ඇමරිකා එක්සත් ජනපදයේ මිනසෝටා ප්‍රාන්තයේ, මිනියපොලිස් හි දී ජෝර්ජ් ෆ්ලොයිඩ් නැමැති අප්‍රිකානු- ඇමරිකානු කලු ජාතිකයා ප්‍රාදේශීය පොලිස් නිලධාරීන් විසින් කුරිරු ලෙස ඝාතනය කිරීම කෙරෙහි මගේ බලගතු විරෝධය ප්‍රසිද්ධියේ පල කිරීමට, මම මෙම ලිපිය ලෝක සමාජවාදී වෙබ් අඩවියට ලියන්නෙමි.

ෆ්ලොයිඩ් මරා දමන අයුරු මම අන්තර්ජාල වීඩියෝවකින් නැරඹුවෙමි. බිමවැටී සිටි ෆ්ලොයිඩ් ගේ බෙල්ල පොලිස් නිලධාරියෙකු තම දනහිසෙන් සිරකරගෙන සිටිනු එහිදී මම දුටුවෙමි. ඔහුගේ බෙල්ල සිරවී තිබියදී ෆ්ලොයිඩ් මෙසේ පවසයි: “මට හුස්ම ගන්න බෑ. මට හුස්ම ගන්න බෑ. ඔබ මාව මරන්නද හදන්නේ”. 46 හැවිරිදි ෆ්ලොයිඩ් තම ජීවිතය ඉල්ලමින් කෙඳිරි ගායි, නමුත් පොලිස් නිලධාරියා ඒ කිසිවක් ගනන් ගන්නා බවක් වීඩියෝවෙන් නොපෙනේ. ෆ්ලොයිඩ් ගිලන් රථයට ඔසවා දැමීමට පෙරම ඔහු ජීවිතයෙන් සමුගෙන අවසන් බව එම වීඩියෝවෙන් වැටහෙයි.

ඝාතනය සිදුවී දින දෙකක් ගත වනවාත් සමගම මාගේ පාසලේ මිතුරන් අතර එම වීඩියෝව විශාල වශයෙන් ඉන්ස්ටග්‍රෑම් හරහා සංසරනය වීමට පටන් ගැනුනි. එම වීඩියෝ බෙදාහදා ගැනීමේදී ඝාතනය සම්බන්ධයෙන් ඔවුන්ගේ දැඩි කනස්සල්ල සහ කෝපය ප්‍රකාශ කරන වගන්ති ද එකතු කර තිබුනි. 

බොහෝ දෙනෙක් දැඩි ලෙස ඉල්ලා සිටියේ ඝාතක පොලිස් නිලධාරීන් අත් අඩංගුවට ගෙන දඬුවම් කල යුතු බවයි. තවත් සමහරු එම පොලිස් නිලධාරීන් මරා දැමිය යුතු යැයි කියා සිටිය හ. ඊට පසු දින එම වීඩියෝවට අමතරව ඇමරිකානු පොලිසිය විසින් මිනිසුන්ට පහර දෙන සහ වෙනත් මිනිසුන් ඝාතනය කරන වීඩියෝ පට ද සංසරනය වීමට පටන් ගැනුනි. 

අනතුරුව ෆ්ලොයිඩ් ඝාතනයට එරෙහිව ඇමරිකානුවන් දක්වන විරෝධතාවයන් ගේ වීඩියෝ පට විශාල ලෙස සමාජ මාධ්‍ය තුල සංසරනය වන්නට පටන් ගත්තේ ය. ඒවා බොහෝ විට ප්‍රවෘත්ති මාධ්‍යන් තුල දක්නට නොලැබුනි. එක් වීඩියෝවක කෝපයට පත් මිනිසුන් පොලිස් රථයකට පහර දෙන දර්ශනයකි. මා එම වීඩියෝව ෂෙයා කල පසු බොහෝ පිරිසක් එය නරඹා තවත් අයට ෂෙයාකර තිබුනි. ඔවුන් සෑමදෙනාම පවසා තිබුනේ මිනිසුන්ගේ කෝපය සාධාරන බවය.

පසුව ඔවුහු ෆ්ලොයිඩ්ගේ ඝාතනයට පෙර පොලිස් ඝාතන වලට ගොදුරු වූ පුද්ගලයන්ගේ ඡායාරූප එකතු කල වීඩියෝවක් ෂෙයා කරන ලදී. තවත් අයෙක් “මෙය නැගී සිටියයුතු වේලාවයි (time to stand)” යනුවෙන් පවසන වීඩියෝවක් ෂෙයා කර තිබුනි. බොහෝ පිරිසක් ෂෙයාකර තිබුනේ “වහා පියවර ගනු”  යනුවෙන් සඳහන් වීඩියෝව යි. 

තවද මගේ බොහෝ මිතුරන් සඳහන් කර තිබුනේ කළු-සුදු භේදයකින් තොරව මෙම ඝාතන සම්බන්ධයෙන් පොලිසියට විරුද්ධ විය යුතු බවයි. මා සිතන ආකාරය ද එයයි. තවද මෙම විරෝධතාවලදී අපට බොහෝ සෙයින් දැකගත හැකි වූයේ එම විරෝධතාකරුවන් කලු-සුදු භේදයකින් තොර ව විරෝධතාවයේ නියැලී සිටි බවයි. 

තවත් මිතුරන්ගේ පල කිරීම් තුල “මිනිසුන් පොලීසියට පාඩමක් උගන්වයි” යන පාඨය සඳහන් වී තිබුනි. මේවායින් පෙනී යන්නේ මගේ මිතුරන් ඇතුලු ලොව බොහෝදෙනා ෆ්ලොයිඩ් ඝාතනයට එරෙහිව එක්ව සිටින බවයි. 

මේ අතර “ශ්‍රී ලාකිකයන් වන අපි ‘කලු මිනිසුන්ගේ ජීවිත වටිනේය (Sri Lankans for black lives matter)’ සංවිධානය සමගයි” යන සටන්පාඨයක් ද සංසරනය වෙමින් තිබුනි. මා එය ෂෙයාකල කීප දෙනෙකු සමඟ කතා කල අවස්ථාවේ මට පැහැදිලි වුනේ ඔවුන් එම සංවිධානය ගැන වැඩි යමක් නොදැන ඒවා පල කර ඇති බවයි. නමුත් මම ලෝක සමාජවාදී වෙබ් අඩවියේ ලිපි වලින් දැනගෙන සිටියේ ‘කලු මිනිසුන්ගේ ජීවිත වටිනේය’ යනු වාර්ගික පදනමක් සහිත සංවිධානයක් බවත් එය ඇමරිකාවේ ඩිමොක්‍රැටික් පක්ෂයට සම්බන්ධ එකක් බවත්ය. මා මගේ මිතුරන්ට පැහැදිලි කර දුන්නේ එවැනි සංවිධාන කම්කරුවන්ගේ එකමුතු බව බිඳීම සඳහා ශක්තිය දුර්වල කිරීම සඳහාත් යෙදී සිටින සංවිධානයක් වන බවයි.  

ලෝක සමාජ වෙබ් අඩවියේ පලවූ ලිපියකින් මා දැනගත්තේ සෑම වසරක් තුල ම ඇමරිකාවේ මෙවැනි පොලිස් ඝාතන දාහක් පමන සිදුවන බවකි. ඇමරිකාවේ පමනක් නොව, ශ්‍රී ලංකාවද ඇතුලු මුලු ලොවපුරා මෙවැනි ඝාතන සිදු වන බව අපි දන්නෙමු. එය ශුන්‍යය දක්වා අඩු කල යුතුය. නැතිනම් එක් ඝාතනයක් හෝ සිදු නොවිය යුතුය. පොලිසිය සහ හමුදාව ට වඩා බලයක් කම්කරුවන් අත තියෙන බව පෙන්වා දිය යුතුයි. මා සිතන්නේ සියලුම රටවල මහජනතාව එකාවන්ව එක්ව මෙම විරෝධතා දිගටම ගෙන යායුතු බවයි. එම විරෝධතාවන්ට නිසි නායකත්වයක් ද අත්‍යවශ්‍ය ය.