இந்த மொழிபெயர்ப்பின் மூலக் கட்டுரையை இங்கு காணலாம்.

ஜூலை 30 ஆம் தேதி மாலையில் இணையவழியில் நடைபெற்ற UAW தலைவர் பதவிக்கான வேட்பாளர் விவாத மேடையானது, 1.25 பில்லியன் டாலர் நிகர சொத்து மதிப்பின் மீது அமர்ந்திருக்கும் ஒரு அமைப்பின் கட்டுப்பாட்டிற்காகப் போட்டியிடும் மற்ற ஐந்து வேட்பாளர்களுக்கும், ஒரு சோசலிஸ்டான, மேக் டிரக்ஸ் நிறுவனத்தின் சாமானிய தொழிலாளியான வில் லேமனுக்கும் இடையிலான பெரும் பிளவை வெளிச்சம் போட்டுக் காட்டியது.

லேமனைத் தவிர மற்ற ஒவ்வொரு வேட்பாளரும் இந்த தொழிற்சங்க எந்திரத்தின் தயாரிப்பாகவோ அல்லது அதை இயக்குவதற்கான போட்டியாளராகவோ இருக்கிறார்கள். தற்போதைய தலைவர் ஷான் பெயின் மீது கூட்டாட்சி குற்றவியல் விசாரணை நடைபெற்று வருகிறது. பெய்ன் தனது வருங்கால மனைவி மற்றும் அவரது சகோதரிக்காக சலுகைகளைப் பெற தனது பதவியை துஷ்பிரயோகம் செய்தார் என்றும், இதற்கு மறுப்பு தெரிவித்த துணைத் தலைவர் ரிச் போயருக்கு எதிராகப் பழிவாங்கும் நடவடிக்கையில் ஈடுபட்டார் என்றும் கண்டறியப்பட்டதைத் தொடர்ந்து, அவர் கூட்டாட்சி குற்றவியல் விசாரணையின் கீழ் உள்ளார். நீதித் துறை இது தொடர்பாக ஒரு சிறப்பு ஜூரியைக் கூட்டியுள்ளதுடன் கண்காணிப்பாளருக்கும் சம்மன் அனுப்பியுள்ளது. தற்போது பெயினுக்கு எதிராகப் போட்டியிடும் போயர், தற்காலிகத் தொழிலாளர்களை மொத்தமாகப் பணிநீக்கம் செய்வதற்கும், ஆயிரக்கணக்கானோரை வேலையிழக்கச் செய்வதற்கும் வழிவகுத்த 2023 ஸ்டெல்லாண்டிஸ் (Stellantis) ஒப்பந்தத்தைப் பேசி முடித்தவர் ஆவார்.

இதர மூன்று வேட்பாளர்களில் பிரையன் கெல்லர் 2022 இல் போட்டியிட்டு, இறுதிச் சுற்றுத் தேர்தலுக்கு முன் பெயினுக்கு ஆதரவளிப்பதற்கு முன்பாகப் பல வாகன உற்பத்தி ஆலைகளில் ஆதரவைப் பெற்ற ஸ்டெல்லாண்டிஸ் மோபார் தொழிலாளி ஆவார். திரிசியா கெய்கர், உயர் ஊதியம் பெறும் UAW சர்வதேசச் சேவைப் பிரதிநிதி ஆவார். கிரெக் மூனி, ஓஹியோவின் லிமாவில் உள்ள ஜெனரல் டைனமிக்ஸ் லேண்ட் சிஸ்டம்ஸின் கிளை 2147 அமைப்பின் பதிவுச் செயலாளர் மற்றும் ட்ரம்பிற்கான வாகன தொழிலாளர்கள் அமைப்பின் ஆதரவாளர் ஆவார்.

தனது தொடக்க உரையில், லெஹ்மன் இந்தத் தேர்தலின் உண்மையான உள்ளடக்கத்தை தெளிவுபடுத்தினார்:

தொழிலாளர்களாகிய நாம், எமது வாழ்வாதாரத்தின் மீதும் வாழ்க்கையின் மீதும் முன்னெப்போதும் இல்லாத அளவிலான வரலாற்று ரீதியான தாக்குதல்களை எதிர்கொண்டு வருகிறோம். தேசிய வருமானத்தில் தொழிலாளர்களின் பங்கு, புள்ளிவிவரங்கள் சேகரிக்கப்படத் தொடங்கியதிலிருந்து இல்லாத அளவுக்கு மிகக் குறைந்த அளவை எட்டியுள்ளது. தீவிரமடைந்து வரும் உலகளாவிய போர்கள் விலைவாசியை உயர்த்துகின்றன. உலகின் முதல் டிரில்லியனரை உருவாக்கிய ஒரு நாட்டில், தொழிலாளர்களின் ஊதியம் அடிப்படைத் தேவைகளைக் கூட பூர்த்தி செய்ய முடியாத அளவில் உள்ளன. 2024 ஆம் ஆண்டின் தொடக்கத்திலிருந்து 21,000-க்கும் மேற்பட்ட வாகன தொழிலாளர்களின் வேலைகள் பறிக்கப்பட்டுள்ளன. செயற்கை நுண்ணறிவு (AI) மற்றும் தானியங்கி மயமாக்கலைப் (Automation) பயன்படுத்தி உலக அளவில் பெருமளவிலான வேலைவாய்ப்புகளை ஒழித்துக்கட்ட பெருநிறுவனங்கள் திட்டமிட்டுள்ளன. ஜனநாயக உரிமைகள் சீரழிக்கப்பட்டு வருகின்றன; எமது புலம்பெயர்ந்த தொழிலாளர் சகோதரர்கள் குடிவரவு மற்றும் சுங்கச் அமலாக்கப் பிரிவு (ICE) முகவர்களால் வேட்டையாடப்படுகிறார்கள்.

இந்த நாட்டில் ஒவ்வொரு ஆண்டும், தொழிலாளர்களின் பாதுகாப்பு என்பது இலாபத்திற்குக் கீழ்ப்படுத்தப்படுவதால், 5,000 க்கும் மேற்பட்ட தொழிலாளர்கள் பணியிடத்திலேயே உயிரிழக்கின்றனர். எமது ஆலைகளில், இந்தத் தலைமை வரலாற்றுச் சிறப்புமிக்கது என்று வர்ணித்த 2023-ஆம் ஆண்டு ஒப்பந்தத்தின் கீழ், அன்டோனியோ காஸ்டன், ரொனால்ட் ஆடம்ஸ் சீனியர், கிரிகோரி நாஃப் ஆகியோர் இயந்திரத்துக்குள் நசுக்கப்பட்டு உயிரிழந்தனர். இந்த மாதத்தில் கூட, தொழிற்சாலைகளில் புகை மூட்டம் சூழ்ந்தபோதும் உற்பத்திப் பணிகள் நிறுத்தப்படாமல் தொடர்ந்து நடந்ததால், தொழிலாளர்கள் தூக்குப் படுக்கைகளில் (stretchers) வெளியே கொண்டு வரப்பட்டனர்.

Loading Tweet ...

Tweet not loading? See it directly on Twitter

பின்னர் லெஹ்மன், உறுப்பினர்களின் சந்தாப் பணம் எங்கே போகிறது என்பதை அவர்களிடம் கூறினார்: 560 சர்வதேச அதிகாரிகள் ஆண்டுக்கு 100,000 டாலர்களுக்கும் அதிகமாக ஊதியம் பெறுகின்றனர்; கடந்த ஆண்டில் பெயினுக்கு 276,000 டாலர்கள் ஊதியமாக வழங்கப்பட்டது, இது ஒரு சராசரி உறுப்பினர் ஈட்டும் வருமானத்தை விட 6.6 மடங்கு அதிகமாகும். இந்த எந்திரத்தின் சொந்த அதிகாரிகளுக்கும் ஊழியர்களுக்கும் 118 மில்லியன் டாலர்கள் செலவிடப்பட்டது. இது வேலைநிறுத்தக் காலத்தில் வழங்கப்பட்ட நிதியை விட 14 மடங்கு அதிகமாகும். “இது ஒரு சில ஊழல் அதிகாரிகளைப் பற்றிய விஷயம் அல்ல; ஒட்டுமொத்த அதிகாரத்துவமும் நிர்வாகத்தின் ஒரு அங்கமாகவே செயல்படுகிறது” என்று கூறினார்.

அவர் தனது தொடக்க உரையை வாகனத் தொழிலாளர்கள் மற்றும் தொழிலாள வர்க்கத்தின் சுயாதீனமான அணிதிரட்டலுக்கு அழைப்பு விடுத்து நிறைவு செய்தார்.

வாகனத் தொழிலாளர்கள், சுகாதாரத் துறைத் தொழிலாளர்கள், கல்வியாளர்கள், சட்ட உதவிப் பணியாளர்கள் மற்றும் UAW உறுப்பினர்களிடையே கோபமும் கிளர்ச்சி மனப்பான்மையும் அதிகரித்து வருகின்றன. எமக்கு இப்போது தேவையானது ஒரு மூலோபாயமும் ஓர் அமைப்பும் ஆகும். வர்க்க கூட்டுழைப்புக்குப் பதிலாக வர்க்கப் போராட்டம், தேசியவாதத்திற்குப் பதிலாக சர்வதேசியவாதம் ஆகியவை அவசியமாகும். அதிகாரத்துவத்தை ஒழித்து, அதிகாரத்தைப் பணித்தளத்திற்கு மாற்றுவதற்கு, தொழிலாளர்களால் நிர்வகிக்கப்படும், பல்வேறு தொழில்துறைகளுடன் இணைக்கப்பட்ட சாமானியத் தொழிலாளர்களின் குழுக்கள் ஒவ்வொரு ஆலையிலும் பணிபுரியும் இடத்திலும் உருவாக்கப்பட வேண்டும். இந்தப் பிரச்சாரம் நான் உங்களுக்காக என்ன செய்வேன் என்பதைப் பற்றியது அல்ல. நீங்கள் என்ன செய்யப் போகிறீர்கள் என்பதைப் பற்றியது.

நெறியாளரும், ஓய்வுபெற்ற நியூ யோர்க் டைம்ஸ் பத்திரிகையின் தொழிலாளர் நிருபருமான ஸ்டீவ் கிரீன்ஹவுஸ், UAW-ஐ நாட்டின் மிகச்சிறந்த தொழிற்சங்கங்களில் ஒன்று என்று பாராட்டியும், “முழுக்க முழுக்க நடுநிலையோடு” செயல்படுவதாக உறுதியளித்தும் விவாதத்தைத் தொடங்கினார். ஆனால், GM, Ford மற்றும் Stellantis நிறுவனங்களுக்கு எதிராக 2023 இல் நடைபெற்ற “திடீர் வேலைநிறுத்தப் போராட்டத்தில்” UAW வெற்றிபெற வழிவகுத்தது எது என்றும், அதில் ஏதேனும் தவறுகள் செய்யப்பட்டதா என்றும் அவர் கேட்ட முதல் கேள்வியே அவரது அந்தப் போலித் தோற்றத்தை வெளிப்படுத்திக் காட்டியது.

அந்த வேலைநிறுத்தம் ஒரு வெற்றி என்பதில் எவ்வித சந்தேகமும் இல்லாதவாறு விவாதம் அமைக்கப்பட்டிருந்ததுடன், ஆறு வேட்பாளர்களில் ஐவர் அந்த அனுமானத்தை அப்படியே ஏற்றுக்கொண்டனர். பெயின் தொழிற்சங்கத்தின் ஒப்பந்தப் பிரச்சாரத்தை “அற்புதமானது” என்று குறிப்பிட்டதுடன், “நாம் சாதித்தவற்றைப் பற்றி நான் பெருமைப்படுகிறேன்” என்று பிரகடனப்படுத்தி, 2028 மே தினத்திற்காக தாம் ஆயத்தப்படுத்தி வருவதாகக் கூறிக்கொள்ளும் பொது வேலைநிறுத்தத்தைப் பற்றிப் தம்பட்டம் அடித்தார்.

லெஹ்மன் மட்டுமே இந்த உரிமைகோரல்களைத் திட்டவட்டமாக நிராகரித்து, “இது ஒரு உண்மையான வேலைநிறுத்தமே அல்ல. இது ஒரு பேரழிவு. இது ஒரு ஹாலிவுட் பாணி வேலைநிறுத்தம்” என்று வெளிப்படையாகக் கூறினார். வேலைநிறுத்தம் செய்ய தொழிலாளர்கள் பெருமளவில் வாக்களித்திருந்தபோதிலும், அதிகபட்சமாக 30 சதவீதத்தினர் மட்டுமே வேலைநிறுத்தத்திற்கு அழைக்கப்பட்டனர்; மீதமுள்ளவர்கள் மேலதிக நேரம் பணியாற்றினர். வெளியேறியவர்கள் போதிய வேலைநிறுத்த நிதியுதவி இன்றி பட்டினியில் போடப்பட்டனர். “இது ஒற்றுமை அல்ல; இது தனிமைப்படுத்தல்” என்று லெஹ்மன் அழுத்தமாகக் கூறினார்.

இந்த “வெற்றி” ஆயிரக்கணக்கான தற்காலிகப் பகுதிநேரத் தொழிலாளர்கள் பணிநீக்கம் செய்யப்படுவதற்கும், அதைத் தொடர்ந்து ஆட் குறைப்புக்களுக்கும், போர்ட் ரூஜ் மின்சார வாகன மையம் மற்றும் பேட்டரி ஆலைகளில் வேலை வெட்டுக்களுக்கும், சக தொழிலாளர்களின் மரணங்களுக்கும் வழிவகுத்தது என்று லெஹ்மன் சுட்டிக்காட்டினார். பெருநிறுவன ஊடகங்கள் இந்த வேலைநிறுத்தத்தை ஒரு “வரலாற்றுச் சிறப்புமிக்க” சாதனையாக சித்தரித்த அதே வேளையில், அது தொழிலாளர்களைப் பிளவுபடுத்தி பெரும்பாலானோரை வேலைக்காக காத்திருக்க வைத்திருந்தது என்று அவர் கூறினார். லேமனின் இந்த ஆய்வுக்கு மற்ற வேட்பாளர்கள் எவரும் பதிலளிக்கவில்லை.

இந்த விவாதத்தின் ஒரு முக்கியமான அம்சம் என்னவென்றால், சமீபத்தில் லெஹ்மனுக்கு எதிராகக் விடுக்கப்பட்ட கொலை மிரட்டல் ஆகும். இந்த மிரட்டலை விடுத்தவர் UAW தொழிற்சங்கத்தின் ஒருங்கிணைப்பாளரான ரேமண்ட் எல். ஜென்சன் ஜூனியர் ஆவார். இவர் அண்மைய காலம் வரை லேமனின் சொந்தப் பிராந்தியமான UAW 9 கிளையின் உதவி இயக்குநராகப் பணியாற்றி, 2025 ஆம் ஆண்டில் தோராயமாக 202,000 டாலர்களை ஊதியமாகப் பெற்றவர் ஆவர். ஜூலை 16 அன்று, ஜென்சன், லெஹ்மனின் பொது பிரச்சார முகநூல் பக்கத்தில் செயற்கை நுண்ணறிவால் (AI) உருவாக்கப்பட்ட ஒரு படத்தைப் பதிவிட்டார். அதில் லெஹ்மன் கைகால்கள் கட்டப்பட்டு, வாயில் துணி அடைக்கப்பட்டு, வாயிலிருந்து இரத்தம் வழிய, முகமூடி அணிந்த ஒரு நபர் அவரது முதுகில் தானியங்கி துப்பாக்கியைக் குறிவைப்பது போல் சித்தரிக்கப்பட்டிருந்தது. தனது முகநூல் சுயவிவரப் பக்கத்தில் “நான் ஷான் பெயினை ஆதரிக்கிறேன்” என்ற பேட்ஜைக் கொண்ட ஜென்சன், பெயின் மீதான கூட்டாட்சி விசாரணை குறித்து லெஹ்மன் வெளியிட்ட அறிக்கையின் கீழே இந்தப் படத்தைப் பதிவிட்டிருந்தார்.

ஒரு தொழிற்சங்கத் தேர்தலில் தனது உரிமைகளைப் பயன்படுத்துவதைத் தடுக்கும் வகையில் தொழிற்சங்க உறுப்பினர் ஒருவரை மிரட்டுவது என்பது கூட்டாட்சிக் குற்றமாகும். கடந்த வியாழக்கிழமை இரவு வரை, பெயினோ அல்லது தொழிற்சங்கத்தின் நிர்வாகக் குழு உறுப்பினர்களோ இது குறித்து ஒரு வார்த்தை கூட பேசவில்லை. விவாதத்தின் போது, இந்த மிரட்டல் தன்னை பற்றியது மட்டுமல்ல, சாமானியத் தொழிலாளர்களின் அனைத்து எதிர்ப்புகளுக்கும் இந்த அதிகாரத்துவ அமைப்பு அளிக்கும் பதிலடியைப் பற்றியது என்று லெஹ்மன் விளக்கினார். ஆலைக்குள் நடைபெற்ற ஒப்பந்தக் கூட்டத்தில் UAW அதிகாரிகளுக்கு எதிராகப் பேசியதற்காகப் பணிநீக்கம் செய்யப்பட்ட நெக்ஸ்டீர் ஆலைத் தொழிலாளி ஆண்ட்வியன் சாண்டர்ஸையும் அவர் இதற்கு உதாரணமாகச் சுட்டிக்காட்டினார்.

பெயின் முதலில் இந்தப் பிரச்சினையைப் புறக்கணிக்க முயன்றார். லெஹ்மன் அவரை நேரடியாக எதிர்கொண்ட பின்னரே பதிலளித்தார். “நான் இதுபோன்ற விஷயங்களை ஆதரிக்கவில்லை,” என்று கூறிய அவர், தொடர்ந்து “நீங்கள் தலைவராவதற்குப் போட்டியிடுகிறீர்கள் என்றால், சகோதரரே, தயாராக இருங்கள், ஏனென்றால் தினமும் இதுபோன்ற மிரட்டல்களைச் சந்திக்க வேண்டி வரும்” என்று சேர்த்துக் கூறினார். இந்தக் கூற்று, அந்த மிரட்டலை மறைமுகமாக ஆதரிப்பதாகவும் மேலும் வலுப்படுத்துவதாகவும் அமைந்தது. ஜென்சன் எந்தவொரு விளைவுகளையும் சந்திக்க நேரிடும் என்பதற்கான எந்தவொரு அறிகுறியையும் பெயின் காட்டவில்லை.

இந்த இணையவழி விவாத அரங்கைப் பார்த்த டெட்ராய்டைச் சேர்ந்த மூத்த வாகனத் தொழிலாளி ஒருவர் WSWS செய்தித் தளத்திடம் கூறியதாவது:

பெயின் அது தவறு என்று சொன்னாரே தவிர, அதற்கு எந்தப் பொறுப்பும் ஏற்கவில்லை. அத்தோடு, நீங்கள் தலைவராவதற்குப் போட்டியிடுகிறீர்கள் என்றால் இதற்கெல்லாம் பழகிக்கொள்ள வேண்டும் என்று கூறி சாடையாகவும் பேசினார். ஆனால், கொலை மிரட்டல் விடுப்பது உண்மையில் ஒரு குற்றமாகும்.

வில் லெஹ்மன் ஆரம்பத்திலிருந்தே இதைத்தான் கூறிக்கொண்டிருக்கிறார். ரொனால்ட் ஆடம்ஸ் போன்ற நபர்கள் தங்கள் உயிரையே இழந்துள்ளனர், ஆனால் தொழிற்சங்கத் தலைமையிடமிருந்து அதைப் பற்றி நீங்கள் எதையுமே கேட்பதில்லை.

ட்ரம்ப் நிர்வாகத்தை நோக்கிய தொழிற்சங்கத்தின் நிலைப்பாடு என்னவாக இருக்க வேண்டும் என்று கேட்கப்பட்டபோது, டரம்ப் “ஒரு பாசிச சர்வாதிகாரத்தை நடைமுறைப்படுத்த முயற்சிக்கிறார்” என்றும் தொழிலாளர்கள் எந்தவொரு முதலாளித்துவக் கட்சியையும் ஆதரிக்கக் கூடாது என்றும் லெஹ்மன் எச்சரித்தார். சுங்கவரிகள் ஆளும் வர்க்கத்திற்கு மட்டுமே சேவை செய்கின்றன என்று அவர் விளக்கினார்: அவை விலைகளை உயர்த்துகின்றன, எந்த வேலைகளையும் காப்பாற்றுவதில்லை, மேலும் ஒரு நாட்டின் தொழிலாளர்களை மற்றொரு நாட்டின் தொழிலாளர்களுக்கு எதிராக நிறுத்துகின்றன. ட்ரம்ப் மற்றும் பைடென் நிர்வாகங்கள் இரண்டையுமே போர்க் குற்றவாளிகளின் நிர்வாகம் என்று லெஹ்மன் பகிரங்கமாகக் கண்டித்தார்.

இதர வேட்பாளர்கள் ட்ரம்பை நேரடியாகக் காரசாரமாக விமர்சிப்பதைத் தவிர்த்தனர். மேலும், வெள்ளை மாளிகையில் இருக்கும் பாசிசவாதியுடன், முக்கியமாக மற்ற அனைத்து வேட்பாளர்களும் ஆதரித்த சுங்கவரிகள் விவகாரத்தில் பேச்சுவார்த்தை நடத்தத் தயார் என்ற விருப்பத்தையும் வெளிப்படுத்தினர். ட்ரம்ப் நிர்வாகத்துடனான தங்களது கூட்டுறவைப் பற்றிப் பெருமை பேசிய பெயின், மெக்சிகோ நகரில் நடைபெற்ற அமெரிக்க-மெக்சிகோ-கனடா ஒப்பந்தப் பேச்சுவார்த்தைகளில் UAW பங்கேற்றதாகவும், அமெரிக்க வர்த்தகப் பிரதிநிதி ஜேமிசன் கிரீருடன் “மிக நெருக்கமாகப் பணியாற்றியதாகவும்” கூறினார்.

கல்வித் துறையில் தொழிற்சங்கங்களை அமைப்பது குறித்த ஒரு கேள்வி, லேமனுக்கு எதிராக அந்த ஐவரையும் ஒன்றிணைப்பது எது என்பதை வெளிப்படுத்திக் காட்டியது: அது, தொழிற்சங்க எந்திரத்தின் நிர்வாகிகளின் ஊதியத்திற்கு ஆதாரமாக விளங்கும் சந்தாப் பணத்தைப் பற்றிய அக்கறையே ஆகும். உயர்கல்வித் துறை “நாங்கள் செலவழிக்கும் பணத்திற்குத் தகுந்த பலனைத் தரவில்லை” என்று போயர் குறை கூறினார். மேலும், அமைப்பமைப்பதற்காக ஒதுக்கப்பட்ட 100 மில்லியiன் டாலர்களை திரும்பப் பெற எவ்வளவு காலம் ஆகும் என்றும் அவர் கேட்டார். கைகர், மூனி மற்றும் கெல்லர் ஆகியோரும் இதையேதான் கூறினர்.

இதற்குப் பதிலளித்த லெஹ்மன், அந்தப் பணம் வேலைநிறுத்த நிதியில் இருக்க வேண்டும் என்றும், கட்டணப் பணத்தில் இயங்கும் அதிகாரிகளை விட, பணிபுரியும் இடங்களில் பெறப்படும் வெற்றிகளே தொழிலாளர்களை UAW தொழிற்சங்கத்தை நோக்கி ஈர்க்கின்றன என்றும் கூறினார். தொழிற்சங்கம் எதற்கு நிதியளிக்கக் கூடாது என்பதைக் குறிப்பிட்ட அவர், “எந்த வேலையும் செய்யாமல், தொழிற்சங்கத்திற்கு எந்தப் பங்களிப்பும் அளிக்காமல், சும்மா சுற்றித் திரிந்து சும்மாவே சம்பளம் வாங்கும் அமைப்பாளர்களின் சொகுசு ஆசனங்களுக்கு நிதி ஒதுக்கக் கூடாது” என்றார். தங்களின் போராட்டங்களில் வாகனத் தொழிலாளர்களுடன் ஒருங்கிணைக்கப்படுவார்கள் என்ற நம்பிக்கையில் UAW பக்கம் திரும்பிய கல்வித் துறைத் தொழிலாளர்கள், தங்களை விற்றுத் தீர்க்கும் மற்றும் காஸா இனப்படுகொலைக்கு எதிரான எதிர்ப்பு உட்பட அரசியல் கோரிக்கைகளுக்காகத் தனது சொந்த உறுப்பினர்கள் வேலைநிறுத்தம் செய்வதைத் தடுக்கும் ஓர் அமைப்பையே கண்டனர்.

தனது நிறைவுரையில், லெஹ்மன் தனது வேலைத்திட்டத்தைப்பற்றி விரிவுபடுத்தி பின்வருமாறு கூறினார்:

நாம் எதிர்கொள்ளும் சூழ்நிலையைப் பற்றி நேர்மையாக இருப்போம். ஆளும் வர்க்கம் தொழிலாள வர்க்கத்தின் மீது முழு அளவிலான போரைத் தொடுத்து வருகிறது. ... UAW இல் உள்ள தொழிலாளர்களின் நலன்களுக்கும், இந்த நாட்டிலும் உலகிலும் நடப்பவற்றிற்கும் எந்தச் சம்பந்தமும் இல்லை என்று நாம் பாசாங்கு செய்ய முடியாது. யதார்த்தம் என்னவென்றால் தொழிலாளர்களின் நலன்களும் முதலாளிகளின் நலன்களும் ஒன்றோடொன்று பகைமை கொண்டவை. அவற்றை ஒருபோதும் சமரசம் செய்ய முடியாது. எமக்குத் தேவையானதை போராட்டத்தின் மூலம் மட்டுமே நாம் வென்றெடுக்க முடியும்.

மற்ற ஒவ்வொரு வேட்பாளரும் உங்களிடம், “என்னைத் தேர்ந்தெடுங்கள், தொழிற்சங்க எந்திரத்தின் உயர்பதவியில் ஒரு சிறந்த மனிதரை வையுங்கள், விஷயங்கள் மாறும்” என்று கூறுகிறார்கள். தொழிலாளர்கள் நான்கு ஆண்டுகளுக்கு முன்பே இதை அனுபவித்துவிட்டார்கள். ஷான் பெயினும் இதே வாக்குறுதியைத்தான் அளித்தார். அது எப்படி முடிந்தது என்பது ஒவ்வொரு தொழிலாளிக்கும் தெரியும். அதே அமைப்பின் உயர் பதவியில் ஒரு புதிய நபரை அமர்த்தினாலும், அதே கொள்கைகள்தான் கிடைக்கும். ஏனெனில், இந்த எந்திரம் நிறுவனங்களுக்கும் தனக்கும் மட்டுமே பொறுப்புக் கூறுகிறது. தொழிலாளர்கள் மீதான சுரண்டலை அடிப்படையாகக் கொண்ட சமூக மற்றும் பொருளாதார அமைப்பு முறையையே அது பாதுகாக்கிறது.

இதற்கான மாற்று வழி என்பது, பணிபுரியும் இடங்களிலிருந்து உருவாக்கப்பட்டு, பல்வேறு தொழில்துறைகள் மற்றும் எல்லைகளைக் கடந்து பிணைக்கப்பட்ட ஒரு புதிய அதிகாரமும், பொருளாதார வாழ்வின் அடிப்படை மறுஒழுங்கமைப்புக்கான போராட்டமுமே ஆகும். “சோசலிசம் என்றால் சமத்துவம்,” என்று லெஹ்மன் கூறினார். “இது உற்பத்தியின் மீது தொழிலாளர்களின் கட்டுப்பாட்டைக் குறிக்கிறது. அது எமது நலன்களின் அடிப்படையில் தொழிலாள வர்க்கத்தின் சர்வதேச ஐக்கியத்தைக் குறிக்கிறது. அந்தப் போராட்டம் ஏற்கெனவே தொடங்கிவிட்டது.” பிரிட்ஜ்வாட்டர் இன்டீரியர்ஸ் (Bridgewater Interiors) மற்றும் அமெரிக்கன் ஆக்சில் நிறுவனங்களில் நடந்த ஒப்பந்தப் போராட்டங்களையும், சர்வாதிகாரத்திற்கு எதிராக அணிவகுத்துச் சென்ற மில்லியன்கணக்கான மக்களையும் அவர் சுட்டிக்காட்டினார்: “அமெரிக்க அரசியலில் உறங்கிக் கொண்டிருக்கும் மாபெரும் சக்தியான தொழிலாள வர்க்கம், விழித்தெழத் தொடங்கியுள்ளது.”

தோமஸ் பெய்னை மேற்கோள் காட்டித் தனது உரையை முடித்த லெஹ்மன், “’இவை மனிதர்களின் ஆன்மாவை சோதிக்கும் காலங்கள். இந்த நெருக்கடியான சூழலில், சுயநலமிக்க அதிகாரியும், பொய்யான சீர்திருத்தவாதியும் போராட்டத்திற்குத் துரோகம் செய்வார்கள். ஆனால், இப்போது நிமிர்ந்து நிற்கும் தொழிலாளி முழு மனிதகுலத்தின் அன்பிற்கும் நன்றிகளுக்கும் உரியவர்’ என்று கூறினார்.

வேலை அழிப்புக்களையும், தொழிற்சாலைகளில் நிகழும் உயிரிழப்புகளையும், உலகப் போரை நோக்கிய நகர்வையும் தடுக்கும் ஆற்றல் கொண்ட ஒரே சமூக சக்தி, சாமானியத் தொழிலாளர்களைக் கொண்டு அமைக்கப்பட்ட குழுக்கள் வழியாகத் திரண்ட தொழிலாள வர்க்கம் மட்டுமே என்பதை, இந்த விவாதம் தெளிவுபடுத்தியது. லெஹ்மன் இதற்குச் செயல்படுமாறு வேண்டுகோள் விடுத்து உரையை முடித்தார்: “எனக்கு வாக்களியுங்கள், ஆனால் வாக்களிப்பதை விட அதிகமாகச் செய்யுங்கள். கட்டியெழுப்புங்கள். கமிட்டிகளை கட்டியெழுப்புங்கள், இந்த இயக்கத்தை கட்டியெழுப்புங்கள். அங்குதான் எமது பலம் இருக்கிறது.”