இந்த மொழிபெயர்ப்பின் மூலக் கட்டுரையை இங்கு காணலாம்.

ஏப்ரல் 8 அன்று அமெரிக்கா அறிவித்த போர்நிறுத்தம் ஏறக்குறைய முடிவுக்கு வந்துள்ள நிலையில், ஈரானுடனான மோதல் தீவிரமடைந்து வருகிறது. தெஹ்ரான் மீது மீண்டும் இராணுவத் தாக்குதல்களை நடத்துவோம் என்று ஜனாதிபதி ட்ரம்ப் தனது அச்சுறுத்தல்களை அதிகப்படுத்தி வருகிறார்.

கடந்த திங்களன்று, அமெரிக்காவின் முன்மொழிவுக்கு ஈரான் அளித்த சமீபத்திய பதிலை “முற்றிலும் ஏற்றுக்கொள்ள முடியாதது” என்று நிராகரித்த ட்ரம்ப், அதை ஒரு “குப்பைத் துண்டு” என்று அழைத்ததுடன், தான் அதை “வாசித்துக்கூட முடிக்கவில்லை” என்றும் கூறினார். கடந்த வாரம் அமெரிக்கா ஈரானிய இராணுவ இலக்குகள் மீது துப்பாக்கிச் சூடு நடத்தியபோது நடைமுறையில் முடிவுக்கு வந்த போர்நிறுத்தம், தற்போது “மிக மோசமான நிலையில்” உள்ளதாக அவர் தெரிவித்தார்.

செவ்வாயன்று, சீனாவுக்குப் புறப்படுவதற்கு முன்னதாக, அமெரிக்கா ஈரானுக்கு நிபந்தனைகளை விதிக்கின்ற தனது நிலைப்பாட்டை ஜனாதிபதி தொடர்ந்தார். பெய்ஜிங்குடன் போரைப் பற்றி விவாதிக்கப் போகிறீர்களா என்று கேட்டபோது, போரைப் பற்றி ஜனாதிபதி ஜி ஜிங்பிங்கிடம் பேசுவேன், ஆனால் பெரும்பாலும் வர்த்தகம் பற்றியே பேசுவேன் என்று ட்ரம்ப் கூறினார். மேலும், ஈரான் விவகாரம் அமெரிக்காவின் “முழுமையான கட்டுப்பாட்டில்” இருப்பதால், அது விவாதத்திற்குரிய தலைப்புகளில் ஒன்றாக இருக்காது என்றும் அவர் சேர்த்துக் கொண்டார்.

அவர் செய்தியாளர்களிடம் கூறுகையில், “நாங்கள் ஒரு நல்ல ஒப்பந்தத்தை மட்டுமே செய்வோம்,” என்று கூறியதுடன், தொடர்ந்து, “நாங்கள் ஒரு ஒப்பந்தம் செய்வோம் அல்லது அவர்கள் அழிக்கப்படுவார்கள். எப்படியாவது, நாமே வெற்றி பெறுவோம்,” என்றார்.

அமெரிக்கா ஏற்கனவே “வெற்றி பெற்றுவிட்டது” என்றும் ஈரானுடனான ஒப்பந்தம் பெரிய முக்கியத்துவம் வாய்ந்தது அல்ல என்றும் ட்ரம்ப் தொடர்ந்து வலியுறுத்தி வந்தார். ஈரானை “அழிப்போம்” என்ற அச்சுறுத்தலுடன் சேர்த்து, மே 7 அன்று அமெரிக்கா விரைவில் “ஈரானிலிருந்து வரும் ஒரு பெரிய ஒளியைப் (glow) பார்க்க வேண்டியிருக்கும்” என்று ட்ரம்ப் எச்சரித்தார் — இது அணு ஆயுதங்களைப் பயன்படுத்துவதற்கான அச்சுறுத்தலாகவே பரவலாகப் புரிந்துகொள்ளப்படுகிறது.

ஈரானின் அரசு ஊடகம் மற்றும் பிற செய்தி நிறுவனங்கள் வெளியிட்டுள்ள தகவலின்படி, ஈரானின் தற்போதைய உறுதிப்படுத்தப்பட்ட நிலைப்பாடு என்னவென்றால், எந்தவொரு தீர்வுக்கும் போரில் ஏற்பட்ட இழப்பீடு, பொருளாதாரத் தடைகள் நீக்கம், முடக்கப்பட்ட சொத்துக்களை விடுவித்தல் மற்றும் ஹோர்முஸ் நீரிணையின் மீது ஈரானின் இறையாண்மையை அங்கீகரித்தல் ஆகியவற்றை உள்ளடக்கியிருக்க வேண்டும் என்பதாகும். ஈரானிய வெளியுறவு அமைச்சகத்தின் செய்தித் தொடர்பாளர் இஸ்மாயில் பாகாயி கூறுகையில், தெஹ்ரான் “அசாதாரணமான எதையும் கேட்கவில்லை” என்றும், நாடு தனது “நியாயமான உரிமைகளை” மட்டுமே கோருவதாகவும் தெரிவித்தார்.

ஈரானின் முன்மொழிவில், அதன் செறிவூட்டப்பட்ட யுரேனியத்தின் ஒரு பகுதியை நீர்த்துப்போகச் செய்யவும், மீதமுள்ளவற்றை வெளிநாடுகளுக்கு மாற்றவும் விருப்பம் தெரிவிக்கப்பட்டதாகக் கூறப்படுகிறது. ஆனால், இவை வாஷிங்டனிடம் முழுமையாக சரணடைவதற்குச் சமமான நிபந்தனைகளின் கீழ் இருக்காது என்பதில் ஈரான் உறுதியாக உள்ளது.

அமெரிக்க ஏகாதிபத்தியம் விதிக்கும் கட்டமைப்பை ஏற்க ஈரான் மறுத்து வருகிறது என்பதே இங்கு மிக முக்கியமான அரசியல் புள்ளியாகும். இஸ்ரேலின் ஆதரவுடன் அமெரிக்கா முன்னெடுத்துள்ள இந்த சட்டவிரோதப் போரில், ஈரானின் 13,000ம் இடங்கள் ஏவுகணைத் தாக்குதல்களுக்கு இலக்கானதோடு. அந்த நாட்டின் பெரும்பாலான அரசியல் தலைவர்கள் படுகொலையும் செய்யப்பட்டுள்ளனர்.

ஈரானின் நிலைப்பாட்டை ஒரு முட்டுக்கட்டையாக வெள்ளை மாளிகை சித்தரித்து வரும் வேளையில், எந்தவொரு அமைதிக்கான உடன்படிக்கையும் போரினால் ஏற்பட்ட சேதங்களுக்கான இழப்பீடு மற்றும் மூலோபாய முக்கியத்துவம் வாய்ந்த கடல்வழிப் பாதையின் மீதான தனது இறையாண்மை உரிமைகளை அங்கீகரிப்பதோடு இணைக்கப்பட வேண்டும் என்பதில் தெஹ்ரான் தொடர்ந்து வெளிப்படையாக இருந்து வருகிறது.

கடந்த 48 மணிநேரத்தில், ஹோர்முஸ் நீரிணையில் ஈரான் அல்லது அமெரிக்கத் தாக்குதலால் படகுகள் மூழ்கடிக்கப்பட்டதாக பகிரங்கமாக உறுதிப்படுத்தப்பட்ட தகவல்கள் எதுவும் இல்லை. இருப்பினும், இந்த கடல்வழிப் பாதை போரின் மைய மூலோபாய மோதல் புள்ளியாகத் தொடர்கிறது. அமெரிக்கா தனது கடற்படை அழுத்தத்தைத் தக்கவைத்துக்கொண்டு, நீரிணையை மீண்டும் திறக்க முயற்சிப்பதாகக் கூறி வருகிறது. அதே நேரத்தில், தெஹ்ரான் அங்கு தனக்கே இறையாண்மை உரிமை இருப்பதாக வலியுறுத்தி வருகிறது.

நடைமுறை ரீதியாகப் பார்த்தால், மே 4 அன்று அமெரிக்க நிதித்துறை அமைச்சர் ஸ்காட் பெசென்ட் கூறியதற்கு மாறாக, இந்த நீரிணை வாஷிங்டனின் “முழுமையான கட்டுப்பாட்டில்” இல்லை. அங்கு தொடர்ந்து நிலவும் இடையூறுகள், இராணுவ ரோந்துகள் மற்றும் பேச்சுவார்த்தைகள் ஆகியவை, அந்த முக்கிய நீர்வழிப் பாதை அமெரிக்காவின் கட்டுப்பாட்டில் இல்லாத ஒரு சர்ச்சைக்குரிய முனையமாக இருப்பதையே காட்டுகின்றன.

வாஷிங்டன் இந்த நீர்வழிப் பாதையை “திறக்க” உதவுமாறு சீனாவிடம் பகிரங்கமாக வேண்டுகோள் விடுப்பதே, வெறும் உத்தரவின் மூலம் அமெரிக்காவால் அங்கு தடையற்ற போக்குவரத்தை உறுதிப்படுத்த முடியாது என்பதற்கான ஒப்புதலாகும். கடந்த செவ்வாயன்று, ஈரானின் லாவன் தீவு (Lavan Island) சுத்திகரிப்பு நிலையம் மீது ஐக்கிய அரபு அமீரகம் இரகசியத் தாக்குதல் நடத்தியதாக வெளிவந்த செய்திகள், இந்த நீரிணை தொடர்பான மோதலில் அமெரிக்க ஏகாதிபத்தியத்தின் பினாமிகளாக செயல்படும் பல பிராந்திய சக்திகள் ஈடுபட்டுள்ளன என்பதை நிரூபிக்கின்றன.

அபுதாபி இந்த தாக்குதலில் தங்களுக்குத் தொடர்பு இருப்பதாகப் பகிரங்கமாக ஒப்புக்கொள்ளவில்லை என்றாலும், கூறப்படும் இந்தத் தாக்குதல் ஒரு பெரிய தீ விபத்தை ஏற்படுத்தியுள்ளதுடன், சுத்திகரிப்பு ஆலை உற்பத்தியை மாதக்கணக்கில் பாதிக்கும் என்றும் எதிர்பார்க்கப்படுகிறது. பெயர் குறிப்பிட விரும்பாத வட்டாரங்களின் தகவல்களின் அடிப்படையில், சவூதி அரேபியா ஈரானுக்கு எதிரான இரகசிய நடவடிக்கைகளில் ஈடுபட்டுள்ளதாக ராய்ட்டர்ஸ் செய்தி நிறுவனம் ஒன்றும் தெரிவித்துள்ளது. இந்த அறிக்கைகள், வளைகுடா முழுவதிலும் உள்ள அரசுத் தரப்பினர் மற்றும் பினாமிகளின் வலையமைப்பால் இந்தப் போர் நடத்தப்படுகிறது என்பதையும், இவை அனைத்தும் அமெரிக்க அரசாங்கத்தால் நிர்வகிக்கப்படுகின்றன என்பதையும் உறுதிப்படுத்துகின்றன.

செவ்வாயன்று, பென்டகனின் உயர்மட்ட பட்ஜெட் அதிகாரியான ஜூல்ஸ் “ஜே” ஹர்ஸ்ட் சட்டமியற்றுபவர்களிடம் கூறுகையில், “உபகரணங்களைப் பழுதுபார்ப்பது, மாற்றுவது மற்றும் பொதுவான செயல்பாட்டுச் செலவுகள்” காரணமாகப் போருக்கான செலவுகள் சுமார் 29 பில்லியன் டாலராக அதிகரித்துள்ளதாகத் தெரிவித்தார்.

பிரதிநிதிகள் சபை மற்றும் செனட் நிதி ஒதுக்கீட்டுக் குழுக்கள் இரண்டின் முன்பும் அளித்த சாட்சியத்தில், போரில் அதிகரித்து வரும் செலவை மூடிமறைக்க யுத்த அமைச்சர் பீட் ஹெக்ஸெத் மேற்கொண்ட முயற்சியை ஹர்ஸ்டினின் சாட்சியம் அம்பலப்படுத்தியது. பத்து வாரப் போரின் மொத்தச் செலவு குறித்த எந்தக் கேள்விகளுக்கும் பதிலளிக்க ஹெக்ஸெத் மறுத்துவிட்டார். சுமார் 1.5 டிரில்லியன் டாலர் மதிப்பிலான 2027 ஆம் ஆண்டுக்கான இராணுவ வரவு செலவுத் திட்டத்திற்கான வெள்ளை மாளிகையின் கோரிக்கைக்கு மத்தியில், அவர் காங்கிரஸின் முன் ஆஜராகி இருந்தார்.

ஈரானிய சுகாதார அமைச்சகம் ஈரானில் 1,700 க்கும் மேற்பட்ட பொதுமக்கள் உட்பட 3,468 பேர் கொல்லப்பட்டுள்ளதாகவும், 26,500 க்கும் அதிகமானோர் காயமடைந்துள்ளதாகவும் தெரிவித்துள்ளது. அமெரிக்கத் தரப்பில் சுமார் 200 இராணுவத்தினர்கள் காயமடைந்துள்ளனர் மற்றும் 13 பேர் இறந்துள்ளனர்.

செவ்வாயன்று ட்ரம்ப் தனது ‘ட்ரூத் சோஷியல்’ பதிவில் போர் குறித்த ஊடக விமர்சனங்களைக் கண்டித்து, “எமக்கு எதிராக ஈரானிய எதிரிகள் இராணுவ ரீதியாக சிறப்பாகச் செயல்படுவதாகப் பொய்ச் செய்திகள் கூறுவது தேசத் துரோகத்திற்குச் சமமானது; ஏனெனில் இது முற்றிலும் தவறான மற்றும் அபத்தமான கூற்று,” என்று எழுதியுள்ளார். பொது விமர்சனங்கள் மீதான ட்ரம்ப் நிர்வாகத்தின் இத்தகைய தாக்குதல்களுடன் இணைந்து, பென்டகன் பத்திரிகையாளர்களுக்கான அனுமதியை “பாதுகாப்பு” காரணங்களைக் காட்டி ரத்து செய்வது போன்ற கட்டுப்பாடுகளையும் விதித்து வருகிறது.

யுத்த அமைச்சின் கொள்கைகள் பென்டகன் செய்தியாளர்களையும் இலக்கு வைத்துள்ளன. மேலும் இராணுவ வெளியீடுகளைப் பொறுத்தவரை, அவற்றின் உள்ளடக்கம் மற்றும் அணுகல் மீது கடுமையான கட்டுப்பாடுகள் விதிக்கப்பட்டுள்ளன. போர்க்காலச் சூழலைப் பயன்படுத்தி, தணிக்கையை விரிவுபடுத்துவதும் சட்ட நடவடிக்கைகளை மேற்கொள்வோம் என்று அச்சுறுத்துவதன் மூலமும் விமர்சனங்களை மௌனமாக்குவதே இதன் நோக்கமாக உள்ளது.

சீனாவிடமிருந்து அமெரிக்காவிற்கு எந்த உதவியும் தேவையில்லை என்று ட்ரம்ப் வலியுறுத்துவதுக்கும், ஹோர்முஸ் நீரிணையை மீண்டும் திறக்க ஈரானிடம் தனது செல்வாக்கைப் பயன்படுத்துமாறு அமெரிக்க உயர்மட்ட அதிகாரிகள் பெய்ஜிங்கை பகிரங்கமாக வலியுறுத்தி வருவதற்கும் இடையே பெரும் முரண்பாடு நிலவுகிறது. செயலாளர் பெசென்ட், இராஜதந்திர ரீதியாக “முன்வர வேண்டும்” என்று சீனாவைக் கேட்டுக்கொண்டார். இதன் மூலம், வாஷிங்டன் வேறுவிதமாகப் பாசாங்கு செய்தாலும், உள்ளுக்குள் சீனாவின் உதவியை நாடுகின்றது என்பது தெளிவாகிறது.

லெபனானில், இஸ்ரேலியத் தாக்குதல்கள் தொடர்கின்றன. ஞாயிற்றுக்கிழமை தெற்கு லெபனானில் உள்ள சுகாதார மையங்கள் மீது நடத்தப்பட்ட தாக்குதல்களில் இரண்டு மருத்துவப் பணியாளர்கள் கொல்லப்பட்டனர். காஸா இனப்படுகொலை முழுவதும் சியோனிச ஆட்சியின் மூலோபாய இலக்காக இருந்த மருத்துவப் பணியாளர்களைக் கொல்லும் இந்த நடவடிக்கை, லெபனான் போரின் குற்றவியல் தன்மையை வெளிச்சம் போட்டுக் காட்டுகிறது.

லெபனானில் இஸ்ரேலியத் தாக்குதல்கள் தொடர்கின்றன. இதன் விளைவாக, தெற்கு லெபனானில் உள்ள சுகாதார மையங்கள் மீது ஞாயிற்றுக்கிழமை நடத்தப்பட்ட தாக்குதல்களில் இரண்டு மருத்துவப் பணியாளர்கள் கொல்லப்பட்டனர். மருத்துவப் பணியாளர்கள் மீதான இந்தக் கொலைகள் —காஸா இனப்படுகொலை முழுவதும் சியோனிச ஆட்சியின் ஒரு முக்கிய நோக்கமாக இவை இருந்தன— லெபனான் மீதான தாக்குதலின் குற்றத் தன்மையை அம்பலப்படுத்துகிறது.