இந்த மொழிபெயர்ப்பின் மூலக் கட்டுரையை இங்கு காணலாம்.

செப்டம்பர் 30ஆம் தேதி, எத்தியோப்பியாவின் வடக்குப் பிராந்திய மாநிலமான திக்ரேயில் உள்ள மெகெல்லே, ஷைர் மற்றும் அக்ஸும் நகரங்களின் விமான நிலையங்களை திக்ரே மக்கள் விடுதலை முன்னணி (TPLF) போராளிகள் கைப்பற்றினர். எத்தியோப்பியக் கூட்டாட்சி இராணுவம் நடத்திய தாக்குதலுக்குப் பதிலளிக்கும் வகையிலேயே இந்த நடவடிக்கை மேற்கொள்ளப்பட்டதாக அவர்கள் தெரிவித்தனர்.

அண்டை பிராந்திய மாநிலங்களான அஃபார் மற்றும் அம்ஹாராவில், TPLF-க்கும் எத்தியோப்பியப் படைகளுக்கும் இடையே கடுமையான சண்டை இடம்பெற்றதாகத் தெரிவிக்கப்பட்டுள்ளது; இது முழு அளவிலான உள்நாட்டுப் போர் வெடித்துவிட்டதோ என்ற அச்சத்தைத் தூண்டியுள்ளது. நூற்றுக்கணக்கானோர் ஏற்கனவே கொல்லப்பட்டுள்ளனர், காயமடைந்துள்ளனர் அல்லது தடுத்து வைக்கப்பட்டுள்ளனர்.

இந்தச் சண்டை, 2020–22ஆம் ஆண்டுகளில் எத்தியோப்பியக் கூட்டாட்சிப் படைகளுக்கும் TPLF-க்கும் இடையே நடைபெற்ற உள்நாட்டுப் போரைப் போன்ற மற்றொரு மனிதாபிமானப் பேரழிவை ஏற்படுத்தும் அச்சுறுத்தலை உருவாக்கியுள்ளது. உலகின் மிக மோசமான மனிதாபிமான நெருக்கடியான சூடான் நெருக்கடியால் இது மேலும் மோசமடைகிறது. அங்கு 33.7 மில்லியனுக்கும் அதிகமான மக்களுக்கு மனிதாபிமான உதவி தேவைப்படுகிறது; 14 மில்லியன் பேர் வரை இடம்பெயர்ந்துள்ளனர்; பஞ்சம் நெருங்கி வருகிறது.

அம்ஹாராவைச் சேர்ந்த ஃபானோ ஆயுதக்குழு, ஒரோமோ விடுதலை இராணுவம் (OLA), சோமாலி, அஃபார் மற்றும் பெனிஷாங்குல்-குமுஸ் பிராந்தியங்களைச் சேர்ந்த குழுக்கள் உள்ளிட்டவற்றை உள்ளடக்கிய “உயிர்வாழ்வுக்கான எத்தியோப்பிய மக்கள் படைகளின் கூட்டணி” என்ற புதிய கிளர்ச்சிக் கூட்டணி உருவானதைத் தொடர்ந்து எத்தியோப்பியாவில் இந்த முன்னேற்றங்கள் ஏற்பட்டுள்ளன. ஒன்றுக்கொன்று வேறுபட்ட இந்தக் குழுக்கள், அடிஸ் அபாபாவில் (Addis Ababa) உள்ள பிரதமர் அபிய் அகமதுவின் கூட்டாட்சி அரசாங்கத்தைக் கவிழ்ப்பது என்ற ஒரே நோக்கத்தின் அடிப்படையில் மட்டுமே ஒன்றிணைந்துள்ளன. இந்த அரசாங்கம் இன அடிப்படையில் அமைக்கப்பட்ட 12 பிராந்திய மாநிலங்களைக் கொண்ட நாட்டை நிர்வகித்து வருகிறது.

திக்ரே, அம்ஹாரா, ஒரோமியா ஆகிய பகுதிகளில் நடைபெற்று வரும் கிளர்ச்சிகள், ஆப்பிரிக்காவின் கொம்புப் பகுதியில் அமெரிக்க ஏகாதிபத்தியத்தின் நங்கூர அரசாக நீண்டகாலம் செயல்பட்டு வந்த எத்தியோப்பியா பிளவுபடும் அபாயத்தை இப்போது ஏற்படுத்தியுள்ளன.

பொருளாதார நெருக்கடிக்கு மத்தியில் எதியோப்பியாவின் போட்டி ஆளும் உயரடுக்கு குழுக்கள் மேலாதிக்கத்திற்காக மோதுகின்றன

ஆப்பிரிக்காவின் இரண்டாவது அதிக மக்கள்தொகை கொண்ட நாடான எத்தியோப்பியாவில் தற்போது நடந்துவருவது, எத்தியோப்பிய ஆளும் உயரடுக்கின் போட்டிப் பிரிவுகளுக்கு இடையே இன அடிப்படையில் நடைபெறும் மற்றொரு வன்முறை மோதலாகும். வறுமையாலும் சமூக சமத்துவமின்மையாலும் சீரழிந்துள்ள இந்த நாட்டில், ஒன்றுபட்ட தொழிலாள வர்க்க இயக்கம் உருவாவதைத் தடுப்பதற்காகவே இத்தகைய மோதல்கள் பல தசாப்தங்களாகத் திட்டமிட்டு வளர்க்கப்பட்டு வந்துள்ளன.

இந்தப் பிரிவுகள் ஒவ்வொன்றும் ஏதாவது ஒரு ஏகாதிபத்திய அல்லது பிராந்திய சக்தியுடன் பிணைக்கப்பட்டுள்ளன. தொழிலாள வர்க்கத்திற்கும் ஏழை விவசாயிகளுக்கும் இவை எந்த மாற்றீட்டையும் வழங்கவில்லை; போட்டியிடும் இன உயரடுக்குகளை மட்டுமே முன்வைக்கின்றன. TPLF, 1991 முதல் 2018 வரை எத்தியோப்பிய அரசில் ஆதிக்கம் செலுத்தியதுடன், அதே இன அடிப்படையிலான கூட்டாட்சிக் கட்டமைப்புக்கும், வெகுஜனங்களின் அதே வறுமையாக்கத்துக்கும், ஏகாதிபத்தியத்திற்கான அதே அடிபணிதலுக்கும் தலைமை தாங்கியது.

உலக வங்கியின்படி, மோதல்கள், காலநிலை அதிர்ச்சிகள் மற்றும் பொருளாதார வீழ்ச்சி காரணமாக எத்தியோப்பியாவின் வறுமை விகிதம் 2016ஆம் ஆண்டில் 33 சதவீதமாக இருந்த நிலையில், 2025ஆம் ஆண்டுக்குள் 43 சதவீதமாக உயரும் என கணிக்கப்பட்டது. நாட்டின் 130 மில்லியன் மக்கள்தொகையில் — அவர்களில் பெரும்பாலானோர் கிராமப்புறவாசிகள் — 72 சதவீதம் என்ற மிகப்பெரும் பகுதியினரை பல்பரிமாண வறுமை (வருமானம் மட்டுமல்லாது, சுகாதாரம், கல்வி, வாழ்க்கைத் தரம் ஆகியவற்றையும் உள்ளடக்கிய வறுமை) பாதிக்கிறது. 2004 முதல் 2018 வரை ஆண்டுக்கு 10 சதவீத பொருளாதார வளர்ச்சி இருந்தபோதிலும், அதன் பலன்கள் பெருமளவில் ஒரு சிறிய நகர்ப்புற உயரடுக்கிற்கே சென்றன.

ஈரானுக்கு எதிரான அமெரிக்க-இஸ்ரேலியப் போர் பேரழிவுகரமான தாக்கத்தை ஏற்படுத்தியுள்ளது. கடல்வழிப் போக்குவரத்துப் பாதைகள் முடக்கப்பட்டுள்ளன; எரிபொருள் தட்டுப்பாடும் 80 சதவீதம் வரையிலான விலையேற்றமும் ஏற்பட்டுள்ளன; வளைகுடா நாடுகளில் பணிபுரியும் தொழிலாளர்கள் அனுப்பும் பணம் சரிந்துள்ளது; உணவு உற்பத்தியையும், எத்தியோப்பியா சார்ந்துள்ள மலர் ஏற்றுமதியையும் உரத் தட்டுப்பாடு அச்சுறுத்துகிறது.

வாஷிங்டனுடன் நெருங்கிய தொடர்புகளைக் கொண்ட முன்னாள் இராணுவ உளவுத்துறை அதிகாரியான பிரதமர் அபிய் அகமது, 2018ஆம் ஆண்டில் எத்தியோப்பியப் பொருளாதாரத்தை நாடுகடந்த நிறுவனங்களுக்கும் சர்வதேச நிதி மூலதனத்திற்கும் திறந்துவிட்டதற்காகப் பாராட்டப்பட்டார். இந்த நடவடிக்கை ஒரு சிலருக்குச் செல்வத்தை உருவாக்கிய அதேவேளை, அடிமட்டத்தில் கடுமையான இன்னல்களை ஏற்படுத்தியது. 2024 ஜூலையில், 3.4 பில்லியன் டாலர் சர்வதேச நாணய நிதியக் கடனையும், கூடுதலாக 10 பில்லியன் டாலர் உலக வங்கித் தொகுப்பையும் பெறுவதற்காக, எத்தியோப்பிய பிர் நாணயத்தை மிதக்க விட அரசாங்கம் ஒப்புக்கொண்டது. இதன் விளைவாக அமெரிக்க டாலருக்கு எதிராக 30 சதவீத மதிப்பிழப்பு ஏற்பட்டு, மருந்துகள், எரிபொருள், உரம் போன்ற முக்கிய இறக்குமதிகளின் செலவு அதிகரித்தது. பணவீக்கம் மற்றும் பொதுச் சேவைகளின் குறைப்பு மூலம் இந்த நிதி அதிர்ச்சி நேரடியாகத் தொழிலாள வர்க்கத்தின் மீதும் கிராமப்புற ஏழைகள் மீதும் சுமத்தப்பட்டது.

2018ஆம் ஆண்டில் எரித்திரியாவுடன் அபிய் செய்துகொண்ட அமைதி ஒப்பந்தம் (அதற்காக அவர் 2019ஆம் ஆண்டில் அமைதிக்கான நோபல் பரிசைப் பெற்றார்), தனது சொந்தப் பிரிவின் ஆதிக்கத்தை நிலைநாட்டும் வகையில் TPLF-ஐத் தனிமைப்படுத்துவதற்கான சூழ்ச்சியைத் தவிர வேறொன்றுமில்லை. போர் ஆண்டுகளில் ஆதிக்கம் செலுத்திய சக்தியாக இருந்த TPLF, பட்மே எரித்திரியாவிடம் விட்டுக்கொடுக்கப்பட்டதை ஒரு துரோகமாகக் கருதியது.

எத்தியோப்பியாவின் தீர்க்கப்படாத உள்நாட்டுப் போர்

ஒரு வாரமாகத் தீவிரமடைந்து வரும் சண்டை, 2020–2022ஆம் ஆண்டுகளின் கொடூரமான உள்நாட்டுப் போர் மீண்டும் வெடிக்குமோ என்ற பரவலான அச்சத்தை ஏற்படுத்தியுள்ளது. அந்தப் போர், எத்தியோப்பியாவின் தரப்பில் அண்டை நாடான எரித்திரியாவையும் தன்னுள் இழுத்துக்கொண்டதுடன், அரை மில்லியனுக்கும் அதிகமானோரைப் பலிகொண்டது — 1984–85ஆம் ஆண்டுகளின் பஞ்சத்தில் உயிரிழந்தவர்களின் எண்ணிக்கையைவிடவும் அதிகம். ஒரு மில்லியனுக்கும் அதிகமானோரை இடம்பெயரச் செய்ததுடன், கிட்டத்தட்ட 30 மில்லியன் பேருக்கு மனிதாபிமான உதவி தேவைப்படும் நிலையையும் ஏற்படுத்தியது. இன்னமும் மில்லியன் கணக்கான மக்களால் உணவு, சுத்தமான குடிநீர் மற்றும் சுகாதாரப் பராமரிப்பைப் பெற முடியவில்லை.

சண்டையை முடிவுக்குக் கொண்டுவந்த பிரிட்டோரியா சமாதான ஒப்பந்தத்தின்கீழ், TPLF தனது ஆயுதங்களைக் கைவிடுவதாக உறுதியளித்தது. அதேவேளை, அந்தக் குழுவுடனான பேச்சுவார்த்தைகள் நடைபெறும் வரை திக்ரேயில் ஓர் இடைக்கால நிர்வாகத்தை அமைக்கவும், மனிதாபிமான உதவிகளுக்காக திக்ரேக்குள் முழுமையான அணுகலை வழங்கவும் அடிஸ் அபாபா ஒப்புக்கொண்டது. ஆனால், TPLF-ம், TPLF-க்கு எதிராக எத்தியோப்பியாவுடன் இணைந்து போரிட்டதும் பேச்சுவார்த்தைகளில் ஒரு தரப்பாகப் பங்கேற்காததுமான எரித்திரியாவும், இந்த ஒப்பந்தத்தில் திருப்தியடையவில்லை. திக்ரேயின் நிலப்பகுதி அம்ஹாராவிடம் பறிபோன விவகாரத்தைத் தீர்க்காமலும், இடம்பெயர்ந்த திக்ரேயர்களை முகாம்களிலேயே விட்டுவைத்தும், எரித்திரியத் துருப்புகள் திக்ரேயிலிருந்து வெளியேற வேண்டும் எனக் கோரியும் அந்த ஒப்பந்தம் அமைந்திருந்தது.

புதிய பிராந்திய நிர்வாகம் குறித்த பேச்சுவார்த்தைகளை அரசாங்கம் ஏற்பாடு செய்யத் தவறியது. அதற்குப் பதிலாக, ஏற்கனவே போரால் சீரழிந்திருந்த திக்ரே மீது எரிபொருள், சேவைகள் மற்றும் பணம் தொடர்பான கட்டுப்பாடுகளை விதித்தது. இதையடுத்து, அரசாங்கம் இனப்படுகொலை செய்ய முயல்வதாக TPLF குற்றம்சாட்டியது.

2026ஆம் ஆண்டு தேர்தல்களுக்கு முன்னதாக, 2025 ஜூனில் எத்தியோப்பிய அரசாங்கம் TPLF-ஐத் தடை செய்தது. இதைத் தொடர்ந்து TPLF-க்கும் கூட்டாட்சிப் படைகளுக்கும் இடையே அவ்வப்போது சண்டைகள் வெடித்தன. இதற்குப் பதிலளிக்கும் வகையில், TPLF தனது தலைவர் டெப்ரெட்சியோன் கெப்ரேமிக்கேலை மீண்டும் பிராந்தியத் தலைவராக நியமித்ததுடன், போருக்கு முந்தைய தனது சட்டவாக்க மன்றத்தையும் மீண்டும் நிறுவியது. இதன் மூலம் இடைக்கால அரசாங்கம் நடைமுறையில் பதவியிலிருந்து அகற்றப்பட்டது. மேலும், போர் மீண்டும் வெடிக்கும் அபாயம் இருப்பதாக TPLF எச்சரித்தது.

பிராந்திய மோதலின் அச்சுறுத்தல்

இந்தப் புதிய சண்டை வெடித்த சிறிது காலத்திலேயே, TPLF துணைத் தலைவர் அமானுவேல் அசெஃபா, “நாங்கள் இப்போது முழு அளவிலான போர் நிலையில் இருக்கிறோம்” என்று தெரிவித்தார்.

ஐக்கிய நாடுகள் சபையின் கூற்றுப்படி, திக்ரேயில் பொதுமக்களுக்கு எதிராகக் கூட்டாட்சிப் படைகள் ட்ரோன்களைப் பயன்படுத்தியுள்ளன. ஷெராரோவில் இடம்பெயர்ந்த மக்களுக்காக 41 டன் உணவு உதவியை ஏற்றிச் சென்ற ஒரு லாரி மீது நடத்தப்பட்ட தாக்குதலும் இதில் அடங்கும். இதையடுத்து, அரசாங்கப் படைகள் ட்ரோன்களை இயக்குவதற்கு இணையத்தைப் பயன்படுத்துவதைத் தடுக்கும் நோக்கில், வடக்கு எத்தியோப்பியா முழுவதும் தொலைத்தொடர்பு வலையமைப்புகளுக்கான அணுகலை TPLF துண்டித்தது. TPLF படைகள் அஃபார் பகுதிக்குள் முன்னேறியுள்ளன. இதனால், அடிஸ் அபாபாவிலிருந்து செங்கடல் துறைமுகமான ஜிபூட்டிக்குச் செல்லும் சாலை அச்சுறுத்தலுக்கு உள்ளாகியுள்ளது. நிலத்தால் சூழப்பட்ட எத்தியோப்பியாவின் எரிபொருள் இறக்குமதிகள் உள்ளிட்ட சர்வதேச வர்த்தகத்தில் கிட்டத்தட்ட அனைத்தும் இந்தப் பாதை வழியாகவே நடைபெறுகின்றன. ஜிபூட்டி, பாப் அல்-மண்டப் நீரிணையின் தெற்கு நுழைவாயிலில் அமைந்துள்ளது. செங்கடலின் மீது சவுதி அரேபியாவுக்கு எதிராகத் தங்களது கட்டுப்பாட்டை நிலைநாட்ட ஹூதிகள் முயன்று வரும் பகுதிக்கு அது நேர் எதிரே அமைந்துள்ளது.

எத்தியோப்பியாவைப் பிளவுபடுத்த TPLF-ம் அரசாங்க எதிர்ப்புக் கூட்டணியும் முயற்சிப்பதாக அடிஸ் அபாபா குற்றம்சாட்டியுள்ளது. மேலும், எத்தியோப்பியாவை பலவீனப்படுத்தும் நோக்கில் திக்ரேயின் அண்டை நாடுகளான எரித்திரியாவும் சூடானும், அத்துடன் எகிப்தும் கிளர்ச்சியாளர்களுக்கு ஆதரவளிப்பதாகவும் அது குற்றம்சாட்டியுள்ளது.

எரித்திரிய இராணுவம் மற்றும் ஆளும் கட்சி மீதான தடைகளை முடிவுக்குக் கொண்டுவந்து, 2021ஆம் ஆண்டில் அறிவிக்கப்பட்ட எத்தியோப்பியா மீதான தேசிய அவசரநிலை காலாவதியாகிவிட்டதாக அமெரிக்க நிதித்துறை செப்டம்பர் 18ஆம் தேதி அறிவித்த ஐந்தே நாட்களுக்குப் பின்னர் இந்தச் சண்டை வெடித்தது. கூட்டாட்சி இராணுவம் பல மாதங்களாக திக்ரேயிலும் அம்ஹாராவிலும் ட்ரோன் போர்களை நடத்தி வந்த நிலையிலும், “[எத்தியோப்பியாவில்] தேசிய அவசரநிலை காலாவதியாகிவிட்டது” என்று நிதித்துறை தெரிவித்தது.

எரித்திரியா மீதான தடைகளை நீக்கியது, செங்கடலில் ஈரான் ஆதரவு ஹூதிகளின் தாக்குதல்களுக்கு எதிராக உருவாக்கப்படும் சர்வதேசக் கூட்டணியில் அஸ்மராவை (Asmara) இணைத்துக்கொள்வதை நோக்கமாகக் கொண்டிருந்ததாகத் தெரிகிறது. ஆனால், அமெரிக்கத் தடைகளுக்கு உட்பட்டுள்ள தலைவர்களைக் கொண்ட TPLF, எரித்திரியாவுடனான தனது உறவுகளை மேலும் வலுப்படுத்தவும், எத்தியோப்பியாவுக்கும் எரித்திரியாவுக்கும் இடையே விரிவான ஒரு பினாமிப் போருக்குக் களம் அமைக்கவும் இந்த நடவடிக்கை வழிவகுக்கக்கூடும். எரித்திரிய ஆட்சி, எத்தியோப்பியாவுக்கு எதிரான 30 ஆண்டுகால கிளர்ச்சியின் (1961–1991) விளைவாக உருவானது; எரித்திரியா 1993ஆம் ஆண்டில் தனி நாடானது. பின்னர், அப்போது சர்ச்சைக்குரியதாக இருந்த எல்லை தொடர்பாக 1998–2000ஆம் ஆண்டுகளில் மற்றொரு போரை அது நடத்தியது. அந்தப் போரில் 100,000 பேர் வரை உயிரிழந்தனர்; அந்த எல்லைப் பிரச்சினை 2018ஆம் ஆண்டில்தான் தீர்க்கப்பட்டது.

பிரதமர் அபிய், 1993ஆம் ஆண்டில் எரித்திரியா சுதந்திரம் பெற்றதைத் தொடர்ந்து இழக்கப்பட்ட செங்கடலுக்கான அணுகலை மீண்டும் பெறுவதற்காக, எரித்திரியாவின் கடற்கரையின் ஒரு பகுதியை இணைத்துக்கொள்ளும் நோக்கத்தைப் பல மாதங்களாக அச்சுறுத்தி வருகிறார். கடலுக்கான அணுகலை மீட்டெடுப்பது — குறிப்பாக, மூலோபாய முக்கியத்துவம் வாய்ந்த பாப் அல்-மண்டப் நீரிணைக்கு அருகில் அமைந்துள்ள அஸ்ஸாப் துறைமுகத்துக்கான அணுகலைப் பெறுவது — எத்தியோப்பியாவின் நீண்டகாலப் பாதுகாப்புக்கும் பொருளாதார வளர்ச்சிக்கும் இன்றியமையாதது என்று அவர் வாதிட்டுள்ளார். அதேவேளை, அஸ்ஸாப்பைப் பலவந்தமாகக் கைப்பற்ற அடிஸ் அபாபா முயற்சிக்கக்கூடும் என்று அஸ்மரா அஞ்சுகிறது.

சூடான் மற்றும் எகிப்துடனான எத்தியோப்பியாவின் உறவுகள் மோசமடைந்துள்ளன. ஆயுதக் குழுக்களின் புதிய அரசாங்க எதிர்ப்புக் கூட்டணிக்கு இந்த இரு நாடுகளும் ஆதரவளிப்பதாக எத்தியோப்பிய இராணுவத் தலைவர் பிர்ஹானு ஜூலா குற்றம்சாட்டியுள்ளார்.

சூடானிலிருந்து எத்தியோப்பியா மீது தாக்குதல் நடத்தக்கூடிய ஆயிரக்கணக்கான திக்ரே போராளிகளுக்கு சூடான் இராணுவம் புகலிடம் அளித்து வருவதாக அடிஸ் அபாபா குற்றம்சாட்டியுள்ளது. இந்தப் போராளிகளில் பலர், ஜெனரல் முஹம்மது ஹம்தான் டகாலோ தலைமையிலான விரைவு ஆதரவுப் படைகளுக்கு (RSF) எதிரான உள்நாட்டுப் போரில், ஜெனரல் அப்தெல் ஃபத்தாஹ் அல்-புர்ஹான் தலைமையிலான சூடான் ஆயுதப் படைகளுடன் (SAF) கூட்டணி சேர்ந்துள்ளனர். 2023ஆம் ஆண்டு முதல் சூடானின் கட்டுப்பாட்டுக்காக இரு தரப்பினரும் போரிட்டு வருகின்றனர். RSF-இன் முக்கிய ஆதரவாளராகப் பரவலாகக் கருதப்படும் ஐக்கிய அரபு அமீரகத்தின் (UAE) கூட்டாளியாக இருக்கும் அபிய் அரசாங்கம், RSF-க்கு ஆயுதங்களை வழங்கியுள்ளது. அதேவேளை, ஐக்கிய அரபு அமீரகத்தின் பிராந்தியப் போட்டியாளரான சவுதி அரேபியா சூடான் ஆயுதப் படைகளுக்கு ஆதரவளித்து வருகிறது; எரித்திரியாவும் எகிப்தும் அவ்வாறே ஆதரவளிக்கின்றன.

மாபெரும் எத்தியோப்பிய மறுமலர்ச்சி அணை (GERD) தொடர்பாக அடிஸ் அபாபாவுக்கும் கெய்ரோவுக்கும் இடையிலான உறவுகள் மோசமடைந்தன. எகிப்தும் சூடானும் சார்ந்திருக்கும் நைல் நதியின் நீரோட்டத்தை மாற்றும் அபாயத்தை, எத்தியோப்பியா ஒருதலைப்பட்சமாக மேற்கொண்ட அந்த அணையின் கட்டுமானம் ஏற்படுத்தியதால், நிலைமை கிட்டத்தட்ட போரில் முடியும் நிலைக்கு வந்தது. சூடான் இராணுவத்தின் மற்றொரு கூட்டாளியான எகிப்து, அணை மற்றும் நைல் நதிப் படுகையின் நீர்வளங்கள் தொடர்பான சர்ச்சைகள் காரணமாக, எத்தியோப்பியாவைச் சுற்றிவளைக்கும் முயற்சிகளைத் தீவிரமாக முன்னெடுத்து வருகிறது. இதன் ஒரு பகுதியாக எரித்திரியாவுடனும், குறைந்த அளவில் சோமாலியா மற்றும் ஜிபூட்டியுடனும் நெருக்கமான உறவுகளை அது உருவாக்கியுள்ளது.

தனது உள்நாட்டுப் படைகளை வலுப்படுத்துவதற்காக, சோமாலியாவிலிருந்து 3,000-க்கும் மேற்பட்ட துருப்புகளைத் திரும்பப் பெற எத்தியோப்பியா திட்டமிட்டுள்ளதாகத் தகவல்கள் தெரிவிக்கின்றன. அதன் படைகள், 2022–23ஆம் ஆண்டுகளில் அரசாங்கம் நடத்திய தாக்குதலின்போது தாம் இழந்த பெரும்பாலான நிலப்பகுதிகளை மீண்டும் கைப்பற்றியுள்ள இஸ்லாமியக் குழுவான அல்-ஷபாபை எதிர்த்துப் பின்னுக்குத் தள்ளுவதற்கு சோமாலியாவுக்கு உதவும் நோக்கிலான ஆப்பிரிக்க ஒன்றியப் பணிகளின் ஒரு பகுதியாக உள்ளன.

செங்கடலுக்கான அணுகலைப் பெறும் முயற்சியாக, அங்கீகரிக்கப்படாத பிரிவினைப் பிராந்தியமான சோமாலிலாந்துடன் 2024 ஜனவரியில் அபிய் புரிந்துணர்வு ஒப்பந்தத்தில் கையெழுத்திட்டதைத் தொடர்ந்து, சோமாலியாவுடனான எத்தியோப்பியாவின் உறவுகள் மோசமடைந்தன. எத்தியோப்பியாவிலிருந்து சோமாலிலாந்தில் உள்ள பெர்பெரா துறைமுகம் வரையிலான ரயில் பாதைக்காக ஐக்கிய அரபு அமீரகத்திடமிருந்து 3 பில்லியன் டாலர் முதலீட்டை எத்தியோப்பியா பெற்றுள்ளது. இது எத்தியோப்பியாவின் வெளிநாட்டு வர்த்தகத்தின் மீதான ஜிபூட்டியின் ஏகபோகத்துக்குச் சவால் விடுக்கிறது. 2025ஆம் ஆண்டில் சோமாலிலாந்துக்கு இஸ்ரேல் வழங்கிய அங்கீகாரம், செங்கடலுக்கான எத்தியோப்பியாவின் அணுகலுக்கு நேரடியாகச் சாதகமாக அமைவதுடன், அதன் பிராந்தியப் போட்டியாளரான துருக்கியுடன் மேலும் ஒரு மோதல் புள்ளியையும் உருவாக்கியுள்ளது. சோமாலியாவை நடைமுறையில் தனது பாதுகாப்பின் கீழுள்ள நாடாக மாற்றிவிட்ட துருக்கி, 2017ஆம் ஆண்டில் மொகடிஷுவில் (Mogadishu) தனது மிகப்பெரிய வெளிநாட்டு இராணுவத் தளத்தைத் திறந்ததுடன், நீண்ட தூர பாலிஸ்டிக் ஏவுகணைகளைச் சோதிப்பதற்கான விண்வெளி ஏவுதளத்தையும் அமைத்து வருகிறது.

ஏற்கனவே ஹோர்முஸ் நீரிணை மூடப்பட்டுள்ள நிலையில், ஈரானுக்கு எதிரான அமெரிக்க-இஸ்ரேலிய ஆக்கிரமிப்புப் போர் பாரசீக வளைகுடாவிலிருந்து செங்கடலுக்கும் ஆப்பிரிக்காவின் கொம்புப் பகுதிக்கும் பரவி வருகிறது. எத்தியோப்பியா, சூடான், சோமாலியா, ஏமன் ஆகியவற்றில் ஒரே நேரத்தில் நடைபெறும் மோதல்கள், இந்தப் போர்கள் ஒன்றிணைந்து விரிவடைந்து வரும் ஒரு ஏகாதிபத்தியப் போராக மாறும் அபாயத்தை உருவாக்குகின்றன.