இந்த மொழிபெயர்ப்பின் மூலக் கட்டுரையை இங்கு காணலாம்.

ரஷ்யாவுக்கு எதிராகத் தீவிரப்படுத்தப்பட்டு வரும் போரை மக்கள் பெருகிய அளவில் எதிர்ப்பதால் அரசியல் நெருக்கடி ஆழமடைந்துள்ள சூழலில், உக்ரேனிய ஜனாதிபதி வோலோடிமிர் ஜெலென்ஸ்கி வார இறுதியில் சுதந்திரமான, திறந்த தேர்தல்களுக்கு எதிராகக் கடுமையாகச் சாடினார்; ஒரு வாக்கெடுப்பு “நாட்டை அழித்துவிடும்” என அவர் அறிவித்தார்.

“இந்த நேரத்தில் தேர்தல் என்பது உக்ரேனைப் பிளவுபடுத்தும் சுனாமி,” என்று ஞாயிற்றுக்கிழமை தி கீவ் இன்டிபென்டன்ட் வெளியிட்ட கருத்துகளில் ஜெலென்ஸ்கி பத்திரிகையாளர்களிடம் கூறினார். “நாட்டை அழிக்க நாம் விரும்பினால், இது போன்ற ஒரு போர்க்காலச் சூழலில் தேர்தலை நோக்கி நகரலாம்.”

ஜூலை மாதம் தாம் பதவி நீக்கம் செய்த முன்னாள் பாதுகாப்பு அமைச்சர் மைக்கைலோ ஃபெடோரோவுக்கே ஜெலென்ஸ்கி பதிலளித்துக் கொண்டிருந்தார். ஆகஸ்ட் 18 அன்று காணொலி உரை ஒன்றில் ஃபெடோரோவ் போர்க்காலத் தேர்தல்களுக்கு அழைப்பு விடுத்திருந்தார். உக்ரேன் ஒரு “ஆட்சி நிர்வாகத்தின் அமைப்புசார் நெருக்கடியை” எதிர்கொள்கிறது என்றும், “உக்ரேன் தனது முழு ஜனநாயக செயல்முறையைப் புதுப்பிக்க அனுமதிக்கும் சட்டபூர்வமான, பாதுகாப்பான, யதார்த்தமான ஒரு வழிமுறையைக் கண்டறிய வேண்டும்” என்றும் ஃபெடோரோவ் கூறினார். தேர்தல்களுக்கான அவரது கோரிக்கை, ஜனநாயக அல்லது போர் எதிர்ப்பு மாற்று எதனையும் முன்வைக்கவில்லை.

அமெரிக்கா மற்றும் ஐரோப்பாவின் அரசாங்கங்களும் ஊடகங்களும் நான்கரை ஆண்டுகளாக மறுத்து வந்ததை ஜெலென்ஸ்கி வெளிப்படையாகக் கூறியுள்ளார். மக்கள் வாக்களிப்பதைத் தடுத்து, இராணுவச் சட்டத்தின் கீழ் அரசியல் எதிர்ப்பை ஒடுக்கி வைத்திருக்கும் வரை மட்டுமே, தாம் தலைமை தாங்கும் அரசியல் அமைப்பைத் தக்கவைக்க முடியும் என்பதே அவரது வாதம்.

தாம் எந்தப் பிளவுக்கு அஞ்சுகிறார் என்பதை ஜெலென்ஸ்கி கூறவில்லை; ஆனால் அது, அரசாங்கத்துக்கும் அது போர்முனைக்கு அனுப்பிக் கொண்டிருக்கும் மக்களுக்கும் இடையிலான பிளவே ஆகும். ஒரு தேர்தல் போரையே குறித்த ஒரு பொது வாக்கெடுப்பாக மாறிவிடும். வெற்றி பெறும் வரை போரைத் தொடர்வதற்கு 24 சதவீதம் பேர் ஆதரவளிக்கும் நிலையில், விரைவில் பேச்சுவார்த்தை மூலம் போரை முடிவுக்குக் கொண்டுவர வேண்டும் என 66 சதவீத உக்ரேனியர்கள் விரும்புவதாக ஜூன் 30 அன்று கேலப் நிறுவனம் நடத்திய கருத்துக் கணிப்பில் தெரியவந்துள்ளது.

உக்ரேனியர்கள் வாக்களிக்கலாமா என்ற கேள்வி, அவர்கள் வாக்களிக்கக் கூடிய பெரும்பாலான கட்சிகள் ஏற்கெனவே சட்டவிரோதமாக்கப்பட்டுள்ள ஒரு நாட்டில் எழுப்பப்படுகிறது. 2022 மார்ச்சில், ஜெலென்ஸ்கி 11 எதிர்க்கட்சிகளை இடைநிறுத்தினார். தொடர்ந்து, நீதிமன்ற உத்தரவின் பேரில் ஒரு டஜன் கட்சிகள் தடைசெய்யப்பட்டன; அப்போது நாடாளுமன்றத்தின் மிகப்பெரிய எதிர்க்கட்சியாக இருந்த ‘எதிர்ப்பு தளம்—வாழ்க்கைக்காக’ (Opposition Platform—For Life) உட்பட. ஏறத்தாழ அனைத்து நிலைபெற்ற இடதுசாரிக் கட்சிகளும் சட்டவிரோதமாக்கப்பட்டுள்ளன. கம்யூனிஸ்ட் கட்சி ஏற்கெனவே 2015-இல் தடைசெய்யப்பட்டிருந்தது. படையெடுப்புக்குப் பிறகு தடைசெய்யப்பட்ட கட்சிகளில் உக்ரேனின் சோசலிசக் கட்சி (Socialist Party of Ukraine), முற்போக்கு சோசலிசக் கட்சி (Progressive Socialist Party), சோசலிஸ்டுகள் (Socialists), இடது எதிர்ப்பு அணி (Left Opposition) மற்றும் இடது சக்திகளின் ஒன்றியம் (Union of Left Forces) ஆகியவை அடங்கும்.

ரஷ்யாவுக்குப் பயன்படுத்தப்படும் தராதரம், உக்ரேன் குறித்த மௌனத்தை மறுக்க முடியாதபடி தெளிவாக்குகிறது. ஆகஸ்ட் 10 அன்று, போரை எதிர்க்கும் ஒரே பதிவுசெய்யப்பட்ட கட்சியான யாப்லோகோவை (Yabloko), அடுத்த மாதம் நடைபெறவிருந்த டூமா தேர்தல்களில் இருந்து ரஷ்யாவின் உச்ச நீதிமன்றம் நீக்கியது. ஆகஸ்ட் 17 அன்று, அக்கட்சியின் மேல்முறையீட்டை நீதிமன்றம் நிராகரித்தது; அதே நாளில், போருக்கு எதிர்ப்புத் தெரிவித்ததற்காக யாப்லோகோவின் துணைத் தலைவர் லெவ் ஷ்லோஸ்பெர்க்குக்கு 11 ஆண்டுகள் சிறைத்தண்டனை விதிக்கப்பட்டது. நியூயார்க் டைம்ஸ் மற்றும் அமெரிக்கப் பத்திரிகைகள் இந்த நடவடிக்கைகளை விரிவாகச் செய்தியிட்டு, அவற்றை ஒரு சர்வாதிகாரத்தின் செயல்கள் என வர்ணித்தன. ஆனால் அவற்றில் ஒன்றுகூட அதே தராதரத்தை உக்ரேனுக்குப் பயன்படுத்தவில்லை; அங்கு ஒரு டஜன் கட்சிகள் தடைசெய்யப்பட்டுள்ளன, யாப்லோகோ வாக்குச்சீட்டில் இருந்து நீக்கப்பட்ட அதே நாளில் ஒரு சோசலிஸ்ட்டுக்கு 15 ஆண்டுகள் சிறைத்தண்டனை விதிக்கப்பட்டது.

இந்தப் போர் உலக மக்களுக்கு எந்த முழு விவரிப்பின் மூலம் முன்வைக்கப்பட்டதோ, அந்த விவரிப்பு முழுவதன் மோசடித்தனமே இதன் மூலம் அம்பலப்படுத்தப்படுகிறது.

போர்க்காலத்தில் தேர்தல்கள் சாத்தியமில்லை என்ற கூற்று, இப்போது உக்ரேனுக்கு ஆயுதம் வழங்கும் ஏகாதிபத்திய சக்திகளின் வரலாற்றாலேயே மறுக்கப்படுகிறது. உள்நாட்டுப் போரின் நான்காம் ஆண்டான 1864 நவம்பரில் அமெரிக்கா ஜனாதிபதித் தேர்தலை நடத்தியது; அதில், உடனடிப் போர் நிறுத்தத்தைக் கோரிய ஜனநாயகக் கட்சியின் தேர்தல் வேலைத்திட்டத்தை ஆபிரகாம் லிங்கன் எதிர்கொண்டார். அதேபோல், இரு உலகப் போர்களின்போதும் பிரிட்டன் 1916-இல் ஹெர்பர்ட் அஸ்குயித்தையும் 1940-இல் நெவில் சேம்பர்லேனையும் பதவியில் இருந்து அகற்றியது.

திங்கட்கிழமை, உக்ரேனிய சுதந்திரத்தின் 35வது ஆண்டு நிறைவு என அவர்கள் அழைப்பதை ஐரோப்பிய சக்திகள் கொண்டாடின. ஆனால் அவர்கள் கொண்டாடியது ஓர் அதிகாரத்துவச் சூழ்ச்சியையே. 1991 ஆகஸ்ட் 24 அன்று, மாஸ்கோவில் நடந்த ஆட்சிக்கவிழ்ப்பு முயற்சி தோல்வியடைந்து மூன்று நாட்களுக்குப் பிறகு, உக்ரேனிய சோவியத் சோசலிசக் குடியரசின் (SSR) கம்யூனிஸ்ட் பெரும்பான்மை கொண்ட உச்ச சோவியத் 346-க்கு 1 என்ற வாக்குகள் வித்தியாசத்தில் சுதந்திரத்தை அறிவிக்க வாக்களித்தது; சில வாரங்களுக்கு முன்பு உக்ரேனிய கம்யூனிஸ்ட் கட்சியின் சித்தாந்தச் செயலாளராக இருந்த லியோனிட் க்ராவ்சுக் தலைமையில் இந்த அமர்வு நடைபெற்றது. ஐந்து மாதங்களுக்கு முன்னர், சோவியத் ஒன்றியத்தை ஒரு புதுப்பிக்கப்பட்ட கூட்டமைப்பாக பாதுகாப்பதற்கு 70.5 சதவீத உக்ரேனிய வாக்காளர்கள் ஒப்புதல் அளித்திருந்தனர். சோவியத் ஒன்றியத்தை ஆண்டு வந்த, மற்றும் தன்னை ஒரு முதலாளித்துவ ஆளும் வர்க்கமாக மாற்றிக்கொள்ளத் தயாராகிக் கொண்டிருந்த அதிகாரத்துவத்தால், மக்களை முழுமையாகப் புறக்கணித்து நிறைவேற்றப்பட்டது.

இந்நிகழ்வைக் கொண்டாடுவதற்காகத் திங்கட்கிழமை கீவில் கூடிய ஐரோப்பியத் தலைவர்கள், இராணுவச் சட்டத்தின் கீழ் உள்ள ஒரு நாடான உக்ரேன் “ஜனநாயகத்திற்காக” போராடுகிறது என்ற பொய்யை மீண்டும் வலியுறுத்தினர். உக்ரேனை ஐரோப்பிய அரசியல் மற்றும் இராணுவ ஸ்தாபகத்திற்குள் ஒருங்கிணைப்பதே, உக்ரேனிய மக்களுக்கு “ஜனநாயக ஸ்திரத்தன்மையைப்” பாதுகாப்பதற்கான வழிமுறை என ஐரோப்பிய கவுன்சிலின் தலைவர் அன்டோனியோ கோஸ்டா கூறினார்.

ஜெலென்ஸ்கி தேர்ந்தெடுக்கப்பட்ட ஐந்தாண்டு பதவிக்காலம் 2024 மே மாதத்தில் முடிவடைந்தது. 2023 அக்டோபரில் நடைபெற வேண்டிய நாடாளுமன்றத் தேர்தல்களும், 2024 இல் நடைபெற வேண்டிய ஜனாதிபதித் தேர்தலும் நடத்தப்படவில்லை. 2022 பிப்ரவரியில் ரஷ்யப் படையெடுப்புக்குப் பிறகு அறிமுகப்படுத்தப்பட்ட இராணுவச் சட்டம், மீண்டும் மீண்டும் நீட்டிக்கப்பட்டு, சட்டப்பூர்வமாகத் தேர்தல்களைத் தடைசெய்கிறது.

ஊடகங்களும் கடுமையாகக் கட்டுப்படுத்தப்பட்டுள்ளன. படையெடுப்பின் தொடக்கத்தில், முக்கிய தொலைக்காட்சி சேனல்கள், “ஐக்கிய செய்திகள்” தொடர் ஒளிபரப்பு எனும் ஒரே 24 மணிநேர அரச செய்தி ஒளிபரப்பாக ஒருங்கிணைக்கப்பட்டன; இது ஒவ்வொரு தேசியச் சேனலிலும் ஒரே நேரத்தில் ஒளிபரப்பப்பட்டது. 2022 ஆம் ஆண்டு ஒரு ஜனாதிபதி ஆணையின் கீழ், உக்ரேனின் முக்கிய செய்திச் சேனல்கள் அரசாங்கத்தால் அங்கீகரிக்கப்பட்ட உள்ளடக்கத்தை மட்டுமே ஒளிபரப்புகின்றன என ஃப்ரீடம் ஹவுஸ் அறிவிக்கிறது. நான்காம் அகிலத்தின் அனைத்துலகக் குழுவுடன் இணைந்த ஒரு ட்ரொட்ஸ்கிஸ்ட் அமைப்பான போல்ஷிவிக்-லெனினிஸ்டுகளின் இளம் காவலர் அமைப்பின் முன்னணி உறுப்பினரும், 27 வயது சோசலிஸ்டுமான போக்டன் சிரோடியுக் கைது செய்யப்பட்டு ஆறு வாரங்களுக்குப் பிறகு, 2024 ஜூன் 6 முதல் உலக சோசலிச வலைத்தளம் உக்ரேனில் தடைசெய்யப்பட்டுள்ளது. 2024 ஏப்ரல் 25 அன்று இராணுவச் சட்டத்தின் கீழ் உயர் தேசத்துரோகக் குற்றச்சாட்டின் பேரில் உக்ரேன் பாதுகாப்பு சேவை (SBU)   அவரைக் கைது செய்தது.

2024 நவம்பருக்குள், “ஒத்துழைப்பு நடவடிக்கைகளுக்காக” 8,894 குற்றவியல் வழக்குகளையும், ஒரு படையெடுப்பாளர் அரசுக்கு உதவியதற்காக மேலும் 1,388 வழக்குகளையும் அதிகாரிகள் தொடங்கியிருந்தனர். மனித உரிமைகள் கண்காணிப்பகம் (Human Rights Watch) ஏறத்தாழ 2,000 ஒத்துழைப்புத் தீர்ப்புகளை ஆய்வு செய்து, 99 சதவீதத்திற்கும் மேற்பட்ட தண்டனை விகிதத்தைக் கண்டறிந்தது.

போக்டன் சிரோடியுக்கிற்கு ஆகஸ்ட் 10 அன்று விதிக்கப்பட்ட தண்டனை, இந்தச் சட்டங்கள் எந்த அரசியல் நோக்கத்திற்குப் பயன்படுத்தப்படலாம் என்பதை அம்பலப்படுத்துகிறது. போரை எதிர்த்ததற்காக அவர் உயர் தேசத்துரோகக் குற்றவாளி எனத் தீர்ப்பளிக்கப்பட்டு, 15 ஆண்டுகள் சிறைத்தண்டனை விதிக்கப்பட்டது. உளவு, நாசவேலை அல்லது ரஷ்ய முகமைகளுடன் ஒத்துழைத்ததற்கான எந்த ஆதாரமும் சமர்ப்பிக்கப்படவில்லை. உலக சோசலிச வலைத்தளத்திற்காக அவர் எழுதிய அரசியல் எழுத்துகளை மையமாகக் கொண்டே இந்த வழக்கு கட்டமைக்கப்பட்டது.

அந்தத் தீர்ப்பு, “உக்ரேனின் சட்டப்பூர்வமாகத் தேர்ந்தெடுக்கப்பட்ட அரசியல் தலைமையையும் ஜனநாயக செயல்முறைகளையும் அவர் அங்கீகரிக்க மறுத்தது,” “உக்ரேனின் ஆயுதப் படைகள் குறித்த எதிர்மறை மதிப்பீடுகள்,” “பாசிஸ்டுகள் மற்றும் நாஜிக்களுடனான ஒப்பீடுகள்” மற்றும் “தேசிய நாயகர்கள் மற்றும் வரலாற்று நபர்களை மறுவிளக்கம் செய்தது” ஆகியவற்றைத் தாக்கியது. கூறப்படும் அச்சுறுத்தலின் ஒரு பகுதியாக அவரது “ட்ரொட்ஸ்கிசத்தையும்” கம்யூனிசக் கருத்துக்களையும் அது தெளிவாக அடையாளம் கண்டது.

இவ்வாறு, உக்ரேனின் கூறப்படும் “ஜனநாயக செயல்முறைகளை” நிராகரித்ததற்காக ஒரு சோசலிஸ்ட் 15 ஆண்டுகள் சிறைத்தண்டனை விதிக்கப்பட்டுள்ளார்; அதேவேளையில், அரசாங்கத்தை ஒரு தேர்தலுக்கு உட்படுத்துவது அரசைத் தகர்த்துவிடக்கூடும் என்று ஜனாதிபதி அறிவிக்கிறார்.

அரசு எந்திரத்திற்குள் நிலவும் மோதலானது, நான்கரை ஆண்டுகாலப் படுகொலைகளாலும் வலுக்கட்டாய இராணுவத் திரட்டல் ஆகியவற்றால் உருவான நெருக்கடியின் ஒரு அறிகுறியாகும். உக்ரேன் தரப்பில் 1,40,000 பேர் உயிரிழந்தது உட்பட 5,00,000 முதல் 6,00,000 வரையிலும், ரஷ்யா தரப்பில் 3,25,000 பேர் உயிரிழந்தது உட்பட 1.2 மில்லியன் வரையிலும் உயிரிழப்புகள் ஏற்பட்டுள்ளதாக மூலோபாய மற்றும் சர்வதேச ஆய்வுகளுக்கான மையம் (CSIS - Center for Strategic and International Studies) மதிப்பிட்டுள்ளது. அப்போது பாதுகாப்பு அமைச்சராக இருந்த ஃபெடோரோவ், ஏறத்தாழ 2,00,000 வீரர்கள் அனுமதியின்றி பணிக்கு வராமல் இருப்பதாகவும், இராணுவத் திரட்டலைத் தட்டிக்கழித்ததற்காக 2 மில்லியன் பேர் தேடப்படுவதாகவும் ஜனவரியில் நாடாளுமன்றத்தில் தெரிவித்தார்.

போருக்கு எதிரான எதிர்ப்பை போக்டன் சோசலிசக் குரலில் வெளிப்படுத்தினார். ரஷ்யப் படையெடுப்பை அவர் எதிர்த்தார்; ஆனால் உக்ரேனிய தொழிலாளர்கள் நேட்டோவுக்கும் ஜெலென்ஸ்கி அரசாங்கத்துக்கும் தம்மைக் கீழ்ப்படுத்திக்கொள்ள வேண்டும் என்ற கூற்றை அவர் நிராகரித்தார். இரு முதலாளித்துவ அரசாங்கங்களுக்கும் எதிராக உக்ரேனிய மற்றும் ரஷ்ய தொழிலாளர்கள் ஒற்றுமையாக நிற்க வேண்டும் என அவர் அழைப்பு விடுத்தார்; நாஜி ஜேர்மனியுடன் ஒத்துழைத்த ஸ்டெபான் பண்டேரா உள்ளிட்ட உக்ரேனிய தேசியவாதிகள் அமைப்பின் (OUN) தலைவர்களை அரசு மகிமைப்படுத்துவதையும் அவர் அம்பலப்படுத்தினார்.

ரஷ்யாவுக்கு எதிரான ஐரோப்பிய ஏகாதிபத்தியப் போராக இந்தப் போரை ஐரோப்பிய சக்திகள் மேலும் மேலும் வெளிப்படையாக மாற்றிவரும் நிலையில், ஒடுக்குமுறை தீவிரமடைந்து வருகிறது.

திங்கட்கிழமை, “விருப்பமுள்ளோர் கூட்டணி” (Coalition of the Willing) கூட்டத்தில் பங்கேற்பதற்காக, கோஸ்டாவுடன் சேர்ந்து பிரிட்டிஷ் பிரதமர் ஆண்டி பர்ன்ஹாம் கீவுக்குப் பயணித்தார். கூடுதல் இராணுவ உதவியையும், உக்ரேனில் ஒரு பன்னாட்டு இராணுவப் படையை நிலைநிறுத்துவதற்கான தொடர்ச்சியான ஏற்பாடுகளையும் அந்தக் கூட்டணி உறுதியளித்தது.

ஆங்கிலோ-பிரெஞ்சு குரூஸ் ஏவுகணையான ஸ்டார்ம் ஷாடோவை உக்ரேன் தயாரித்துக்கொள்ளும் வகையில், அதன் பிரிட்டனில் தயாரிக்கப்பட்ட பாகங்கள்  குறித்த ரகசியத் தரவை வெளியிட ஆயுதத் தயாரிப்பாளரான MBDA-க்கு  பிரிட்டன் அனுமதி வழங்கியது. உக்ரேனிய ஆயுதக் கொள்முதலுக்காக மேலும் 6.1 பில்லியன் யூரோக்களை ஐரோப்பிய ஒன்றியம் அறிவித்தது.

இந்தத் தீவிரப்படுத்தலின் மையத்தில் ஜேர்மனி உள்ளது. ஜேர்மன் வெளியுறவு அமைச்சர் யொஹான் வாடெஃபுல்  சனிக்கிழமை கீவுக்கு விஜயம் செய்து, ஜேர்மனியை “உக்ரேனின் மிக வலுவான இருதரப்பு நன்கொடையாளர்” எனக் குறிப்பிட்டார்..

தேர்தல்களுக்கு எதிரான ஜெலென்ஸ்கியின் எச்சரிக்கையும், போக்டனின் சிறைவாசமும் ஒரே மூலத்திலிருந்து எழுகின்றன. வெளிநாட்டில் போரைத் தீவிரப்படுத்துவதற்கு உள்நாட்டில் ஒடுக்குமுறை தேவைப்படுகிறது. பெருமளவிலான ஆட்சேர்ப்புத் தவிர்ப்பு, இராணுவத்தைவிட்டு வெளியேறுதல், பேச்சுவார்த்தைகளுக்கான வளர்ந்துவரும் கோரிக்கைகள் ஆகியவற்றை எதிர்கொள்ளும் ஓர் அரசாங்கம், போருக்கு எதிரான தொழிலாள வர்க்கத்தின் சுதந்திரமான அரசியல் இயக்கத்தை அனுமதிக்க முடியாது.

இந்தப் போரும், அதை நிலைநிறுத்தும் ஒடுக்குமுறையும், திங்கட்கிழமையன்று கீவில் ஐரோப்பிய சக்திகள் கொண்டாடிய அந்த நிகழ்விலேயே பொதுவான தோற்றுவாயைக் கொண்டுள்ளன. 1991 ஆகஸ்ட் 24 அன்று சுதந்திரத்தை அறிவித்த அதிகாரத்துவம், தொடர்ந்து சோவியத் ஒன்றியத்தை முற்றிலுமாக ஒழித்துக்கட்டியது. க்ராவ்சுக் முதலாளித்துவ உக்ரேனின் முதல் ஜனாதிபதி ஆனார்; அந்த டிசம்பரில், ரஷ்ய சோவியத் கூட்டாட்சி சோசலிசக் குடியரசின்  ஜனாதிபதி போரிஸ் யெல்ட்சின் மற்றும் பெலாரஷ்ய நாடாளுமன்றத் தலைவர் ஸ்டானிஸ்லாவ் ஷுஷ்கேவிச் ஆகியோருடன் இணைந்து சோவியத் ஒன்றியத்தை முறைப்படி கலைத்தார்.

இதன் விளைவு ஒன்றுக்கொன்று போட்டியிடும் முதலாளித்துவ தன்னலக்குழுக்கள் ஆகும். உக்ரேனில், தன்னலக்குழு தன்னை அமெரிக்க மற்றும் ஐரோப்பிய ஏகாதிபத்தியத்துடன் பிணைத்துக்கொண்டு, தீவிர உக்ரேனிய தேசியவாதத்தின் மரபுகளை மீட்டெடுத்தது. ரஷ்யாவில், முதலாளித்துவத்தின் மீட்சி, ரஷ்ய ஜனாதிபதி விளாடிமிர் புட்டினின் தன்னலக்குழு ஆட்சியையும் அதன் மாபெரும் ரஷ்ய தேசியவாதத்தையும் உருவாக்கியது. புட்டினின் பிற்போக்குத்தனமான படையெடுப்பு ரஷ்ய மற்றும் உக்ரேனிய தொழிலாளர்களைப் பிளவுபடுத்தி, ஒரு மகத்தான இராணுவக் கட்டமைப்புக்கான சாக்குப்போக்கை நேட்டோவுக்கு வழங்கியுள்ளது.

போக்டன் இதற்கு எதிரான முன்னோக்கைப் பிரதிநிதித்துவப்படுத்துகிறார்: இரு தேசியவாத ஆட்சிகளுக்கும் எதிராகவும், போரைத் தீவிரப்படுத்தும் ஏகாதிபத்திய சக்திகளுக்கு எதிராகவும் தொழிலாளர்களின் சர்வதேச ஒற்றுமை ஆகும்.

அவரது சிறைவாசமும், தேர்தல்கள் குறித்த ஜெலென்ஸ்கியின் அறிவிப்பும், “ஜனநாயகத்திற்கான போர்” என்பதன் மோசடியை அம்பலப்படுத்துகின்றன. ஜனநாயக உரிமைகளைப் பெருகிய முறையில் வன்முறையுடன் ஒடுக்குவதைக் கோரும் ஒரு போரைத் தொடர்வதன் மூலம் அந்த உரிமைகளைப் பாதுகாக்க முடியாது. போக்டனை விடுவிப்பதற்கான போராட்டம், போருக்கு எதிரான தொழிலாள வர்க்கத்தின் ஒரு சர்வதேச சோசலிச இயக்கத்தைக் கட்டியெழுப்புவதிலிருந்து பிரிக்க முடியாதது ஆகும்.