இந்த மொழிபெயர்ப்பின் மூலக் கட்டுரையை இங்கு காணலாம்.

ட்ரம்ப் நிர்வாகமும் இஸ்ரேலிய அரசாங்கமும் ஈரான் மீது சில வாரங்களுக்குள் ஒரு பாரிய தாக்குதலை நடத்துவதற்கான தமது திட்டங்களைத் தீவிரப்படுத்தி வருகின்றன. அமெரிக்க அதிகாரிகளை மேற்கோள் காட்டி, நியூ யோர்க் டைம்ஸ் புதன்கிழமை அன்று வெளியிட்ட செய்தியில், “அமெரிக்க இடைக்காலத் தேர்தல்களுக்குப் பிறகு ஈரானுக்கு எதிரான புதிய தாக்குதல்களுக்காக அமெரிக்க மற்றும் இஸ்ரேலிய இராணுவங்கள் குறிப்பிட்ட திட்டங்களை வகுத்துள்ளன” என்றும், அந்தத் தாக்குதல்களின் இலக்குகளில் “ஈரானின் எரிசக்தி உள்கட்டமைப்பு, அணுசக்தி நிலையங்கள், மற்றும் ஏவுகணை, ஆளில்லா விமான ஆயுதக் கிடங்குகள் ஆகியவை இடம்பெற வாய்ப்புள்ளது” என்றும் கூறப்பட்டுள்ளது.

[img]

https://www.wsws.org/asset/f7bc2aaf-daa7-4189-a8fc-6d628cad48c0?rendition=image1280

அக்டோபர் 13, 2025 அன்று, டெல் அவிவ் அருகே உள்ள பென் குரியன் சர்வதேச விமான நிலையத்தில் ஏர் ஃபோர்ஸ் ஒன் விமானத்தில் ஏறுவதற்கு முன்பு, ஜனாதிபதி டொனால்ட் ட்ரம்ப் (வலதுபுறம்) இஸ்ரேல் பிரதமர் பெஞ்சமின் நெதன்யாகுவுடன் புகைப்படம் எடுத்துக்கொள்கிறார்; இடதுபுறம் இஸ்ரேல் ஜனாதிபதி ஐசக் ஹெர்சாக் இதைப் பார்த்துக்கொண்டிருக்கிறார். [AP புகைப்படம்/இவான் வுச்சி]

[/img]

அமெரிக்க ஜனாதிபதி டொனால்ட் ட்ரம்பின் செல்வாக்கு வரலாறு காணாத அளவுக்குக் குறைந்திருக்கும் வேளையில், அமெரிக்க ஏகாதிபத்தியத்தால் நடத்தப்படும் போர்களுக்கும், அவற்றால் தூண்டப்பட்டுள்ள வாழ்க்கைச் செலவு நெருக்கடிக்கும் எதிரான பரந்த மக்களின் எதிர்ப்புக்கள் நவம்பர் 3ல் இடம்பெறும் இடைக்காலத் தேர்தல்களில் பிரதிபலிக்கும் என எதிர்பார்க்கப்படுகிறது. ஆயினும், இரு கட்சிகளுமே தேர்தல் முடிவுகளை உதாசீனம் செய்யத் திட்டமிட்டு வருகின்றன. ட்ரம்ப் ஈரான் மீது தாக்குதல் நடத்துவதற்குத் தீவிரமாகத் தயாராகி வரும் அதேவேளை, ஜனநாயகக் கட்சியினர் ரஷ்யாவுடனான போரைத் தீவிரப்படுத்துமாறு பிரச்சாரம் செய்து வருகின்றனர்.

இந்த வாரம் இஸ்ரேலுக்கு மேற்கொண்ட பயணத்தின்போது யுத்த அமைச்சர் பீட் ஹெக்செத், இஸ்ரேலிய பிரதமர் பெஞ்சமின் நெத்தன்யாகுவுடன் புதிய தாக்குதல்கள் குறித்துக் கலந்தாலோசித்ததாகவும், அத்தாக்குதல்களுக்கான ஒத்திகையாக அமெரிக்க மற்றும் இஸ்ரேலிய போர் விமானங்கள் ஈராக்கின் மீது பறந்து வருவதாகவும் டைம்ஸ் செய்தி வெளியிட்டுள்ளது. “மூன்று விமானம் தாங்கிக் கப்பல்கள், ஆயிரக்கணக்கான கடற்படையினர்கள், போர் விமானங்கள் மற்றும் சிறப்பு நடவடிக்கைப் படைகள்” உள்ளிட்ட “ஒரு பிரம்மாண்டமான ஆயுதக் களஞ்சியத்தை அமெரிக்கா உருவாக்கி வருகிறது. அது நவம்பர் மாதத் தொடக்கத்தில் முழுமையாகச் செயல்பாட்டுக்குத் தயாராகிவிடும்” என்று டைம்ஸ் எழுதியுள்ளது. “அமெரிக்க இராணுவம் இரவின் மறைவில் தாக்குதல்களை நடத்துவதையே விரும்புகிறது,” என்றும், “அடுத்த மாதத் தொடக்கத்தில் ஈரானின் மீது இருள் சூழ்ந்திருக்கும் நேரத்தில் தாக்குதல்கள் அதிகரிக்கும்” என்றும் டைம்ஸ் மேலும் தெரிவித்துள்ளது.

டைம்ஸ் பத்திரிகையின்படி, சில அமெரிக்கத் திட்டமிடுபவர்கள், “ஒரு தீவிரமான மூன்று நாள் தாக்குதல், ஈரானின் நிலைப்பாட்டை மாற்றும் அளவுக்குப் போதுமான பொருளாதார சேதத்தை ஏற்படுத்தக்கூடும்” என்று நம்புகிறார்கள். இந்தத் திட்டமிடல் குறித்துத் தகவல் அறிந்தவர்களை மேற்கோள் காட்டி, இரு படைகளும் ஈரானின் அணுசக்தித் திட்டத்தின் மீது குண்டு வீசத் தயாராகி வருவதாகவும், அதில் பிக்காக்ஸ் மலையில் உள்ள நிலத்தடித் தளமும் அடங்கக்கூடும் என்றும் டைம்ஸ் பத்திரிகை செய்தி வெளியிட்டது. வலதுசாரிக் கேபிள் தொலைக்காட்சி நிறுவனமான நியூஸ்மேக்ஸுக்கு (Newsmax) அக்டோபர் 15 அன்று அளித்த நேர்காணலில் ட்ரம்ப், “இப்போது நாங்கள் பிக்காக்ஸ் மலையைப் பார்த்துக்கொண்டிருக்கிறோம். நாங்கள் அங்கு செல்ல வேண்டியிருக்கலாம்” என்று கூறினார்.

பைனான்சியல் டைம்ஸ் பத்திரிகையானது. புதன்கிழமை அன்று “இந்த மாத தொடக்கத்தில் ஈரான் மீதான தாக்குதல்களை மீண்டும் தொடங்க நெதன்யாகு திட்டமிட்டார்” என்ற தலைப்பின் கீழ், வெளியிட்ட செய்தியில், பிப்ரவரியில் தொடங்கப்பட்ட அமெரிக்க-இஸ்ரேலிய வான்வழிப் போரைக் காட்டிலும் தீவிரமான ஒரு நடவடிக்கையாக, அணுசக்தி நிலையங்கள், மின் உற்பத்தி நிலையங்கள் மற்றும் பிற பொதுமக்களின் உள்கட்டமைப்புகள் மீது அக்டோபர் 10 வார இறுதியில் பல நாட்களுக்கு ஈரான் மீது தாக்குதல்களைத் தொடங்க இஸ்ரேல் இராணுவம் திட்டமிட்டிருந்தது என்று குறிப்பிட்டுள்ளது.

இடைக்காலத் தேர்தல்கள் முடியும் வரை குண்டுவீச்சை மீண்டும் தொடங்குவதை ட்ரம்ப் எதிர்த்ததால், அந்தத் தாக்குதல்கள் நடைபெறவில்லை என்றும் பைனான்சியல் டைம்ஸ் தெரிவித்தது. நியூயோர்க் டைம்ஸ் இதேபோன்ற ஒரு விவரத்தை அளித்தது. இரு இராணுவங்களும் “இந்த மாத தொடக்கத்தில் ஈரான் மீது தாக்குதல் நடத்தும் நிலைக்கு மிக நெருக்கமாக வந்திருந்தன”; அவற்றின் விமானப் படைகள் “மிக உயர்ந்த எச்சரிக்கை நிலையில்” இருந்தன; ஆனால் ட்ரம்ப் “கடைசி நிமிடத்தில் தாக்குதலை ஒத்திவைக்க முடிவு செய்தார்” என்று நியூயோர்க் டைம்ஸ் தெரிவித்தது.

அக்டோபர் 27 அன்று நடைபெறவுள்ள இஸ்ரேலியத் தேர்தலில், ஈரான் அரசாங்கத்தைத் தூக்கியெறிவதைத் தனது தேர்தல் முழக்கமாகக் கொண்டு நெத்தன்யாகு பிரச்சாரம் செய்து வருகிறார். செப்டம்பர் 3 அன்று இஸ்ரேலிய இராணுவத் தளபதிகள் முன்னிலையில் பேசிய அவர், “இந்த அச்சுறுத்தலை நாம் முற்றிலுமாக அகற்ற முடியும் என்று நான் உறுதியாக நம்புகிறேன்—அதாவது, ஈரானிய ஆட்சியைக் கவிழ்க்க முடியும். அதுவே எமக்கு முன்னால் இன்னும் இருக்கும் மையப் பணியாகும், ஆனால் அது நெருங்கிவிட்டது” என்று கூறினார்.

இஸ்ரேலியத் தேர்தலுக்கு முன்னதாகவே குண்டுவீச்சை மீண்டும் தொடங்குமாறு நெத்தன்யாகு ட்ரம்பிடம் வலியுறுத்தியதாகவும், “தாராளமாகத் தயாராகலாம்” என்று ட்ரம்ப் அவரிடம் கூறியதாகவும், இஸ்ரேலியத் தொலைக்காட்சிச் செய்தி நிறுவனமான சேனல் 12 அறிந்துகொண்டதாக, ஆங்கில மொழியிலான இஸ்ரேலியச் செய்தித் தளமான டைம்ஸ் ஆஃப் இஸ்ரேல் அக்டோபர் 14 அன்று செய்தி வெளியிட்டது. ஐந்து நாட்களுக்கு முன்னர், மீண்டும் சேனல் 12-ஐ மேற்கோள்காட்டி, ஒரு தாக்குதல் இஸ்ரேலைத் தனது தேர்தலைத் தள்ளிவைக்கும் நிலைக்குத் தள்ளக்கூடும் என இஸ்ரேலிய இராணுவத்தின் தலைமைப் பணியாளரான லெப்டினன்ட் ஜெனரல் எயால் சமீர் அமெரிக்க இராணுவத் தளபதிகளை எச்சரித்ததாக டைம்ஸ் ஆஃப் இஸ்ரேல் செய்தி வெளியிட்டிருந்தது.

ட்ரம்பும் நெத்தன்யாகுவும் திட்டமிட்டு வரும் இந்தப் போர் ஏற்கெனவே ஆயிரக்கணக்கான உயிர்களைப் பலிகொண்டுள்ளது. அமெரிக்க மற்றும் இஸ்ரேலிய போர் விமானங்கள் பிப்ரவரி 28 அன்று ஈரானை முதன்முதலாகத் தாக்கின. பிப்ரவரி முதல் ஏப்ரல் வரையிலான குண்டுவீச்சுத் தாக்குதலைப் போரின் “முதல் கட்டம்” என்று டைம்ஸ் புதன்கிழமை குறிப்பிட்டது. அதிகாரபூர்வ புள்ளிவிவரங்களைத் தொகுத்த, கட்டாரைத் தளமாகக் கொண்ட அல் ஜசீரா தொலைக்காட்சி நிறுவனம், ஆகஸ்ட் 28 நிலவரப்படி ஈரானில் 3,527 பேர் கொல்லப்பட்டதாகக் கணக்கிட்டுள்ளது. செப்டம்பர் 28 வரையிலான அமெரிக்க இராணுவத்தின் கணக்கின்படி, அமெரிக்கத் தரப்பில் 19 பேர் கொல்லப்பட்டதுடன் 861 பேர் காயமடைந்துள்ளனர்.

போரின் முதல் கட்டம் “உலகெங்கும் எரிசக்தி விலைகளையும் பணவீக்கத்தையும் உயர்த்தியது” என்றும், “பென்டகனின் இடைமறிப்பு ஏவுகணைகளின் கையிருப்பைக் கடும் நெருக்கடிக்கு உள்ளாக்கியது” என்றும் டைம்ஸ் புதன்கிழமை ஒப்புக்கொண்டது. சர்வதேச எண்ணெய் அளவுகோலான பிரென்ட் கச்சா எண்ணெய் வியாழக்கிழமை ஒரு பீப்பாய்க்கு 112 டாலர் என்ற விலையில் வர்த்தகம் செய்யப்பட்டது. அமெரிக்க வாகன ஓட்டுநர்கள் சங்கம் (AAA), வியாழக்கிழமை வழக்கமான பெட்ரோலின் சராசரி விலையை ஒரு லிட்டருக்கு ஏறத்தாழ 1.13 டாலர் (கேலனுக்கு 4.27 டாலர்) எனக் குறிப்பிட்டது; குண்டுவீச்சு தொடங்குவதற்கு இரண்டு நாட்களுக்கு முன்னர், பிப்ரவரி 26 அன்று இது ஏறத்தாழ 0.79 டாலராக (கேலனுக்கு 2.98 டாலர்) இருந்தது.

ஈரானின் கூட்டாளியான யேமனின் ஹவுதி போராளிகள் சவுதி அரேபியா மீதான தங்கள் தாக்குதல்களை தீவிரப்படுத்தியுள்ளனர். புதன்கிழமையன்று, அமெரிக்க வெளியுறவுத் துறை சவுதி அரேபியாவில் உள்ள தனது அவசரகால அல்லாத பணியாளர்களை தங்கள் குடும்பங்களுடன் நாட்டை விட்டு வெளியேறுமாறு உத்தரவிட்டது. தமாம் விமான நிலையம் மற்றும் ஷைபா எண்ணெய் வயல் மீது இந்த வாரம் நடத்தப்பட்ட தாக்குதல்களில் குறைந்தது மூன்று பேர் கொல்லப்பட்டனர்.

ட்ரம்ப் நிர்வாகம் தேர்தல்களுக்குப் பின்னர் ஈரான் மீது தாக்குதல் நடத்தத் திட்டமிட்டிருப்பது குறித்து எச்சரிக்கும் வகையில், செனட் சிறுபான்மைக் கட்சித் தலைவர் சக் ஷூமரும் பிரதிநிதிகள் சபை சிறுபான்மைக் கட்சித் தலைவர் ஹக்கீம் ஜெஃப்ரீஸும் குறிப்பிடத்தக்க எந்தவொரு கூற்றையும் வெளியிடவில்லை. ஜனநாயகக் கட்சியினரோ ரஷ்யாவுக்கு எதிரான போரைத் தீவிரப்படுத்த வேண்டும் எனக் கோருகின்றனர். ரஷ்ய எண்ணெயையும் எரிவாயுவையும் வாங்கும் நாடுகள் மீது சுங்க வரிகளை விதிக்க அனுமதிக்கும் மசோதா மீதான விவாதத்தின்போது, செப்டம்பர் 16 அன்று பிரதிநிதிகள் சபையில் பேசிய ஜெஃப்ரீஸ், “கிழக்கு ஐரோப்பாவின் கொடுங்கோலனை ஆக்ரோஷமாக எதிர்கொள்ள ஜனாதிபதி ஏன் இவ்வளவு தயக்கம் காட்டுகிறார் என்று நம்மில் பலர் வியக்கிறோம்.” அவர் மேலும் கூறுகையில், “நீங்கள் கொடுங்கோலனை எதிர்கொள்ள வேண்டும், அவரைச் சமாதானப்படுத்தக் கூடாது” என்றார்.

ரஷ்யா மீதான புதிய தடைகளுக்கு ட்ரம்ப் விலக்கு அளித்ததைத் தொடர்ந்து அக்டோபர் 17 அன்று பேசிய ஷூமர், “மத்திய கிழக்கில் உள்ள அமெரிக்கப் படைகளைக் குறிவைக்க ஈரானுக்கு உதவிய ஒரு சர்வாதிகாரிக்கு ட்ரம்ப் உதவி செய்து வருகிறார்” என்று கூறினார். மார்ச் 13 அன்று, ஷூமரும் நியூ ஹாம்ப்ஷயரின் ஜனநாயகக் கட்சி செனட்டர் ஜீன் ஷாஹீனும், மாசசூசெட்ஸின் ஜனநாயகக் கட்சி செனட்டர் எலிசபெத் வாரனும், ஈரானுக்கு எதிராக ஜனாதிபதி ட்ரம்ப் மோசமாகத் திட்டமிட்டு நடத்தும் போரின் “முதன்மைப் பயனாளிகளில் ஒருவராக” ரஷ்ய ஜனாதிபதி விளாடிமிர் புட்டின் இருந்து வருகிறார் என்றும், “அமெரிக்கப் படையினரைக் குறிவைத்துக் கொல்வதற்காக ஈரானுக்கு ரஷ்யா உளவுத் தகவல்களை வழங்கி வருவதாகக் கூறப்படுகிறது” என்றும் தெரிவித்திருந்தனர்.

வேர்ஜீனியாவின் ஜனநாயகக் கட்சி செனட்டர் டிம் கெய்ன், இந்த விலக்கு குறித்து அக்டோபர் 18 அன்று பொக்ஸ் நியூஸ் சண்டே நிகழ்ச்சியில் பேசுகையில், ட்ரம்ப் “அந்தப் பணத்தை ரஷ்யாவுக்குக் கொடுத்தால் ... அவர்கள் அதை ஈரானுக்கு ஆதரவளிக்கப் பயன்படுத்துவார்கள். இப்போது நடந்துகொண்டிருக்கும் ஈரான்-அமெரிக்கப் போரில், ஒரு எதிரிக்குப் பணம் கொடுக்கக் கூடாது” என்று கூறினார்.

அரிசோனாவின் ஜனநாயகக் கட்சி செனட்டர் மார்க் கெல்லி, செப்டம்பர் 27 அன்று ABC-யின் இந்த வார நிகழ்ச்சியில், “நீரிணையை ஈரானியர்களின் கையில் விட்டுவிட எங்களால் முடியாது. அவர்கள் அணு ஆயுதத்தைப் பெறுவதை அனுமதிக்க முடியாது” என்று கூறினார். அரிசோனாவின் ஜனநாயகக் கட்சி செனட்டர் ரூபென் கலேகோ, செப்டம்பர் 30 அன்று CNN-இல் பேசுகையில், ஹெக்செத் “ஒரு போரில் தான் தோற்றுக்கொண்டிருக்கிறார் என்ற உண்மையிலிருந்து கவனத்தைத் திசைதிருப்ப வேண்டியுள்ளது” என்றும், பென்டகனில் ஹெக்செத்துக்குப் புதிய அலுவலகம் தேவைப்பட்டால், அது “ஈரானில் இந்தப் போரில் எப்படி வெற்றி பெறுவது என்பதைக் கண்டறிவதற்கான” அலுவலகமாக இருக்க வேண்டும் என்றும் கூறினார்.

ஈரான் மீது அமெரிக்கக் குண்டுவீச்சு தொடங்குவதற்கு ஐந்து வாரங்களுக்கு முன்னர், ஜனவரி 22 அன்று, 839 பில்லியன் டாலர் இராணுவ ஒதுக்கீட்டு மசோதாவுக்குப் பிரதிநிதிகள் சபையின் 149 ஜனநாயகக் கட்சியினர் ஆதரவாக வாக்களித்தனர். ட்ரம்ப் பின்னர் கையொப்பமிட்டதும், ஈரான் மீதான தடைகளையும் 2031ஆம் ஆண்டு வரை நீட்டிப்பதுமான ரஷ்யா மீதான தடை மசோதாவுக்கு, செப்டம்பர் 16 அன்று பிரதிநிதிகள் சபையின் 58 ஜனநாயகக் கட்சியினர் ஆதரவாக வாக்களித்தனர்.