இந்த மொழிபெயர்ப்பின் மூலக் கட்டுரையை இங்கு காணலாம்.

வால் ஸ்ட்ரீட் ஜேர்னல் புதன்கிழமை வெளியிட்ட ஓர் அறிக்கையின்படி, ஈரான் மீது தரைவழித் துருப்புக்களை அனுப்புவது குறித்து விவாதிக்க இந்த வாரம் வெள்ளை மாளிகையில் கூட்டங்கள் நடைபெற்றுள்ளன. “உயர் ஆலோசகர்களின் பல நாள் விளக்கக் கூட்டங்களுக்குப் பின்னர், அதிபர் டொனால்ட் ட்ரம்ப் ஈரானில் அமெரிக்க இராணுவ நடவடிக்கைகளை விரிவுபடுத்தும் ஒரு முடிவை நோக்கி நகர்ந்து வருகிறார்,” என்று அமெரிக்க அதிகாரிகளை மேற்கோள் காட்டி அந்த ஜேர்னல் எழுதியுள்ளதுடன், இதற்கான விருப்பத் தெரிவுகளில் “ஹோர்முஸ் நீரிணைக்கு அருகிலுள்ள ஈரானியத் தீவுகளைக் கைப்பற்ற தரைவழிப் படைகளை அனுப்புவதும் அடங்கும்.”

ஈரான் மீதான ஒரு தரைவழிப் படையெடுப்பானது, இன்றுவரையிலான போரின் மிக ஆபத்தான தீவிரப்பாடாக அமையும். பிப்ரவரி 28 அன்று தொடங்கிய நான்கரை மாத காலப் போர், ஈரானிய அரசாங்கத்தை அதன் இடத்திலேயே நீடிக்க வைத்துள்ளதோடு, ஈரானின் செறிவூட்டப்பட்ட யுரேனியக் கையிருப்பு இன்னும் நிலத்தடியில் பாதுகாப்பாக மூடிவைக்கப்பட்டுள்ளதுடன், நீரிணை வழியிலான கப்பல் போக்குவரத்து கிட்டத்தட்ட முடங்கிய நிலையிலுமே விட்டுச் சென்றுள்ளது. வான்வழி குண்டுவீச்சுத் தாக்குதல்கள் தோல்வியடைந்துள்ளதால், வாஷிங்டன் தற்போது தரைவழிப் படைகளைப் பயன்படுத்தும் வழியை நோக்கித் திரும்புகிறது.

ட்ரம்ப் செவ்வாய்க்கிழமை மாலை வெள்ளை மாளிகையின் சிச்சுவேஷன் ரூமில் ஒரு கூட்டத்தைக் கூட்டியதாகவும், அதில் “அமெரிக்கத் துருப்புக்களைப் பயன்படுத்தி கார்க் தீவு (Kharg Island)  மற்றும் ஹோர்முஸ் நீரிணையை ஒட்டியுள்ள பிற பகுதிகளைக் கைப்பற்றுவதற்கான சாத்தியக்கூறுகள், அத்துடன் பிகாக்ஸ் மலையில் (Pickaxe Mountain) அமைந்துள்ள சுரங்கப்பாதை வளாகத்தின் மீது குண்டுவீச்சு நடத்துவதற்கான சாத்தியக்கூறுகள் குறித்து விவாதிக்கப்பட்டது” என்றும் வோல் ஸ்ட்ரீட் ஜேர்னல் தெரிவித்துள்ளது. போரை மேலும் தீவிரப்படுத்துவது தொடர்பாக, ட்ரம்ப் சமீபத்திய நாட்களில் மூத்த அதிகாரிகளுடன் நடத்திய பல முறையான மற்றும் முறைசாரா ஆலோசனைகளில் இதுவும் ஒன்றாகும் என்றும் அந்த அறிக்கை குறிப்பிடுகிறது.

ட்ரம்ப் செவ்வாயன்று பாக்ஸ் நியூஸ் ஊடகத்திற்கு அளித்த பேட்டியில்: “சில நேரங்களில் உங்களுக்கு ஒரு தரைவழிப் போர்த்தொடர் தேவைப்படும், ஆனால் நமக்காக தரைவழிப் போர்த்தொடரை நடத்துவதற்குப் பிற நபர்கள் நம்மிடம் உள்ளனர்,” என்றார். அதே நேர்காணலில், ஈரானின் பிரதான எண்ணெய் ஏற்றுமதி முனையமான கார்க் தீவை அமெரிக்கப் படைகள் கைப்பற்றுவது சாத்தியமில்லை என்று அவர் கூறியபோதிலும், அதை முற்றிலும் நிராகரிக்க மறுத்துவிட்டார்: “நாங்கள் அவர்களைப் போதுமான அளவுக்கு பலவீனப்படுத்தி, அவர்களை வெகுதூரம் பின்வாங்கச் செய்தால், நான் அதைச் செய்வேன்.”

ஜூன் 14 அன்று, வாஷிங்டன் நேரடித் தாக்குதல்களை இடைநிறுத்துவதற்கான ஒரு “புரிந்துணர்வு ஒப்பந்தம்” அறிவிக்கப்பட்டதாக தெரிவித்தது. ஜூன் 17 அன்று கையெழுத்திடப்பட்ட அந்த ஒப்பந்தத்தின் கீழ், ஹோர்முஸ் நீரிணை வழியாக 60 நாட்களுக்கு பாதுகாப்பான கப்பல் போக்குவரத்துக்கு உத்தரவாதம் அளிக்கப்படுவதற்குப் பதிலாக, அமெரிக்கா தனது கடற்படை முற்றுகையை நீக்கி, எண்ணெய் மீதான தடைகளை தற்காலிகமாக நிறுத்திவைத்தது.

இந்த “போர்நிறுத்தம்” அரசியல் ஆளும் வர்க்கத்தின் அனைத்துப் பிரிவினராலும் கண்டிக்கப்பட்டது. முன்னாள் துணை அதிபர் மைக் பென்ஸ், ஜூன் 22 அன்று அந்த ஜேர்னலில் எழுதிய கட்டுரையில், இந்த ஒப்பந்தம் ட்ரம்ப் ஒரு காலத்தில் நிராகரித்த “சமரசக் கொள்கையை நினைவூட்டுகிறது” என்று குறிப்பிட்டதுடன், “ஆயுதப் படைகள் தங்கள் பணியை முழுமையாக நிறைவேற்ற அனுமதியுங்கள்” என்று அவரை வலியுறுத்தினார். ஜனநாயகக் கட்சியின் செனட் சிறுபான்மைத் தலைவர் சக் ஷுமர் இதை “சரணடையும் கலை” என்று விமர்சித்தார். மேலும், கனெக்டிகட் மாநிலத்தைச் சேர்ந்த ஜனநாயகக் கட்சி செனட்டர் கிறிஸ் மர்பி, இதை “அடிப்படையில் ஈரானிடம் சரணடைவதற்குச் சமமானது” என்று விவரித்தார்.

ஜூலை 8 அன்று ட்ரம்ப் “போர்நிறுத்தம்’’ முடிவுக்கு வந்துவிட்டது” என்று அறிவித்தார். தொடர்ந்து, ஜூலை 10 தேதியிட்ட கடிதம் ஒன்றில், அமெரிக்கா ஈரான் மீதான “இராணுவ நடவடிக்கைகளை” மீண்டும் தொடங்கியுள்ளதாக காங்கிரஸுக்கு அறிவித்தார். இந்த அறிவிப்பு, இராணுவ நடவடிக்கைகளுக்கு காங்கிரஸின் ஒப்புதலைப் பெறுவதற்காக போர் அதிகாரங்கள் சட்டம் நிர்ணயித்த 60 நாள் காலக்கெடுவை மீண்டும் தொடக்கத்திலிருந்து கணக்கிடச் செய்கிறது என்று வெள்ளை மாளிகை வாதிடுகிறது. அடுத்த நாள் இரவே குண்டுவீச்சு மீண்டும் தொடங்கியது. அதனைத் தொடர்ந்து, திங்களன்று ட்ரம்ப் கடற்படை முற்றுகை மீண்டும் அமல்படுத்தப்படுவதாக அறிவித்தார்; அது செவ்வாய்க்கிழமை பிற்பகல் முதல் நடைமுறைக்கு வந்தது.

அமெரிக்க அதிகாரிகளை மேற்கோள் காட்டி ராய்ட்டர்ஸ் புதன்கிழமை வெளியிட்ட செய்தியின்படி, ஹோர்முஸ் நீரிணையை வலுக்கட்டாயமாகத் திறக்கச் செய்வதை நோக்கமாகக் கொண்ட இந்தத் தாக்குதல்கள், ஈரான் மீது மேலும் சிக்கலான இராணுவ நடவடிக்கைகளை மேற்கொள்வதற்கு முன்னதாக, அமெரிக்கா அழிக்க விரும்பும் ஈரானிய இராணுவத் திறன்களையும் இலக்காகக் கொண்டுள்ளன.அதிகாரிகளில் ஒருவர் இந்தத் தாக்குதல்களை “களத்தைத் தயார்படுத்தும் நடவடிக்கைகள்” என்று வர்ணித்ததுடன், தேவை ஏற்பட்டால், அதற்கான களத்தை இது தயார்படுத்த உதவுகிறது, என்றும் கூறினார்.பாதுகாப்புச் செயலர் பீட் ஹெக்செத், “ஈரான் மீதான இராணுவ நடவடிக்கையை மேலும் தீவிரப்படுத்துவதற்கு ஆதரவாளராக இருந்து வருகிறார்” என்று மற்றொரு அதிகாரி தெரிவித்ததாக ராய்ட்டர்ஸ் செய்தி வெளியிட்டது.

2019 முதல் 2022 வரை மத்திய கிழக்கு முழுவதும் அமெரிக்க இராணுவ நடவடிக்கைகளுக்குத் தலைமை தாங்கிய ஓய்வுபெற்ற மரைன் படை ஜெனரல் பிராங்க் மெக்கென்சி , ஞாயிற்றுக்கிழமை CBS தொலைக்காட்சியின் பேஸ் தி நேஷன் (Face the Nation) நிகழ்ச்சியில் கார்க் தீவின் மீது தரைவழிப் படையெடுப்பை ஆதரித்துப் பேசினார்: “அதைச் செய்வது குறித்து நாம் பரிசீலிக்க வேண்டும். ஏனெனில் ஈரானிய நிலப்பரப்பின் ஒரு பகுதியைக் கட்டுப்பாட்டில் வைத்திருப்பது, ஈரானுடனான எதிர்காலப் பேச்சுவார்த்தைகளில் ஒரு முக்கியமான காரணியாக இருக்கும்,” என்றார்.

மூலோபாய ஆய்வுகளுக்கான சர்வதேச நிறுவனம் (IISS) மதிப்பிட்டுள்ளபடி, கடலோர ஏவுகணைப் படைப்பிரிவுகள், கடற்படை கண்ணிவெடிகள் மற்றும் அதிவேகத் தாக்குதல் படகுகளின் அணிகளின் ஆதரவுடன், ஈரானிடம் சுமார் 5,70,000 செயற்பாட்டுப் பணியில் உள்ள துருப்புக்களும் 3,50,000 இருப்புப் படையினரும் உள்ளனர்.ஜூலை 7-8 இரவில் நடத்தப்பட்ட தாக்குதல்களில், இஸ்லாமியப் புரட்சிகர காவல்படையின் (IRGC) 60-க்கும் மேற்பட்ட சிறிய தாக்குதல் படகுகள் உட்பட 80-க்கும் மேற்பட்ட இலக்குகள் தாக்கப்பட்டதாக அமெரிக்க இராணுவம் தெரிவித்தது. எனினும், கடுமையான இழப்புகள் ஏற்பட்டபோதிலும், ஈரான் இன்னும் ஏவுகணைகளையும் ட்ரோன்களையும் களமிறக்கி வருகிறது என்று ராய்ட்டர்ஸ் புதன்கிழமை செய்தி வெளியிட்டது.2003-ஆம் ஆண்டு ஈராக் மீதான படையெடுப்புக்காக குவைத் மற்றும் சவுதி அரேபியாவில் 3,00,000-க்கும் அதிகமான அமெரிக்கத் துருப்புக்கள் முன்கூட்டியே நிலைநிறுத்தப்பட்டிருந்தன என்று ஓய்வுபெற்ற ஜெனரல் பிலிப் பிரீட்லோவ் இந்த வாரம் பாக்ஸ் நியூஸுக்குத் தெரிவித்தார். தற்போது அந்தப் பிராந்தியத்தில் அமெரிக்கப் படைகளின் எண்ணிக்கை சுமார் 50,000 மட்டுமே; ஆனால் அவர்களில் தரைவழிப் படையினர் மிகவும் குறைவானவர்களே என்றும் அவர் கூறினார்.

2005 முதல் 2010 வரை ஈரானின் வெளியுறவு அமைச்சராகப் பதவி வகித்தவரும், தற்போதைய நாடாளுமன்ற உறுப்பினருமான மனோச்சேர் மொட்டகி, புதன்கிழமை அரசு ஊடகத்திற்கு அளித்த நேர்காணலில், அமெரிக்கப் படைகள் ஈரானிய நிலப்பரப்பின் ஒரு பகுதியைக் கைப்பற்றினால், ஈரான் “ஹெலிகாப்டர் மூலம் இறக்கப்படும் படைகளும் தரைவழிப் படைகளும் இணைந்து மேற்கொள்ளும் தாக்குதல் மூலம்” அமெரிக்க இராணுவத் தளம் ஒன்றைக் கைப்பற்றி, அமெரிக்க வீரர்களைப் பிணைக் கைதிகளாகப் பிடிக்க வேண்டும் என்று கூறினார்

குண்டுவீச்சு தற்போது தொடர்ந்து ஆறு இரவுகளாக நீடித்து வருகிறது. புதன்கிழமை இரவுடன் முடிவடைந்த தாக்குதல் அலையானது, தெஹ்ரானுக்கு அருகிலுள்ள பர்ச்சின் (Parchin) இராணுவ வளாகத்தையும் பாக்தாஷ்ட் (Pakdasht) நகரையும் சென்றடைந்தது. இந்தப் போரின் இந்தக் கட்டத்தில் தலைநகருக்கு அருகில் நடத்தப்பட்ட முதல் தாக்குதல்கள் இவை. மேலும், ஈரான் தனது பாலிஸ்டிக் ஏவுகணைகளை உருவாக்கி, விண்வெளித் திட்டத்தை முன்னெடுத்துவரும் செம்னான் (Semnan) மாகாணத்தில் உள்ள ஒரு சிவிலியன் விமான நிலையமும் தாக்கப்பட்டது.ஈரானிய இராணுவத் திறன்களை மேலும் பலவீனப்படுத்துவதற்காக, வியாழக்கிழமை பிற்பகல் 2.00 மணிக்கு (அமெரிக்க கிழக்கு நேரம்) ஆறாவது தாக்குதல் அலை தொடங்கியதாக அமெரிக்க இராணுவம் அறிவித்தது. அதேவேளையில், நாட்டின் தென்கிழக்குப் பகுதியில் உள்ள பந்தர் அப்பாஸ் (Bandar Abbas) மற்றும் லார் (Lar) நகரங்களுக்கு இடையிலான ஒரு பாலமும், இரான்ஷஹ்ர் (Iranshahr) நகரில் உள்ள ஒரு விமான நிலையமும் தாக்கப்பட்டதாக ஈரானிய அரசு ஊடகங்கள் தெரிவித்தன.

புதன்கிழமை அன்று, அமெரிக்க ஏவுகணைகள் ஹோர்முஸ் நீரிணைக்கான அணுகல் வழிகளைக் கட்டுப்படுத்தும் மூன்று தீவுகளில் ஒன்றான கிரேட்டர் துன்ப் தீவையும் (Greater Tunb Island), இராணுவத்தின் 388-வது இயந்திரமயமாக்கப்பட்ட காலாட்படைப் பிரிவின் முகாமையும் தாக்கின. அந்த முகாமில் குறைந்தது 13 ஏவுகணைகள் தாக்கி ஏழு வீரர்கள் கொல்லப்பட்டதாக ஈரானிய அரசு தொலைக்காட்சி தெரிவித்தது.ஈரானிய சுகாதார அமைச்சகத்தின் தகவலின்படி, இந்த மாதத்தில் குறைந்தது 35 பேர் கொல்லப்பட்டுள்ளனர், மேலும் 300-க்கும் மேற்பட்டோர் காயமடைந்துள்ளனர்.

புதன்கிழமை இரவு அமெரிக்கா நடத்திய தாக்குதல் ஒன்று அஹ்வாஸில் (Ahvaz) உள்ள குழந்தைகளுக்கான புற்றுநோய் சிகிச்சை மையமான ஷாஹித் பகாயி (Shahid Baqaei) மருத்துவமனைக்கு அருகில் தாக்கியதில், கீமோதெரபி சிகிச்சை பெற்றுவந்த 211 நோயாளிகளை வெளியேற்ற வேண்டிய கட்டாயம் ஏற்பட்டதாக ஈரானிய அதிகாரிகள் தெரிவித்தனர். வெளியுறவுத் துறை செய்தித் தொடர்பாளர் இஸ்மாயில் பகாஹி இதனை, “மனித இனத்திலேயே மிகவும் அப்பாவிகளான—தங்கள் உயிர்களுக்காகத் துணிச்சலுடன் போராடி வரும் குழந்தைகளுக்கு எதிரான ஒரு கோழைத்தனமான போர்க் குற்றம்” என்று அழைத்தார்.

அஹ்வாஸ் மருத்துவமனைக்கு அருகில் நடத்தப்பட்ட தாக்குதலை நியாயப்படுத்தலாகக் குறிப்பிட்டு, ஜோர்டான், குவைத் மற்றும் பஹ்ரைனில் அமெரிக்கப் படைகள் தங்கியுள்ள விமானத் தளங்கள் மீது புரட்சிகரக் காவல்படை வியாழக்கிழமை பதிலடித் தாக்குதல்களை நடத்தியது. ஈரானின் தலைமைப் பேச்சுவார்த்தையாளரும் நாடாளுமன்ற சபாநாயகருமான முகமது பாகர் காலிபாப் புதன்கிழமை அன்று: “நாங்கள் அமெரிக்காவுடன் ஓர் இன்றியமையாத மற்றும் வாழ்வா சாவா என்ற போரில் ஈடுபட்டுள்ளோம்,” என்று அறிவித்தார். ஈரானிய உள்கட்டமைப்புகளுக்கு எதிராக ட்ரம்ப் தனது அச்சுறுத்தல்களைச் செயல்படுத்தினால், “இப்பகுதியில் உள்ள அனைத்து உள்கட்டமைப்புகளும் ஈரானிய இஸ்லாமியக் குடியரசின் சக்திவாய்ந்த ஆயுதப் படைகளின் எஃகு போன்ற அடிகளின் கீழ் நசுக்கப்படும்,” என்று ஈரானிய இராணுவச் செய்தித் தொடர்பாளர் பிரிகேடியர் ஜெனரல் முகமது அக்ராமினியா வியாழக்கிழமை எச்சரித்தார்.

அமெரிக்க இராணுவம் தற்போது சிவிலியன் கப்பல்களைத் தாக்குவதன் மூலம் கடற்படை முற்றுகையை அமல்படுத்தி வருகிறது. அது நடைமுறைக்கு வந்த 17 மணி நேரத்திற்குள், இரண்டு வணிகக் கப்பல்களை திசைதிருப்பியதாக இராணுவம் தெரிவித்தது. மேலும், புதன்கிழமை, கார்க் தீவை நோக்கிச் சென்று கொண்டிருந்த குராசோ (Curaçao) கொடியேந்திய பெல்மா (Belma) என்ற எண்ணெய் டேங்கர் கப்பலின் புகைபோக்கியில் அமெரிக்க விமானம் ஒன்று ஹெல்ஃபயர் ஏவுகணைகளைத் தாக்கச் செய்து, அதைச் செயலிழக்கச் செய்தது.அந்தக் கப்பல் இனி ஈரானை நோக்கிச் பயணிக்காது, என்று இராணுவம் அறிவித்தது.