இந்த மொழிபெயர்ப்பின் மூலக் கட்டுரையை இங்கு காணலாம்.

ஈரானுக்கு எதிரான தனது ஆக்கிரமிப்புப் போரில் இரண்டு வார கால போர் நிறுத்தம் முடிவடைவதற்கு சில மணி நேரங்களுக்கு முன்பு, அமெரிக்க ஜனாதிபதி டொனால்ட் ட்ரம்ப், இந்தப் போர் இடைநிறுத்தத்தை காலவரையின்றி நீட்டிப்பதாக அறிவித்தார்.

சமூக ஊடகங்களில் அவரது அறிக்கை பின்வருமாறு:

எதிர்பாராத விதமாகவே, ஈரான் அரசாங்கம் கடுமையாகப் பிளவுபட்டுள்ளது என்பதாலும், ஃபீல்ட் மார்ஷல் ஆசிம் முனீர் மற்றும் பாகிஸ்தான் பிரதமர் ஷெபாஸ் ஷெரீப்பின் வேண்டுகோளின் பேரிலும், ஈரான் தலைவர்களும் பிரதிநிதிகளும் ஒரு ஒருங்கிணைந்த முன்மொழிவை முன்வைக்கும் வரை, அந்நாட்டின் மீதான நமது தாக்குதலை நிறுத்தி வைக்குமாறு கேட்டுக் கொள்ளப்பட்டுள்ளோம். எனவே, நமது இராணுவம் இந்த முற்றுகையைத் தொடரவும், மற்ற எல்லா வகையிலும் தயாராகவும் திறனுடனும் இருக்கவும் நான் உத்தரவிட்டுள்ளேன். ஆகையால், அவர்களின் முன்மொழிவு சமர்ப்பிக்கப்பட்டு, ஏதாவதொரு வகையில் பேச்சுவார்த்தைகள் ஒரு முடிவுக்கு வரும் வரை, இந்தப் போர் நிறுத்தத்தை நீட்டிப்பேன்.

பேச்சுவார்த்தைகளுக்கு அவகாசம் அளிப்பதற்காகவே இந்த நீட்டிப்பு என்று ட்ரம்ப் கூறியபோதிலும், பெப்ரவரி 28 அன்று அயதுல்லா அலி கமேனி மற்றும் டஜன் கணக்கான உயர்மட்ட உதவியாளர்கள், குடும்ப உறுப்பினர்கள் கொல்லப்பட்ட தாக்குதல்களைத் தொடர்ந்து, ஆட்சியைக் கவிழ்ப்பதற்கான அமெரிக்காவின் இரண்டாவது முயற்சிக்கு இந்த இடைநிறுத்தம் ஒரு மூடுதிரையாக மட்டுமே இருக்கலாம் என்று ஈரானிய அதிகாரிகள் எச்சரித்தனர்.

இந்த முடிவு வெள்ளை மாளிகையின் திடீர் நிலைமாற்றமாக வந்தது. செவ்வாய்க்கிழமை முழுவதும் சமூக ஊடகங்களில், போர் நிறுத்தம் நீட்டிக்கப்படாது என்றும், செவ்வாய்க்கிழமை இரவிலேயே ஈரான் மீதான அமெரிக்க குண்டுவீச்சு மீண்டும் தொடங்கும் என்றும், அமெரிக்க இராணுவம் 'தாக்குதலுக்குத் தயாராக உள்ளது' என்றும் ட்ரம்ப் அறிவிப்புகளை வெளியிட்டு வந்தார்.

இந்த போர் நிறுத்த நீட்டிப்புடன், சர்வதேச சட்டத்தை முழுமையாக மீறி, ஈரானுக்கு உள்ளேயும் வெளியேயும் செல்லும் கப்பல்களை அமெரிக்க கடற்படை தொடர்ந்து குறுக்கே மறிக்கும். சமீபத்திய கடற்கொள்ளை நடவடிக்கையாக, தென்கிழக்கு ஆசியாவின் சர்வதேச கடல் பகுதியில் செவ்வாய்க்கிழமை அன்று அமெரிக்க கடற்படையினர் ஒரு ஈரானிய எண்ணெய் கப்பலைக் கைப்பற்றினர்.

'அவர்களின் முன்மொழிவு சமர்ப்பிக்கப்பட்டு, பேச்சுவார்த்தைகள் ஏதோ ஒரு வழியில் முடிவடையும் வரை' போர் நிறுத்தம் தொடரும் என்று அறிவிக்கையில், போர் நிறுத்தத்திற்கு முன்னதாக, ஈரானில் உள்ள ஒவ்வொரு பாலத்தையும் மின் நிலையத்தையும் குண்டு வீசித் தாக்கி, ஈரானின் நாகரீகத்தையே அழித்துவிடுவதாகவும் கூட அச்சுறுத்தி, ட்ரம்ப் பேசிய இனப்படுகொலை மொழியிலான கருத்துக்களை அவர் நினைவுகூர்ந்தார்.

அனைத்துப் பிரச்சினைகளிலும் முழுமையாகச் சரணடைவது மற்றும் ஈரானை ஒரு அமெரிக்க அரை-காலனியாக மாற்றுவது போன்ற கோரிக்கைகளை ஈரான் நிராகரித்ததால், ஒரே நாளில் முறிந்துபோன ஈரானுடனான பேச்சுவார்த்தைகளை மீண்டும் தொடங்குவதற்காக, அமெரிக்கத் துணை ஜனாதிபதி ஜே.டி. வான்ஸ் செவ்வாய்க்கிழமை பாகிஸ்தானுக்குப் பயணம் செய்யத் திட்டமிட்டிருந்தார். இந்த கோரிக்கைகளில், கடந்த கோடையில் நடந்த முந்தைய அமெரிக்க-இஸ்ரேலிய குண்டுவீச்சுத் தாக்குதலில் பெருமளவில் புதைக்கப்பட்ட ஈரானின் அணு எரிபொருள் கையிருப்பின் மீது அமெரிக்காவின் நேரடிக் கட்டுப்பாடும் அடங்கும்.

இருப்பினும், அமெரிக்கா ஹோர்முஸ் நீரிணை மீதான தனது முற்றுகையை நிறுத்தும் வரை பாகிஸ்தானில் பேச்சுவார்த்தைகளை மீண்டும் தொடங்கத் தயாராக இல்லை என்று ஈரானிய அதிகாரிகள் தெளிவுபடுத்தினர்.

பாகிஸ்தானின் வேண்டுகோளின் பேரில் ஒருதலைப்பட்சமாகப் போர்நிறுத்தத்தை நீட்டித்ததாக ட்ரம்ப் கூறுவது ஒரு அப்பட்டமான பொய்யாகும். இது, தெஹ்ரான் எச்சரித்தபடி, ஈரானியத் தலைமை மீது மற்றொரு முழு அளவிலான வான்வழித் தாக்குதலுக்கான சாத்தியமான தயாரிப்புகளையும், நவீன அமெரிக்க ஆயுதங்களின் கையிருப்பை மீண்டும் கட்டியெழுப்ப வேண்டிய தேவையையும் மூடிமறைக்கும் நோக்கம் கொண்டதாகும்.

செவ்வாயன்று சிஎன்என் வெளியிட்ட ஒரு செய்தியின்படி:

ஈரானுடனான போரின்போது அமெரிக்க இராணுவத்தின் பிரதான ஏவுகணைகளின் இருப்பு கணிசமாகக் குறைத்துள்ளதால், அடுத்த சில ஆண்டுகளில் எதிர்காலத்தில் ஒரு மோதல் ஏற்பட்டால், வெடிபொருட்கள் தீர்ந்துபோகக்கூடிய 'அண்மைக்கால அபாயம்' உருவாகியுள்ளது என நிபுணர்களும், பாதுகாப்புத் துறையின் சமீபத்திய உள் இருப்பு மதிப்பீடுகள் குறித்து அறிந்த மூன்று நபர்களும் கூறுகின்றனர்.

மூலோபாயம் மற்றும் சர்வதேச கற்கைகளுக்கான மையம் (Center for Strategic and International Studies) நடத்திய, பல்வேறு ஆயுதங்கள் பற்றிய புள்ளிவிவரங்களை வழங்கிய ஒரு பகுப்பாய்வை சிஎன்என் மேற்கோள் காட்டியது: 45 சதவீத துல்லியத் தாக்குதல் ஏவுகணைகள், குறைந்த பட்சம் 50 சதவீத பாலிஸ்டிக் ஏவுகணைகளை இடைமறிக்கும் தாட் (THAAD) ஏவுகணைகள், கிட்டத்தட்ட 50 சதவீத பேட்ரியாட் (Patriot) வான் பாதுகாப்பு இடைமறிப்பு ஏவுகணைகள், 30 சதவீத டோமஹாக் (Tomahawk) ஏவுகணைகள் மற்றும் 20 சதவீத எஸ்எம்-3 (SM-3), எஸ்எம்-6 (SM-6) மற்றும் கூட்டு வான்-தரை தொலைதூர ஏவுகணைகள்.

ஈரானுக்கு எதிரான ஒருதலைப்பட்சமான போரை மீண்டும் தொடங்குவதற்குப் போதுமான பொருட்கள் கையிருப்பில் இருந்தாலும்,

சீனா போன்ற ஒரு சமமான எதிரியை எதிர்கொள்வதற்கு, அமெரிக்கக் கையிருப்பில் உள்ள முக்கிய ஆயுதங்களின் எண்ணிக்கை இனி போதுமானதாக இல்லை என்றும், போருக்கு முன்னர் இருந்த எண்ணிக்கையை உற்பத்தி செய்ய பல ஆண்டுகள் ஆகும் என்றும் CSIS பகுப்பாய்வு முடிவு செய்கிறது.

பென்டகன் அமெரிக்க ஆயுத உற்பத்தியாளர்களுக்கு அவசர வேண்டுகோள் விடுத்துள்ள போதிலும், ஒரு பெரிய போருக்காகக் கையிருப்பை மீண்டும் நிரப்புவதற்குப் பல ஆண்டுகள் ஆகலாம். பெயர் குறிப்பிடப்படாத பென்டகன் மற்றும் இராணுவ அதிகாரிகள், அத்துடன் முன்னாள் சிஐஏ முகவரும் பென்டகன் அதிகாரியுமான செனட்டர் எலிசா ஸ்லாட்கின் போன்ற, இராணுவ-உளவுத்துறை அமைப்புடன் நெருங்கிய தொடர்புகளைக் கொண்ட ஜனநாயகக் கட்சியினரும், ஈரானில் நடக்கும் போர், சீனாவை எதிர்த்துப் போராடும் அமெரிக்காவின் திறனைக் குறைத்து வருவதாகக் கூறியுள்ளனர். அமெரிக்க ஆளும் வர்க்கத்தின் அனைத்துப் பிரிவுகளும், அமெரிக்காவின் உலகளாவிய ஆதிக்கத்திற்கான பிரதான அச்சுறுத்தலாக சீனாவை கருதுகின்றன.

'ஈரானியர்களிடம் ஏராளமான ஷாஹெட் ட்ரோன்கள், நடுத்தர மற்றும் குறுகிய தூர பாலிஸ்டிக் ஏவுகணைகளைத் தயாரிக்கும் திறன் இருப்பதுடன் அவர்களிடம் ஒரு பெரிய கையிருப்பும் இருக்கிறது,' என்று அரிசோனா ஜனநாயகக் கட்சி செனட்டர் மார்க் கெல்லி கடந்த மாதம் கூறினார். 'எனவே ஒரு கட்டத்தில்... இது ஒரு கணக்குப் பிரச்சினையாக ஆகியுள்ளது, வான் பாதுகாப்பு ஆயுதங்களை நாம் எப்படி மீண்டும் வழங்க முடியும்? அவை எங்கிருந்து வரப்போகின்றன?' என அவர் கேட்டார்.

ஜனநாயகக் கட்சியின் கருத்துக்கள் கூர்மையாக மாறியுள்ளன; போர்க்குற்றங்களைச் செய்யப் போவதாக ட்ரம்ப் வெளிப்படையாக விடுத்த அச்சுறுத்தல்கள் சம்பந்தமான விமர்சனங்களைக் கைவிட்டுவிட்டு, அதற்குப் பதிலாக, அமெரிக்க ஏகாதிபத்தியத்தின் இலக்குகளை நிறைவேற்றுவதில் அவர் தோல்வியடையும் போது, போரை மிக விரைவாகக் கைவிட்டுவிட்டு, வெற்றிக்கு உரிமை கோருவார் என்பதே முக்கிய ஆபத்து என்று எச்சரிக்கிறது.

ஏ.பி.சி.யின் “திஸ் வீக்” நிகழ்ச்சியில் பேசிய ஜனநாயகக் கட்சிப் பிரதிநிதி ரோ கன்னா கூறியதாவது:

செறிவூட்டப்பட்ட யுரேனியம் இன்னும் அங்கே இருக்கிறது. அங்கு ஒரு கடும்போக்கு ஆட்சி நிலவுகிறது. கமெனி ஜூனியர் உண்மையில் அணு ஆயுதங்களை உருவாக்க விரும்புகிறார். ஹோர்முஸ் நீரிணையின் மீது நமக்கு உண்மையில் அதிக செல்வாக்கு இருப்பதாக யாராவது நம்புகிறார்களா? நமக்கு குறைவாகவே உள்ளது. ஈரானில் சீனாவுக்கு அதிக செல்வாக்கு உள்ளது.

கருத்துக் கணிப்புகளின்படி, கிட்டத்தட்ட மூன்றில் இரண்டு பங்கு அமெரிக்க மக்கள் ஈரானுக்கு எதிரான போரை எதிர்ப்பதோடு அணு ஆயுதங்களைப் பயன்படுத்துவதற்கான சாத்தியக்கூறுகள் குறித்து, அதிர்ச்சியூட்டும் வகையில் 59 சதவீதத்தினர் ட்ரம்ப்பை நம்பத்தகாதவராகக் கருதுகின்றனர்.