மொழிபெயர்ப்பின் மூலக் கட்டுரையை இங்கே காணலாம். 

ஈரானுக்கு எதிரான அமெரிக்க கடற்படை முற்றுகையின் ஒரு பகுதியாகவும், போரின் சமீபத்திய தீவிரமயமாக்கலாகவும், அமெரிக்க கடற்படை விமானங்கள் கடந்த வெள்ளிக்கிழமை ஓமான் வளைகுடாவில் ஈரான் கொடி ஏற்றப்பட்ட இரண்டு எண்ணெய் தாங்கிக் கப்பல்களைத் தாக்கின. USS ஜோர்ஜ் H.W. புஷ் விமானம் தாங்கி கப்பலில் இருந்து புறப்பட்ட F/A-18 சூப்பர் ஹார்னெட் விமானங்கள், M/T சீ ஸ்டார் III மற்றும் M/T செவ்தா ஆகிய கப்பல்களின் புகைபோக்கிகள் மீது துல்லியமான வெடிபொருட்களை வீசித் தாக்கி அந்த கப்பல்களைச் செயலிழக்கச் செய்தன. மூன்றாவது ஈரானிய எண்ணெய் கப்பலான எம்/டி ஹஸ்னா, கடந்த புதன்கிழமை இதே முறையில் செயலிழக்கச் செய்யப்பட்டது.

ஏப்ரல் 8 போர் நிறுத்தத்திற்குப் பிறகு ஈரானியப் பிரதேசத்தில் அமெரிக்கா நடத்திய முதல் தாக்குதல்களுக்கு ஒரு நாள் கழித்து இந்தத் தாக்குதல்கள் நிகழ்ந்துள்ளன. வியாழக்கிழமையன்று, ஹோர்முஸ் நீரிணையை கடந்து சென்ற மூன்று அமெரிக்க கடற்படையின் நாசகாரி கப்பல்கள் மீது ஈரான் ஏவுகணைகள், ட்ரோன்கள் மற்றும் சிறிய படகுகள் மூலம் தாக்குதல் நடத்தியதைத் தொடர்ந்து, அமெரிக்கப் படைகள் பண்டார் அபாஸ் மற்றும் கெஷ்ம் தீவில் உள்ள ஈரானிய இராணுவ இலக்குகளைத் தாக்கின.

கடந்த வியாழன் அன்று நடந்த தாக்குதலுக்கு சில மணி நேரங்களுக்குப் பிறகு, அமெரிக்க ஜனாதிபதி டொனால்ட் ட்ரம்ப் ஈரானுக்கு எதிராக ஒரு அணுஆயுத அச்சுறுத்தலாக பரவலாகப் புரிந்துகொள்ளப்பட்ட ஒரு அறிக்கையை வெளியிட்டார். வாஷிங்டனில் உள்ள லிங்கன் நினைவுப் பூங்காவில் செய்தியாளர்களிடம் பேசிய ட்ரம்ப், “நீங்கள் ஈரானில் இருந்து ஒரு பெரிய பிரகாசம் வருவதைப் பார்க்கப் போகிறீர்கள், ஆகவே அவர்கள் தங்கள் ஒப்பந்தத்தில் விரைவாகக் கையெழுத்திடுவது நல்லது” என்று கூறினார்.

பெப்ரவரி 28 அன்று ஈரானுக்கு எதிராக அமெரிக்காவும் இஸ்ரேலும் தொடங்கிய போர் 70வது நாளை எட்டியுள்ளது. பென்டகன் 38 நாட்கள் போர் நடவடிக்கைகளில் சுமார் 13,000 இலக்குகளைத் தாக்கியுள்ளது. 275 மருத்துவ வசதிகள் உட்பட 81,000 பொதுமக்களின் கட்டமைப்புகள் சேதமடைந்துள்ளதாக ஈரானிய அரசாங்கம் அறிவித்துள்ளது. ஏப்ரல் 7 வரை 1,701 பொதுமக்கள் உட்பட 3,636 ஈரானியர்கள் உயிரிழந்துள்ளதாக ஈரானிய மனித உரிமைகள் ஆர்வலர்கள் செய்தி நிறுவனம் ஆவணப்படுத்தியுள்ளது. ஈரானிய ஏவுகணைத் தாக்குதல்களால் 24 பேர் கொல்லப்பட்டனர் மற்றும் 7,791 பேர் காயமடைந்தனர் என்று இஸ்ரேல் தெரிவித்துள்ளது. பதின்மூன்று அமெரிக்க துருப்புக்கள் கொல்லப்பட்டுள்ளனர் மற்றும் 400-க்கும் மேற்பட்டோர் காயமடைந்துள்ளனர். உண்மையான இறப்பு எண்ணிக்கை குறைந்தது 15 என்று தி இன்டர்செப்ட் (The Intercept) செய்தி நிறுவனம் தெரிவித்துள்ளது. ஐக்கிய அரபு அமீரகம், சவூதி அரேபியா, பஹ்ரைன் மற்றும் ஓமன் மீது ஈரான் நடத்திய தாக்குதல்களில் வளைகுடா நாடுகளைச் சேர்ந்த குறைந்தது ஒன்பது பேர் கொல்லப்பட்டுள்ளனர்.

போரின் பிராந்திய பரிமாணங்கள் தொடர்ந்து விரிவடைந்து வருகின்றன. 2024 நவம்பரில் ஒப்புக்கொள்ளப்பட்ட போர்நிறுத்த உடன்படிக்கை நடைமுறையில் இருந்தபோதிலும், இஸ்ரேல் லெபனான் மீது தொடர்ந்து குண்டுவீசி வருகிறது. சமீபத்திய நாட்களில் இந்த நடவடிக்கைகள் கடுமையாகத் தீவிரமடைந்துள்ளன. கடந்த புதன்கிழமையன்று, இஸ்ரேலியப் படைகள் பெய்ரூட்டின் தெற்கு புறநகர்ப் பகுதிகளில் தாக்குதல் நடத்தின — போர்நிறுத்தம் தொடங்கியதிலிருந்து லெபனான் தலைநகருக்கு அருகில் நடந்த முதல் தாக்குதல் இதுவாகும்— ஹரேட் ஹ்ரெய்க் (Haret Hreik) சுற்றுவட்டாரத்தில் உள்ள ஹிஸ்புல்லாவின் உயரடுக்கு ராத்வான் படைகளின் தளபதியை இலக்கு வைத்து இத்தாக்குதல் நடத்தப்பட்டது. தெற்கு மற்றும் கிழக்கு லெபனான் முழுவதும் இஸ்ரேலியத் தாக்குதல்களில் கடந்த சில நாட்களில் குறைந்தது 13 பேர் கொல்லப்பட்டுள்ளனர். உள்ளூர் நேரப்படி அதிகாலை 3:00 மணிக்கு இஸ்ரேலிய விமானங்கள் பெய்ரூட் மீது தாக்குதல் நடத்தின, மேலும் இஸ்ரேலிய இராணுவம் தெற்கு லெபனான் மற்றும் பேக்கா பள்ளத்தாக்கில் உள்ள 50-க்கும் மேற்பட்ட கிராமங்களில் உள்ள குடிமக்களை வெளியேறுமாறு உத்தரவிட்டது.

ட்ரம்ப் மே 14 அன்று பெய்ஜிங்கில் சீன ஜனாதிபதி ஷி ஜின்பிங்கைச் சந்திக்க ஒரு வாரம் உள்ள நிலையில் இந்தத் தீவிரப்பாடு ஏற்பட்டுள்ளது. பாதுகாப்பு அமைச்சர் பீட் ஹெக்செத் “இரும்புக்கரம்” என்று அழைத்த, ஓமன் வளைகுடாவிலிருந்து “திறந்த கடல்கள்” வரை நீடிக்கும் கடற்படை முற்றுகையை அமெரிக்கா அமல்படுத்தி வரும் நிலையில் இந்த உச்சிமாநாடு நடைபெற உள்ளது. இந்த முற்றுகையானது, ஈரானிய துறைமுகங்களுக்கு வரும் சீனக் கொடியுடன் கூடிய கப்பல்களுக்கும், சீனப் பொருளாதாரத்திற்கு எண்ணெய் வழங்கும் கடல்வழி எண்ணெய் வர்த்தகத்திற்கும் பயனுள்ள கட்டுப்பாடுகளை விதிக்கிறது. இந்த முற்றுகையின் கீழ், தற்போது சுமார் 70 எண்ணெய்க் கப்பல்கள் காவலில் வைக்கப்பட்டுள்ளன. அவற்றின் மொத்த கொள்ளளவு 166 மில்லியன் பீப்பாய்கள் ஆகும், இதன் மதிப்பு 13 பில்லியன் டாலருக்கும் அதிகமாகும்.

சீனா தனது கச்சா எண்ணெயில் சுமார் மூன்றில் ஒரு பகுதியை ஹோர்முஸ் நீரிணை வழியாகப் பெறுகிறது. மேலும், அந்த நெருக்கடியான வழித்தடம் வழியாகச் செல்லும் மொத்த எண்ணெயில் 37.7 சதவீதத்தைச் சீனா பெறுகிறது. இது மற்ற எந்த நாட்டையும் விட அதிகமாகும். சீனா, ஈரானிய எண்ணெயை வாங்கும் மிகப்பெரிய நாடாக உள்ளது; 2025 ஆம் ஆண்டில் ஈரானின் கடல்வழி ஏற்றுமதியில் 80 சதவீதத்திற்கும் அதிகமானவற்றைச் சீனா வாங்கியுள்ளது. கடந்த ஆண்டு சீனாவின் மொத்த கச்சா எண்ணெய் இறக்குமதியில் ஈரானிய கச்சா எண்ணெய் தோராயமாக 12 சதவீதமாகும். அமெரிக்கப் பாதுகாப்பு அமைச்சர் ஹெக்செத், ஈரான் மீதான இந்த முற்றுகையை “உலகிற்கு கிடைத்த ஒரு பரிசு” என்று அழைத்ததுடன், அமெரிக்கா இதை “எவ்வளவு காலம் தேவையோ அவ்வளவு காலத்துக்கு” தொடரும் என்றும் கூறியுள்ளார்.

ஈரானிய இராணுவத்தைச் செயலிழக்கச் செய்வது மற்றும் அதன் அரசாங்கத்தைக் கவிழ்ப்பது என்ற தனது வெளிப்படையான நோக்கங்களை அடைவதில் அமெரிக்கா தோல்வியடைந்துள்ளது. இந்தப் போர், ஈரானின் அணுசக்தித் திட்டத்திற்கு “குறைந்த அளவிலான புதிய சேதத்தையே” ஏற்படுத்தியுள்ளது என்று அமெரிக்க உளவுத்துறை மதிப்பீடுகள் முடிவு செய்துள்ளன. ஈரானிடம் உள்ள சுமார் 440 கிலோகிராம் செறிவூட்டப்பட்ட யுரேனியம் — இது சுமார் 10 ஆயுதங்களுக்குப் போதுமானது — அமெரிக்க வெடிபொருட்களால் ஊடுருவ முடியாத ஆழமான நிலத்தடி தளங்களில் பாதுகாப்பாக உள்ளது. ஈரானுக்கு எதிரான போருக்கு முந்தைய வழக்கமான ஏவுகணைப் படையில் சுமார் பாதி தப்பிப்பிழைத்துள்ளது. ஈரானிய அரசாங்கம் பதவியிலிருந்து அகற்றப்படவில்லை, மேலும் ஈரான் ஹோர்முஸ் நீரிணையைக் தொடர்ந்து தனது கட்டுப்பாட்டில் வைத்துள்ளது.

ஈரான் இந்தப் பிராந்தியம் முழுவதிலும் உள்ள அமெரிக்க சொத்துக்களுக்கு கடுமையான சேதத்தை ஏற்படுத்தியுள்ளது. போர் தொடங்கியதில் இருந்து பதினாறு அமெரிக்கத் தளங்கள் ஈரானியத் தாக்குதலுக்கு உள்ளாகியுள்ளன. கத்தாரில் உள்ள அல் உதித் விமான படைத் தளம் 1 பில்லியன் டாலர் மதிப்புள்ள ரேடார் ஒன்றை இழந்தது. சவூதி அரேபியாவில் உள்ள இளவரசர் சுல்தான் விமானப்படைத் தளம் மார்ச் 27 அன்று தாக்கப்பட்டதில், 12 அமெரிக்கப் படையினர்கள் காயமடைந்தனர் மற்றும் ஒரு AWACS விமானம் அழிக்கப்பட்டது; பஹ்ரைனில் உள்ள ஐந்தாவது கடற்படைத் தலைமையகம் போரின் முதல் நாளிலேயே தாக்கப்பட்டது. அமெரிக்காவின் பேட்ரியாட் (Patriot) இடைமறிப்பு ஏவுகணைகளில் பாதி மற்றும் தாட் (THAAD) இடைமறிப்பு ஏவுகணைகளில் பாதிக்கும் மேலானவை தீர்ந்துவிட்டன. அவற்றை மீண்டும் நிரப்புவதற்கான கால அவகாசம் மூன்று முதல் நான்கு ஆண்டுகள் ஆகும்.

வியாழக்கிழமை அன்று இத்ரீஸ் அலி, எரின் பாங்கோ மற்றும் ஹடேம் மஹேர் ஆகியோரால் வெளியிடப்பட்ட ராய்ட்டர்ஸ் அறிக்கை, இந்த மூலோபாய நெருக்கடியின் ஆழத்தை அடிக்கோடிட்டுக் காட்டியது. அந்த அறிக்கையின்படி, ஈரான் இன்னும் சுமார் நான்கு மாதங்களுக்கு அமெரிக்க முற்றுகையைத் தாங்கிக்கொள்ள முடியும் என்று மத்திய உளவுத்துறை (CIA) மதிப்பிட்டுள்ளது.

போரின் செலவுகள், பென்டகனின் உத்தியோகபூர்வ புள்ளிவிவரங்களை விட வெகுவாக அதிகரித்து வருகிறது. வெள்ளிக்கிழமையன்று நியூ யோர்க் டைம்ஸில் வெளியான “இந்தப் போருக்கு 25 பில்லியன் டாலர் செலவாகியுள்ளது என்கிறார் ஹெக்ஸெத். நான் உண்மையான தொகையைக் கணக்கிட்டேன்” என்ற கட்டுரையில் மிச்சிகன் பல்கலைக்கழகப் பொருளாதார நிபுணர் ஜஸ்டின் வொல்பர்ஸ் இவ்வாறு எழுதினார்: “தற்போதைய நிலையில் எந்தவொரு பொருளாதார நிபுணராலும் செய்யக்கூடிய சிறந்த விஷயம், செலவின் தோராயமான அளவைச் சரியாகக் கணிப்பதுதான். எனது கணக்கீட்டின்படி, ஈரான் போருக்கு நூற்றுக்கணக்கான பில்லியன் டாலர்களும், ஒருவேளை டிரில்லியன் டாலர்களும் செலவாகும்.”

வொல்பர்ஸின் கணக்கீட்டில் வெடிமருந்துகள், கப்பல் மற்றும் விமான இழப்புகள், பேட்ரியாட் மற்றும் தாட் உற்பத்தி ஆலைகளில் தேங்கியுள்ள தயாரிப்புப் பணிகள், மத்திய கட்டளையகம் (CENTCOM) முழுவதும் மேற்கொள்ளப்பட்டுள்ள விமானம் தாங்கி கப்பல்களின் கூடுதல் நிலைநிறுத்தம், எரிசக்தி அதிர்ச்சி மற்றும் நுகர்வோர் விலை உயர்வால் அமெரிக்கப் பொருளாதாரத்திற்கு ஏற்பட்டுள்ள ஒட்டுமொத்த பொருளாதார பாதிப்புகள் ஆகியவை அடங்கும்.

இந்தப் பேரழிவின் பின்னணியில், அமெரிக்க ஆளும் வர்க்கத்தின் கணிசமான பிரிவுகள், ட்ரம்ப் இராணுவ நடவடிக்கைகளை மேலும் அதிகரிக்க வேண்டும் என்று கோரி வருகின்றன.

“போரிடுவதற்கான ட்ரம்பின் மனவுறுதியை ஈரான் சோதிக்கிறது” என்ற தலைப்பிலான ஒரு கட்டுரையில், வோல் ஸ்ட்ரீட் ஜேர்னல் ஆசிரியர் குழு இவ்வாறு எழுதியது: “பெரிய அளவிலான இராணுவ நடவடிக்கைகளை மீண்டும் தொடங்குவதில் ஆழ்ந்த தயக்கத்தைக் காட்டியதன் மூலம், அவர் ஈரானியர்கள் சிறந்த நிபந்தனைகளுக்காகக் காத்திருக்க ஊக்குவித்தார். இப்போதும் கூட போர்நிறுத்தத்தை செயற்கை சுவாசத்தில் வைத்திருப்பதன் மூலம், திரு. ட்ரம்ப் அதே செய்தியையே அனுப்புகிறார். ஆனால் ஈரானின் முடிவுக்காகக் காத்திருப்பதற்குப் பதிலாக, அமெரிக்கா குறைந்தபட்சம் ஹோர்முஸ் நீரிணையில் இருந்து வணிகக் கப்பல்களை வெளியே வழிநடத்தும் பணியையாவது மீண்டும் தொடங்கலாம். தனது செல்வாக்கை தான் இழந்து வருகிறோம் என்பதை அந்த ஆட்சி உணர வேண்டும்.”

வாஷிங்டன் போஸ்ட் இதழில் வியாழக்கிழமை வெளியான, “ஈரானில் வெற்றியின் விளிம்பிலிருந்து தோல்வியைத் தழுவும் அபாயத்தில் ட்ரம்ப் உள்ளார்” என்ற கட்டுரையில் மார்க் திசென் போரைத் தீவிரப்படுத்துமாறு அழைப்பு விடுத்துள்ளார். “அப்படியானால், ட்ரம்ப் என்ன செய்ய வேண்டும்? எளிது: அவர் தொடங்கியதை முடித்து வைக்க வேண்டும்,” என்று திசென் எழுதியுள்ளார்.

சுதந்திரத் திட்டத்தை (Project Freedom) மீண்டும் தொடங்குங்கள்... ஈரான் மீண்டும் அமெரிக்கா மீது துப்பாக்கிச் சூடு நடத்தினாலோ அல்லது எமது வளைகுடா நட்பு நாடுகளின் எரிசக்தி உள்கட்டமைப்பை அச்சுறுத்தினாலோ, ஈரானின் 90 சதவீத எண்ணெய் கடந்து செல்லும் கார்க் தீவில் உள்ள ஈரானின் எரிசக்தி உள்கட்டமைப்பைத் தாக்குவதன் மூலம் பதிலடி கொடுங்கள். பின்னர் இஸ்ரேலுக்குப் போர் நடவடிக்கைகளை மீண்டும் தொடங்க பச்சைக்கொடி காட்டுங்கள், ஈரான் முழுவதும் உள்ள அதன் தலைமைத்துவம், ஆயுதங்கள் மற்றும் எரிசக்தி இலக்குகளைத் தாக்கச் சொல்லுங்கள்... ஈரான் அப்போதும் சரணடையவில்லை என்றால், ட்ரம்ப் இறுதிக்கட்டத் தாக்குதல்களைத் தொடுக்கலாம்... அதன் பின்னர் ஈரானிய ஆட்சியை வீழ்த்துவதற்கு ஈரானிய மக்களுக்கு ஆயுதம் வழங்குவதற்கான இரகசிய நடவடிக்கைகளைத் தொடங்கலாம்.”

இராணுவ வன்முறையை மேலும் தீவிரப்படுத்துவது, ட்ரம்ப் நிர்வாகம் எதிர்கொள்ளும் நெருக்கடியைத் தீர்ப்பதற்குப் பதிலாக, அதனை மேலும் ஆழமாக்கவே செய்யும்.