மொழிபெயர்ப்பின் மூலக் கட்டுரையை இங்கே காணலாம்

இந்த வாரம் ஜோர்ஜியாவின் அட்லாண்டாவில் நடந்த பாரிய துப்பாக்கிச் சூடுகளில் பாதிக்கப்பட்டவர்கள் பெரும்பாலும் ஆசிய அமெரிக்கர்களாக இருந்தனர். அமெரிக்க அரசாங்கத்தால் இடைவிடாமல் சீனாவை அரக்கத்தனமாக காட்டுவதன் மத்தியில் அமெரிக்காவில் ஆசிய எதிர்ப்பு வன்முறைகள் அதிகரித்துள்ளன.

துப்பாக்கிச் சூட்டின் நோக்கங்கள் இன்னும் தெளிவாகத் தெரியவில்லை. ஆனால் தாக்குதல்களை அடுத்து, அமெரிக்க ஆளும் வர்க்கம் சீனாவுக்கு எதிரான உணர்வைத் தூண்டுவதற்கான அதன் முயற்சிகளை விரிவுபடுத்தியுள்ளது. இதில் ஆசிய எதிர்ப்பு தப்பெண்ணம் மற்றும் வன்முறைக்கு அரசியல் ஸ்தாபகத்தின் சில பிரிவுகளின் வெளிப்படையாக அழைப்புவிடுவதும் அடங்கும்.

வியாழக்கிழமை, காங்கிரஸ் நீதித்துறைக்குழு "ஆசிய அமெரிக்கர்களுக்கு எதிரான பாகுபாடு மற்றும் வன்முறை" குறித்த விசாரணையை நடத்தியது. இது வாரங்களுக்கு முன்பே திட்டமிடப்பட்டதாகும். குழுவில் உயர்மட்ட குடியரசுக் கட்சியின் தொடக்க அறிக்கையை வழங்கிய டெக்சாஸ் பிரதிநிதி சிப் ரோய், ஒரு இனவெறி மற்றும் வன்முறைக்கு வெளிப்படையான தூண்டுதலை வெளிப்படுத்தினார். சீனர்களை "சீன-கம்யூனிஸ்ட்கள்" (Chi-Coms) என்ற ஒரு இனவெறி பழிச்சொல்லால் குறிப்பிட்டு, ரோய் "அவர்கள் மோசமானவர்கள் என்று நான் நினைக்கிறேன்" என அறிவித்தார்.

அவர் மேலும் கூறுகையில், “இதுதான் நான் அவர்களை சீன-கம்யூனிஸ்ட்கள் (Chi-Coms) என்று குறிப்பிட முனைவதன் காரணமாகும். சீன-கம்யூனிஸ்ட்களை (Chi-Coms) நான் எதிர்க்கிறேன் என்று சொல்வதில் நான் வெட்கப்பட மாட்டேன்” என்றார்.

அமெரிக்காவில் நீதிமன்றத்திற்கு அப்பால் தண்டனை வழங்கும் லிஞ்ச் சட்டத்தின் மரபுக்கு அவர் சாதகமாக அழைப்பு விடுத்து, "டெக்சாஸில் அனைத்து கயிறுகளையும் தேடியெடுத்து ஒரு உயரமான ஓக் மரத்தைப் கண்டுபிடிக்கவேண்டும் என்று டெக்சாஸில் பழமொழி உள்ளது" என்று அறிவித்தார். அரசாங்கம் "கெட்டவர்களை சுற்றி வளைக்க" மற்றும் "கெட்டவர்களை வெளியேற்ற வேண்டும்" என்று அவர் கோரினார்.

ஆசிய அமெரிக்கர்களுக்கு எதிரான வன்முறை பற்றி விகிதாச்சாரத்திற்கு மாறாக ஊதிப்பெருப்பிக்கப்படுவதாக தெரிவித்த ரோய், இனவெறி பேச்சினால் குழப்பத்திற்கு உள்ளாகுபவர்கள் தணிக்கை செய்வதில் ஈடுபடுவதாகக் கூறினார்.

ஆசிய எதிர்ப்பு இனவெறியை அம்பலப்படுத்துவதற்கு பதிலாக, "நவீனகால அடிமைத்தனத்தில் ஈடுபட்டதற்காக" சீனாவை காங்கிரஸ் கண்டிக்க வேண்டும் என்று ரோய் கோரினார். சீனாவை "பசிபிக் முழுவதும் தங்கள் இராணுவத்தை கட்டியெழுப்ப அவர்கள் என்ன செய்கிறார்கள்" என்று அவர் கண்டனம் செய்தார். மேலும் சீன ஆட்சி "இந்த வைரஸின் யதார்த்தத்தை மறைக்க" முயல்கிறது என்று குற்றம் சாட்டினார். இது கோவிட்-19 ஒரு உயிரியல் ஆயுதமாக உருவாக்கப்பட்டது என்பதைக் குறிக்கிறது.

குழுவில் ஜனநாயகக் கட்சியினரிடமிருந்து சாந்தமான எதிர்ப்பை மட்டுமே ரோயின் வன்முறைக் குறிப்பு சந்தித்தது. தலைவர் ஸ்டீவ் கோஹன் (டென்னசியின் ஜனநாயகக் கட்சி) பின்வருமாறு பதிலளித்தார். “எனது தொடக்க அறிக்கையில் நான் குறிப்பிட்ட சம்பவங்கள் துப்பப்பட்டு, முகத்தில் அறைந்து, தீயில் எரிக்கப்பட்டு, கம்பள கத்தி மூலம் வெட்டப்பட்டு, வன்முறையுடன் தரையில் வீசப்பட்டன. … அது பேச்சு அல்ல.”

கண்ணீருடன் போராடும் காங்கிரஸின் பெண் கிரேஸ் மெங், ரோய் "இந்த நாடு முழுவதும் உள்ள ஆசிய அமெரிக்கர்களின் முதுகில், எங்கள் தாத்தா, பாட்டி மீது, எங்கள் குழந்தைகள் மீது ஒரு முக்கிய எதிரியாக வைப்பதாக" குற்றம் சாட்டினார். மாறாக, ரோய் இனவெறி வன்முறையைத் தூண்டுவது குறித்து குழு உறுப்பினர்கள் அமைதியாக இருந்தனர்.

அட்லாண்டாவில் ஆசிய அமெரிக்க பிரதிநிதிகளுடனான சந்திப்பைத் தொடர்ந்து வெள்ளிக்கிழமை கருத்து தெரிவித்த ஜனாதிபதி ஜோ பைடென், கோவிட் -19 தொற்றுநோய் தொடர்பாக ஆசிய அமெரிக்கர்களை "பலிகடாவாக்குவதை" பாசாங்குத்தனமாக கண்டித்தார். "ஒற்றுமை" பற்றிய அவரது கருத்துக்கள் இருந்தபோதிலும், பைடென் தனது முன்னோடி மேற்கொண்ட சீனாவை அரக்கத்தனமாக காட்டுவதை தொடர்ந்ததோடு தீவிரப்படுத்தியுள்ளார்.

கோவிட்-19 ஐ “சீன வைரஸ்” மற்றும் “Kung Flu” என்று பெயரிடுவது உட்பட ட்ரம்பின் கொடூரமான இனவெறி வாய்வீச்சை குறிப்பிடாவிட்டாலும், பைடென் சீனா மீதான ட்ரம்பின் போர்க்குணமிக்க மற்றும் இராணுவக் கொள்கையை அனைத்து அடிப்படைகளிலும் தொடர்ந்தார்.

அமெரிக்க பங்குச் சந்தைகளில் இருந்து சீன நிறுவனங்களை ட்ரம்ப் நீக்குவதை பைடென் வெள்ளை மாளிகை விரிவுபடுத்தியுள்ளது. ட்ரம்ப்பின் சீன எதிர்ப்பு வரிவிதிப்புகளுக்கு இடமளித்து, சீன மாணவர்கள் மீதான ட்ரம்பின் கட்டுப்பாடுகளை தொடர்ந்து அமுல்படுத்தியுள்ளார்.

அதே நேரத்தில், பைடென் நிர்வாகம் சீனா தனது முஸ்லீம் மக்களுக்கு எதிராக "இனப்படுகொலையில்" ஈடுபட்டுள்ளது என்ற ட்ரம்ப்பின் தவறான குற்றச்சாட்டையும், சீன ஆய்வகத்தில் கோவிட்-19 உருவாக்கப்பட்டிருக்கலாம் என்ற ஆதாரமற்ற கூற்றையும் தொடர்ந்து ஊக்குவித்து வருகிறது.

முழு அமெரிக்க ஊடகங்கள் மற்றும் அரசியல் ஸ்தாபகத்திலும், ஆசிய எதிர்ப்பு இனவெறியின் எழுச்சிக்கும் சீனாவிற்கு எதிரான “பெரும் சக்தி மோதலை” வாஷிங்டன் பின்பற்றுவதற்கும் இடையிலான உறவைப் பற்றி விவாதிப்பதை தவிர்க்க உண்மையில் ஒரு ஒப்பந்தம் உள்ளது.

நியூ யோர்க் டைம்ஸ், இந்த வாரம் ஒரு "தலையங்க பார்வையாளர்" கட்டுரையை வெளியிட்டது. இது சீனாவை ஒரு "அச்சுறுத்தலாக" முன்வைத்து அமெரிக்கா ஒரு "இராணுவ மற்றும் தொழில்நுட்ப மேன்மையை" தக்க வைத்துக் கொள்ள வேண்டும் என்று வலியுறுத்துகிறது.

அதே நாளில், டைம்ஸின் இணைய பதிப்பானது, “ஆசிய-அமெரிக்கர்கள் ஒரு காரணத்திற்காக பயப்படுகிறார்கள்” என்ற தலைப்பில் ஒரு தலையங்கத்தை எடுத்துச் சென்றது. இது “அச்சமுறுதல் மற்றும் வாய்வீச்சு” ஆகியவற்றைக் கண்டித்தது. ஆனால் தலையங்கம்: சீனாவை ஒரு "அச்சுறுத்தல்" என்று அறிவித்து, அரை மில்லியனுக்கும் அதிகமான அமெரிக்கர்களின் இறப்புகளுக்கு அதைக் குறை கூற முயற்சிப்பது இனவெறித் தூண்டுதல் இல்லையா? என்ற வெளிப்படையான கேள்வியை எழுப்பவில்லை. ஏனெனில் அக்கேள்வியைக் கேட்டால் அதற்கு பதில் ஆம் என்பதாகவே இருக்கும்.

அமெரிக்காவில் ஆசிய எதிர்ப்பு இனவெறியின் முழு மோசமான வரலாறும் அமெரிக்க ஏகாதிபத்தியத்தின் கொள்ளையடிக்கும் நோக்கங்களுடன் நெருக்கமாக இணைக்கப்பட்டுள்ளது. ஏகாதிபத்திய சக்திகளால் சீனாவை செதுக்கியதன் மத்தியில் 1882 ஆம் ஆண்டின் சீன விலக்குச் சட்டம் வந்தது, அதோடு "மஞ்சள் அபாயத்திற்கு" எதிராக இனவெறி தூண்டப்பட்டது.

1942 ஆம் ஆண்டில், 120,000 ஜப்பானிய அமெரிக்கர்களை தடுத்து வைக்க அமெரிக்க அரசாங்கம் உத்தரவிட்டது. அவர்கள் தங்கள் இனத்தின் அடிப்படையில் ஒரு தேசிய பாதுகாப்பு அச்சுறுத்தல் என்று கூறியது.

இப்போது, ஆசிய அமெரிக்கர்களுக்கு எதிரான இனவெறி வன்முறையின் எழுச்சி சீனாவுடனான அமெரிக்க மோதலின் பெரும் விரிவாக்கத்துடன் இணைந்துபோகிறது.

வெள்ளிக்கிழமை அலாஸ்காவின் ஏங்கரேஜில் சீன அதிகாரிகளுடனான சந்திப்பில், அமெரிக்க வெளியுறவுத்துறை செயலர் அந்தோனி பிளிங்கன் சீனாவை கடுமையாக கண்டனம் செய்தார். குடியரசுக் கட்சியின் பிரதிநிதி ரோயின் வார்த்தைகளை எதிரொலித்தது, சீனா அமெரிக்காவிற்கு எதிராக சைபர் தாக்குதல்களை நடத்தியதாகவும் அதன் "பொருளாதார அச்சுறுத்தலுக்காகவும்" குற்றம் சாட்டினார்.

கடந்த மாதம் ஒரு உரையில், பிளிங்கன் சீனாவை அமெரிக்காவின் மத்திய எதிரியாக அடையாளம் காட்டினார். அமெரிக்காவை "சவால்" செய்யும் "பொருளாதார, இராஜதந்திர, இராணுவ மற்றும் தொழில்நுட்ப சக்தி" கொண்ட ஒரே நாடு சீனா என்று அறிவித்தார்.

சீனாவை அரக்கர்களாக்க ட்ரம்ப் மற்றும் பைடென் நிர்வாகங்கள் மேற்கொண்ட முயற்சிகள் மக்களின் பொது நனவில் ஒரு மோசமான விளைவை ஏற்படுத்தியுள்ளன. கடந்த மாதம் நடத்தப்பட்ட ஒரு பியூ ஆராய்ச்சி கருத்துக் கணிப்பின்படி, 10 அமெரிக்கர்களில் ஒன்பது பேர் இப்போது சீனாவை ஒரு கூட்டாளியாக இல்லாமல் ஒரு போட்டியாளராகவோ அல்லது எதிரியாகவோ பார்க்கிறார்கள். பதிலளித்தவர்களில் மூன்றில் இரண்டு பங்கு பெய்ஜிங்கைப் பற்றி "குளிர் உணர்வுகளை" கொண்டுள்ளதாகவும் தெரிவித்தனர். இது இரண்டு ஆண்டுகளுக்கு முன்பு 46 சதவீதமாக இருந்தது.

"குடியரசுக் கட்சி மற்றும் ஜனநாயக நிர்வாகங்கள் இரண்டும் உறவை மூலோபாய போட்டியாக வடிவமைத்து, சீனா ஏராளமான அச்சுறுத்தல்களை முன்வைப்பதாக மேம்படுத்திக் காட்டியுள்ளன. அதிகமான அமெரிக்கர்கள்… சீனாவைப் பற்றி சாதகமற்ற பார்வையைக் கொண்டிருப்பதில் ஆச்சரியமில்லை" என்று மூலோபாய மற்றும் சர்வதேச ஆய்வுகளுக்கான சீனாவின் மின்சக்தி திட்டத்தின் இயக்குனர் போனி கிளாசர் குறிப்பிட்டார்.

தேசியவாதம் மற்றும் பேரினவாதத்தை ஊக்குவிப்பதன் மைய நோக்கம் வெளிப்புற எதிரியை பலிகடாவாக்க முயற்சிப்பதன் மூலம் உள்நாட்டின் சமூக விரோதங்களை வெளிப்புறமாக திசை திருப்புவதாகும்.

அமெரிக்க தொழிலாள வர்க்கம் ஆசிய அமெரிக்கர்களின் பாதுகாப்பிற்கு முன்வர வேண்டும். அவர்கள் தொற்றுநோய்க்கு பதிலளிக்கும் விதமாக "சமூகநோய் எதிர்ப்பு சக்தி பெருக்கம்" என்ற அதன் கொலைகாரக் கொள்கையை பின்பற்ற தொழிலாள வர்க்கத்தை பிளவுபடுத்துவதற்கான உந்துதலின் ஒரு பகுதியாக ஆளும் வர்க்கத்தினால் இழிவுபடுத்தப்படுகிறார்கள்.

கோவிட்-19 தொற்றுநோயின் பிடியில் உலகம் நிலைத்திருந்தாலும், அமெரிக்காவும் அதன் நட்பு நாடுகளும் தங்கள் முயற்சிகளை வைரஸை ஒழிப்பதில் அல்லாது, போருக்குத் தயாராகி வருவதற்கு பயன்படுத்துகின்றன. பென்டகன் சமீபத்தில் அதன் இந்தோ-பசிபிக் கட்டளையகத்திற்கான நிதியை இரட்டிப்பாக்கக் கோரியது. அதே நேரத்தில் இங்கிலாந்தின் ஜான்சன் நிர்வாகம் பிரிட்டனில் அணு ஆயுதங்களின் எண்ணிக்கையை 40 சதவீதம் அதிகரிக்க திட்டமிட்டுள்ளது.

கோவிட்-19 ஐ ஒழிப்பதற்கான போராட்டத்தை போர், இனவாதம் மற்றும் இனவெறி ஆகியவற்றிற்கான எதிர்ப்பிலிருந்து பிரிக்க முடியாது. அமெரிக்கத் தொழிலாளர்களின் எதிரிகள் அவர்களின் சீன சகோதர சகோதரிகள் அல்ல, மாறாக உலகெங்கிலும் உள்ள மில்லியன் கணக்கான மக்களின் இறப்பிலிருந்து இலாபம் பெறும் தன்னலக்குழுக்களாகும். முதலாளித்துவ தன்னலக்குழுவின் பேராசை, அறியாமை மற்றும் குற்றத்தன்மையினால் உருவாகிய தொற்றுநோய்க்கு சீனா மற்றும் ஆசிய அமெரிக்கர்களைக் குறை கூறும் அனைத்து முயற்சிகளும் அவமதிப்புடன் நிராகரிக்கப்பட வேண்டும்.