மொழிபெயர்ப்பின் மூலக் கட்டுரையை இங்கே காணலாம்.
காசா பகுதியை இஸ்ரேல் முற்றுகையிட்டதற்கு எதிராக பாலஸ்தீனியர்கள் ஆயுதமேந்திய கிளர்ச்சியைத் தொடங்கி ஒரு வாரத்திற்குப் பிறகு, காசா மீதான இஸ்ரேலின் போருக்கு எதிராக சர்வதேச அளவில் போராட்டங்கள் வெடித்து வருகின்றன.
பெஞ்சமின் நெதன்யாகுவின் பாசிச ஆட்சி, 1.1 மில்லியன் பாலஸ்தீனியர்களை காசா நகரத்திலிருந்து வெளியேறி, இஸ்ரேல் பாதுகாப்புப் படைகளால் (IDF) குண்டுவீசித் தாக்கப்பட்ட சாலைகள் வழியாக தெற்கு நோக்கிச் செல்லும்படி உத்தரவிட்டுள்ளது. இஸ்ரேல், இப்போது காசாவிற்கு தண்ணீர், எரிபொருள் மற்றும் மின்சாரத்தை துண்டித்துள்ளது, மேலும் அதன் தலைவர்கள் பாலஸ்தீனியர்களை “மனித விலங்குகள்” என்று அழைத்து, அவர்கள் மீதான இனப்படுகொலைக்கு குறிவைக்கின்றனர்.
இஸ்ரேலிய ஆட்சி மற்றும் அதன் நேட்டோ கூட்டாளிகள் செய்து வருகின்ற குற்றங்களின் அளவு தெளிவாகிவரும் நிலையில், பாலஸ்தீனியர்கள் மீதான ஊடக கண்டனங்கள், போலீஸ் மிரட்டல்கள் மற்றும் எதிர்ப்புத் தடைகள் ஆகியவற்றிற்கு தைரியமாக கீழ்ப்படியாமல் உலகம் முழுவதும் எதிர்ப்பு போராட்ங்கள் வெடித்துள்ளன.
கடந்த வெள்ளிக்கிழமை நியூயோர்க் நகரில் மிக முக்கியமான ஆர்ப்பாட்டம் நடந்தது. முழு அமெரிக்க அரசியல் ஸ்தாபனம் மற்றும் பெருநிறுவன ஊடகங்களின் இடைவிடாத இஸ்ரேல் சார்பு பிரச்சாரத்தை வெளிப்படையாக மீறி, பாலஸ்தீனத்திற்கு எதிரான தாக்குதலை எதிர்க்க ஆயிரக்கணக்கானோர் அங்கு திரண்டனர். உலக ஏகாதிபத்தியத்தின் மையத்தில், எந்த ஒரு அமெரிக்க நகரத்திலும் இல்லாத யூத மக்கள்தொகையில் மிகப் பெரிய மக்கள் வசிக்கும் ஒரு இடத்தில், காஸாவில் வெளிவரும் குற்றங்கள் குறித்து வெகுஜன மக்கள் (1,000 யூதர்கள் உட்பட) தங்கள் வெறுப்பை வெளிப்படுத்தினர்.
வெள்ளியன்று நூற்றுக்கணக்கான மக்கள் சம்பந்தப்பட்ட இதர போராட்டங்கள் பிட்ஸ்பேர்க், போர்ட்லேண்ட் மற்றும் வாஷிங்டன் டி.சி. ஆகிய இடங்களில் நடந்துள்ளன. இந்த வார இறுதியில் அமெரிக்கா முழுவதும் பெரிய ஆர்ப்பாட்டங்கள் நடத்த திட்டமிடப்பட்டுள்ளது. இஸ்ரேலியக் கொள்கைகளுக்கு எதிரான அனைத்து எதிர்ப்புக்களையும் “யூத-விரோதக்” கொள்கைகளாகவும், பாலஸ்தீனியர்களுக்கு அனுதாபம் உள்ளவர்களைத் தனிமைப்படுத்தவும் ஊடகங்கள் மற்றும் அரசியல்வாதிகள் முயற்சிகள் செய்து வருகின்ற போதிலும், தொழிலாளர்கள் மற்றும் இளைஞர்கள் மத்தியில் அனைத்துப் பின்னணியிலும் எதிர்ப்புகள் உருவாகி வருகிறது. 2021 ஆம் ஆண்டு நடத்தப்பட்ட கருத்துக் கணிப்பில், அமெரிக்க யூதர்களில் கால் பகுதியினர் இஸ்ரேலை பாலஸ்தீனியர்களுக்கு விரோதமான ஒரு “இனவெறி நாடாக” கருதுகின்றனர் என்று தெரிவித்துள்ளது. இந்த எண்ணிக்கை தொடர்ந்து வளர்ச்சியடையும்.
பிரிட்டிஷ் ஊடகங்கள் மற்றும் அரசியல் ஸ்தாபனத்தின் இதேபோன்ற பிரச்சாரம் மற்றும் அச்சுறுத்தல்களை மீறி, ஆயிரக்கணக்கானோர் வெள்ளியன்று லண்டன் தெருக்களில் இறங்கினர்.
நூறாயிரக்கணக்கான மக்களை உள்ளடக்கிய தொடர்ச்சியான பெரிய ஆர்ப்பாட்டங்கள் மத்திய கிழக்கு முழுவதும் பரவின. ஜோர்டானில், இஸ்ரேல் ஆக்கிரமித்துள்ள மேற்குக் கரையுடன் ஜோர்டான் எல்லையைத் திறக்கக் கோரி, தலைநகர் அம்மானில் மாபெரும் போராட்டங்கள் நடந்தன. கூட்டமாக இஸ்ரேலின் எல்லையை நோக்கி அணிவகுத்துச் சென்ற ஆர்ப்பாட்டக்காரர்களை, ஜோர்டான் பொலிசார் தொடர்ந்து செல்ல விடாமல் திருப்பி அனுப்பினர்.
ஏமன் தலைநகர் சனா மற்றும் ஈரான் தலைநகர் தெஹ்ரானில் பெரிய ஆர்ப்பாட்டங்கள் நடந்தன. கெய்ரோவில் அல் அசார் மசூதிக்கு முன்னால் பல்லாயிரக்கணக்கான மக்கள் ஒன்றுகூடி, “பாலஸ்தீனத்தை விடுதலை செய்” என்று கோஷமிட்டனர். துனிஸில் காசாவுக்கு ஆதரவாக ஊர்வலம் செல்வதற்கான அரசின் தடையை ஆயிரக்கணக்கானோர் மீறினர். 1991 வளைகுடாப் போருக்குப் பிறகு, பல தசாப்தங்களாக அமெரிக்கா தலைமையிலான பொருளாதாரத் தடைகள், போர் மற்றும் ஆக்கிரமிப்புக்குப் பிறகு ஒரு மில்லியனுக்கும் அதிகமான உயிர்களை இழந்த ஈராக்கில், நூறாயிரக்கணக்கான மக்கள் பாக்தாத்தில் அணிவகுத்துச் சென்றனர்.
மத்திய கிழக்கில் உள்ள எதிர்ப்பாளர்கள் இஸ்ரேலிய ஆட்சியை மட்டுமல்ல, பல தசாப்தங்களாக பாலஸ்தீனியர்களுக்கு துரோகம் இழைத்த அவர்களது சொந்த அரசாங்கங்களையும் எதிர்க்கின்றனர். அரபு முதலாளித்துவத்தின் பாத்திரம் எகிப்திய இராணுவ சர்வாதிகாரத்தின் காட்டிக்கொடுப்பினால் விளக்கப்படுகிறது. 1978 இல் இஸ்ரேலுடன் ஒரு ஒப்பந்தத்தில் கையெழுத்திட்ட பிறகு, எகிப்து இப்போது காஸாவிலிருந்து வெளியேற முயற்சிக்கும் பாலஸ்தீனியர்களுக்கு அதன் எல்லைகளை மூடியுள்ளது.
இஸ்ரேலிலேயே, இப்போது உத்தியோகபூர்வ எதிர்க்கட்சியுடன் இணைந்துள்ள, நெத்தன்யாகுவின் அரசாங்கத்தால் வளர்க்கப்பட்ட தீவிர பிற்போக்குத்தனமான அரசியல் சூழ்நிலை இருந்தபோதிலும், அதிருப்திகள் வெடிக்கும் நிலையில் உள்ளது. நீதித்துறையின் சுதந்திரத்தை குறைமதிப்பிற்கு உட்படுத்தும் நெதன்யாகுவின் முயற்சிக்கு எதிராக மில்லியன் கணக்கானவர்கள் இந்த ஆண்டின் தொடக்கத்தில் போராட்டங்களில் இணைந்தனர். 3,000ம் பிரதான யூத அறிவுஜீவிகள், “அறையில் யானை” என்ற தலைப்பில் எழுதிய கடிதம், நீதித்துறை மீதான தாக்குதல், ஹமாஸ் எழுச்சிக்கு வழிவகுத்த நிலைமைகளுடன் நெருக்கமாகப் பிணைந்துள்ளது என்று தெளிவுபடுத்தியுள்ளது.
அந்தக் கடிதத்தில் கூறப்பட்டுள்ளதாவது:
(அங்கே ஒரு) நீதி அமைப்பு மீதான சமீபத்திய இஸ்ரேலிய தாக்குதலுக்கும், ஆக்கிரமிக்கப்பட்ட பாலஸ்தீனிய பிரதேசத்தில் பாலஸ்தீனியர்களை சட்டவிரோதமாக ஆக்கிரமித்ததற்கும் இடையே நேரடி தொடர்புகள் உள்ளன. பாலஸ்தீன மக்களின் வாக்குரிமை மற்றும் ஆர்ப்பாட்டம் உள்ளிட்ட அனைத்து அடிப்படை உரிமைகளும் பறிக்கப்பட்டுள்ளன. அவர்கள் தொடர்ந்து வன்முறையை எதிர்கொள்கின்றனர்: இந்த ஆண்டில் மட்டும், இஸ்ரேலியப் படைகள் மேற்குக் கரை மற்றும் காஸாவில் 190க்கும் மேற்பட்ட பாலஸ்தீனியர்களைக் கொன்று, 590க்கும் மேற்பட்ட கட்டிடங்களை இடித்துள்ளன. குடியேற்றப்பட்ட பகுதியில் உள்ள காவலர்கள் தண்டனையின்றி எரித்து, கொள்ளையடித்து, கொலை செய்கிறார்கள்.
இஸ்ரேலிய சட்ட வல்லுனர்கள் விவரித்ததைப் போல பாலஸ்தீனியர்கள் இனவெறி ஆட்சியின் கீழ் வாழும் வரை, இஸ்ரேலில் யூதர்களுக்கு ஜனநாயகம் இருக்க முடியாது. உண்மையில், நீதித்துறை மறுசீரமைப்பின் இறுதி இலக்கு, காஸா மீதான கட்டுப்பாடுகளை வலுப்படுத்துவது, பச்சை கோட்டிற்கு அப்பால் பாலஸ்தீனியர்களின் சம உரிமைகளைப் பறித்து, மேலும் அவர்களின் நிலத்தை இணைத்து, இஸ்ரேலிய ஆதிக்கத்தின் கீழ், பாலஸ்தீனிய மக்களின் அனைத்து பிரதேசங்களையும் இன ரீதியாக சுத்தப்படுத்துவது ஆகும்.
அனைத்து பெரிய ஏகாதிபத்திய சக்திகளும் பாலஸ்தீனியர்களுக்கு எதிராக, நெதன்யாகுவின் போருக்கு ஆதரவளிப்பதன் மூலம் அம்பலப்பட்டு நிற்கின்றன. ஞாயிற்றுக்கிழமை அக்டோபர் 8 அன்று, பிரான்ஸ், இத்தாலி, ஜேர்மனி, பிரிட்டன் மற்றும் அமெரிக்கா ஆகிய நாடுகளின் தலைவர்கள் “இஸ்ரேல் அரசுக்கு உறுதியான மற்றும் ஒன்றுபட்ட ஆதரவையும், ஹமாஸை சந்தேகத்திற்கு இடமின்றி கண்டிப்பதாகவும்” உறுதியளித்தனர். வெள்ளிக்கிழமை கட்டாரில் நடைபெற்ற செய்தியாளர் சந்திப்பில், அமெரிக்க வெளியுறவு அமைச்சர் ஆண்டனி பிளிங்கன் இஸ்ரேலிய குற்றங்களை மன்னிப்பதில் இரட்டிப்பாக்கினார்.
இஸ்ரேல் “ஆவேசத்துடன் பதிலடி கொடுக்கிறதா” மற்றும் அமெரிக்கா அதை ஆதரிக்கிறதா என்று ஒரு நிருபர் கேட்டபோது, பிளிங்கன் முழுமையான பாசாங்குத்தனத்துடன் இதற்கு பதிலளித்தார்: “இஸ்ரேல் செய்வது பழிவாங்கும் நடவடிக்கை அல்ல. இஸ்ரேல் தனது மக்களின் உயிரைப் பாதுகாக்கிறது.... இஸ்ரேல் அனுபவித்த துன்பங்களை எந்த நாடும் எதிர்கொண்டாலும் அதையே செய்யும் என்று நான் நினைக்கிறேன்” என்று குறிப்பிட்டார்.
நேட்டோ சக்திகள் இதன்மூலம் என்ன செய்தியை அனுப்புகின்றன? அவர்கள் உலக அளவில் ஏகாதிபத்திய காலனித்துவ ஆட்சியின் புதிய சகாப்தத்தை உருவாக்குவதை நோக்கமாகக் கொண்டுள்ளனர். 16 ஆண்டுகளாக இஸ்ரேலிய அரசால் திணிக்கப்பட்ட காசா மீதான சட்டவிரோத முற்றுகை, வறிய பகுதிகளுக்கு உணவு மற்றும் மருந்துகள் மறுப்பு அல்லது அதன் குடிமக்கள் மீதான இலக்கு வைக்கப்பட்ட படுகொலைகள் என்பனவற்றை அவர்கள் பொறுத்துக்கொள்ள மாட்டார்கள். ஏகாதிபத்திய குண்டர் கும்பல்களின் இந்த ஐக்கிய முன்னணி, பாலஸ்தீனிய மக்கள் மீதான அவர்களின் கொள்கையை ஒரே வாக்கியத்தில் சுருக்கமாகச் சொன்னால், அது, “நீங்கள் அடிமைகளாக இருந்தீர்கள், நீங்கள் அடிமைகளாக இருக்கிறீர்கள்” என்பதாகும்.
கடந்த வெள்ளிக்கிழமை, மேற்கத்திய ஊடகங்களில் கிட்டத்தட்ட முழுமையாக அறிவிக்கப்படாது வெளிவந்த ஒரு காணொளியில், ஹமாஸ் அதிகாரி பாசிம் நைம், அக்டோபர் 7 கிளர்ச்சிக்கு வழிவகுத்த இஸ்ரேலிய அடக்குமுறையின் பின்னணியை சுருக்கமாகக் கூறினார்:
75 ஆண்டுகால ஆக்கிரமிப்பைப் பற்றி நாங்கள் பேசுகிறோம், இஸ்ரேல், மோதலைத் தீர்ப்பதற்கான அனைத்து அரசியல் மற்றும் சட்ட வழிகளையும் புறக்கணித்து நிராகரித்து வந்தது. இஸ்ரேலிய எதிரிகள் பாலஸ்தீன மக்களின் இருப்பு மற்றும் அவர்களின் தேசிய உரிமைகளை மறுக்கும் கொள்கையை தொடர்ந்தனர். கடந்த சில மாதங்களாகவும், பல ஆண்டுகளாகவும், தளத்தின் நிலைமை தாங்க முடியாதது என்றும், வெடிப்பு சிறிது நேரம் மட்டுமே தாங்கும் என்றும் எச்சரித்திருந்தோம்.
அல்-அக்ஸா மசூதியில் இஸ்ரேல் தொடர்ந்து அத்துமீறல்கள் மற்றும் அதன் நிலையை மாற்ற அவர்கள் மேற்கொள்ளும் முயற்சிகள் குறித்து நாங்கள் பலமுறை எச்சரித்துள்ளோம். ஆக்கிரமிக்கப்பட்ட மேற்குக் கரை முழுவதும் குடியேற்றப்பட்ட, பாசிசக் குடியேற்றக்காரர்களால் மேற்கொள்ளப்பட்ட அரச பயங்கரவாதம் குறித்தும் எச்சரித்துள்ளோம். ஜெருசலேமிலிருந்து எங்கள் மக்களை வலுக்கட்டாயமாக வெளியேற்றுவது குறித்தும் எச்சரித்துள்ளோம். இஸ்ரேலிய சிறைகளில் உள்ள பெண்கள் மற்றும் குழந்தைகள் உட்பட எங்கள் சிறைக் கைதிகளுக்கு எதிராக திட்டமிட்ட குற்றங்கள் குறித்தும் எச்சரித்துள்ளோம்.
இறுதியாக, 17 ஆண்டுகளுக்கும் மேலாக காஸா மீதான இஸ்ரேலிய முற்றுகை குறித்து நாங்கள் எச்சரித்துள்ளோம், இது ஒரு போர்க்குற்றமாகும், இது காஸாவை பூமியின் மிகப்பெரிய திறந்தவெளி சிறைச்சாலையாக மாற்றியுள்ளது, அங்கு முழுத் தலைமுறையும் நம்பிக்கையை இழந்துள்ளது. ஆனால் துரதிர்ஷ்டவசமாக, இந்த எச்சரிக்கைகளுக்கு யாரும் செவிசாய்க்கவில்லை. சர்வதேச சமூகம், குறிப்பாக மேற்கத்திய நாடுகள், இஸ்ரேல் தனது குற்றங்களைத் தொடர்வதற்கு, அனைத்து மட்டங்களிலும் மறைமுகமான மூடிமறைப்புக்களை தொடர்ந்தும் வழங்கி வருகின்றன.
காஸாவுக்கு எதிரான தங்கள் போரைத் தொடர்வதன் மூலம், இஸ்ரேலிய அரசாங்கமும் மேற்கத்திய ஏகாதிபத்திய சக்திகளும் இந்த வரலாற்றுச் சூழலை அழித்து, தொடர்ச்சியான அட்டூழிய பிரச்சாரத்தால் மக்களை மழுங்கடிப்பதை நோக்கமாகக் கொண்டுள்ளன.
இஸ்ரேலிய குடிமக்களின் மரணங்கள் சந்தேகத்திற்கு இடமின்றி சோகமானவை என்றாலும், இந்த வன்முறையானது ஒரு பெரும் ஆயுதமேந்திய ஒடுக்குமுறையாளருக்கு எதிராக பாரியளவில் ஒடுக்கப்பட்ட மக்கள் கிளர்ச்சியின் பின்னணியில் நிகழ்ந்தது. பாலஸ்தீனிய வன்முறையின் அனைத்து கணக்குகளையும் ஒருவர் ஏற்றுக்கொண்டாலும், அது ஒரு கேள்வியை மட்டுமே எழுப்புகிறது — இத்தகைய வன்முறைக்கு என்ன வழிவகுக்கிறது?
ஒடுக்குமுறைக்கு எதிராக எழுச்சி பெறும் மக்கள்தொகையின் வன்முறை மற்றும் பரந்த இராணுவ மற்றும் நிதி ஆதாரங்களுடன் ஆயுதபாணியாக இருக்கும் முதலாளித்துவ அரசு இயந்திரங்களால் மேற்கொள்ளப்படும் பாரிய கொலைகளை கணக்கிடுவதை வரலாறு வித்தியாசமாக மதிப்பிடுகிறது. ஏகாதிபத்தியவாதிகள், காலனித்துவத்திற்கு எதிரான ஒடுக்கப்பட்டவர்களின் எதிர்ப்பானது, அவர்களின் காட்டுமிராண்டித்தனமான பழிவாங்கலை நியாயப்படுத்துகிறது என்று எப்போதும் கூறிவருகின்றனர். இந்த பழிவாங்கும் நடவடிக்கையில், அவர்கள் எப்போதும் ஒடுக்கப்பட்டவர்களை காட்டுமிராண்டிகளாகவும் கொலைகாரர்களாகவும் சித்தரித்துள்ளனர்.
1899 இல், ஏகாதிபத்திய செல்வாக்கு மண்டலங்களாக சீனாவை பிரிப்பதற்கு எதிராக குத்துச்சண்டை கிளர்ச்சி நடந்தது. இந்தக் கிளர்ச்சியில், கிறிஸ்தவ மிஷனரிமார்களை கிளர்ச்சியாளர்கள் கொன்றதையும், வெளிநாட்டவர்களின் சொத்துக்களை அவர்கள் கைப்பற்றியதையும் மேற்கோள் காட்டி, எட்டு ஏகாதிபத்திய சக்திகள் பெய்ஜிங்கை துடைத்துக் கட்டவும், கிளர்ச்சியை மேற்கொண்டவர்களை படுகொலை செய்யவும் படைகளை அனுப்பியது. சீனாவில் கொள்ளையடிப்பதைப் பகிர்ந்து கொள்வதில் இந்த சக்திகளுக்கு இடையே வளர்ந்து வந்த மோதல்கள் இறுதியில் 1930கள் மற்றும் 1940களில் ஜப்பானின் இரத்தக்களரி ஆக்கிரமிப்புக்கு வழிவகுத்தது, இது கிட்டத்தட்ட 20 மில்லியன் உயிர்களை பலிவாங்கிய நிலையில், 1949 புரட்சியைத் தூண்டியது, இது சீனாவின் காலனித்துவ ஆட்சியை முடிவுக்குக் கொண்டு வந்தது.
1904 இல், நமீபியாவில் உள்ள ஹெரேரோ மக்கள் ஜேர்மன் காலனித்துவ ஆட்சிக்கு எதிராக கிளர்ந்தெழுந்து, 100 க்கும் மேற்பட்ட ஜேர்மன் குடியேறிகளைக் கொன்றனர். ஜேர்மன் இராணுவம் ஹெரேரோவுக்கு எதிராக 20 ஆம் நூற்றாண்டின் முதல் இனப்படுகொலையை நடத்தியதன் மூலம் இதற்கு பதிலளித்தது. ஜேர்மன் இராணுவம் ஹெரேரோவுக்கு எதிராக 20 ஆம் நூற்றாண்டின் முதல் இனப்படுகொலையை நடத்தி, அவர்களை பாலைவனங்களுக்குத் தள்ளியது, அங்கு அவர்கள் தாகத்தால் இறந்தனர் அல்லது நாஜி ஆட்சியின் அழிவு முகாம்களை முன்னறிவிக்கும் மரண முகாம்களில் அவர்களை சிறையில் அடைத்தனர். 2015 இல், ஜேர்மன் அதிகாரிகள் இந்த இனப்படுகொலையை முறையாக ஒப்புக்கொண்டு அரச மன்னிப்புக் கோரினர்.
நெதன்யாகு ஆட்சியும் அதன் ஏகாதிபத்திய கூட்டாளிகளும் காசாவிற்கு எதிராக இதே போன்ற வழிமுறைகளை நாடுகின்றனர். இருப்பினும், 1905 மற்றும் அக்டோபர் 1917 ரஷ்ய புரட்சிகளுக்குப் பிறகு வெடித்த 20 ஆம் நூற்றாண்டின் மாபெரும் காலனித்துவ எதிர்ப்புப் போராட்டங்கள் வீண் போகவில்லை. உலகெங்கிலும் உள்ள தொழிலாளர்கள் மற்றும் இளைஞர்கள் மத்தியில், நெதன்யாகுவின் காட்டுமிராண்டித்தனமான வழிமுறைகள் கடும் சீற்றத்தை ஏற்படுத்தி வருகின்றன. உலகெங்கிலும் உள்ள தொழிலாளர்கள் மற்றும் இளைஞர்களின் பரந்த அடுக்குகளுக்கு, காஸாவிற்கு எதிராக திட்டமிட்டு நிகழ்த்தப்பட்டுவரும் குற்றங்களின் பிரமாண்டமான அளவு தெளிவாகத் தெரியும் போது இந்த எதிர்ப்பு மேலும் வளர்ச்சியடையும்.
நெதன்யாகுவின் குற்றங்களை ஆதரிப்பதற்காக நேட்டோ அதிகாரங்கள் கொடுத்துவரும் நியாயப்படுத்தல்கள் (அவர்கள் யூதர்களைப் பாதுகாப்பதாகவும், யூத-விரோதத்தை எதிர்ப்பதாகவும்) தகர்ந்து வருகிறது. உண்மையில், அவர்கள் யூதர்கள் மீதான படுகொலையை நடத்திய சக்திகளின் அரசியல் வழித்தோன்றல்களுடன் நெருக்கமான கூட்டணியில் இருப்பதோடு, பாலஸ்தீனியர்களுக்கு எதிரான நெதன்யாகுவின் இனப்படுகொலை பிரச்சாரத்தை ஆதரிக்கின்றனர்.
ஏறக்குறைய இரண்டு ஆண்டுகளாக, அவர்கள் நாஜி ஒத்துழைப்பாளரும் மற்றும் யூத-எதிர்ப்பாளருமான ஸ்டீபன் பண்டேராவின் நினைவைப் போற்றும் அசோவ் பட்டாலியன் போன்ற நவ-பாசிஸ்டுகளுடன் கூட்டணி வைத்து உக்ரேனில் ரஷ்யாவுக்கு எதிராக போரை நடத்தி வருகின்றனர். நேட்டோ இந்த உண்மையை மறுத்தது, அல்லது இது ரஷ்யாவின் பிரச்சாரம் என்று மேற்கொண்ட முயற்சிகள் வீழ்ச்சியடைந்தது. கடந்த மாதம், 98 வயதான உக்ரேனிய நாஜி போர்க் குற்றவாளியும் முன்னாள் Waffen SS ன் உறுப்பினருமான யாரோஸ்லாவ் ஹன்காவை, முழுக் கனேடிய நாடாளுமன்றமும் எழுந்து நின்று கைதட்டி வரவேற்றது.
முதலாளித்துவ ஆளும் உயரடுக்குகள் காட்டுமிராண்டித்தனத்தில் மூழ்கிய நிலையில், சர்வதேச தொழிலாள வர்க்கத்தின் மத்தியில் ஒரு பாரிய இயக்கம் உருவாகி வருகிறது. தொழிலாள வர்க்கத்தின் வளர்ந்து வரும் உலகளாவிய போராட்டங்களுக்கு மத்தியில் ஏகாதிபத்தியம் மற்றும் சியோனிசத்திற்கு எதிரான எதிர்ப்புக்கள் வெடித்து வருகின்றன. சுரண்டல், சிக்கனம், பணவீக்கம் மற்றும் போலீஸ் வன்முறைக்கு எதிரான வேலைநிறுத்தங்கள் இந்த ஆண்டு அனைத்து பெரிய ஏகாதிபத்திய சக்திகளையும் உலுக்கியுள்ளது, மேலும் வாரங்கள் மற்றும் மாதங்களில் இன்னும் இது மேலும் தீவிரமடையும்.
பாலஸ்தீனத்தின் விடுதலை என்பது, இஸ்ரேல் உட்பட சர்வதேச தொழிலாள வர்க்கத்தின் சக்திவாய்ந்த சோசலிச இயக்கத்தின் வளர்ச்சியின் பின்னணியில் மட்டுமே சாத்தியமாகும். இது, சியோனிச பேரினவாதத்தை தூக்கி எறிவதற்கும் பாலஸ்தீனிய மற்றும் இஸ்ரேலிய தொழிலாளர்களின் ஐக்கியத்திற்கும் நிலைமையை உருவாக்கும். காஸாவில் போருக்கு எதிரான போராட்டம், பாலஸ்தீனம், மத்திய கிழக்கு மற்றும் சர்வதேச அளவில் சோசலிசத்திற்கான போராட்டத்தில் தொழிலாள வர்க்கத்தை அணிதிரட்டி, தெளிவாக ஏகாதிபத்திய எதிர்ப்பு மற்றும் முதலாளித்துவ எதிர்ப்பு தன்மையை பெற வேண்டும்.