இந்த மொழிபெயர்ப்பின் மூலக் கட்டுரையை இங்கு காணலாம்.

ஈரான் மீதான அமெரிக்க-இஸ்ரேலிய போரினால் விளைந்துள்ள எரிசக்தி விலை உயர்வுகளால் உலகப் பொருளாதார நெருக்கடி மேலும் தீவிரமடைந்து வரும் நிலையில், இலங்கையின் மக்கள் விடுதலை முன்னணி / தேசிய மக்கள் சக்தி (ஜே.வி.பி./தே.ம.ச.) அரசாங்கம் மக்களின் வாழ்க்கை நிலைமைகள் மீது இன்னும் கடுமையான தாக்குதல்களைத் தொடுப்பதன் மூலம் பதிலளித்து வருகிறது. அதேநேரம், தொழிலாள வர்க்கத்தின் மத்தியில் அதிகரித்து வரும் கோபம் குறித்து ஆளும் வர்க்கம் மென்மேலும் பதற்றமடைந்து வருகிறது.

கொழும்பில் உள்ள தேர்தல் ஆணைக்குழு அலுவலகத்திற்கு வெளியில், 2024 செப்டம்பர் 22 அன்று நடைபெற்ற இலங்கை ஜனாதிபதித் தேர்தலில் வெற்றி பெற்ற பின்னர் கை அசைத்து மகிழ்ச்சித் தெரிவிக்கும் ஜே.வி.பி. தலைவர் அநுரகுமார திசாநாயக.

மே 20 அன்று, கிழக்கின் மட்டக்களப்பு நகரில் நடைபெற்ற பகிரங்கக் கூட்டம் ஒன்றில் உரையாற்றிய ஜனாதிபதி அநுரகுமார திசாநாயக, 'இலங்கையின் டொலர் நெருக்கடியைக் கையாள்வதற்காகக் கடுமையான நடவடிக்கைகள் எடுக்கப்பட்டு வருகின்றன' என்று கூறியதுடன், மற்றுமொரு பொருளாதார வீழ்ச்சிக்குத் தான் இடமளிக்கப் போவதில்லை என்றும் உறுதியளித்ததாக ஊடக அறிக்கைகள் தெரிவிக்கின்றன. அமெரிக்க டொலருக்கு எதிராக ரூபாயின் மதிப்பு வீழ்ச்சியடைந்து வருவதைச் சுட்டிக்காட்டிய அவர், ரூபாய் அழுத்தத்திற்கு உள்ளாகியிருப்பதாகக் கூறினார்.

அரசாங்கம் சர்வதேச நாணய நிதியத்துடன் இணைந்து செயல்பட்டு வருவதாகவும், எரிபொருள் நுகர்வைக் குறைத்தல், இறக்குமதிகளைக் கட்டுப்படுத்துதல் மற்றும் ஒட்டுமொத்த இறக்குமதிச் செலவுகளைக் குறைத்தல் உட்பட பல முன்மொழிவுகளைச் சமர்ப்பித்துள்ளதாகவும் திசநாயக மேலும் தெரிவித்தார்.

ஏப்ரல் மாதத்தில் சுற்றுலாப் பயணிகளின் வருகை 29 சதவீதம் வீழ்ச்சியடைந்ததையும், எரிபொருள் இறக்குமதிச் செலவு பெப்ரவரியில் 98 மில்லியன் டொலரில் இருந்து மே மாதத்தில் 522 மில்லியன் டொலராக உயர்ந்ததையும் அவர் மேற்கோள் காட்டினார்.

ஜனாதிபதி அங்கு பிரகடனப்படுத்தியதாவது: 'டொலர்கள் நாட்டை விட்டு வெளியேறுவதை நாம் எவ்வாறு தடுக்கலாம் என்பது குறித்து நாம் அனைவரும் சிந்திக்க வேண்டும். மிகக் குறுகிய கால அவகாசமே உள்ளது, அதை நாம் பலத்துடன் எதிர்கொள்ள வேண்டும்.'

'கடந்த கால பொருளாதாரப் பேரழிவுகள் மீண்டும் நிகழ ஒருபோதும் அனுமதிக்க மாட்டோம்' என்ற அவரது வாக்குறுதியானது, தவறான நம்பிக்கைகளை வளர்ப்பதையும், அதிகரித்து வரும் பொதுமக்களின் கோபத்தைத் தணிப்பதையுமே நோக்கமாகக் கொண்டிருந்தது. 'அதைப் பலத்துடன் எதிர்கொள்ள வேண்டும்' என்ற அழைப்பு, உண்மையில் உழைக்கும் மக்கள் இன்னும் பெரிய தியாகங்களைச் சகித்துக் கொள்ள வேண்டும் என்ற ஒரு கோரிக்கையாகும்.

முந்தைய ஆண்டு ஏற்பட்ட பொருளாதார வீழ்ச்சியைத் தொடர்ந்து 2023 இல் கொடூரமான சிக்கன நடவடிக்கைகளைக் கட்டளையிட்ட சர்வதேச நாணய நிதியம், தொழிலாளர்களையும் ஏழைகளையும் காப்பாற்ற வரப்போவதில்லை. முதலாளித்துவ முறைமையைப் பாதுகாப்பதற்கான நடவடிக்கைகள் குறித்து ஆலோசனைகளை வழங்குவதே அதன் வகிபாகமாகும்.

கடந்த வாரம், சர்வதேச நாணய நிதியத்தின் பேச்சாளர் ஒருவர், இலங்கையின் 3 பில்லியன் டொலர் பிணை எடுப்புத் திட்டத்தின் அடுத்த 700 மில்லியன் டொலர் தவணையைப் பெறுவதற்கான தகுதி, மின்சாரம் மற்றும் எரிபொருளுக்கான செலவை மீட்டெடுக்கும் விலை நிர்ணய முறையை மீள நிலைநிறுத்துவதிலேயே தங்கியுள்ளது என்பதை மீண்டும் வலியுறுத்தினார். இதன் அர்த்தம், எரிபொருள் விலை உயர்வின் முழுச் சுமையையும் உழைக்கும் மக்களே சுமக்க வேண்டும் என்பதாகும்.

தற்போதைய நெருக்கடியானது 2026 இல் தொழிலாளர்கள் மற்றும் ஒடுக்கப்பட்ட மக்களின் மத்தியில், 2022 இல் ஏற்பட்டதை விட இன்னும் பெரிய அளவிலான ஒரு எழுச்சியைத் தூண்டிவிடக்கூடும் என்பதே ஜே.வி.பி./தே.ம.ச. அரசாங்கத்தினதும் ஆளும் வர்க்கத்தினதும் பீதியாகும். 2022 இல், வெளிநாட்டு நாணய கையிருப்பின் வேகமான வீழ்ச்சி, இறக்குமதிகள் குறைப்பு அல்லது நிறுத்தப்படுதல், கடுமையான பற்றாக்குறை உருவாக்கம் மற்றும் எரிபொருள், உணவு மற்றும் மருந்து விலைகளின் பெரும் உயர்வு மற்றும் நீண்ட நேர மின்வெட்டுகளையும் நாடு எதிர்கொண்டது. வெளிநாட்டுக் கடன் தவணை தவறலை அறிவிக்க அரசாங்கம் அப்போது நிர்ப்பந்திக்கப்பட்டது.

தாங்கொணாத இந்த நிலைமைகள், ஏப்ரல் மாதம் தொடங்கி நாடு முழுவதும் மில்லியன் கணக்கான தொழிலாளர்கள், கிராமப்புற ஏழைகள் மற்றும் இளைஞர்களும் பங்குபற்றிய நான்கு மாத கால வெகுஜன எழுச்சிக்கு வழிவகுத்தன. இந்த வெகுஜனப் போராட்டம் ஜனாதிபதி இராஜபக்ஷ அரசாங்கத்தின் வீழ்ச்சியிலும் அவரது பதவியிறக்கத்திலும் உச்சக்கட்டத்தை அடைந்தது.

எரிபொருள் மற்றும் மின்சாரத்தினால் ஏற்படும் நட்டங்களை தனது அரசாங்கத்தால் தொடர்ந்து தாங்க முடியாது என்று திசாநாயக இதற்கு முன்னர் எச்சரித்திருந்தார். நுகர்வோர் 392 ரூபாய் மட்டுமே செலுத்தும் வேளையில், ஒரு லிட்டர் டீசலின் விலை 720 ரூபாய் (2.09 அமெரிக்க டொலர்) என அவர் கூறிக்கொண்டதுடன், திறைசேரியால் தொடர்ந்து மானியங்களை வழங்க முடியாது என்றும் அவர் வலியுறுத்தினார்.

இலங்கை மத்திய வங்கியும், கடந்த நான்கு ஆண்டுகளில் முதன்முறையாக 2026 ஆம் ஆண்டில் நாடு நடைமுறைக் கணக்குப் பற்றாக்குறையை எதிர்கொள்ள நேரிடும் என எச்சரித்துள்ளது. முக்கியமாக விண்ணை முட்டும் எண்ணெய் விலைகள் மற்றும் அதிகரித்து வரும் இறக்குமதிச் செலவுகள் காரணமாக, 'இந்த ஆண்டில் வரவுகளை விட வெளிச்செல்லும் தொகைகள் அதிகமாக இருக்கும்' என்று மத்திய வங்கியின் பிரதி ஆளுநர் சந்திரநாத் அமரசேகர ஒப்புக்கொண்டார்.

அரசுக்குச் சொந்தமான இலங்கை பெற்றோலியக் கூட்டுத்தாபனம், 2025 ஆம் ஆண்டு முழுவதுக்கும் வெறும் 1.5 பில்லியன் டொலர்களை மட்டுமே செலவிட்டிருந்த நிலையில், 2026 ஆம் ஆண்டின் முதல் நான்கு மாதங்களில் மட்டும் எரிபொருள் இறக்குமதிக்காக ஏற்கனவே 1 பில்லியன் டொலருக்கும் அதிகமாகச் செலவிட்டுள்ளது.

அதேநேரம், தொடர்ந்து கடுமையாகச் சரிந்து வரும் ரூபாயின் மதிப்பும், ஜனவரி முதல் மே வரை அமெரிக்க டொலருக்கு எதிராக 4.8 சதவீதம் வீழ்ச்சியடைந்துள்ளது, இது இறக்குமதி செய்யப்படும் அனைத்துப் பொருட்களின் விலைகளிலும் கடுமையான உயர்வுக்கு வழிவகுத்துள்ளது.

வெளிநாட்டு கையிருப்பு வெளியேறுவதைத் தடுக்கும் தீவிர முயற்சியில், அரசாங்கம் கடந்த வாரம் வாகன இறக்குமதிக்கு 50 சதவீத மேலதிக வரியை விதித்ததுடன், மேலும் இறக்குமதிக் கட்டுப்பாடுகளை திணிப்பதை பற்றியும் பரிசீலித்து வருகிறது. நிதித்துறை பிரதி அமைச்சர் அனில் ஜயந்த பெர்னாண்டோ, எரிபொருள் நுகர்வைக் குறைக்குமாறும், 'உங்களது தனிப்பட்ட எரிபொருள் பயன்பாட்டைச் சிக்கனப்படுத்துமாறும்' மக்களை வலியுறுத்தினார்.

ஈரான் போரினால் உருவான உலகளாவிய எரிசக்தி அதிர்ச்சிகளுக்குப் பதிலளிக்கும் விதமாக, அரசாங்கம் பெப்ரவரி மாதத்திலிருந்து எரிபொருள் விலையை ஏற்கனவே சுமார் 40 சதவீதம் உயர்த்தியுள்ள அதே நேரம், எரிவாயு விலை 31 சதவீதமும், மின்சாரக் கட்டணம் 32 சதவீதமும் உயர்ந்துள்ளன. இந்த அதிகரிப்புகள் பொருட்கள் மற்றும் சேவைகளின் விலைகள் உயர்வதில் ஒரு சங்கிலித் தொடர் எதிர்வினையை உருவாக்கியுள்ளன. ஜூன் மாத இறுதியில் நீர்க் கட்டணங்களும் உயரவுள்ளன.

ஏற்கனவே வானளவு உயர்ந்துள்ள வாழ்க்கைச் செலவு, தேக்கமடைந்த ஊதியங்கள் மற்றும் வேலையின்மையினாலும் பாதிக்கப்பட்டுள்ள தொழிலாளர்கள் மற்றும் ஏழை குடும்பங்களுக்கு இந்த அதிகரிப்புகள் பேரழிவை ஏற்படுத்தும். கடந்த ஆண்டில், 22 சதவீத இலங்கையர்கள் வறுமைக் கோட்டிற்கு கீழ் வாழ்வதாகவும், மேலும் 10 சதவீதத்தினர் அதற்கு சற்று மேலாக வாழ்வதாகவும் உலக வங்கி மதிப்பிட்டிருந்த அதேநேரம், மக்கள் தொகையில் பாதிக்கும் மேற்பட்டோர் உணவுப் பாதுகாப்பின்மையை எதிர்கொண்டனர். அரசாங்கம் இப்போது அதிகாரப்பூர்வ வறுமைக் கோட்டை மாதத்திற்கு 16,658 ரூபாயிலிருந்து (48.47 அமெரிக்க டொலர்) 16,690 ரூபாயாக உயர்த்தியுள்ளது. அதாவது ஒரு தனிநபர் தனது குறைந்தபட்ச வாழ்க்கைச் செலவுகளை ஈடுகட்ட மட்டுமே குறைந்தது அந்தத் தொகை தேவைப்படுகிறது.

எரிபொருள் பயன்பாட்டைக் குறைக்குமாறும், நுகர்வைச் சுருக்குமாறும், தங்களது இடுப்புப் பட்டைகளை இறுக்கிக் கொள்ளுமாறும் தொழிலாளர்கள் கேட்டுக்கொள்ளப்படும் அதேவேளை, அரசாங்கம் பெரிய வணிகங்கள், வங்கிகள் மற்றும் கூட்டுத்தாபனங்கள் பெறுகின்ற பிரமாண்டமான இலாபங்களைப் பாதுகாத்து வருகிறது. தொலைத்தொடர்புத் துறை இராட்சதனான டயலொக் அக்ஸியோட்டா நிறுவனம், திங்கட்கிழமையன்று தனது 2026 ஆம் ஆண்டின் முதலாவது காலாண்டு நிகர இலாபம் ஆண்டுக்கு ஆண்டு இரட்டிப்பாகி 9.6 பில்லியன் ரூபாயாக (29 மில்லியன் அமெரிக்க டொலர்) உயர்ந்துள்ளதாகத் தெரிவித்தது.

இலங்கை நிலையான எரிசக்தி அதிகார சபையினால் நடத்தப்பட்ட ஆய்வில், நாட்டில் விற்பனை செய்யப்படும் எரிபொருளில் சுமார் 70 சதவீதம் சமூகத்தின் மிகச் செல்வந்தர்களான 30 சதவீதத்தினரால் நுகரப்படுவதாகக் கண்டறியப்பட்டுள்ளது. இந்த கண்டுபிடிப்புகள், இலங்கையில் எரிபொருள் மானியங்கள் ஏழைகளை விட அதிக வருமானம் ஈட்டும் குடும்பங்களுக்கே விகிதாசாரத்திற்கு அப்பாற்பட்ட வகையில் பயனளிக்கின்றன என்பதைக் காட்டுகின்றன.

ஆளும் வர்க்கத்தின் சில பிரிவினர், அதிகரித்து வரும் சமூகக் கோபத்தால் தெளிவாகவே அச்சமடைந்துள்ளனர். ஜே.வி.பி./தே.ம.ச. தலைமைத்துவத்திற்குள் கடுமையான உள்முரண்பாடுகள் நிலவுவதை டெய்லி மிரர் தலைமை ஆசிரியரின் அறிக்கை ஒன்று வெளிப்படுத்தியுள்ளது. சிரேஷ்ட தலைவர்கள் சிலர் எதிர்க்கட்சி நாடாளுமன்ற உறுப்பினர்களை அரசாங்கத்திற்குள் அழைப்பதற்கு முன்மொழிந்ததாகக் கூறப்படுவதுடன், ஒரு பரந்த 'தேசிய அரசாங்கம்' குறித்தும் அவர்கள் கலந்துரையாடியுள்ளனர்.

ஆளும் கட்சியோ அல்லது எந்தவொரு எதிர்க்கட்சியோ இந்த செய்திகளை மறுக்காமல் இருக்கின்றமை, அத்தகைய தயாரிப்புகள் நடந்து வருவதைக் காட்டுகிறது. இலங்கையில் ஒரு புரட்சிகர எழுச்சியால் தங்களது ஆட்சிக்கு அச்சுறுத்தல் ஏற்படும் போதெல்லாம் முதலாளித்துவக் கட்சிகள் ஒன்றிணைந்த நீண்ட வரலாறு உண்டு. முழு முதலாளித்துவக் கட்டமைப்பையே கவிழ்க்க அச்சுறுத்திய 2022 வெகுஜன எழுச்சியின் போதும் இதுவே நடந்தது. அந்த நேரத்தில், திசாநாயக இந்த எழுச்சியை 'அராஜகம்' என்று கண்டித்தார் — எனினும், தங்களது தேர்தல் வெற்றியானது அந்த வெகுஜன இயக்கத்தின் அபிலாஷைகள் வெற்றியடைவதைப் பிரதிபலிக்கிறது என்று ஜே.வி.பி. பின்னர் உரிமை கோரியது.

ஐக்கிய மக்கள் சக்தி (ஐ.ம.ச.) மற்றும் ஸ்ரீலங்கா பொதுஜன முன்னணி உட்பட அனைத்து முதலாளித்துவக் கட்சிகளும், அதிகரித்து வரும் பொதுமக்களின் அதிருப்தியைத் தங்களுக்குச் சாதகமாகப் பயன்படுத்திக் கொள்வதற்காக அரசாங்கத்தின் மீது போலியான விமர்சனங்களை முன்வைத்த போதிலும், அவை சர்வதேச நாணய நிதியத்தின் (IMF) கட்டளைகளை எதிர்ப்பதில்லை.

தொழிலாளர்கள் மீதான தாக்குதல்கள் அதிகரித்து வருகின்ற போதிலும், அரசாங்கத்திற்கு எதிராக ஒரு வெகுஜன இயக்கம் வெடிப்பதற்கான சாத்தியக்கூறுகளைக் கண்டு பீதியடைந்துள்ள தொழிற்சங்க அதிகாரத்துவம், ஒரு சிறிய போராட்டத்திற்கான அழைப்பைக் கூட ஒடுக்கி வருகிறது.

இதேபோல் திவாலாகிப் போயுள்ள முன்னிலை சோசலிசக் கட்சி போன்ற போலி-இடது குழுக்களும், 2022 எழுச்சியின் போது, அந்த வெகுஜன எதிர்ப்பை முதலாளித்துவ பாராளுமன்ற அரசியலுக்குக் கீழ்ப்படுத்துவதற்கும், தொழிலாள வர்க்கத்தின் சுயாதீனமான நடவடிக்கைகளைத் தடுப்பதற்கும் திட்டமிட்ட முறையில் வேலை செய்தன.

இலங்கையில் திசாநாயகவைப் போலவே, இந்தியா, பாகிஸ்தான், பங்களாதேஷ் மற்றும் பிராந்தியத்தின் பிற நாடுகளின் தலைவர்களும் ஆழமடைந்து வரும் பொருளாதார நெருக்கடிக்கு இதே வழியில்தான் பதிலளிக்கிறார்கள்: ஒருபுறம், ஈரான் மீதான அமெரிக்க-இஸ்ரேலிய போருக்கு தங்களது ஆதரவை நீடிக்கிறார்கள்; மறுபுறம், போரின் சுமையைத் தொழிலாள வர்க்கம் மற்றும் ஒடுக்கப்பட்ட மக்கள் மீது நேரடியாகச் சுமத்துகிறார்கள்.

தொழிலாள வர்க்கம் இப்போது ஒரு தீர்க்கமான கேள்வியை எதிர்கொள்கிறது: எவ்வாறு எதிர்த்துப் போராடுவது? வாழ்வாதார நிலைமைகளையும் ஜனநாயக உரிமைகளையும் பாதுகாப்பதற்காக அரசுக்கு எதிராக நடத்தப்படும் எந்தவொரு போராட்டத்திற்கும் விரோதமாகச் செயல்படும் போலி-இடது அமைப்புகளையோ அல்லது தொழிற்சங்க எந்திரங்களையோ தொழிலாளர்கள் நம்பியிருக்க முடியாது.

2022 எழுச்சியின் போது சோசலிச சமத்துவக் கட்சி (சோ.ச.க.) மட்டுமே தொழிலாள வர்க்கத்தையும் கிராமப்புற ஏழைகளையும் சுயாதீனமாக அணிதிரட்டுவதற்காகப் போராடியது. நாடு முழுவதும் உள்ள வேலைத் தளங்கள், பெருந்தோட்டங்கள், மருத்துவமனைகள், பல்கலைக்கழகங்கள் மற்றும் கிராமப்புறங்களிலும் உள்ள சுயாதீன நடவடிக்கை குழுக்களிலிருந்து ஜனநாயக ரீதியாகத் தேர்ந்தெடுக்கப்பட்ட பிரதிநிதிகளைக் கொண்டு, தொழிலாளர்கள் மற்றும் கிராமப்புற வெகுஜனங்களின் ஜனநாயகத்துக்கும் சோசலிசத்துக்குமான மாநாட்டை கூட்டுமாறு அது அழைப்பு விடுத்தது. அத்தகைய பேராளர் மாநாடு ஒரு போராட்ட வேலைத்திட்டத்தை முன்வைக்க வேண்டும்: வாழ்க்கைச் செலவு சுட்டெண்ணுடன் இணைக்கப்பட்ட முழு ஊதிய முறை, தனியார்மயமாக்கலுக்கு முடிவு கட்டுதல், சர்வதேச நாணய நிதியம் மற்றும் சர்வதேச நிதி மூலதனத்திற்குச் செலுத்த வேண்டிய வெளிநாட்டுக் கடன்களை நிராகரித்தல், மற்றும் வங்கிகள், பிரதான பெருநிறுவனங்கள் மற்றும் எரிசக்தித் துறையை தொழிலாள வர்க்கத்தின் ஜனநாயகக் கட்டுப்பாட்டின் கீழ் கொண்டு வருதல் போன்றவை அந்த வேலைத்திட்டத்தில் அடங்க வேண்டும்.

இலங்கைத் தொழிலாளர்கள் தனித்துப் போராடவில்லை. சிக்கன நடவடிக்கைகள், ஏகாதிபத்தியப் போர் மற்றும் அழுகிவரும் முதலாளித்துவ ஒழுங்கின் காட்டுமிராண்டித்தனத்திற்கு எதிராக சர்வதேச அளவில் உழைக்கும் மக்கள் நடத்தி வரும் வளர்ந்து வரும் போராட்டங்களுடன் தங்களது போராட்டம் உணர்வுப்பூர்வமாக இணைக்கப்பட வேண்டும்.

போராடத் துணியும் தொழிலாளர்கள், இளைஞர்கள் மற்றும் அனைவரையும் சோசலிச சமத்துவக் கட்சியில் இணைந்து அதைக் கட்டியெழுப்பக் கோருகிறோம் — தொழிலாளர்-விவசாயிகள் அரசாங்கத்திற்காகவும், உலக சோசலிசத்திற்கான பரந்த போராட்டத்தின் ஒரு பகுதியாக இலங்கையில் சோசலிச மாற்றத்திற்காகவும் போராடும் ஒரே கட்சி இதுவே ஆகும்.