மொழிபெயர்ப்பின் மூலக் கட்டுரையை இங்கே காணலாம்.
டொனால்ட் ட்ரம்ப் மற்றும் அவரது போர் வெறிபிடித்த கும்பலால் ஈரான் மீது நடத்தப்பட்ட தாக்குதல் ஒரு பெரும் அரசியல் குற்றமாகும். இது, சர்வதேச சட்டத்தின் கீழ் சட்டவிரோதமானது மற்றும் அமெரிக்க அரசியலமைப்பை நேரடியாக மீறுவதாகும். அமெரிக்காவைத் தாக்காத மற்றும் அமெரிக்காவிற்கு எந்தவிதமான அச்சுறுத்தலும் ஏற்படுத்தாத ஒரு நாட்டின் மீது, நாடாளுமன்றத்தின் (Congress) எந்தவித அங்கீகாரமும் இன்றி, இனப்படுகொலை செய்யும் இஸ்ரேலிய ஆட்சியுடன் இணைந்து இந்தத் தாக்குதல் தொடங்கப்பட்டுள்ளது.
இந்தக் குற்றவியல் தாக்குதலின் முதல் சில மணிநேரங்களுக்குள்ளேயே, தெற்கு ஈரானின் மினாப்பில் (Minab) உள்ள ஒரு சிறுமியர் பள்ளியின் மீது நடத்தப்பட்ட வான்வழித் தாக்குதலில் குறைந்தது 24 மாணவர்கள் கொல்லப்பட்டனர். வரும் நாட்களில் எத்தனை ஆயிரக்கணக்கான, பல்லாயிரக்கணக்கான மற்றும் பல இலட்சக்கணக்கான மக்கள் கொல்லப்படுவார்கள்?
வெறும் நான்கு நாட்களுக்கு முன்புதான், ட்ரம்ப் காங்கிரஸிற்கும் அமெரிக்க மக்களுக்கும் முன்னால் தனது நாட்டின் நிலை குறித்த உரையை வழங்கத் தோன்றினார். போரைத் தொடங்குவதற்கு அவர் ஏற்கனவே முடிவெடுத்திருந்தது தெளிவாகத் தெரிந்த போதிலும், அவர் தனது முடிவை மறைத்தார் மற்றும் அவரது இரண்டு மணி நேர வசைபாடலின் போது ஈரானைப் பற்றி மிகக் குறைவாகவே குறிப்பிட்டார்.
இப்போது, பெரும்பாலான அமெரிக்கர்கள் தூங்கிக்கொண்டிருந்தபோது, நள்ளிரவில் தனது தலையில் ஒரு பேஸ்பால் தொப்பியை அணிந்து கொண்டு ட்ரம்ப் தனது முடிவை அறிவித்தார். அவர் அமெரிக்காவையும் ஒட்டுமொத்த உலகையும் ஒரு பேரழிவுகரமான பாதையில் தள்ளியுள்ளார். இந்தப் போர் அமெரிக்க சமூகத்தின் உள்நாட்டு சமூக நெருக்கடியைத் தீர்க்கப்போவதில்லை, அல்லது அமெரிக்க முதலாளித்துவத்தின் உலகளாவிய நிலையில் ஏற்பட்டுள்ள நீண்டகாலச் சரிவை மாற்றியமைக்கவும் போவதில்லை.
உள்நாட்டு மற்றும் சர்வதேச ரீதியிலான இந்த முரண்பாடுகள் அனைத்தும் தீவிரமடையும். இந்தப் போர் தவிர்க்க முடியாமல் தீவிரமடைந்து ஒட்டுமொத்த கிரகத்தையும் ஆட்கொள்ளும். 1945-46 இல் நாஜி தலைவர்கள் மீதான நூரம்பேர்க் விசாரணைகளில் “அமைதிக்கு எதிரான குற்றம்” என்று விவரிக்கப்பட்டதையே ஈரான் மீதான இந்தத் தாக்குதல் துல்லியமாகப் பிரதிபலிக்கிறது என்ற உண்மையை எந்தவொரு ஊடகப் பிரச்சாரத்தாலும் மறைக்க முடியாது.
எதிர்காலத்தில், வரலாற்றாசிரியர்கள் ட்ரம்ப் ஈரான் மீது நடத்திய பிப்ரவரி 28, 2026 தாக்குதலை, ஹிட்லர் போலந்து மீது நடத்திய செப்டம்பர் 1, 1939 படையெடுப்புடன் ஒப்பிடுவார்கள். அவை சம அளவிலான குற்றங்களாகும்.
ஈரான் மீதான இந்த இரத்தவெறி பிடித்த தாக்குதல் உடனடியாக நிறுத்தப்பட வேண்டும் என்று சோசலிச சமத்துவக் கட்சி கோருகிறது.
நிதி-பெருநிறுவன தன்னலக்குழுவின் நலன்களுக்காகத் தொடங்கப்பட்டுள்ள இந்தப் போரை தொழிலாள வர்க்கமும், இளைஞர்களும், அனைத்து முற்போக்கான மற்றும் நேர்மையான மக்களும் எதிர்க்க வேண்டும்.
அமெரிக்க நகரங்களையும் சுற்றுப்புறங்களையும் பயமுறுத்துவதற்காக குடிவரவு மற்றும் சுங்க அமலாக்கத்துறை (ICE) முகவர்களைப் நிலைநிறுத்தி, உரிமைகள் சட்டத்தை மீறி வருகின்ற அதே நிர்வாகம் தான் இந்த குற்றவியல் போரைத் தொடங்கியுள்ளது.
இந்தப் போரை உடனடியாக முடிவுக்குக் கொண்டுவரக் கோரி உங்கள் தொழிற்சாலைகள், வேலைத்தளங்கள், பள்ளிகள் மற்றும் சுற்றுப்புறங்களில் கூட்டங்களை கூட்டுங்கள்.
அமெரிக்க மக்கள் இந்தப் போரை எதிர்க்கிறார்கள் என்பதை யும், அதில் எந்த வகையிலும் பங்கேற்க அவர்கள் விரும்பவில்லை என்பதையும் உலகம் அறிய வேண்டும்.
ஒரு நிலைப்பாட்டை எடுங்கள். உங்கள் குரல்களை உரக்க ஒலிக்கச் செய்யுங்கள்.