மொழிபெயர்ப்பின் மூலக் கட்டுரையை இங்கே காணலாம்

பாதிக்கப்பட்ட இலண்டன் பஸ் சாரதி டேவிட் ஓ'சுல்லிவனின் சட்ட நடவடிக்கைகளுக்கான நிதிதிரட்டல் 11 நாட்கள் இருக்கையில் அதன் முதல் இலக்கான 10,000 பவுண்டுகளை எட்டியுள்ளது. இந்த நிதிதிரட்டல் அழைப்பு, பஸ் நிறுவனமான மெட்ரோலைனுக்கு எதிராக, நியாயமற்ற முறையில் பணிநீக்கம் செய்யப்பட்டதற்கான சட்டபூர்வ உரிமைகோரலுக்கு நிதியளிக்கும். கொரோனா வைரஸ் தொற்றுநோய்களின் போது பாதுகாப்பான பணியிடத்திற்கான தனது சக ஊழியர்களின் உரிமைகளைப் பாதுகாத்த பின்னர் ஓ'சுல்லிவன் பிப்ரவரி மாதம் பதவிநீக்கப்பட்டார்.

ஓ'சுல்லிவனின் மீண்டும் பதவியிலிருத்துவதற்கான சட்ட நடவடிக்கைகளுக்கான நிதிதிரட்டல் வேண்டுகோள் மே 16 அன்று தொடங்கப்பட்டது. அயர்லாந்து, ஜேர்மனி, ஆஸ்திரேலியா மற்றும் பிரிட்டனில் இருந்து நேற்று புதிய நன்கொடைகளுக்குப் பின்னர் இது, 10,031 பவுண்டுகளை எட்டியது. 20 நாட்களில், 150 நன்கொடையாளர்கள் தலா 69 பவுண்டுகள் சராசரியாக பங்களித்தனர். ஓ'சுல்லிவன் வேலைவாய்ப்பு தீர்ப்பாயத்தில் தனது வழக்கு செலவுக்கு நிதியளிக்க 20,000 பவுண்டுகள் திரட்ட வேண்டும். விசாரணைக்கான திகதி இன்னும் அறிவிக்கப்படவில்லை.

ஓ'சுல்லிவன் நேற்று சட்ட நடவடிக்கைகளுக்கான நிதிதிரட்டல் பக்கத்தில் ஆதரவாளர்களுக்கு ஒரு நன்றி செய்தியை வெளியிட்டு, தாராளமாக ஆதரவளித்ததற்கு நன்கொடையாளர்களுக்கு நன்றி தெரிவித்தார். பிரிட்டன், நோர்வே, ஜேர்மனி மற்றும் ஆஸ்திரேலியாவில் உள்ள பேருந்து மற்றும் போக்குவரத்து ஊழியர்களிடமிருந்து கடந்த வாரம் பெறப்பட்ட ஆதரவு அறிக்கைகளுடன் அவரது செய்தி கீழே வெளியிடப்பட்டுள்ளது.

டேவிட் ஓ’சுல்லிவனின் அறிக்கை:

திட்டமிட்டதற்கு 11 நாட்கள் முன்னதாக எங்கள் முதல் 10,000 பவுண்டுகள் இலக்கை எட்டியுள்ளோம். இது ஒரு அருமையான சாதனையாகும்.

எனது ஆதரவாளர்கள் ஒவ்வொருவருக்கும் நான் நன்றி சொல்ல விரும்புகிறேன். உங்கள் நன்கொடைகள் பெரியதாகவோ சிறியதாகவோ இருந்தாலும் பெரிய மாற்றத்தை ஏற்படுத்தியுள்ளன.

இந்த பிரச்சாரம் ஓட்டுனர்களின் சொந்த அனுபவங்களுடனும், எல்லா இடங்களிலும் உள்ள முக்கிய தொழிலாளர்களின் அனுபவங்களுடனும் பல வழிகளில் இணைக்கப்பட்டுள்ளது. ஒரு அரசியல் போராட்டத்திற்கு தொழிலாள வர்க்கத்தின் மத்தியில் ஒரு தாகம் இருப்பது தெளிவாகிறது.

கடந்த வாரம் பாராளுமன்ற சுகாதார மற்றும் விஞ்ஞானக் குழுவில் டொமினிக் கம்மிங்ஸின் வெளிப்படுத்தல்கள் ஜோன்சன் அரசாங்கம் ஒரு "சமூக நோய் எதிர்ப்பு சக்தி பெருக்கும்" மூலோபாயத்தை பின்பற்றியது என்பதை நிரூபித்தது. எந்தவொரு தீவிரமான வைரஸ் ஒழிப்பு நடவடிக்கைகளையும் அரசாங்கம் எடுக்காமல் தொற்றுநோய் பரவ அனுமதிக்கப்பட்டது. இந்த குற்றவியல் கொள்கையை தொழிற் கட்சி மற்றும் தொழிற்சங்கங்கள் ஆதரித்தன. எனது நிலைமை காட்டுவது போல், தொழிலாளர்கள் பாதுகாப்பற்ற நிலையில் விடப்பட்டனர்.

British Medical Journal இன் வார்த்தைகளில், ஆரோக்கியத்திற்கு மேலாக இலாபங்களுக்கு முன்னுரிமை அளிப்பதும், விஞ்ஞான ஆலோசனையை அடக்குவதும் 150,000 க்கும் அதிகமான மக்களின் இறப்புகள் உட்பட “தவிர்க்கக்கூடிய தீங்கு விளைவிப்பில்” சென்றுமுடிந்தது. அமெரிக்கா மற்றும் இந்தியா முதல் பிரேசில், பிரான்ஸ் மற்றும் ஜேர்மனி வரை உலகெங்கிலும் உள்ள அரசாங்கங்களால் இதே நிகழ்ச்சி நிரலே பின்பற்றப்பட்டுள்ளது.

எனது பிரச்சாரத்தில் எழுப்பப்பட்ட பிரச்சினைகள் உலகெங்கிலும் உள்ள உழைக்கும் மக்கள் எதிர்கொள்ளும் உலகளாவியவை. உலகளவில் அதிகரித்தளவில் தொழிலாளர்களால் படிக்கப்படும் உலக சோசலிச வலைத் தளம் வழியாகவே சட்ட நடவடிக்கைகளுக்கான தளத்திற்கு நன்கொடையாளர் உதவி வழங்கியுள்ளார்கள் என்பதை மிகப்பெரிய ஆதாரம் எடுத்துக்காட்டுகின்றது.

WSWS அவர்களின் ஆதரவிற்காகவும், இங்கிலாந்து, ஐரோப்பா மற்றும் சர்வதேச அளவில் உள்ள தொழிலாளர்களின் கவனத்திற்கு எனது வழக்கைக் கொண்டுவந்ததற்காக பகிரங்கமாக நன்றி தெரிவிக்க விரும்புகிறேன். சட்ட நடவடிக்கைகளுக்கான குழுவினரின் அனைத்து உதவிகளுக்கும் நான் நன்றி கூற விரும்புகிறேன்.

இந்த முதல் 10,000 பவுண்டுகள் Leigh Day இன் எனது வழக்கறிஞர்கள் எனது நியாயமற்ற தள்ளுபடி வழக்கைத் தயாரிக்க தொடங்க அனுமதிக்கும். விசாரணையில் ஒரு பாரிஸ்டரை பிரதிநிதித்துவத்துவப்படுத்த அழைப்பதற்கு நிதியளிக்க எங்கள் நீட்டித்த இலக்கான 20,000 பவுண்டுகள் தேவைப்படுகிறது. விசாரணை பல நாட்களுக்கு நடைபெற வாய்ப்புள்ளது. தயவு செய்து நன்கொடை அளிக்கவும். இது தொடர்பான தகவல்களை அவ்வப்போது அனைவருக்கும் தெரிவித்துக்கொள்வேன்.

ஒரு பொது பிரச்சாரம் அதிகரித்து வரும் ஆதரவைப் பெறுவது இதுவே முதல் படியாகும். கடந்த பதினைந்து நாட்களில் லண்டன், லீட்ஸ், ஷெஃபீல்ட் மற்றும் மான்செஸ்டரில் உள்ள பஸ் ஓட்டுனர்கள் மற்றும் அயர்லாந்து, பிரான்ஸ், ஜேர்மனி, போலந்து, ஆஸ்திரேலியா, நியூசிலாந்து, அமெரிக்கா, கனடா மற்றும் இந்தியா ஆகிய நாடுகளைச் சேர்ந்த போக்குவரத்துத் தொழிலாளர்கள், ஆசிரியர்கள், தபால் ஊழியர்கள், சுரங்கத் தொழிலாளர்கள் மற்றும் தகவல் தொழில்நுட்பத் தொழிலாளர்கள் ஆகியோரிடமிருந்து எனக்கு செய்திகள் வந்துள்ளன.

கோவிட்-19 இன் மிகவும் தொற்றக்கூடிய மாறுபாடான டெல்டா அதிகரித்து வருவதால், நோய்த்தொற்றுகள் மற்றும் மருத்துவமனை சேர்க்கைகளில் ஆபத்தான அதிகரிப்பு காணப்படுவதால், தொற்றுநோய்களின் போது பாதுகாப்பான பணியிடத்திற்கான முக்கிய தொழிலாளர்களின் உரிமைகளுக்கான இந்த பரிசோதனையான சட்ட வழக்கு மிகவும் அத்தியாவசியமானதாக உள்ளது. மீண்டும் ஒரு முறை நன்றி, தயவுசெய்து இந்த போராட்டத்தை ஆதரிக்க, உங்களால் முடிந்த அனைத்தையும் செய்யுங்கள்.

சட்ட நடவடிக்கைகளுக்கான குழுவிடம் நன்கொடையாளர்கள் விட்டுச்சென்ற ஓ'சுல்லிவனுக்கான செய்திகள், தொழிலாளர்களை பாதுகாப்பதில் உணர்வின் ஆழத்தைக் காட்டுகின்றன. "நீங்கள் விரும்பினால் உங்கள் வெற்றிகளையும் உங்கள் வேலையையும் திரும்பப் பெற வாழ்த்துகிறேன்". "தவறான பணிநீக்கம், மன அழுத்தம் மற்றும் வருவாய் இழப்பு ஆகியவற்றிற்கு உங்களுக்கு இழப்பீடு தேவை. முதலாளி உங்கள் செலவுகளைச் செலுத்தி, சட்டத்தை மீறியதற்காக உங்களுக்கும் உங்கள் பணித் தோழர்களுக்கும் கடுமையான நோய் மற்றும் இறப்பு அபாயத்தை ஏற்படுத்தியதற்காக பொதுவில் மன்னிப்பு கேட்க வேண்டும்” என ஜோன் எழுதினார்.

மற்றொரு நன்கொடையாளர் எழுதினார், “டேவிட், நீங்கள் ஒரு உத்வேகமானவர். நீங்கள் பஸ் ஓட்டுனர்களுக்களின் உரிமைக்காக எழுந்து நின்றீர்கள். தொழிற்சங்கத்தின் உதவியுடன் முதலாளிகள் உங்கள் மீது தாக்குதல் நடாத்தினார்கள் என்று தெரிகிறது. அவர்களுக்கு வெட்கம். நீங்கள் வெல்வீர்கள் என்று நான் நம்புகிறேன்.”

கரோஷ் எழுதினார், "கனடா முழுவதிலுமுள்ள சாமானிய தொழிலாளர் சங்க உறுப்பினர்களைப் பிரதிநிதித்துவப்படுத்தும் ஒரு சட்ட வல்லுநராக, பேரழிவு தரும் உலகளாவிய தொற்றுநோய்களின் போது முதலாளித்துவ பேராசைக்கு முகங்கொடுக்கும் தொழிலாளர் நீதி மற்றும் தொழிலாளர் பாதுகாப்பிற்கான உங்கள் போராட்டத்திற்கு ஒற்றுமையுடன் எனது உறுதிமொழியை ஏற்றுக்கொள்ளுங்கள்." அத்துடன் இதையும் இணைத்துக்கொள்ளுங்கள் "பாதிக்கப்பட்டவர்களுக்கு எதிராக, கோவிட் பாதிக்கப்பட்ட பணியிடங்களுக்கு எதிராக, உடல்நலம் மற்றும் பாதுகாப்பிற்காக முதலில் மற்றும் பணியிடத்தில் ஜனநாயக உரிமைகள்” பாதுகாக்கப்படவேண்டும்.

உலக சோசலிச வலைத் தளம் இங்கிலாந்து மற்றும் சர்வதேச அளவில் பஸ் மற்றும் போக்குவரத்து தொழிலாளர்களிடமிருந்தும் கருத்துகளைப் பெற்றுள்ளது. அவற்றின் ஒரு தேர்வு கீழே சேர்க்கப்பட்டுள்ளது:

பஸ் ஓட்டுனர், பாட்டர்ஸியா திருத்துமிடம், லண்டன்:

டேவிட்டிற்கு நடந்தது நியாயமற்றது. கோவிட் இனால் நாங்கள் நிறைய ஓட்டுனர்களை இழந்த பின்னர் அவர் ஓட்டுனர்களின் உயிரைக் காப்பாற்ற முயன்றார். நிறுவனம் பாதுகாப்பை மேம்படுத்த வேண்டும் என்று டேவிட் விரும்பினார். அவரை பதவிநீக்குவதற்குப் பதிலாக, அவரிடம் இருந்த பாதுகாப்புக் கவலைகளை அவர்கள் கவனித்து உரையாற்றியிருக்க வேண்டும். இது நிறைய நிறுவனங்களில் நடந்துள்ளது மற்றும் அனைத்து ஓட்டுனர்களும் பயந்தனர். பாட்டர்ஸியாவில், கோவிட் இனால் பலர் பாதிக்கப்பட்டனர்.

எங்களிடம் இப்போது நுரையீரல் சேதமடைந்ததால் இன்னும் மருந்துவ கவனிப்பில் உள்ள ஒரு ஓட்டுனர் இருக்கிறார். கோவிட்டினால் நிக்கு என்ற ஒரு ஓட்டுனரை இழந்தோம். கோவிட்டினால் ஒரு பொறியியலாளரும் இறந்தார். ஆனால் அவர் வேலையில் தொற்றுக்குள்ளாகவில்லை என்று நிறுவனம் கூறியது. ஆரம்பத்தில் நிறுவனம் மூடிமறைத்துக்கொண்டிருந்தது. என்ன நடக்கிறது என்பதை மற்ற ஓட்டுனர்கள் தெரிந்து கொள்ளவதை அவர்கள் விரும்பவில்லை. ஓட்டுநர்கள் வேலைக்கு வர வேண்டும் என்று அவர்கள் விரும்பினர். பணம் சம்பாதிப்பதே அவர்களின் ஒரே கவலை. கோவிட் தரிப்பிடத்தில் பரவுவதை மறுத்த பின்னர், சில மேலாளர்கள் கோவிட் தொற்றுக்குள்ளானார்கள்.

பஸ் நிறுவனங்கள் இப்போது இயல்பு நிலைக்குச் செல்கின்றன, ஆனால் வைரஸ் இன்னும் உள்ளது. சமூக இடைவெளி மற்றும் முகக்கவசங்கள் இருக்க வேண்டும். ஆனால் பயணிகளின் மீதான வரம்புகள் நீக்கப்பட்டு, அவை பயணிகளை ஓட்டுநரின் பின்னால் அமர அனுமதிக்கின்றன. இது நல்லதல்ல. தொழிற்சங்கம் எதுவும் செய்யவில்லை. தொழிற்சங்க பிரதிநிதிகள் திரும்பி வாகனம் ஓட்டுமாறு எங்களுக்கு கூறகின்றனர். Unite தொழிற்சங்கம் எங்களை கலந்தாலோசிக்கவில்லை அல்லது TfL [லண்டனுக்கான போக்குவரத்து] ஐ கேள்வி கேட்கவில்லை. அவர்கள் எங்களைப் பற்றி கவலைப்படுவதில்லை. டேவிட் செய்தது சரியானது என்று நான் நினைக்கிறேன்-அது நம் அனைவருக்குமாக செய்யப்பட்டது. எங்களுக்கு பாதுகாப்பு தேவை, இந்த போராட்டம் முடிந்துவிடவில்லை.”

ரொம், டிராம் ஓட்டுனர், முனிச், ஜேர்மனி:

உங்களின் மீள்வேலையிலிருத்துவதற்கான போராட்டத்தை நான் முழுமையாக ஆதரிக்கிறேன்! தன்னையும், சக ஊழியர்களையும், குடும்பத்தினரையும் பாதுகாக்க, பாதுகாப்பான வேலை நிலைமைகளுக்காக எழுந்து நின்றதற்காக ஒரு தொழிலாளி பணிநீக்கம் செய்யப்படுவது குற்றமாகும். உங்களுக்கு என்ன நடந்தது என்பது தொழிற்சங்கங்களின் உண்மையான முகத்தைக் காட்டுகிறது. முனிச்சிலும், கொரோனா வைரஸிலிருந்து ஓட்டுநர்களைப் பாதுகாக்க தொழிற்சங்கங்கள் எதுவும் செய்யவில்லை. செயல்பாடுகள் சீராக இயங்குகின்றன என்பதையும், பேருந்துகளின் முன் கதவுகள் தடையின்றி பயன்படுத்தப்படலாம் என்பதையும் பற்றி மட்டுமே அவர்கள் கவலைப்படுகிறார்கள். அதனால்தான், தொழிலாளர்கள் நாங்கள் சர்வதேச மற்றும் சுயாதீனமாக ஒன்றிணைந்து ஒரு சோசலிச வேலைத்திட்டத்தில் நம்மை அடித்தளமாகக் கொண்டிருப்பது மிகவும் முக்கியமானது. உங்கள் போராட்டத்தில் ஒவ்வொரு வெற்றிகளையும் நான் விரும்புகிறேன், உலகளாவிய தொழிலாளர்களின் ஆதரவுடன் நீங்கள் வெற்றி பெறுவீர்கள் என்று நான் நம்புகிறேன்.

புளோரியான், பஸ் திருத்துனர், நோர்வே:

இங்கே ஒரு அனுபவமிக்க தொழிலாளி தனது சக ஊழியர்கள், பயணிகள் மற்றும் குடும்பத்தினருக்கான பொறுப்பு, தைரியம் மற்றும் விவேகமான செயலைக் காட்டுகின்றார். இதற்கெல்லாம் பணத்தை பெறும் ஒரு நிர்வாகம் அவரை பதவி நீக்கம் செய்வதன் மூலம் தங்களை பொறுப்பற்ற காட்டிக்கொடுப்பாளர்களாக நிரூபிக்கின்றது. ஒழுக்கமான தொழிலாளர்கள் அத்தகைய நிர்வாகத்திற்காக வேலை செய்யமாட்டார்கள்.

ரெபேக்கா, பஸ் ஓட்டுனர், டவுன்ஸ்வில், ஆஸ்திரேலியா:

குயின்ஸ்லாந்து ஓட்டுநர்கள், Unite தொழிற்சங்கத்தின் ஆதரவுடன் மெட்ரோலைன் போக்குவரத்தால் பணிநீக்கம் செய்யப்பட்ட லண்டன் பஸ் ஓட்டுனர் டேவிட் ஓ’சுல்லிவனுடன் ஒற்றுமையுடன் நிற்கிறார்கள். ஏற்கனவே 45 லண்டன் ஓட்டுனர்களைக் கொன்ற கோவிட்-19 இலிருந்து ஓட்டுனர்களை பாதுகாப்பாக வைத்திருக்க முயற்சிப்பதில் டேவிட் மேற்கொண்ட நடவடிக்கைகளை குயின்ஸ்லாந்து ஓட்டுநர்கள் ஆதரிக்கின்றனர். ஓட்டுநர்கள் மற்றும் பயணிகளைப் பாதுகாக்கும் அனைத்து சுகாதார மற்றும் பாதுகாப்பு முயற்சிகளையும் நாங்கள் ஆதரிக்கிறோம். பெரும்பாலான தொழிற்சங்கத் தலைவர்கள் முதலாளிகளுடன் ஒன்றாக இருந்து தொழிலாளர்களை மீண்டும் மீண்டும் விற்பதை ஓட்டுநர்கள் அறிந்துகொள்ள வேண்டும். அறிவார்ந்த ஓட்டுநர்கள் எங்கள் நிலையங்களிலும் மற்றும் உலகெங்கிலும் உள்ள பிற தொழிலாளர்களுடன் ஒற்றுமையுடன் செயல்படும் சாமானிய தொழிலாளர்களின் அடிமட்ட அமைப்புகளை ஆதரிக்கின்றனர். டேவிட் ஓ'சுல்லிவனை இப்போது மீண்டும் வேலையில் இருத்துங்கள்.

பாட்ரிக், இரயில் போக்குவரத்து தொழிலாளி, நியூ சவுத் வேல்ஸ், ஆஸ்திரேலியா:

டேவிட் ஓ’சுல்லிவனை மெட்ரோலைன் பழிவாங்குவதை நான் முழுமையாக எதிர்க்கிறேன். அவரை மீண்டும் பணியில் அமர்த்துமாறு அழைக்கிறேன். இது பாதுகாப்பற்ற பணியிடத்தில் ஒரு நிலைப்பாட்டை எடுத்த தைரியமான தொழிலாளிக்கு எதிராக ஒரு உதாரணத்தை உருவாக்கும் ஒரு முதலாளிகளின் அப்பட்டமான வழக்காகும். டேவிட்டின் பதவி நீக்கம் என்பது மற்ற தொழிலாளர்களுக்கு பாதுகாப்பு பிரச்சினைகளைப் பற்றி பேசக்கூடாது, நிறுவனத்தின் இலாபத்திலிருந்து எதையும் பெறக்கூடாது என்பதற்கான எச்சரிக்கையாகும். எங்கள் தொழிற்துறையில் பாதுகாப்பு என்பது முதலிடம் என்று பெரும்பாலும் கூறப்படுகிறது. ஆனால் சிக்கல்கள் புகாரளிக்கப்பட்டால், அவை பெரும்பாலும் அதிக நேரம் செலவழிக்கப்படும் என்றால், அவை முடிந்தவரை புறக்கணிக்கப்படும். உண்மை என்னவென்றால், இலாபமே முதலிடம். மற்றும் டேவிட் நிலைமை இதை நிரூபிக்கிறது.

மெட்ரோலைனில் தொழிலாளர்கள் மத்தியில் 301 நோய்த்தொற்றுகள் மற்றும் 12 இறப்புகள் இருந்தன. இது தொற்றுநோய்களின் எண்ணிக்கையை மறைத்து வைத்திருந்தது, ஏனெனில் என்ன நடக்கிறது என்பதை தொழிலாளர்கள் புரிந்து கொண்டால், அவர்கள் வேலை செய்ய மறுப்பார்கள். நான் பணிபுரியும் நிலை இதுதான் என்று எனக்குத் தெரிந்தால், அந்த சூழ்நிலையில் வேலை செய்ய நான் முற்றிலும் மறுப்பேன்.

இது ஒரு பாதுகாப்பான பணியிடத்திற்கான அடிப்படை உரிமையைப் பற்றியது, இந்த பிரச்சினையில் தொழிலாளர்கள் ஒன்றாக நிற்காவிட்டால் அது இருக்காது. இந்த தாக்குதலை உலக போக்குவரத்து தொழிலாளர்கள் நிராகரிக்க வேண்டும். இது நம் அனைவருக்கும் எதிரான தாக்குதலாகும்."

மேலும் அறிய இங்கே சென்று டேவிட் ஓ'சுல்லிவனின் மீள்வேலையிலிருத்தலுக்கான பிரச்சாரத்தில் சேரவும். ஓ'சுல்லிவனின் சட்டபூர்வ பாதுகாப்புக்கு நீங்கள் இங்கே நன்கொடை அளிக்கலாம்