இந்த மொழிபெயர்ப்பின் மூலக் கட்டுரையை இங்கு காணலாம்.

வெள்ளிக்கிழமை தெற்கு லெபனானில் இஸ்ரேல் நடத்திய தாக்குதல்களில் குறைந்தது நான்கு பேர் கொல்லப்பட்டனர்; மேலும், சிடோன் (Sidon) மாவட்டத்தில் உள்ள மேலும் ஒன்பது நகரங்கள் மற்றும் கிராமங்களிலிருந்தும் மக்களைக் கட்டாயமாக வெளியேறுமாறு இராணுவம் உத்தரவிட்டது.

முந்தைய தாக்குதல்களால் இடம்பெயர்ந்த சுமார் 2,500 பேருக்கு ஏற்கனவே அடைக்கலம் அளித்து வந்த அன்கூன் (Aanqoun) கிராமத்தில், ஹெஸ்பொல்லா நிலைகள் எனக் கூறப்படும் இடங்களைத் தான் தாக்கப் போவதாக இராணுவம் அறிவித்து, குடியிருப்பாளர்களை வெளியேறுமாறு உத்தரவிட்டதைத் தொடர்ந்து நூற்றுக்கணக்கான குடும்பங்கள் அங்கிருந்து தப்பியோடின. அக்குடும்பங்கள் தங்குமிடம் தேடிச் சென்றதால், சிடோனை நோக்கிய சாலைகளில் கார்கள் நெரிசலை ஏற்படுத்தின.

லெபனான் மீதான இந்தத் தாக்குதல்கள், ஈரானுக்கு எதிரான அமெரிக்க-இஸ்ரேலிய போருடன் ஒருங்கிணைந்து நடத்தப்படும் இஸ்ரேலியப் போரின் தீவிரப்பாடாகும். மார்ச் 2 முதல் இப்போரில் குறைந்தது 3,516 பேர் கொல்லப்பட்டுள்ளனர் மற்றும் 10,674 பேர் காயமடைந்துள்ளனர் என்று லெபனான் சுகாதார அமைச்சகம் தெரிவித்துள்ளது. மே 30-31 வார இறுதியில் குறைந்தது 88 பேர் கொல்லப்பட்டதாக ஐக்கிய நாடுகள் சபை கணக்கிட்டுள்ளது, மேலும் இஸ்ரேலிய தாக்குதல்களில் செவ்வாய்க்கிழமை குறைந்தது எட்டு பேரும், புதன்கிழமை ஒன்பது பேரும், வியாழக்கிழமை நான்கு பேரும் கொல்லப்பட்டனர். இறந்தவர்களில் ஒரு துணை மருத்துவரும் அடங்குவார்; மார்ச் மாதம் முதல் கொல்லப்பட்ட 130-க்கும் மேற்பட்ட மருத்துவப் பணியாளர்களில் இவரும் ஒருவர்.

வியாழக்கிழமை, இஸ்ரேலிய பிரதமர் பெஞ்சமின் நெதன்யாகு தெற்கு லெபனான் ஆக்கிரமிப்பை நிரந்தரமானது என்று அறிவித்தார். இஸ்ரேலுக்கு “பாதுகாப்பு மண்டலங்கள்: எல்லையின் மறுபுறத்தில் பிரிப்பு மற்றும் பாதுகாப்பு பகுதிகள்” தேவை என்று அவர் வடக்கு இஸ்ரேலில் உள்ள மேயர்களிடம் கூறினார். “இது ஒரு அடிப்படையான மாற்றமாகும்” என்று அவர் குறிப்பிட்டார்.

அமெரிக்க ஊடகங்கள் ட்ரம்ப் மற்றும் ஈரானுக்கு இடையிலான “அமைதி” பேச்சுவார்த்தைகளில் தொடர்ந்து கவனம் செலுத்தி வரும் வேளையில், லெபனான், காஸா மற்றும் மேற்கு கரையில் நடக்கும் நிகழ்வுகள், எந்தவொரு “போர்நிறுத்தமும்” தொடர்ந்து நடந்து வரும் வெகுஜனப் படுகொலைகளுக்கான ஒரு மூடிமறைப்பு  மட்டுமே என்பதைத் தெளிவுபடுத்துகின்றன.

இஸ்ரேலும் லெபனானும் ஒரு போர்நிறுத்தத்தை புதுப்பிக்க ஒப்புக்கொண்டதாக அமெரிக்கா புதன்கிழமை அறிவித்தது; இப்போரநிறுத்தம் ஹெஸ்பொல்லா தனது அனைத்து தாக்குதல்களையும் நிறுத்திவிட்டு தெற்கு லெபனானில் இருந்து தனது போராளிகளை பின்வாங்க வேண்டும் என்று கோருகிறது, ஆனால் இஸ்ரேலின் ஆக்கிரமிப்பு படைகளிடம் எதையும் கோரவில்லை. சில மணிநேரங்களுக்குப் பிறகு, இஸ்ரேலிய பாதுகாப்பு மந்திரி இஸ்ரேல் காட்ஸ், இராணுவம் பின்வாங்காது என்றும், இடம்பெயர்ந்த நூறாயிரக்கணக்கான லெபனானியர்கள் தாயகம் திரும்ப அனுமதிக்கப்பட மாட்டார்கள் என்றும், இஸ்ரேல் “பெய்ரூட்டில் தாக்குதல் நடத்துவதற்கு, அமெரிக்காவின் ஆதரவுடன் கூடிய செயல்படும் சுதந்திரத்தை” தக்க வைத்துக் கொண்டுள்ளது என்றும் அறிவித்தார். ஹெஸ்பொல்லா தலைவர் நைம் காசிம் இந்த ஒப்பந்தத்தை நிராகரித்தார்; தாக்குதலுக்கு உள்ளாகியிருக்கும் நிலையில் தெற்கிலிருந்து தனது போராளிகளை வெளியேறக் கட்டளையிடுவது “சரண் அடைவதையும், தோல்வியையும் மற்றும் எதிரி தன் இலக்குகளை அடைவதையும்” குறிக்கும் என்று அவர் அல்-மனார் தொலைக்காட்சியிடம் தெரிவித்தார்.

மர்ஜாயூன் அருகே ஐக்கிய நாடுகள் சபையின் அமைதிப்படை வீரர் ஒருவர் மோர்ட்டார் குண்டுவீச்சில் கொல்லப்பட்டார்; இதற்கு இஸ்ரேலும் ஹெஸ்புல்லாவும் ஒருவரையொருவர் குற்றம் சாட்டினர்.

இஸ்ரேலியப் படைகள் கடந்த வாரம் பியூஃபோர்ட் கோட்டையைக் கைப்பற்றி, லிட்டானி ஆற்றைக் கடந்து, தெற்கு லெபனானின் சுமார் 2,000 சதுர கிலோமீட்டர் பரப்பளவை ஆக்கிரமித்துள்ளன; இது நாட்டின் மொத்த பரப்பளவில் கிட்டத்தட்ட ஐந்தில் ஒரு பங்காகும். அமெரிக்க ஜனாதிபதி டொனால்ட் ட்ரம்பால் ஆயுதபாணியாக்கப்பட்டு ஆதரிக்கப்படும் இஸ்ரேலிய இராணுவம், தெற்குப் பகுதியை ஒரு தடையில்லாத் தாக்குதல் மண்டலமாக  மாற்றியுள்ளது.

ஒரு மில்லியனுக்கும் அதிகமான மக்கள் தங்கள் வீடுகளை விட்டு விரட்டப்பட்டுள்ளதாகவும், மக்கள் தொகையில் கிட்டத்தட்ட கால் பகுதியினரான 1.24 மில்லியன் மக்கள் பட்டினியால் வாடுவதாகவும் ஐக்கிய நாடுகள் சபையின் மனிதாபிமான அலுவலகம் தெரிவித்துள்ளது.

காஸாவில், இஸ்ரேல் இந்த நிலப்பகுதியின் 60 சதவீதத்தைத் தன் கட்டுப்பாட்டில் வைத்துள்ளதாகக் கடந்த வாரம் நெதன்யாகு கூறினார்; இது முன்பிருந்த 50 சதவீதத்திலிருந்து அதிகரித்துள்ளது. மேலும், கூடுதல் பகுதிகளைக் கைப்பற்றுமாறு இராணுவத்திற்கு அவர் உத்தரவிட்டுள்ளார். “முதலில், 70” என்று அவர் கூறியபோது, அங்கிருந்த கூட்டம் “100!” என முழக்கமிட்டது.

ட்ரம்பின் 20-அம்ச திட்டத்தின் அடிப்படையில் அக்டோபர் 2025-இல் எட்டப்பட்ட போர்நிறுத்தத்தின் கீழ், இஸ்ரேலியப் படைகள் “மஞ்சள் கோடு” என்று அழைக்கப்படும் எல்லைக்குப் பின்வாங்க வேண்டியிருந்தது; ஆனால், அதற்கு மாறாக அவர்கள் அக்கோட்டையையும் தாண்டி முன்னேறியுள்ளனர்.

இந்தத் தற்காலிக போர்நிறுத்தம் நடைமுறைக்கு வந்த ஏழு மாதங்களில், 929 பாலஸ்தீனியர்கள் கொல்லப்பட்டுள்ளதுடன் 2,811 பேர் காயமடைந்துள்ளனர் என்று காஸா சுகாதார அமைச்சகம் கணக்கிட்டுள்ளது. காஸாவிலிருந்து மக்களை வெளியேற்றும் “சுயவிருப்ப வெளியேற்ற” திட்டம், “சரியான நேரத்திலும் சரியான முறையிலும்” தொடரும் என்று காட்ஸ் மே 27 அன்று அறிவித்தார்.

இஸ்ரேலிய நிதி மந்திரி பெசலெல் ஸ்மோட்ரிச், இராணுவம் “காஸா பகுதியை முழுமையாகக் கைப்பற்றுவதற்கு உடனடியாகத் தயாராக வேண்டும்” என்றும், அங்கு யூத குடியிருப்புகளை உருவாக்க வேண்டும் என்றும் கோரியுள்ளார். மனித உரிமை அமைப்புகள் இந்தக் குடியேற்றத் திட்டத்தை இனச் சுத்திகரிப்புக்கான ஒரு திட்டம் என்று அழைக்கின்றன.

ஆக்கிரமிக்கப்பட்ட மேற்கு கரையில், இஸ்ரேலியப் படைகள் வெள்ளிக்கிழமை ஹெப்ரோன் அருகே ஏழு மாத பாலஸ்தீனியக் குழந்தையைச் சுட்டுக் கொன்றதுடன், அவரது பெற்றோரையும் காயப்படுத்தின.

லெபனான் மற்றும் பாலஸ்தீனத்தில் ஏற்பட்டுள்ள இந்தத் தீவிரப்பாடுகள், ஈரானுக்கு எதிரான அமெரிக்க-இஸ்ரேலியப் போர் தொடர்பான ஆழமடைந்து வரும் நெருக்கடிக்கு மத்தியில் நிகழ்கின்றன. இந்தப் போர் அதன் இலக்குகளை அடையத் தவறிவிட்டது. பிப்ரவரி 28 அன்று, அமெரிக்காவும் இஸ்ரேலும் ஒரு திடீர் தாக்குதலைத் தொடங்கின; இதில் உச்ச தலைவர் அலி கமேனி மற்றும் பத்து மூத்த அதிகாரிகள் உட்பட ஈரானிய தலைமையின் பெரும்பகுதி கொல்லப்பட்டது. ஆனால், இது அந்த ஆட்சியின் வீழ்ச்சியைக் கொண்டுவரத் தவறிவிட்டது; கமேனியின் மகன் மொஜ்தாபா சில நாட்களிலேயே பதவியில் அமர்த்தப்பட்டார், மேலும் எந்தவொரு எழுச்சியும் ஏற்படவில்லை.

அதன்பிறகு அமெரிக்கா, ஹோர்முஸ் நீரிணையை கடற்படை முற்றுகையிட்டு ஈரானை நெரிக்க முயன்றது; ஆனால் இந்த முயற்சியும் தெஹ்ரானை நிபந்தனைகளுக்குப் பணிய வைப்பதில் தோல்வியடைந்துள்ளது. மூன்று மாதங்களுக்கும் மேலாகியுள்ள நிலையில், 13 அமெரிக்கப் படை வீரர்கள் உயிரிழந்துள்ளனர்; மேலும் இந்தச் சண்டை எந்தவொரு முடிவும் இன்றி நீடித்துக்கொண்டே செல்கிறது.

ட்ரம்பிற்கும் நெதன்யாகுவிற்கும் இடையே இருப்பதாகக் கூறப்படும் கருத்து வேறுபாடுகள், அந்தத் தோல்வி குறித்து திருடர்களுக்கு இடையே ஏற்பட்டுள்ள ஒரு மோதலாகும். லெபனான் தாக்குதலின் தீவிரப்பாடு தொடர்பாக நெதன்யாகுவின் போக்கைப் “பைத்தியக்காரத்தனம்” என்று ட்ரம்ப் சாடியதாகவும், மேலும் “நான் மட்டும் இல்லையென்றால் நீ சிறையில் இருந்திருப்பாய்” மற்றும் “இதன் காரணமாக எல்லாரும் இஸ்ரேலை வெறுக்கிறார்கள்” என்று அவரிடம் கூறியதாகவும் ஜூன் 1 அன்று ஆக்ஸியோஸ் செய்தி வெளியிட்டது. ஜூன் 3 அன்று இந்தத் தொலைபேசி அழைப்பை உறுதிப்படுத்திய ட்ரம்ப், தான் “சற்று எரிச்சலடைந்ததாகக்” கூறிய போதிலும், தனக்கு நெதன்யாகுவைப் பிடிக்கும் என்றும் அவரிடம் “நாம் இதை நிறுத்த வேண்டும்” என்று கூறியதாகவும் தெரிவித்தார்.

“போர்நிறுத்த” பேச்சுவார்த்தைகள் நடந்து வந்தபோதிலும், அமெரிக்கா தொடர்ந்து ஈரான் மீது தாக்குதல் நடத்தி வருகிறது. இந்த வாரம், அமெரிக்கா முற்றுகையிட்டுள்ள ஹோர்முஸ் நீரிணைக்கு மேல் நான்கு ஈரானிய ட்ரோன்களைச் சுட்டு வீழ்த்திய பின்னர், அமெரிக்கப் படைகள் ஈரானிய ரேடார் தளங்களைத் தாக்கின. ட்ரம்ப் போர்நிறுத்தத்தைக் காலவரையின்றி நீடித்ததுடன், பேச்சுவார்த்தைகள் “ஏதாவது ஒரு வழியில்” முடியும் வரை இந்த முற்றுகை தொடரும் என்றும் கூறினார்.

ஜனநாயகக் கட்சி இப்போரின் இலக்குகளைப் பகிர்ந்து கொள்கிறது. வியாழக்கிழமை, மிச்சிகனின் ரஷீதா த்லைப் மற்றும் இலினாய்ஸின் டெலியா ராமிரெஸ் ஆகிய ஜனநாயகக் கட்சி பிரதிநிதிகள் கொண்டு வந்த, லெபனான் போரிலிருந்து அமெரிக்கப் படைகளை வெளியேற்றுவதற்கான போர் அதிகாரத் தீர்மானத்தை பிரதிநிதிகள் சபை 324-92 என்ற வாக்குக் கணக்கில் தோற்கடித்தது. தொண்ணூற்றொரு ஜனநாயகக் கட்சியினர் அதற்கு ஆதரவாக வாக்களித்தனர்; 117 பேர் எதிர்த்து வாக்களித்தனர், மேலும் அதற்கு ஆதரவாக வாக்களித்த ஒரே குடியரசுக் கட்சியினர் தாமஸ் மாசி மட்டுமே ஆவார்.

பிரதிநிதிகள் சபையின் ஜனநாயகக் கட்சித் தலைவர் ஹக்கீம் ஜெப்ரிஸ், சிறுபான்மையினக் கட்சித் கொறடா கேத்தரின் கிளார்க் மற்றும் காகஸ் தலைவர் பீட் அகிலர் ஆகியோர் இந்த எதிர்ப்பிற்குத் தலைமை தாங்கினர். ஒரு கூட்டு அறிக்கையில், அவர்கள் பின்வருமாறு அறிவித்தனர்: “லெபனான் மக்கள், லெபனான் அரசாங்கம் மற்றும் லெபனான் ஆயுதப் படைகள் அமைதியாக வாழ்வதற்கும், அமெரிக்காவின் பரம எதிரியாக இருக்கும் வன்முறை பயங்கரவாத அமைப்பான ஹெஸ்பொல்லாவைத் தோற்கடிப்பதற்கும் எடுக்கும் முயற்சிகளில் நாங்கள் அவர்களுடன் துணை நிற்கிறோம்.”

இந்த அறிக்கை ஜனநாயகக் கட்சியின் உண்மையான கொள்கையை அம்பலப்படுத்துகிறது. ட்ரம்ப் நிர்வாகத்தின் மீதான அதன் தந்திரோபாய விமர்சனங்கள் இருந்தபோதிலும், மத்திய கிழக்கை அடிபணிய வைக்கும் அந்த நிர்வாகத்தின் அடிப்படை இலக்கையே இக்கட்சியும் ஆதரிக்கிறது.

ட்ரம்பிற்கும் தெஹ்ரானுக்கும் இடையே எத்தகைய “ஒப்பந்தம்” ஏற்பட்டாலும் — அப்படி ஒரு ஒப்பந்தம் சாத்தியம் என்றாலுமே கூட — அதன் உள்ளடக்கத்தை லெபனானும் காஸாவும் முன்கூட்டியே காட்டுகின்றன. காட்ஸ் தெற்குப் பகுதியை விட்டு வெளியேற மாட்டார்; நெதன்யாகு காஸாவின் எஞ்சிய பகுதியைக் கைப்பற்ற உத்தேசித்துள்ளார், மேலும் இரு பிராந்தியங்களிலும் இடம்பெயர்ந்த மக்கள் தங்களது தாயகம் திரும்ப அனுமதிக்கப்பட மாட்டார்கள். இந்த நிர்வாகத்துடனான ஓர் ஒப்பந்தம் என்பது, கையெழுத்திடப்பட்டு தேதியிடப்பட்ட தொடர்ச்சியான படுகொலைகளையும் கொள்ளையடிப்புகளையுமே குறிக்கும்.