மொழிபெயர்ப்பின் மூலக் கட்டுரையை இங்கே காணலாம்.

பிரதான நேட்டோ சக்திகள் பிரஸ்ஸல்ஸ் உச்சிமாநாட்டை பயன்படுத்தி ரஷ்யாவிற்கு எதிரான போரை பாரியளவில் தீவிரப்படுத்த, அதன் இராணுவக் கூட்டணியின் 75வது ஆண்டு நிறைவைக் கொண்டாடுகின்றன. உக்ரேனிய இராணுவத்தின் உடனடி வீழ்ச்சியை தடுக்க, அணு ஆயுதத்துடன் நேரடி இராணுவ மோதலைத் தூண்டி, முழுக் கண்டத்தையும் பேரழிவுகரமான போரில் மூழ்கடிக்கும் நடவடிக்கைகளில் இந்தக் கூட்டணி தீவிரமாக செயல்பட்டு வருகிறது.

“இப்போது ஒரு போரை எதிர்கொண்டுள்ள ஐரோப்பா, வரலாற்றில் இருந்து விலகிவிட்டது என்று நாங்கள் நினைத்தோம்” என்று நேட்டோ வெளியுறவு அமைச்சர்கள் கூட்டத்தின் தொடக்கத்தில் நேட்டோ செயலாளர் ஜெனரல் ஜென்ஸ் ஸ்டோல்டன்பெர்க் ஒரு செய்திக்குறிப்பில் கூறினார். சமீபத்திய நாட்களில், ரஷ்யா உக்ரேனுக்கு எதிராக “பெரிய புதிய தாக்குதல்களைத்” தொடங்கியுள்ளது மற்றும் “போர் முன்னரங்கில் தனது நிலையை தொடர்ந்து தக்க வைத்துக் கொண்டுள்ளது”.

எனவே, “உக்ரேனுக்கான எமது ஆதரவில் நேட்டோ உறுதியாக நிற்க வேண்டும்” என ஸ்டோல்டன்பெர்க் குறிப்பிட்டார். “நேச நாடுகள் தொடர்ந்து ஆயுதங்கள், வெடிமருந்துகள் மற்றும் இராணுவ உபகரணங்களை பெரிய அளவில் வழங்குவதை” அவர் வரவேற்றார். எனினும், “கியேவிற்கு அவசரத் தேவைகள் உள்ளன, அதற்கு ஆதரவை வழங்குவதில் எந்த தாமதமும், நாம் பேசும் போது போர்க்களத்தில் விளைவுகளை ஏற்படுத்தும்” என அவர் எச்சரித்தார்.

அதிக இறப்பு எண்ணிக்கை (உக்ரேன் ஏற்கனவே நூறாயிரக்கணக்கான மக்களை போர்க்களத்தில் இழந்துள்ளது) மற்றும் அணு ஆயுத விரிவாக்கத்தின் பெருகும் ஆபத்து இருந்தபோதிலும், முன்னணி ஏகாதிபத்திய சக்திகள் தங்கள் போர் நோக்கத்தில் இருந்து விலக விரும்பவில்லை. அவை, கியேவை தங்கள் கட்டுப்பாட்டின் கீழ் கொண்டு வருவதற்கும், வளங்கள் நிறைந்த மற்றும் பூகோள மூலோபாய முக்கியத்துவம் வாய்ந்த யூரேசிய நிலப்பரப்பை முழுவதுமாக அடிபணிய வைப்பதற்கும், உக்ரேனில் ரஷ்யா மீது இராணுவ தோல்வியை சுமத்த முயற்சிக்கின்றன.

“உக்ரேன் நேட்டோவில் உறுப்பினராகும். இல்லை என்றால் எப்போது என்பது ஒரு கேள்வி” என்று ஸ்டோல்டன்பெர்க் வலியுறுத்தினார். உக்ரேனில் ரஸ்யா மீதான நேட்டோவின் தாக்குதல் ஏகாதிபத்திய சக்திகளின் உலகளாவிய போரின் ஒரு பகுதியாகும் என்பதில் அவருக்கு எந்த சந்தேகமும் இல்லை.

“எமது பாதுகாப்பு பிராந்தியத்தில் அல்ல, அது உலகளாவியது என்பது எங்களுக்குத் தெரியும்” என்று நேட்டோ பொதுச் செயலாளர் கூறினார். “உக்ரேன் போர் இதை தெளிவாக விளக்குகிறது. ஆசியாவில் ரஷ்யாவின் நண்பர்கள், அதன் ஆக்கிரமிப்புப் போரைத் தொடர்வதற்கு இன்றியமையாதவர்கள். ரஷ்யாவின் போர் பொருளாதாரத்தை சீனா ஆதரிக்கிறது. மாற்றாக, மாஸ்கோ அதன் எதிர்காலத்தை பெய்ஜிங்கின் நலனுக்காக அடமானம் வைக்கிறது. வடகொரியாவும் ஈரானும் அதிக அளவில் ஆயுதங்கள் மற்றும் வெடிமருந்துகளை வழங்குகின்றன. பதிலுக்கு, பியாங்யாங் மற்றும் தெஹ்ரான் ரஷ்ய தொழில்நுட்பம் மற்றும் பொருட்களைப் பெறுகின்றன, அவை அவற்றின் பாலிஸ்டிக் ஏவுகணை மற்றும் அணு ஆயுத திறன்களை மேம்படுத்த உதவுகின்றன” என்று அவர் மேலும் தெரிவித்தார்.

எனவே நேட்டோ அழைக்கப்பட்டு, “எங்கள் ஆதரவின் இயக்கவியலை மாற்ற வேண்டும்”. “நீண்ட காலத்திற்கு உக்ரேனுக்கு நம்பகமான மற்றும் யூகிக்கக்கூடிய பாதுகாப்பு உதவிக்கு உத்தரவாதம் அளிப்பது அவசியம்.… அதனால் நாங்கள் தன்னார்வ பங்களிப்புகளில் குறைவாகவும், நேட்டோவின் கடமைகளில் அதிகமாகவும் சார்ந்திருக்கிறோம்.” மற்றும் “இராணுவ உபகரணங்களை ஒருங்கிணைப்பதற்கும், உக்ரேனுக்கான பயிற்சியை ஒரு வலுவான நேட்டோ கட்டமைப்பிற்குள் நங்கூரமிடுவதற்கும், நேட்டோ எவ்வாறு அதிக பொறுப்பை ஏற்க முடியும்” என்பது பற்றி இந்த கூட்டத்தில் விவாதிக்கப்படும். மற்றொரு பிரச்சினை “எங்கள் ஆதரவைத் தக்கவைப்பதற்கான பல ஆண்டு நிதி அர்ப்பணிப்பு” ஆகும் என்று அவர் மேலும் தெரிவித்தார்.

ஸ்டோல்டன்பெர்க் இதுபற்றிய உறுதியான விவரங்களைத் தரவில்லை. ஆனால், ஜூலை மாதம் வாஷிங்டனில் நேட்டோ உச்சிமாநாட்டிற்கு முன்னதாக நேட்டோ சக்திகள் பாரியளவில் போரை விரிவுபடுத்தும் பணியில் ஈடுபட்டுள்ளன என்பது தெளிவாகிறது. ஊடக அறிக்கைகளின்படி, அடுத்த ஐந்து ஆண்டுகளில் உக்ரேனுக்கான 100 பில்லியன் யூரோ போர் நிதியும் இதில் அடங்கும். அதே நேரத்தில், நேட்டோ இராணுவக் கூட்டணி ரஷ்ய எல்லையில் எப்போதும் அதிகரித்து வரும் துருப்புக்களைத் திரட்டி மிகப்பெரிய இராணுவப் பயிற்சிகளை ஏற்பாடு செய்து வருகிறது.

10,000ம் துருப்புக்கள் மற்றும் அவர்களது குடும்பங்களுக்கு இடமளிக்கும் வகையில், ஐரோப்பாவில் மிகப்பெரிய நேட்டோ தளம் தற்போது ருமேனியாவில் கட்டப்பட்டு வருகிறது. லிதுவேனியாவில் இரண்டு போர் படைப் பிரிவுகளை நிரந்தரமாக நிலைநிறுத்த ஜேர்மனி தயாராகி வருகிறது. அதே நேரத்தில், உக்ரேனில் தரைப்படைகளை நிலைநிறுத்துவது குறித்து விவாதங்கள் நடந்து வருகிறது. சமீபத்தில் மார்ச் மாத இறுதியில், பிரெஞ்சு இராணுவத்தின் தளபதி பியர் சீல், பிரான்ஸ் “30 நாட்களில் 20,000ம் துருப்புக்களை நிலைநிறுத்த முடியும்” என்று பெருமையாகக் கூறினார்.

குறிப்பாக முன்னணி ஐரோப்பிய நேட்டோ சக்திகள் உக்ரேனிய இராணுவத்தின் தோல்விக்கு பதிலடி கொடுக்கும் வகையில், போரில் வலுவான ஐரோப்பிய பங்கை ஆதரிக்கும் அறிவிப்புகளுடன் தயாராக உள்ளன. அமெரிக்க நாளேடான பொலிட்டிகோவில் வெளியிடப்பட்ட ஒரு கட்டுரையில், ஜேர்மனி, பிரான்ஸ் மற்றும் போலந்தின் வெளியுறவு மந்திரிகளான அன்னலெனா பேர்பாக், ஸ்டீபன் செஜோர்னே மற்றும் ராடோஸ்லாவ் சிகோர்ஸ்கி ஆகியோர் உக்ரேனுக்குத் “தேவைப்படும் வரையிலும், தேவையான அளவுக்கு அதிகமாகவும், தங்கள் ஆதரவைத் தொடருவோம்” என்று அறிவித்துள்ளனர்.

அவ்வாறு செய்வதன் மூலம், வெய்மர் முக்கோணத்தின் (Weimar Triangle) வெளியுறவு அமைச்சர்கள் மோதலுக்கு எந்த இராஜதந்திர தீர்வையும் நிராகரித்து, போரை நீடிப்பதற்கு வாதிடுகின்றனர். “ஐரோப்பா அமைதியாக இருக்க, ரஷ்ய ஏகாதிபத்தியம் முடிவுக்கு கொண்டுவரப்பட வேண்டும். எந்த சாம்பல் மண்டலங்களையும் நாங்கள் அனுமதிக்க முடியாது. ஏனெனில் புட்டின், பிராந்திய ஒருமைப்பாடு மற்றும் இறையாண்மையை குறைமதிப்பிற்கு உட்படுத்துவதற்கான அழைப்பாக வரைபடத்தில் கற்பனைக் கோடுகளை வரைந்து, இறுதியில் இராணுவ சக்தியைப் பயன்படுத்துகிறார். உக்ரேன் மீதான அவரது முழு அளவிலான படையெடுப்பு மற்றும் ரஷ்யாவிற்கு எதிரான சலுகைகளின் கொள்கையானது, கண்டத்தில் அமைதி அல்லது ஸ்திரத்தன்மையை மீண்டும் கொண்டு வர முடியும் என்ற நம்பிக்கை, அப்பாவித்தனமானது என்பதை நிரூபித்துள்ளது“ என்று அவர்கள் எழுதினார்கள்.

இது பிரச்சாரமேயன்றி வேறில்லை. “ரஷ்ய ஏகாதிபத்தியம்” ஐரோப்பா முழுவதிலும் “அமைதிக்கு” அச்சுறுத்தல் விடுக்கிறது என்ற பேச்சுக்கள் அனைத்தும், உண்மையில் நேட்டோ சக்திகள் ஆக்கிரமிப்பாளர்கள் என்ற உண்மையை மறைத்துவிட முடியாது.

கடந்த 75 ஆண்டுகளில் நேட்டோவின் சாதனை என்ன? அமெரிக்காவின் தலைமையின் கீழ், கம்யூனிச எதிர்ப்பு அரணாக நிறுவப்பட்ட இந்த இராணுவக் கூட்டணி, எண்ணற்ற நாடுகளின் “பிராந்திய ஒருமைப்பாட்டையும் இறையாண்மையையும்” கீழ்ப்படுத்தியுள்ளது. ஸ்ராலினிச அதிகாரத்துவத்தால் சோவியத் ஒன்றியம் கலைக்கப்பட்டதில் இருந்து, நேட்டோ சக்திகள் பொருளாதார மற்றும் புவிசார் அரசியல் நலன்களுக்காக தொடர்ச்சியான போரை நடத்தி வருகின்றன. மத்திய கிழக்கு மற்றும் மத்திய ஆசியாவின் பெரும் பகுதிகள் இடிபாடுகளாக மாறியது மட்டுமல்லாமல், முழு நாடுகளின் “பிராந்திய ஒருமைப்பாடு மற்றும் இறையாண்மை” ஐரோப்பாவில் அழிக்கப்பட்டுள்ளது. 1999 இல், நேட்டோ, ஜேர்மனியின் தீவிர பங்கேற்புடன், கொசோவோவின் பிரிவினையை அமுல்படுத்துவதற்காக சேர்பியாவிற்கு எதிராக பேரழிவுகரமான குண்டுவீச்சு தாக்குதலை மேற்கொண்டது.

இந்தக் கொள்கையின் தொடர்ச்சியே தற்போதைய போர்த் தாக்குதல் ஆகும். நேட்டோ சக்திகள் உக்ரேன் மீதான ரஷ்யாவின் பிற்போக்குத்தனமான படையெடுப்பைத் தூண்டின. நேட்டோ சக்திகள்

இப்போது உக்ரேனிய முன்னரங்கின் வீழ்ச்சியை தவிர்ப்பதற்காகவும், அணு ஆயுத வல்லரசான ரஷ்யாவை இராணுவ ரீதியாக தோற்கடிக்கும் பைத்தியக்காரத்தனமான இலக்கை அடைவதற்காகவும் தொடர்ந்து போரைத் தீவிரப்படுத்தி வருகின்றன.

பேர்பாக், செஜோர்னே மற்றும் சிகோர்ஸ்கி ஆகியோரின் கட்டுரை, ரஷ்யாவிற்கு எதிராக ஐரோப்பாவின் ஒட்டுமொத்த போர் அணிதிரட்டலுக்கான ஒரு வரைபடத்தை கொண்டிருக்கிறது. மேலும், “ஐரோப்பிய நட்பு நாடுகள், நேட்டோவின் கூட்டுச் சுமைகளில் நியாயமான பங்கை ஏற்க வேண்டும், மற்றும் ஐரோப்பாவின் பாதுகாப்பிற்கு அதிக பொறுப்பை ஏற்கும் விருப்பத்தை வெளிப்படுத்த வேண்டும்” என்ற அதில் கூறியுள்ளனர். மேலும், “அட்லாண்டிக் பெருங்கடலின் இருபுறமும் உள்ள நாடுகளுடன் இருக்கும் நீடித்த ட்ரான்ஸ்அட்லாண்டிக் பந்தம், நமது பாதுகாப்பின் அடித்தளமாக உள்ளது. மற்றும் ஐரோப்பியர்களாகிய நாம் கடந்த மாதங்கள் மற்றும் ஆண்டுகளில் வலிமிகுந்த வெளிப்படையான சில அவசர குறைபாடுகளை நிவர்த்தி செய்ய வேண்டி இருந்தது: அவை, திறன் இடைவெளிகள், நமது படைகளின் தயார்நிலை, உற்பத்தி திறன், தளவாடங்கள், தரப்படுத்தல் மற்றும் இயங்குதன்மை” என்று அவர்கள் வாதிடுகின்றனர்.

இன்னும் துல்லியமாக, மூன்று வெளியுறவு மந்திரிகளும் “மொத்த உள்நாட்டு உற்பத்தியில் குறைந்தபட்சம் 2% சதவீதத்தை பாதுகாப்புக்காக” செலவிடுவதாக உறுதியளித்துள்ளனர். இது “தேவையான முன்நிபந்தனை மற்றும் நமது கூட்டுப் பாதுகாப்பை உருவாக்குவதற்கான அடித்தளமாகும்.” ஆனால், அதே நேரத்தில், இந்த எண்ணிக்கை “கூட்டுப் பாதுகாப்பிற்கு நமக்குத் தேவையான சக்திகள் மற்றும் திறன்களை” வளர்ப்பதற்கான “ஒரு தொடக்க புள்ளியாக மட்டுமே” இருக்க வேண்டும் என்று கூறுகின்றனர்.

பேர்பாக், செஜோர்னே மற்றும் சிகோர்ஸ்கி ஆகியோர், ஒரு ஐரோப்பிய போர்ப் பொருளாதாரத்தை உருவாக்குவதைத் தவிர வேறொன்றையும் கோரவில்லை. “எங்கள் இராணுவ திறன்களை மேம்படுத்தவும், உற்பத்தியை அதிகரிக்கவும் மற்றும் அறுவடை பொருளாதாரங்களை அளவிடவும், எங்கள் கண்டத்தின் முழு தொழில்துறை திறனைப் பயன்படுத்த வேண்டும்” என்று அவர்கள் எழுதுகிறார்கள். மேலும், “நமது தேசிய பாதுகாப்புத் தொழில்கள் இதற்கு முக்கியமானவை. அவர்களுக்கு உறுதியான, தெளிவான காலக்கெடுவுடன் கூடிய நீண்ட கால ஒப்பந்தங்கள், ஒரு குறிப்பிட்ட அளவிலான லட்சியம், நிலையான நிதிக் கடமைகள் மற்றும் நமது அரசாங்கங்களிடமிருந்து கொள்முதல் உத்தரவாதங்கள் தேவை“ என்றும் குறிப்பிடுகிறார்கள்.

சமீபத்தில் உலக சோசலிச வலைத் தளத்தில் வெளியான முன்னோக்கு கட்டுரையில், ஆளும் வர்க்கங்களை ஒட்டுமொத்தப் போருக்கு அணிதிரட்டுவதற்குத் தூண்டும் காரணிகளைப் பற்றி பின்வருமாறு எழுதியது:

20 ஆம் நூற்றாண்டின் இரு உலகப் போர்களைப் போலவே, ஏகாதிபத்திய ஆளும் உயரடுக்கு தங்களுக்கு சிறிது நேரம் இருப்பதாகவும், விரைவான போர் விரிவாக்கம் மட்டுமே தங்களுக்கு எதிராக செயல்படும் சக்திவாய்ந்த அரசியல் சக்திகளை - இராணுவ சூழ்நிலையிலும் சர்வதேச வர்க்கப் போராட்டத்திலும் - எதிர்கொள்ள முடியும் என்றும் உணர்கிறார்கள்.

ஐரோப்பிய சக்திகளுக்கு இது குறிப்பாக உண்மை. அவர்கள் உக்ரேனிய இராணுவத்தின் வீழ்ச்சிக்கு பதிலடி கொடுப்பதன் மூலம் பெருகிய முறையில் ஆக்கிரமிப்பு மற்றும் ஒரு பாரிய ஐரோப்பிய போர் முயற்சிக்கு அழைப்பு விடுக்கின்றனர். அவ்வாறு செய்வதன் மூலம், தொழிலாள வர்க்கம் தங்கள் போர்த் திட்டங்களை முறியடித்துவிடுமோ என்ற நிலையான அச்சத்தால் அவர்கள் உந்தப்படுகிறார்கள்.

ஏற்கனவே காஸாவில் இனப்படுகொலைக்கு எதிராக பெருமளவில் அணிதிரண்டுவரும் தொழிலாளர்கள் மற்றும் இளைஞர்கள், ரஷ்யாவிற்கு எதிரான நேட்டோ போரையும் பெருமளவில் எதிர்க்கின்றனர். போர்க் கொள்கையுடன் தொடர்புடைய சமூக மற்றும் ஜனநாயக உரிமைகள் மீதான தாக்குதல்கள், போராட்ட எதிர்ப்புக்கள் மற்றும் வேலைநிறுத்தங்கள் அதிகரிப்பதற்கு இட்டுச் செல்கின்றன. தொழிற்சங்கங்களும் அவற்றின் போலி-இடது ஆதரவாளர்களும் தொழிலாளர்கள் மற்றும் இளைஞர்களைத் தனிமைப்படுத்தவும் ஒடுக்கவும் தீவிர முயற்சியில் உள்ளனர்.

போர் பைத்தியக்காரத்தனத்தை நிறுத்துவதற்கு, முதலாளித்துவ இலாப முறைக்கு எதிரான தொழிலாள வர்க்கத்தின் ஒரு சர்வதேச இயக்கமாக இந்த எதிர்ப்பு போராட்டங்கள் வளர்க்கப்பட வேண்டும், மற்றும் ஒரு நனவான சோசலிச தலைமை மற்றும் முன்னோக்குடன் ஆயுதபாணியாக வேண்டும். சோசலிச சமத்துவக் கட்சி (SGP) வரவிருக்கும் ஐரோப்பிய தேர்தல்களில் அதன் சகோதர கட்சிகளுடன் கூட்டணி வைத்து, இந்த முன்னோக்குக்காக போராடுகிறது.

SGP இன் தேர்தல் அறிக்கை பின்வருமாறு அறிவிக்கிறது: “வங்கிகள் மற்றும் பெருநிறுவனங்களின் ஐரோப்பிய ஒன்றியத்தையும், வெகுஜன மரணம் மற்றும் போரையும், ஐரோப்பிய ஐக்கிய சோசலிச அரசுகளின் முன்னோக்குடன் தொழிலாளர்கள் எதிர்க்க வேண்டும். வங்கிகள் மற்றும் பெருநிறுவனங்களின் அதிகாரத்தை உடைத்து, அதனை ஜனநாயகக் கட்டுப்பாட்டின் கீழ் வைக்காமல் போரை முடிவுக்குக் கொண்டு வந்து, மனித உயிர்களைக் காப்பாற்ற முடியாது மற்றும் ஊதியங்களைப் பாதுகாக்க முடியாது. ஒருவரையொருவர் சுட்டுக் கொல்வதற்கு பதிலாக, ரஷ்யாவிலும் உக்ரேனிலும் உள்ள தொழிலாளர்களும், ஐரோப்பா முழுவதும் உள்ள தொழிலாளர்களும் இந்த முன்னோக்குடன், உள்நாட்டில் உள்ள போர்வெறியர்களுக்கு எதிராக ஒன்றாகப் ஐக்கியப்பட்டு போராட வேண்டும்.