என்று குறிப்பிடுகிறார்.

இத்தகைய அறிக்கைகள் பைத்தியக்காரத்தனத்தின் தற்கொலைக்கான எல்லையாகும். பாப்ஸ்ட் & கோ உண்மையில் போரின் அணுவாயுத விரிவாக்கத்தை பற்றி எழுதுகிறார்கள். அவர்கள் இதன் பின்விளைவுகளைப் பற்றி சிந்திப்பது கூட இல்லை. வார்சோ, பேர்லின் மற்றும் பிற முக்கிய ஐரோப்பிய நகரங்கள் அணு ஆயுத அழிப்புப் போரின் முதல் இலக்குகளாக இருக்கும்.

நேட்டோ உச்சிமாநாட்டின் நோக்கத்தைப்பற்றி உலக சோசலிச வலைத்தளம் ஏற்கனவே எச்சரித்துள்ளது: “நேட்டோவின் இராணுவம் ரஷ்யாவைத் தோற்கடிக்க அச்சுறுத்தினால், ரஷ்யாவின் இராணுவக் கோட்பாடு அணு ஆயுதங்களைப் பயன்படுத்துவதாக இருக்கும், இது ஒரு அணு ஆயுதப் போரைத் தூண்டுகிறது, இதில் ரஷ்ய அணு ஆயுதங்கள் மட்டுமே அமெரிக்காவின் ஒவ்வொரு பெரிய நகரத்தையும் அழிக்கும் திறன் கொண்டவை ஆகும், ஆனால் மனித நாகரிகத்தை முற்றிலுமாக அழித்துவிடும்.”

போரின் பைத்தியக்காரத்தனம் புறநிலைக் காரணங்களைக் கொண்டுள்ளது. ஏகாதிபத்திய சக்திகளின் பெருகிய முறையில் ஆக்கிரோஷமான தோரணைக்கு பின்னால் பூகோள அரசியல் இலக்குகள் மற்றும் ஆழமான உள் நெருக்கடி ஆகியவற்றின் நச்சுக் கலவை உள்ளது. 1930 களில் இருந்ததைப் போலவே, ஆளும் வர்க்கம் முதலாளித்துவ அமைப்பின் ஆழமான நெருக்கடிக்கு இராணுவவாதம், பாசிசம் மற்றும் போருக்குத் திரும்புவதன் மூலம் விடையிறுக்கிறது. தொழிலாள வர்க்கம் இந்த ஆபத்தான வளர்ச்சியை அதன் சொந்த சுயாதீன மூலோபாயத்துடன் எதிர்க்க வேண்டும் மற்றும் ஒரு சோசலிச வேலைத்திட்டத்தின் அடிப்படையில் ஒரு சக்திவாய்ந்த சர்வதேச போர் எதிர்ப்பு இயக்கத்தை கட்டியெழுப்ப வேண்டும்.