இந்த மொழிபெயர்ப்பின் மூலக் கட்டுரையை இங்கு காணலாம்.

அமெரிக்கா ஈரான் மீதான பகிரங்கமான போரை மீண்டும் தொடங்கியுள்ளது. கடந்த வாரத்தில், அமெரிக்கப் படைகள் நாடு முழுவதும் நூற்றுக்கணக்கான இலக்குகள் மீது குண்டுவீசித் தாக்கியுள்ளன, 90 மில்லியன் மக்கள் வாழும் ஒரு நாட்டின் மீது மீண்டும் கடற்படை முற்றுகையை விதித்துள்ளன, மேலும் இந்தத் தாக்குதலை காலவரையின்றித் தொடர்வதற்கான உரிமையையும் பிரகடனம் செய்துள்ளன. இப்போது வெளிப்பட்டுக்கொண்டிருப்பது ஒரு ஆக்கிரமிப்புப் போரின் புதிய கட்டமாகும் — ஈரானை ஒரு சுதந்திர நாடாக இல்லாமல் செய்து அழிப்பதையும், ஹோர்முஸ் நீரிணையைத் தன் கட்டுப்பாட்டில் கொண்டுவருவதையும், உலகின் மிக முக்கியமான எரிசக்திப் பாதையை அமெரிக்காவின் சுங்கச்சாவடிப் பாதையாக மாற்றுவதையும் நோக்கமாகக் கொண்டுள்ளது.

ஜூன் 17 உடன்படிக்கையின் கீழ், நீரிணை வழியாகக் கப்பல்கள் 60 நாட்களுக்குப் பாதுகாப்பாகச் செல்வதற்குப் பகரமாக, ஈரானியத் துறைமுகங்கள் மீதான தனது முற்றுகையை அமெரிக்கா நீக்கியிருந்தது. இந்த “போர்நிறுத்தம்” வெறும் மூன்று வாரங்கள் மட்டுமே நீடித்தது. அங்காராவில் நடைபெற்ற நேட்டோ உச்சிமாநாட்டின் இறுதி நாளான ஜூலை 8 அன்று ட்ரம்ப் இது முடிவுக்கு வந்துவிட்டதாக அறிவித்தார். அங்கு, ஏகாதிபத்திய சக்திகள் தங்களது இராணுவச் செலவினங்களை மொத்த உள்நாட்டு உற்பத்தியில்  5 சதவீதம் வரை உயர்த்த உறுதியளித்ததோடு, ரஷ்யாவிற்குள் உக்ரேன் ஆழமாக நடத்திய தாக்குதல்களையும் கொண்டாடின.

வெள்ளியன்று ட்ரம்ப், “ஈரானின் அனைத்துப் பகுதிகளையும் முற்றிலுமாக நிர்மூலமாக்கி அழிப்பதற்கு, மேலும் நீட்டிக்கப்படக்கூடிய வகையில் ஓராண்டு காலத்திற்கு அமெரிக்க இராணுவம் தயாராகவும், விருப்பத்துடனும், தகுதியுடனும் உள்ளது” என்று அச்சுறுத்தினார். சனிக்கிழமை இரவு முதல், அமெரிக்கப் படைகள் தொடர்ந்து மூன்று இரவுகளில் ஈரான் முழுவதிலும் உள்ள 300-க்கும் மேற்பட்ட இலக்குகள் மீது தாக்குதல் நடத்தின. இதற்குப் பதிலடியாக, உலகின் தினசரி எண்ணெய் விநியோகத்தில் ஐந்தில் ஒரு பங்கு வழக்கமாகச் கடந்து செல்லும் இந்த நீரிணை, “மறு அறிவிப்பு வரும் வரை மூடப்பட்டிருக்கும்” என்று இஸ்லாமிய புரட்சிகர காவல் படை அறிவித்தது.

பின்னர், திங்கட்கிழமை காலையில், ஈரான் மீதான கடற்படை முற்றுகையை மீண்டும் விதிப்பதாக ட்ரம்ப் அறிவித்தார்; மேலும், வானொலி நிகழ்ச்சித் தொகுப்பாளர் ஹக் ஹெவிட் உடனான நேர்காணலில், “இன்று இரவு நாம் அவர்களை மிகக் கடுமையாகத் தாக்கப் போகிறோம், நாளையும் அவர்களைக் கடுமையாகத் தாக்கப் போகிறோம். இதற்கு எதிராக அவர்களால் ஒரு துரும்பைக் கூட அசைக்க முடியாது” என்று பிரகடனம் செய்தார். அந்த நீரிணை வழியாகக் கொண்டு செல்லப்படும் அனைத்துச் சரக்குகளுக்கும் “20 சதவீதக் கட்டணம் அமெரிக்காவிற்குத் திரும்பச் செலுத்தப்படும்” என்று ட்ரூத் சோஷியல்  தளத்தில் அவர் பதிவிட்டார்.

அமெரிக்க ஏகாதிபத்தியத்துடனான எந்தவொரு போர்நிறுத்தமும் மேலும் ஒரு போருக்கான முன்னோடியாகவே இருக்கும் என்று ஜூன் 15 அன்று உலக சோசலிச வலைத்தளம் (World Socialist Web Site - WSWS) விடுத்த எச்சரிக்கையை இந்நிகழ்வுகள் உறுதிப்படுத்துகின்றன. “போரின் இக்கட்டத்தின் முடிவு என்பது போரின் முடிவு என்று அர்த்தமல்ல,” என்று குறிப்பிட்ட நாம், “2026 போர்நிறுத்தக் கட்டமைப்பு அதனைத் தொடர்ந்து வரும் போருக்கே வழிவகுக்கும்” என்றும் எழுதினோம்.

இந்த மீண்டும் புதுப்பிக்கப்பட்ட தாக்குதல் என்பது, அமெரிக்க ஏகாதிபத்தியம் தன் இலக்குகளை அடைவதில் சந்தித்த தோல்வியின் விளைவே ஆகும். தெஹ்ரானில் உள்ள அரசாங்கத்தைக் கவிழ்க்கவும், ஈரானின் அணுசக்தித் திட்டத்தைக் கலைக்கவும், அதன் ஆயுதப் படைகளை முறியடிக்கவும் மற்றும் ஹோர்முஸ் நீரிணையைக் கைப்பற்றவும் ட்ரம்ப் கடந்த பிப்ரவரியில் ஈரான் மீதான தனது தாக்குதலைத் தொடங்கினார். ஆனால், 136 நாட்களுக்குப் பின்னரும் இந்த இலக்குகளில் ஒன்று கூட எட்டப்படவில்லை.

அமெரிக்க ஏகாதிபத்தியத்தின் நடவடிக்கைகளுக்குப் பின்னால் ஒரு திட்டவட்டமான தர்க்கம் உள்ளது. கடந்த வாரத்தில் ட்ரம்ப், ஈரானின் கிட்டத்தட்ட 90 சதவீத எண்ணெய் ஏற்றுமதி நடைபெறும் கார்க் தீவை கைப்பற்றப் போவதாகவும், ஈரானின் மின் உற்பத்தி நிலையங்களையும் 90 மில்லியன் மக்களின் குடிநீர் தேவையைப் பூர்த்தி செய்யும் கடல்நீரை நன்னீராக்கும் ஆலைகளையும் அழிக்கப் போவதாகவும் அச்சுறுத்தினார். இதற்காக, இரண்டு விமானம் தாங்கி கப்பல் தாக்குதல் குழுக்கள், இரண்டு கடல் மற்றும் தரைவழித் தாக்குதல் குழுக்கள் மற்றும் சுமார் 50,000 அமெரிக்க துருப்புகள் இப்பகுதியில் குவிக்கப்பட்டுள்ளன.

ஒரு முற்றுகை என்பது போரைத் தொடங்குவதற்கான ஒரு செயலாகும்; அதன் தர்க்கரீதியான முடிவு ஆக்கிரமிப்பை நோக்கியே இட்டுச் செல்லும். அப்படியிருக்க, ஹோர்முஸ் நீரிணையைத் தன் கட்டுப்பாட்டுக்குள் கொண்டுவந்து ஆக்கிரமிக்க ட்ரம்ப் நிர்வாகம் எவ்வாறு உத்தேசித்துள்ளது? ஏனெனில், இத்தகையதொரு ஆக்கிரமிப்பு நடவடிக்கைக்குத் தரைவழிப் படைகளைப் பாரிய அளவில் குவிக்க வேண்டியிருக்கும்; அதோடு, ஏற்கனவே மத்திய கிழக்கு முழுவதும் அமெரிக்கப் படைகளுக்கு ஏற்பட்ட இழப்புகளை விட மிக அதிகமான உயிரிழப்புகளையும் இது கோரும்.

மேலும் ஒரு எச்சரிக்கையையும் விடுக்க வேண்டியுள்ளது. ஈரான் தனது ஏவுகணைகளைத் தயாரிக்கும் நிலத்தடித் தொழிற்சாலைகளுக்கு எதிராகக் குறைந்த திறன் கொண்ட அணு ஆயுதங்களைப் பயன்படுத்துவது “சாத்தியமா” என்று ட்ரம்ப் கேட்டதாக ஜூன் 10 அன்று பத்திரிகையாளர் சீமோர் ஹெர்ஷ் (Seymour Hersh) தெரிவித்திருந்தார். அமெரிக்க ஏகாதிபத்தியம் தற்போது எதிர்கொண்டுள்ள இக்கட்டான சூழ்நிலையைக் கருத்தில் கொள்ளும்போது, அணு ஆயுதங்களைப் பயன்படுத்துவதற்கான சாத்தியக்கூறை முற்றிலுமாக விலக்கி வைக்க முடியாது.

ஈரான் மட்டுமே இறுதி இலக்கும் அல்ல. ஈரான் மீதான போர் என்பது மனிதகுலத்தைப் பேரழிவிற்குள் தள்ளும் அச்சுறுத்தலைக் கொண்ட, தீவிரமடைந்து வரும் உலகப் போரின் ஒரு முனையாகும். இது காஸாவில் இஸ்ரேல் தொடர்ந்து நடத்தி வரும் இனப்படுகொலை, மேற்குக் கரையில் அது கட்டவிழ்த்துவிட்டுள்ள வன்முறை மற்றும் மார்ச் மாதத்தில் இருந்து 4,322 பேரைக் கொன்றுள்ள லெபனான் மீதான அதன் குண்டுவீச்சு ஆகியவற்றுக்கு இணையாகவே இந்தப் போரும் நடைபெற்று வருகிறது. மற்றொருபுறம், நேட்டோ உக்ரேனில் ரஷ்யாவிற்கு எதிரான தனது பினாமிப் போரைத் தீவிரப்படுத்தி வருகிறது; அதோடு, அமெரிக்க ஆளும் வர்க்கத்தின் அனைத்துப் பிரிவினரும் சீனாவை எதிர்கொள்ள வேண்டியதன் அவசியத்தில் ஒன்றுபட்டுள்ளனர்.

அரசியல் ஆளும் வர்க்கத்தின் எந்தவொரு பிரிவும் போரின் கொள்ளையடிக்கும் நோக்கங்களை எதிர்க்கவில்லை; மாறாக, அதில் ஏற்பட்டுள்ள பின்னடைவுகளை மட்டுமே அவர்கள் விமர்சிக்கிறார்கள். ஜனநாயகக் கட்சியினரும் குடியரசுக் கட்சியினரும் ஜூன் மாத உடன்படிக்கை தெஹ்ரானுக்கு மிகவும் சாதகமாக இருப்பதாகக் கண்டனம் செய்தனர். ஜூன் 22 அன்று வால் ஸ்ட்ரீட் ஜர்னல் கருத்துப் பக்கத்தில் எழுதிய முன்னாள் அமெரிக்கத் துணை அதிபர் மைக் பென்ஸ், இந்த உடன்படிக்கையானது ட்ரம்ப் தனது முதல் பதவிக்காலத்தில் நிராகரித்த “ ஒரு வகையான திருப்திப்படுத்தும் சமரசக் கொள்கையையே காட்டுகிறது “ என்று குறிப்பிட்டதோடு, இல்லையெனில், “திரு. ட்ரம்ப் ஆயுதப் படைகளைத் தனது பணியை முடிக்க அனுமதிக்க வேண்டும்” என்று வலியுறுத்தினார்.

ஜனநாயகக் கட்சித் தலைமையும் இதே பாணியிலான சொற்களைக் கொண்டே இந்த உடன்படிக்கையைக் கடுமையாகத் தாக்கியது. செனட் சிறுபான்மைக் குழுத் தலைவர் சக் ஷுமர் இதனை “சரணடைவதற்கான கலை” என்று சாடினார். ஞாயிற்றுக்கிழமை தொலைக்காட்சி விவாத நிகழ்ச்சிகளில் பங்கேற்ற ஜனநாயகக் கட்சியினர், இந்த விமர்சனத்தை மேலும் தீவிரப்படுத்தினர். கனெக்டிகட் மாகாணப் பிரதிநிதி ஜிம் ஹைம்ஸ் CNN ஊடகத்திடம் கூறுகையில், “அந்த ஆட்சியை முற்றிலும் வீழ்த்திவிடும் தாக்குதலைத் தொடுப்பதாக அதிபர் நமக்கு உறுதியளித்திருந்தார்; ஆனால், அந்தத் தாக்குதலையும் கடந்து ஈரான் அரசு இன்னமும் தப்பிப்பிழைத்துள்ளது,” என்றார்.

ஜனநாயகக் கட்சி என்பது வோல் ஸ்ட்ரீட் மற்றும் இராணுவத்தின் கட்சியாகும். போர் எவ்வாறு நடத்தப்படுகிறது என்பது குறித்து அக்கட்சியின் தலைவர்களுக்கு அமெரிக்க நிர்வாகத்துடன் உத்தி ரீதியிலான முரண்பாடுகள் உள்ளனவே தவிர, அதன் இறுதி இலக்குகளில் அவர்கள் முழுமையாக ஒன்றுபட்டுள்ளனர். அதாவது, மத்திய கிழக்கில் அமெரிக்க ஆதிக்கத்தை நிலைநாட்டுவது மற்றும் அணு ஆயுதங்களைக் கொண்ட சீனாவுடனான மோதல் ஆகியவையே அவை. ட்ரம்ப் மீதான தங்களது எதிர்ப்பிலிருந்து போருக்கான எதிர்ப்பைத் திட்டமிட்டு ஒதுக்கி வைப்பதற்கும், மக்களின் போர் எதிர்ப்பு உணர்வுகளை ஒடுக்குவதற்கும் அவர்கள் திட்டமிட்ட முறையில் வேலை செய்து வருகின்றனர்.

ட்ரம்ப் ஒரு குற்றகரமான ஆக்கிரமிப்புப் போரை நடத்தினார், இராஜதந்திரப் பேச்சுவார்த்தைகளின் போது ஓர் அரசின் தலைவரையும் அவரது குடும்ப உறுப்பினர்களையும் படுகொலை செய்தார், மற்றும் ஆயிரக்கணக்கான ஈரானியர்களைக் கொன்றார் என்பது அவர்களின் புகாரல்ல; மாறாக, அந்தப் போர் இன்னும் அதன் நோக்கங்களை அடைவதில் வெற்றி பெறவில்லை என்பதுதான் அவர்களின் முக்கிய குற்றச்சாட்டாகும்.

ட்ரம்பின் அறிக்கைகள் அமெரிக்க ஏகாதிபத்தியத்தினதும், அவர் யாருக்காகப் பேசுகிறாரோ அந்த நிதித் தன்னலக்குழுக்களினதும் அப்பட்டமான குற்றத்தன்மையையும் குண்டர் கும்பல் தனத்தையும் வெளிப்படுத்துகின்றன. ஓர் ஒட்டுமொத்த நாட்டை அழிப்பதாக பகிரங்கமாகவும் அதிகாரப்பூர்வமாகவும் விடுக்கப்படும் அச்சுறுத்தல் என்பது, ஒரு மனிதப் பேரழிவை நோக்கிய வன்முறை அச்சுறுத்தலாகும்; இதுவே ஒரு போர்க் குற்றமுமாகும். அந்த நீரிணை வழியாகச் செல்லும் அனைத்துச் சரக்குக் கப்பல்களுக்கும் 20 சதவீத கப்பம் கோருவது என்பது, விமானம் தாங்கிப் போர்க்கப்பல்களின் மிரட்டல் பலத்துடன் இயங்கும் ஒரு மாமூல் வசூல் கும்பலின்  மொழியாகும்.

இந்தப் போர் உள்நாட்டிலும் அதே அளவில் சட்டவிரோதமானதாகவே தொடர்கிறது. போர் அதிகாரச் சட்டத்தின் கீழ், மோதல்களில் இராணுவப் படைகளை ஈடுபடுத்தும் ஓர் அதிபருக்கு, காங்கிரஸின் அங்கீகாரத்தைப் பெற அல்லது அப்படைகளைத் திரும்பப் பெற 60 நாட்கள் மட்டுமே அவகாசம் உண்டு. ட்ரம்ப் இந்தத் தடையை, சட்டவிரோதப் போரைத் தொடர்ந்து நடத்துவதற்கான ஒரு முடிவற்ற இயக்க இயந்திரமாக  மாற்றியுள்ளார். இந்தக் காலக்கெடு நெருங்கிய நிலையில், ஜூன் 17 அன்று போர்நிறுத்த ஒப்பந்தத்தில் கையெழுத்திட்ட அவர், மோதல்கள் “முடிவுக்கு வந்துவிட்டன” என்று காங்கிரசுக்கு முறைப்படி அறிவித்தார். இதன் மூலம், நிர்வாகத்தின் கூற்றுப்படி, அந்த 60 நாட்கள் காலக்கெடு என்பது வெறும் செயலற்ற காகிதமாக மாற்றப்பட்டது.

வெளிநாட்டில் போரும் உள்நாட்டில் சர்வாதிகாரமும் இரு வேறு கொள்கைகள் அல்ல, மாறாக அவை ஒன்றேதான். 90 மில்லியன் மக்கள் வாழும் ஒரு நாட்டை முற்றிலும் அழிக்கும் உரிமை தனக்கு இருப்பதாகக் கோரும் ஓர் அரசாங்கத்தால், தனது சொந்த மக்களிடத்தில் ஜனநாயக உரிமைகளை ஒருபோதும் சகித்துக்கொள்ள முடியாது. குறிப்பாக, கட்டுக்கடங்காத விலைவாசி உயர்வு மற்றும் வாழ்க்கைத் தரத்தில் ஏற்பட்டுள்ள கடும் வீழ்ச்சி ஆகியவற்றின் வழியாகவே மக்கள் இந்தப் போருக்கான விலையைச் செலுத்தி வரும்போது, அவர்களது ஜனநாயக உரிமைகள் சகித்துக்கொள்ளப்பட மாட்டாது.

ஆயினும், இதுவே அந்தப் போரைத் தடுக்கக்கூடிய மாபெரும் சக்தியையும் சுட்டிக்காட்டுகிறது. அமெரிக்கா, ஈரான், மத்திய கிழக்கு மற்றும் சர்வதேச அளவிலும் உள்ள தொழிலாள வர்க்கத்திற்கு இந்தப் போரில் எந்தவொரு நலனும் இல்லை; மாறாக, அதனை முடிவுக்குக் கொண்டுவருவதில்தான் அவர்களின் ஒட்டுமொத்த நலனும் அடங்கியுள்ளது. போரைத் தோற்றுவிக்கும் முதலாளித்துவ முறைக்கு எதிராக வழிநடத்தப்படும் ஒரு சர்வதேசப் போர் எதிர்ப்பு இயக்கத்தின் முன்னணிப் படையாக, ஈரான் மீதான அமெரிக்க ஏகாதிபத்தியத்தின் தாக்குதலுக்கு எதிராக உலகெங்கிலும் உள்ள தொழிலாளர்கள் அணிதிரட்டப்பட வேண்டும்.