இந்த மொழிபெயர்ப்பின் மூலக் கட்டுரையை இங்கு காணலாம்

அமெரிக்க கடற்படை வர்த்தகக் கப்பல்களுக்கு ஹார்முஸ் நீரிணை வழியாகப் பாதுகாப்பு அளித்து வழிநடத்தத் தொடங்கும் என்று அமெரிக்க திறைசேரி செயலாளர் ஸ்காட் பெசென்ட் வியாழக்கிழமை தெரிவித்தார். இது ஒரு பெரிய போர் விரிவாக்கமாகும்; இது அமெரிக்கப் போர்க்கப்பல்களை ஈரானியத் தாக்குதலுக்கு ஆளாகக்கூடிய நேரடி இலக்காக மாற்றுவதோடு, பெருமளவிலான உயிரிழப்புகள் ஏற்படுவதற்கான அதிக சாத்தியக்கூறுகளையும் உருவாக்கும்.

“இராணுவ ரீதியாக எப்போது சாத்தியமாகுமோ, அவ்வளவு விரைவில் அமெரிக்க கடற்படை, ஒருவேளை ஒரு சர்வதேசக் கூட்டணியுடன் இணைந்து, கப்பல்களுக்குப் பாதுகாப்பு அளித்து வழிநடத்தும்,” என்று பெசென்ட் ஸ்கை நியூஸிடம் தெரிவித்தார்.

ஈரான் மீதான அமெரிக்க-இஸ்ரேலியப் போர் இப்போது பதின்மூன்றாவது நாளை எட்டியுள்ள நிலையில், உலகின் 20 சதவீத எண்ணெய் கடந்து செல்லும் ஹார்முஸ் நீரிணையை மையமாகக் கொண்டு, தொடர் விளைவுகளைக் கொண்ட ஒரு பிராந்திய நெருக்கடியைத் தூண்டியுள்ளது. பிப்ரவரி 28 அன்று போர் வெடித்த சில நாட்களுக்குள் ஈரான் அந்த நீரிணையைத் திறம்பட மூடியது; 150-க்கும் மேற்பட்ட எண்ணெய் டாங்கர் கப்பல்களை நங்கூரமிட உத்தரவிட்டதுடன், “ஒரு லிட்டர் எண்ணெய் கூட” கடந்து செல்லாது என்றும் அறிவித்தது. இதன் விளைவாக, டேங்கர் கப்பல் போக்குவரத்து 70 சதவீதம் வீழ்ச்சியடைந்துள்ளது. புதனன்று, ஈரானின் புதிதாக நியமிக்கப்பட்ட அதி உயர் தலைவர் மொஜ்தபா கமேனி தனது முதல் பகிரங்க அறிக்கையை வெளியிட்டார். அதில், நீரிணையை மூடியே வைத்திருப்பதாகவும் புதிய போர் முனைகளைத் திறப்பதாகவும் அவர் சபதம் செய்தார். ஈரானிய ட்ரோன் படகுகளும் ஏவுகணைகளும் பல வர்த்தகக் கப்பல்களைத் தாக்கியுள்ளன — புதன்கிழமை மட்டுமே ஆறு கப்பல்கள் தாக்கப்பட்டன — மேலும் மார்ச் 10 அன்று ஈரான் அந்த நீர்வழியில் கண்ணிவெடிகளை வைக்கத் தொடங்கியுள்ளதாக சிஎன்என் செய்தி வெளியிட்டுள்ளது.

சர்வதேச எரிசக்தி முகமை (IEA) தனது மூலோபாய இருப்புகளில் இருந்து சாதனை அளவாக 400 மில்லியன் பேரல்களை (பீப்பாய்களை) சந்தைக்கு வெளியிட அனுமதித்த போதிலும் — இதனை அந்த முகமை “உலகளாவிய எண்ணெய் சந்தையின் வரலாற்றில் மிகப்பெரிய விநியோகத் தடை” என்று குறிப்பிட்டது — பிரெண்ட் கச்சா எண்ணெய் விலை 70 டாலரிலிருந்து 100 டாலருக்கும் அதிகமாக உயர்ந்துள்ளதுடன், ஒரு கட்டத்தில் 119 டாலரையும் தொட்டது. இது ஒரு பேரல் 200 டாலர் வரை உயரக்கூடும் என்று ஆய்வாளர்கள் எச்சரிக்கின்றனர். கடந்த இரண்டு வாரங்களில் மட்டும் அமெரிக்க பெட்ரோல் விலைகள் 20 சதவீதமும், ஐரோப்பிய எரிவாயு விலைகள் 58 சதவீதமும் அதிகரித்துள்ளன. மேலும், உலகின் உர ஏற்றுமதியில் சுமார் 30 சதவீதம் இந்த நீரிணை வழியாகச் செல்வதால், உர விலைகளும் உலகளவில் கடுமையாக உயர்ந்துள்ளன.

பாதுகாப்பு அளித்து வழிநடத்தும் இப்பணி அசாதாரணமான முறையில் அபாயகரமானது என்று கடற்படை நிபுணர்கள் எச்சரிப்பதாக தி ஹில் இதழ் வியாழக்கிழமை செய்தி வெளியிட்டது. ஹட்சன் நிறுவனத்தின் கடற்படை நடவடிக்கைகளுக்கான நிபுணர் பிரையன் கிளார்க் இதன் அடிப்படைச் சிக்கலை விளக்கினார்: “ஈரானிய கடற்கரையோரம் நிறுத்தப்பட்டுள்ள ட்ரோன் மற்றும் ஏவுகணை ஏவுதளங்களின் மிக நெருக்கமான அருகாமையைக் கையாளுவதே பெரும் சவாலாக இருக்கும்.” அவர் மேலும் கூறுகையில்: “சிக்கல் என்னவென்றால், ஏவுதளம் வெளிப்பட்ட சில நிமிடங்களிலேயே ஏவுகணைகள் உங்கள் மீது வந்து விழுந்துவிடும், ஏனெனில் கடற்கரையிலிருந்து கப்பல் போக்குவரத்துப் பாதை வெறும் 3 அல்லது 4 மைல் தொலைவில் மட்டுமே உள்ளது.” இந்த நீரிணை அதன் மிகக் குறுகிய பகுதியில் வெறும் 21 மைல் அகலம் மட்டுமே கொண்டது.

மேலும் வியாழக்கிழமையன்று, ஆறு பணியாளர்களுடன் சென்ற அமெரிக்காவின் KC-135 எரிபொருள் நிரப்பும் விமானம் மேற்கு ஈராக்கில் விழுந்து நொறுங்கியது. இது எரிபொருள் நிரப்பும் பணியின் போது நடந்த ஒரு “வெளிப்படையான விபத்து” என்று சென்ட்காம் (CENTCOM) கூறியது. ஆனால் இது ஈரானிய வான் பாதுகாப்பால் சுட்டு வீழ்த்தப்பட்டதாகவும், விமானத்தில் இருந்த ஆறு பணியாளர்களும் கொல்லப்பட்டதாகவும் இஸ்லாமியப் புரட்சிகரக் காவல் படை (IRGC) தெரிவித்தது.

யுஎஸ்எஸ் ஆபிரகாம் லிங்கன் (USS Abraham Lincoln) விமானம் தாங்கி கப்பலைத் தாம் இலக்கு வைத்ததாகவும், அக்கப்பல் தற்போது “அமெரிக்காவை நோக்கி பின்வாங்குகிறது” என்றும் IRGC புதனன்று உரிமை கோரியது. இந்த விமானம் தாங்கி கப்பல் தாக்குதலுக்கு உள்ளானதை அமெரிக்க அதிகாரிகள் மறுத்ததோடு, அது ஓமன் வளைகுடாவில் சாதாரணமாக இயங்குவதைக் காட்டும் புகைப்படங்களையும் வெளியிட்டனர்; போர் தொடங்கியதில் இருந்து பாரசீக வளைகுடாவிற்குள் நுழையாமல் அது அங்கேயே நிலைகொண்டுள்ளது. இருப்பினும், ஈரானியக் கப்பல்கள் அந்த விமானம் தாங்கி கப்பலை நெருங்கியதாகவும், அவை சுடப்பட்டதாகவும், கப்பலில் தீ விபத்து ஏற்பட்டதாகவும் பென்டகன் ஒப்புக்கொண்டது. தனியாக, யுஎஸ்எஸ் ஜெரால்ட் ஆர். ஃபோர்டு (USS Gerald R. Ford) கப்பலிலும் இந்த வாரம் தீ விபத்து ஏற்பட்டது — இக்கப்பல் அதன் திட்டமிடப்பட்ட பராமரிப்பு காலத்தையும் கடந்து, எட்டு மாதங்களுக்கும் மேலாகத் தொடர்ந்து கடலில் நிலைநிறுத்தப்பட்டுள்ளது.

போர் எந்தவொரு தெளிவான முடிவும் இன்றி நீடித்துக் கொண்டிருக்கும் நிலையில், ஆளும் வர்க்கத்தின் சில பிரிவினர் இப்போது அமெரிக்கத் தரைப்படைகளை நிலைநிறுத்துவதற்காக பகிரங்கமாகத் தூண்டி வருகின்றனர். போரை முன்கூட்டியே முடிவுக்குக் கொண்டு வருவது ஒரு மூலோபாயப் பேரழிவாக அமையும் என்று வால் ஸ்ட்ரீட் ஜர்னல் வியாழக்கிழமை எச்சரித்தது. “திரு. ட்ரம்ப் போரை எப்போது முடிப்பது என்று ஆலோசிக்கும்போது எதிர்கொள்ளும் ஆபத்து இதுதான்” என்று அந்த இதழ் எழுதியது. “ஈரான் பல தசாப்தங்களாக வளைகுடா எண்ணெய் உற்பத்தியை அச்சுறுத்தி வருகிறது; அந்த அச்சுறுத்தலுக்கான சாத்தியப்பாடு, எண்ணெய் விலையில் ஒரு அபாயக் கூடுதல் விலையை உருவாக்கியுள்ளது. ஆனால், அந்த அச்சுறுத்தல் நடைமுறையில் நிரூபிக்கப்பட்ட பின்னரும், அமெரிக்காவால் அதைத் தடுக்க ஏதும் செய்ய முடியாத நிலையில் போர் முடிந்தால், அமெரிக்காவே மூலோபாய ரீதியாகத் தோற்றதாகக் கருதப்படும்.” என்று ஜர்னல்  குறிப்பிட்டது.

ஈரானின் ஏவுகணை அச்சுறுத்தல், அதன் அணுசக்தித் திட்டம் மற்றும் அதன் கடற்படையை அழிப்பது என்ற போரின் ஆரம்பகால நோக்கங்கள் இனி போதுமானவை அல்ல என்று அந்த இதழ் வாதிட்டது. “ஈரானின் பதிலடி காரணமாக, இப்போது நீரிணையை மீண்டும் திறப்பதும், கப்பல் போக்குவரத்தின் மீது ஈரானுக்கு இருக்கும் வீட்டோ அதிகாரத்தை குறைப்பதும் ஒரு இலக்காக இருக்க வேண்டும் என்பதை இது குறிக்கிறது. ஒரு மோதல் மாற்றமடையும் போது, போரின் நோக்கங்களும் அதற்கேற்ப மாற வேண்டும்.” தொடர்ந்து அந்த இதழ் பின்வருமாறு குறிப்பிட்டது: “அமெரிக்காவும் இஸ்ரேலும் நீரிணைப் பகுதியைப் பாதுகாப்பானதாக மாற்றி, ஈரானின் ட்ரோன் பிரிவுகள், தனிப்பட்ட IRGC மற்றும் பாசிஜ் [Basij - ஈரானின் ஒரு துணை இராணுவப் படை ஆகும்] பிரிவுகளைத் தாக்குதலுக்கான இலக்குப் பட்டியலில் சேர்க்கும்போது, இது ட்ரம்ப் ஆரம்பத்தில் எதிர்பார்த்ததை விட ஒரு  நீண்ட கால இராணுவ நடவடிக்கையாக அமையக்கூடும்.”

ஈரானின் முக்கிய எண்ணெய் ஏற்றுமதி முனையமான கார்க் தீவைக் (Kharg Island) கைப்பற்றக் கோரி அந்த தலையங்கம் இன்னும் ஒரு படி மேலே சென்றது: “ஈரானின் முக்கிய எண்ணெய் ஏற்றுமதி முனையமான கார்க் தீவைத் தனது கட்டுப்பாட்டில் கொண்டு வருவது அவசியமாகலாம்... சீனாவிற்கான ஈரானின் எண்ணெய் விற்பனை அந்த ஆட்சியைத் தொடர்ந்து நிலைநிறுத்தி வருகிறது.”  ட்ரம்ப், “ தனித்துவமான மற்றும் முக்கியமான பணிகளுக்கு சிறப்புப் படைகளைப் பயன்படுத்துவதை நிராகரிக்காமல் கவனமாக இருக்கிறார், ஒருவேளை அவர் கார்க் தீவை மனதில் வைத்திருக்கலாம்,” என்று ஜர்னல் குறிப்பிட்டது. அதன் முடிவுரை இதுதான்: “இப்போது வெற்றி என்பது ஹார்முஸ் நீரிணையை மீண்டும் திறப்பதையும் உள்ளடக்கியது.”

வேறு வார்த்தைகளில் கூறுவதானால், அமெரிக்க நிதி மூலதனத்தின் மிகவும் செல்வாக்குமிக்க குரல் போரை விரிவாக்கக் கோருகிறது — அதாவது தரைப்படைகளை நிலைநிறுத்துதல், ஒரு நாட்டின் இறையாண்மை கொண்ட நிலப்பகுதியைக் கைப்பற்றுதல் மற்றும் உலகின் மிக மூலோபாய எரிசக்தி வழித்தடத்தை காலவரையற்ற இராணுவ ஆக்கிரமிப்பிற்கு உள்ளாக்குதல். அதே சமயம், அரசாங்கம் கட்டாய இராணுவச் சேர்க்கையை நிராகரிக்கவில்லை. மார்ச் 8 அன்று ஃபாக்ஸ் நியூஸில் இராணுவத் திரட்டு குறித்துக் கேட்கப்பட்டபோது, வெள்ளை மாளிகையின் செய்தித் தொடர்பாளர் கரோலின் லெவிட், இது “தற்போதைய திட்டத்தின் ஒரு பகுதியாக இல்லை, ஆனால் ஜனாதிபதி மீண்டும் ஒருமுறை தனது விருப்பங்களை புத்திசாலித்தனமாக திறந்தே வைத்துள்ளார்” என்று கூறினார்.

இதற்கிடையில், ஈரான் மீதான குண்டுவீச்சுத் தாக்குதல்கள் தொடர்ந்து தீவிரமடைந்து வருகின்றன. அமெரிக்கா இதுவரை இல்லாத அளவில் தனது “மிகப்பெரிய வான்வழித் தாக்குதல் நடவடிக்கையை” மேற்கொள்ளும் என்று பெசென்ட் கடந்த வாரம் ஃபாக்ஸ் பிசினஸில் அறிவித்தார். பிப்ரவரி 28 முதல் அமெரிக்கா 5,000-க்கும் மேற்பட்ட இலக்குகளைத் தாக்கியுள்ளது. இதில் நூற்றுக்கணக்கான குழந்தைகள் உட்பட 1,348-க்கும் மேற்பட்ட ஈரானியப் பொதுமக்கள் கொல்லப்பட்டுள்ளனர்; குறைந்தது 12,000 பேர் காயமடைந்துள்ளனர். சுமார் 3.2 மில்லியன் ஈரானியர்கள் உள்நாட்டிலேயே இடம்பெயர்ந்துள்ளதாக ஐநா அகதிகள் முகமை (UNHCR) தெரிவிக்கிறது. ஈரானில் ஆட்சி மாற்றம் ஏற்படுவது குறித்து நிச்சயமற்ற நிலை இருப்பதாக நெதன்யாகு ஒப்புக்கொண்ட நிலையில், அந்த ஆட்சி விரைவில் வீழ்வதற்கு வாய்ப்பில்லை என்று இஸ்ரேலிய அதிகாரிகள் தனிப்பட்ட முறையில் மதிப்பிடுகின்றனர்.

அதே நேரத்தில், போரானது லெபனானுக்கும் விரிவடைந்துள்ளது. மார்ச் 2 அன்று ஹெஸ்பொல்லா மீண்டும் தனது தாக்குதல்களைத் தொடங்கியதைத் தொடர்ந்து, இஸ்ரேல் அங்கு தீவிர குண்டுவீச்சுகளையும் தரைவழி ஊடுருவலையும் முன்னெடுத்துள்ளது.

இஸ்ரேலியப் படைகள் தெற்கு லெபனானுக்குள் பல முனைகளில் முன்னேறியுள்ளன; லெபனான் எல்லைக்குள் குறைந்தது 18 இராணுவ நிலைகளை நிறுவியுள்ளன. நவம்பர் 2024 போர்நிறுத்தத்திற்குப் பிறகு அங்கு நடக்கும் முதல் தரைவழி நடவடிக்கை இதுவாகும். புதனன்று இஸ்ரேலிய வான்வழித் தாக்குதல்கள் மத்திய பெய்ரூட்டைத்  தாக்கின; இது அரசாங்கத் தலைமையகத்திலிருந்து ஒரு கிலோமீட்டர் தொலைவில் உள்ள இடமாகும். லெபனானில் 98 குழந்தைகள் உட்பட 680-க்கும் மேற்பட்டோர் கொல்லப்பட்டுள்ளனர், மேலும் 8,00,000-க்கும் அதிகமானோர் இடம்பெயர்ந்துள்ளனர். இந்த நடவடிக்கை “குறுகியதாக இருக்காது” என்று இஸ்ரேலின் இராணுவத் தளபதி எச்சரித்தார். தரைவழித் தாக்குதலை மேலும் விரிவாக்குவதற்கான தயாரிப்புகளுக்குப் பாதுகாப்பு மந்திரி காட்ஸ் புதன்கிழமை உத்தரவிட்டார்.