[පහතින් පලවෙන්නේ  American workers are the natural allies of workers throughout the world මැයෙන් 2021 ජුනි 03, ලෝක සමාජවාදී වෙබ් අඩවියේ පලවූ ලිපියේ පරිවර්තනයයි.]

“කොවිඩ්-19 වසංගතය හා සමාජවාදී මූලෝපායක අවශ්‍යතාව” යන මැයෙන්, ශ්‍රී ලංකවේ සමාජවාදී සමානතා පක්ෂය (සසප) පැවැත්වූ රැස්වීමකට එක්සත් ජනපද සසප ජාතික ලේකම් ජෝසෆ් කිෂෝර් ඉදිරිපත් කල කතාවේ සංස්කරනය කරන ලද පිටපතක් පහත පලකරනු ලැබේ. ශ්‍රී ලංකාවේ, ඉන්දියාවේ හා දකුනු ආසියාව පුරා කම්කරුවන්ට හා තරුනයන්ට ආමන්ත්‍රනය කල මෙම රැස්වීම මැයි 30දා පවත්වන ලදී.

එක්සත් ජනපද සසප වෙනුවෙන් මෙම රැස්වීම ආමන්ත්‍රනය කිරීමට ලැබීම මම ගෞරවයක් කොට සලකනවා. 

දැන් ඉන්දියාවේ දැවැන්ත හා බිහිසුනු සිද්ධීන් දිග හැරෙමින් පවතිනවා. වසංගතය හා නරේන්ද්‍ර මෝදිගේ බීජේපී ආන්ඩුවේ සාපරාධී ප්‍රතිචාරය විසින් නිර්මානය කරන ලද මරනවල හා විනාශයේ මට්ටම අසීමාන්තිකයි. පිරී ඉතිරී ගිය ආදාහනාගාරවල සහ අවසානයක් නැති නව ආසාදන රැල්ලක බලපෑම යටතේ, ඇද වැටෙමින් පවතින සෞඛ්‍යාරක්ෂන පද්ධතියක ඡායාරූප, ලොව පුරා කම්කරුවන් දැකගන්නේ බියකරු ලෙසින්.

සමස්ත ග්‍රහලෝකය වෙලාගෙන තිබෙන රෝගයක වර්තමාන ව්‍යාප්ති කේන්ද්‍රය වන්නේ ඉන්දියාව යි. යථා තත්ත්වය විශාල වශයෙන් ලෙස අවතක්සේරු කරන නිල සංඛ්‍යා ලේඛනවලට අනුව, ලෝක පරිමාන මරන සංඛ්‍යාව දැනට මිලියන 3.5 ඉක්මවනවා. සැබෑ මරන සංඛ්‍යාව මිලියනයකට ආසන්න යයි තක්සේරු කිරීම් පවතිද්දී, එක්සත් ජනපදය තුල නිල මරන ගනන 600,000ට අධිකයි. බ්‍රසීලයේ මරන සංඛ්‍යාව මිලියන බාගයක් කරා ලඟා වෙමින් තිබෙනවා; මෙක්සිකෝවේ එය 220,000ට වැඩියි; එක්සත් රාජධානියේ හා ඉතාලියේ මරන 125,000 ඉක්මවා යනවා.

ලොව පුරා කම්කරුවන් වසංගතයේ අත්දැකීම් දෙස විමසිල්ලෙන් බලද්දී, මුලදී ඇති වූ කම්පනය කෝපයකට හා වෛරයකට පෙරලී, මීට වගකිව යුත්තන් කවුරුන්දැයි විමසනවා. මෙය සිදු වූයේ කෙසේ ද? වගකිව යුත්තේ කවුරුන් ද? මෙම මනුෂ්‍ය සංහාරය නැවැත්විය හැක්කේ කෙසේ ද?

එක්සත් ජනපදයේ පාලක පන්තිය, රෝගය පැතිරීම පිලිබඳව චීනයට දෝෂාරෝපනය කිරීමේ කෝපාවිෂ්ඨ උද්ඝෝෂනයක නිරත වී සිටිනවා. ගිය අවුරුද්දේ දී ට්‍රම්ප් පරිපාලනය හා අන්ත-දක්ෂිනාංශය විසින් පෙරට දමන ලද අපකීර්තිමත් හා සත්‍යයෙන් තොර න්‍යායයන්-චීනයේ රසායනාගාරයක් තුල උපත ලැබූ වෛරසය, ජෛව විද්‍යාත්මක ඉංජිනේරු විද්‍යාවේ නිෂ්පාදිතයක් යන්න පවා-මාධ්‍ය හා සමස්ත දේශපාලන සංස්ථාපිතය විසින් යුක්ති යුක්ත කෙරෙමින් ඉදිරියට දමනු ලබනවා.

මෙම උද්ඝෝෂනය පිටුපසින් පැහැදිලි දේශපාලන අභිලාෂයන් පවතිනවා. සියලු ප්‍රධාන ධනපති ආන්ඩුවල නායකයන්  සිටින්නේ මහා රුධිර තටාක තුල පීනමින්. ජීවිත ආරක්ෂා කරනු ඇති මහජන සෞඛ්‍ය පියවරයන් ගැනීම ප්‍රතික්ෂේප කිරීම සඳහා, රාජ්‍යයේ ඉහල ම මට්ටම්වල දී දැනුවත් ව ගන්නා තීන්දු හේතුවෙන්, මිලියන ගනන් ජනයා නිරපරාදේ මියගොස් ඇත.

ඉන්දියාවේ මෝදි ආන්ඩුවේ එම නොතැකීම හා අපරාධකාරීත්වය, සෑම ප්‍රධාන ධනපති රටක් ම වසංගතයට දක්වන ප්‍රතිචාරය තුල ප්‍රකාශ වෙනවා.

ලෝක ධනවාදයේ මධ්‍යස්ථානය හා වෝල් වීදිය පිහිටා තිබෙන රට ලෙස එක්සත් ජනපදය, වසංගතයේ විශාලතම මරන සංඛ්‍යාවට හිමිකම් කීම, දැවැන්ත අර්ථභාරයක් දරන කරුනක්. එය සතු අතිවිශාල ධනය හා වඩාත් ම අභිවර්ධිත තාක්ෂනය එරට විසින් නතු කරගෙන සිටීම නො තකා, අතිමහත් බහුතර ජනතාවගේ අවශ්‍යතා ඉටු කිරීමට අසමත්, සමාජ හා දේශපාලන පද්ධතියක් වසංගතය විසින් හෙලිදරව් කර තිබෙනවා.

පාලක පන්තිය ආරම්භයේ පටන් ම වසංගතයට දක්වන ප්‍රතිචාරය පාලනය කරන එක් මූලධර්මයක් පවතිනවා. සංගතවල අවශ්‍යතාවන්ට වල කපන හෝ වෝල් වීදියේ කොටස් වටිනාකම්වලට තර්ජනය කරන කිසිදු පියවරක් නො ගැනීම එම මූලධර්මය යි.

පලමුව ට්‍රම්ප් යටතේ ද දැන් බයිඩන් යටතේ ද ආන්ඩුවේ පිලිවෙත මෙහෙයවනු ලැබ තිබෙන්නේ, ජීවිත ආරක්ෂා කිරීම හා වසංගතය මුලිනුපුටා දැමීම වෙනුවට, කොටස් වෙලඳ බුබුල චීරස්ථායී කිරීම හා ඇමරිකානු අධිරාජ්‍යවාදයේ භූ-මූලෝපායික අවශ්‍යතාවන්ට මුක්කු ගැසීම විසින්.

අවුරුද්දකටත් ඇත දී, ගිය වසරේ මාර්තු අග දී, බැංකු හා වෝල් වීදියේ සමපේක්ෂකයන්ට ඩොලර් ට්‍රිලියන ගනනින් ඇප දීමට මුදල් සම්පාදනය කල, ඊනියා කෙයාස් පනත (CARES Act) එක්සත් ජනපද කොංග්‍රසය විසින් සම්මත කරනු ලැබුවා. කතිපයාධිකාරයේ අවශ්‍යතා සුරක්ෂිත කරගත් පසු, “ප්‍රතිකාරය රෝගයට වඩා නරක නො විය යුතු ය” යන්න හෙවත්, ලාබ සඳහා ජීවිත කැපකල යුතු ය යන්න අවධාරනය කිරීමේ උද්ඝෝෂනය ආරම්භ වුනා.

පනවා තිබූ සීමිත තහනම් කිරීම් ඉවත් කිරීමේ උද්ඝෝෂනයට ට්‍රම්ප් පරිපාලනය නායකත්වය දුන්නේ වුවත්, එම උද්ඝෝෂනයට, මාධ්‍ය හා වෘත්තීය සමිතිවල තීරනාත්මක සහයෝගය සමගින් රිපබ්ලිකන් හා ඩිමොක්‍රටික් යන එක්සත් ජනපදයේ ධනපති පක්ෂ දෙකේ ම සහයෝගය ලැබුනා.

මෙහි විපාක පුරෝකථනය කල හැකි වූ අතර, පුරෝකථනය කරනු ලැබුනා: එනම් නව ආසාදන හා මරනවල යෝධ ඉහල යාමක්.

සියලු ප්‍රධාන ධනපති රටවල් තුල ඒ හා සමාන පිලිවෙත් ක්‍රියාවට දැමුනා. මේ ගෙවී ගිය සතියේ දී, පුද්ගලයන් 800,000ක් තරම් විශාල පිරිසකගේ මරනවලට හේතුවනු ඇතැයි ගනනය කල පිලිවෙතක්, එක්සත් රාජධානියේ ආන්ඩුව ක්‍රියාවට දමූ බව, බෝරිස් ජොන්සන්ගේ හිටපු උපදේශකයෙක් වැඩිදුර තහවුරු කලා. බ්‍රසීලයේ දී, ජයිර් බොල්සොනාරෝගේ ආන්ඩුව හිතා මතා ම බාධාවකින් තොර ව වෛරසයට පැතිර යාමට ඉඩ දීමේ පිලිවෙතක් අනුගමනය කලේ, මරන සංඛ්‍යාව මිලියන 1.4ක් තරම් ඉහල මට්ටමකට ලඟා විය හැකි යයි අපේක්ෂා කරමින්.

මහා පරිමාන මරන හා සමාජ කාලකන්නි භාවය මධ්‍යයේ, කතිපයාධිකාරයේ ධනය නව ඉහල මට්ටම් දක්වා පිම්බී තිබෙනවා. 2020 මාර්තු මැද සිට, එක්සත් ජනපද බිලියනපතියන්ගේ සාමූහික ධනය, ඩොලර් ට්‍රිලියන 1.1කටත් වඩා ඉහල ගියා. “මහා සෙනග හා කොවිඩ්-19 තර්ජනය මගහැරීම” පිනිස “ධනවතුන් සුඛෝපභෝගය හා විවේකය සොයද්දී” සුපර්යොට් (මුහුදේ කාලයක් නවතා තැබිය හැකි අධි සුඛෝපභෝගී යාත්‍රා-පරිවර්තක) වෙලඳපොල ඉහල නගිමින් තිබෙන බව බ්‍රිතාන්‍යයේ ෆයිනෑන්ෂල් ටයිම්ස් පත්‍රය ඊයේ වාර්තා කලා. යමෙක්ට සමස්ත සමාජ හා ආර්ථික පර්යාය පිලිබඳව මීට වඩා පැහැදිලි හා වරද තහවුරු කරන චෝදනාවක් තිබිය නො හැකියි.

හතරවැනි ජාත්‍යන්තරයේ ජාත්‍යන්තර කමිටුව (හජාජාක), මෙම වසංගතය “ප්‍රේරක සිද්ධියක්” ලෙස අර්ථ දක්වා තිබෙනවා. මේ මගින් අපි අදහස් කරන්නේ, ධනේශ්වර පද්ධතියට යටින් දිවෙන පරස්පර-විරෝධයන් හා ප්‍රවනතාවන් වේගවත් කරන හා තීව්‍ර කරන සිද්ධියක් යන්නයි.

පසුගිය මාස 15 පුරා, අප, වසංගතයට පාලක පන්තියේ ප්‍රතිචාරය දැකගෙන තිබෙනවා. මහා පරිමාන මරන ජනනය කරන පිලිවෙත, ආඥාදායක පාලන රූප කරා වඩ වඩා විවෘත ව හැරීමක් සමග සමපාත වී ඇත. මේ වසරේ ආරම්භයේ දී, ජනවාරි 6දා, සමස්ත රිපබ්ලිකන් පක්ෂය සමග ඒකාබද්ධ ව, ට්‍රම්ප් පරිපාලනය විසින් ෆැසිස්ට්වාදී නැගී සිටීමක් සංවිධානය කිරීමෙහි ඉලක්කය වූයේ, මැතිවරනය පෙරලාදමා ආඥාදායකත්වයක් ස්ථාපිත කිරීමයි. හුදෙකලා සිද්ධියක් නොවූ මෙය, සමාජ හා දේශපාලන පද්ධතියේ ගැඹුරට ගිය රෝගී තත්ත්වයක් පිලිබිඹු කලා.

දැන් බයිඩන් හා ඩිමොක්‍රටිකයන් බලයේ සිටින අතර, එම මූලික පාලක පන්ති පිලිවෙත ම ලුහුබඳිමින් තිබෙනවා. සෑම දිනක ම කොරෝනා වෛරසයෙන් පුද්ගලයන් 500ක් මියගියත්, වසංගතය අවසන් වී ඇති බව බයිඩන් ප්‍රකාශ කොට ඇත. පරිපාලනයේ මග පෙන්වීම යටතේ, ප්‍රසිද්ධ ස්ථානවල දී මුහුනු ආවරන පැලඳීමේ රෙගුලාසි පවා රෝග පාලන හා වැලැක්වීමේ මධ්‍යස්ථානය විසින් ඉවත් කර තිබෙනවා.

ඒ අතර ම, ඩිමොක්‍රටිකයන් දැන් චීනයට එරෙහි මිලිටරිවාදී උද්ඝෝෂනයට නායකත්වය දෙනවා. සිකුරාදා, බයිඩන් පරිපාලනය එලඹෙන වසර සඳහා එහි අයවැය යෝජනාව නිකුත් කල අතර, එය කේන්ද්‍රගත වන්නේ, න්‍යෂ්ටික ආයුධ නවීකරනයට වෙන් කරන ලද ඩොලර් බිලියන 24.7ක් ඇතුලු ව ඩොලර් බිලියන 753ක වාර්තාගත මිලිටරි අයවැයක් මතයි. සියලු ඉන්දියානුවන් එන්නත්කරනය කිරීමට අවශ්‍ය වන්නේ ඩොලර් බිලියන 6.4ක් බව තක්සේරු කෙරෙනවා. ඇමරිකානු අධිරාජ්‍යවාදය එහි මහජන සංහාරක අවි නවීකරනය කිරීම සඳහා එමෙන් හතර ගුනයක් වියදම් කරමින් සිටිනවා.

මේ මාසයේ ඊස්රායලය ගාසා වෙත එහි සාපරාධී ප්‍රහාර එල්ල කරද්දී, බයිඩන්ගේ නායකත්වය යටතේ පවතින එක්සත් ජනපදය තුලින් තම වඩාත්ම ස්ථීරසාර මිතුරා හමුවුනා.

මෙම ක්‍රියා දාමයේ අනෙක් පැත්ත වන්නේ, කම්කරු පන්තිය තුල විරුද්ධත්වයේ වර්ධනය යි. පසුගිය අවුරුද්දේ අත්දැකීම අපතේ ගොස් නැහැ. ලොව පුරා කම්කරු හා තරුන මහජනයාගේ විඥානය මත එය ප්‍රගාඪ රැඩිකලීකාරක බලපෑමක් ඇති කොට තිබෙනවා.

සමස්ත ලෝකය පුරා කම්කරුවන් සඳහා, ක්‍රියා මාර්ගය හා ඉදිරි දර්ශනය පිලිබඳ තීරනාත්මක ප්‍රශ්න ඉස්මතු කෙරෙනවා. නිෂ්පාදනය නැවැත්වීම සඳහා, මේ සතියේ දී ඉන්දියාවේ මෝටර් රථ කම්කරුවන් ධෛර්යය සම්පන්න ක්‍රියාවන්වල යෙදුනා, නිර්බාධිත ව වසංගතය පැතිර යද්දී, එය ඉන්දියාව තුල පලල් කම්කරු ව්‍යාපාරයක කොටසක්.

මෝටර් රථ කම්කරුවන්ගේ, ඔවුන්ගේ පවුල්වල හා පලල් ව මහජනයාගේ ජීවිත බරපතල අන්තරායකට ඇද හෙලමින්, නිෂ්පාදනය අඛන්ඩව පවත්වාගෙන යාම සඳහා තමිල්නාඩු ප්‍රාන්ත ආන්ඩුවෙන් චෙන්නායිහි මෝටර් රථ සමාගම්වලට අනුමැතිය ලැබී තිබුනා. ගෝලීය ව්‍යසනයේ දී අන් සෑම තැනක මෙන් ම, කම්කරුවන්ගේ ජීවිත බැංකුවල ලාභවලට යටත් කොට ඇත.

ඉන්දියාවේ කම්කරුවන් එක්සත් ජනපදයේ අත්දැකීම අධ්‍යයනය කල යුතු යි. 2020 මාර්තුවේ දී, කැනඩාවේ හා යුරෝපයේ කම්කරුවන් සමගින් එක්සත් ජනපදයේ මෝටර් රථ කම්කරුවෝ, පිරිද්දුම් පේලිවල වැඩ නවත්වා, අත්‍යවශ්‍ය නො වන නිෂ්පාදනය නවත්වන ලෙස ඉල්ලා සිටියා. වසංගතයේ මෙම මූලික අවධියේ දී, කම්කරුවන්ගේ ස්වයංසිද්ධ ප්‍රතිචාරය, රෝගය පැතිරී යාම නැවැත්වීමට අවශ්‍ය යයි විද්‍යාඥයින් අවධාරනය කල පාර්ශවීය අගුලු දැමීම් හා අනෙකුත් පියවරයන් ක්‍රියාවට දැමීමට ආන්ඩුවලට බල කලා.

කම්කරුවන් ධෛර්යය සම්පන්න ව ක්‍රියාකලත්, ගැටලුවේ ප්‍රභවය වන ධනේශ්වර පද්ධතියට අවසානයක් තැබිය හැකි ව්‍යාපාරයක් බවට, විරෝධයේ මෙම පුපුරා යාම පරිවර්තනය කිරීමට අවශ්‍ය සංවිධාන ව්‍යුහ හා දේශපාලනික ඉදිරි දර්ශනය ඔවුන්ට තිබුනේ නැහැ. පාලක පන්තිය යලි සංවිධානය වුනා. තම ඇප තැබීම (bailout) සම්මත කරගත් පාලක පන්තිය, කම්කරුවන් ආපසු බලෙන් වැඩට දැක්කීමේ උද්ඝෝෂනය සමගින් ඉදිරියට ගියා.

පාලක පන්තියට එහි මිනීමරු පිලිවෙත් ක්‍රියාවට දැමීම සඳහා සහයෝගය දීමේ දී, වෘත්තීය සමිති අත්‍යන්තයෙන් ම තීරනාත්මක භූමිකාවක් ඉටු කර තිබෙනවා. කම්කරුවන් අතර විරෝධය සංවිධානය කරනු වෙනුවට, ව්‍යාපාර හා පාසල් විවෘත ව තබා ගැනීම සඳහා වෘත්තීය සමිති ඒකාබද්ධ වී සිටිනවා. එක්සත් ජනපදය තුල ලක්ෂ හයකට වැඩි ජනකායක් මිය ගොස් තිබුනත්, මනුෂ්‍ය සංහාරය නැවැත්වීම ඉලක්ක කරගත් කම්කරුවන්ගේ එකදු අරගලයක්වත් සංවිධානය කිරීමට, වෘත්තීය සමිති පියවර ගෙන නැහැ.

බයිඩන් විසින් නායකත්වය දෙන පාලක පන්තියේ කොටසක්, පවත්නා වෘත්තීය සමිති, කම්කරු පන්තික විරෝධය මර්දනය කිරීමේ තීරනාත්මක උපකරන ලෙස දැකගන්නවා. ඇමරිකානු අධිරාජ්‍යවාදය, චීනය සමග එදා මෙදා තුර වඩාත් ම ඍජු ගැටුමක් සූදානම් කරද්දී, ආන්ඩුවේ අනුග්‍රහය ලබන හා රාජ්‍ය-පාලිත “කම්කරු ව්‍යාපාරයක්” වර්ධනය කරගැනීම, මූලෝපායික අවශ්‍යතාවක් වෙනවා. ආරක්ෂක ලේකම් ලොයිඩ් ඔස්ටින් සහ භාන්ඩාගාර ලේකම් හා ෆෙඩ් බැංකුවේ හිටපු සභාපතිනිය වන ජැනට් යෙලන් ප්‍රමුඛ සාමාජිකයන් ව සිටින, වෘත්තීය සමිති දිරිමත් කිරීමේ “කාර්ය සාධක බලකායක්” පසුගිය මාසයේ දී බයිඩන් විසින් නිවේදනය කලා. ඔවුන් දෙදෙනා සිටීමේ අර්ථය වන්නේ, එහි ඇමරිකානු අධිරාජ්‍යවාදයේ හා මූල්‍ය ප්‍රාග්ධනයේ ප්‍රධාන නියෝජිතයන් දෙදෙනා සිටින බව යි.

මේ රට තුලත් හා ලෝකය පුරාත්, මාධ්‍ය විසින් නො තකා හරින දෙයක් වන, කම්කරු පන්තිය වෘත්තීය සමිතිවල යකඩ සැට්ටයෙන් නිදහස් වීමේ ව්‍යාපාරයක් වැඩෙමින් පවතිනවා.

පසුගිය මාසයේ දී, තමන්ගේ වැඩ වර්ජනය කඩාකප්පල් කොට, සමාගම විසින් විධානය කරන ලද කොන්ත්‍රාත්තුවක් පැටවීමට, එක්සත් මෝටර් කම්කරු සමිතිය දරන ලද ප්‍රයත්නයන්ට විරෝධය පෑම සඳහා, වර්ජිනියාවේ ස්වීඩනයට අයත් වොල්වෝ ට්‍රක්ස් කම්කරුවෝ ක්‍රියාකාරී කමිටුවක් ගොඩනගා ඇත. නව කොන්ත්‍රාත්තුවක් පරාජය කිරීම සඳහාත්, තමන්ගේ අරගල සම්බන්ධීකරනය කිරීමට රටපුරා සහෝදර කම්කරුවන් කරා ලඟාවීම ආරම්භ කිරීමටත්, කම්කරුවන් දැන් බලමුලුගැන්වෙමින් සිටිනවා.

දකුනේ ඇලබාමා ප්‍රාන්තයේ පතල් කම්කරුවන් 1,100ක් අප්‍රේල් මාසයේ පටන් වැඩ වර්ජනයේ යෙදී සිටිනවා, ඔවුන් ඇමරිකානු එක්සත් පතල් කම්කරු සමිතිය (යූඑම්ඩබ්ලිව්ඒ) විසින් යලි ගෙන එන ලද කොන්ත්‍රාත්තුවක් අතිමහත් බහුතරයෙන් ප්‍රතික්ෂේප කලා. පසුගිය සතිය පුරා,  විශේෂයෙන් ම ලෝක සමාජවාදී වෙබ් අඩවිය ඉලක්ක කරගනිමින් ද කම්කරුවන්ගේ අරගලය පාවාදීමට විරුද්ධ ව ඔවුන් අතර පවතින විරෝධය බියගැන්වීම සඳහා ද යූඑම්ඩබ්ලිව්ඒහි නායක නිලධාරීන් ප්‍රචන්ඩත්වය හා මැර බලය යෙදීමට උත්සාහ කර තිබෙනවා. 

උතුරු එක්සත් ජනපදයේ වානේ කම්කරුවන් 1,300ක්, ඇලගෙනි ටෙක්නෝලොජීස් සමාගමට එරෙහි ව මාස දෙකක් තිස්සේ වැඩ වර්ජනය යෙදී සිටිනවා. ඔවුන් ද මෙහි දී එක්සත් වානේ කම්කරු සමිතිය විසින් හුදකලා කරනු ලැබ තිබෙන නමුත්, එම කම්කරුවන් යලි යලිත් සමාගමේ අවසන් නිවේදනවලට ප්‍රතිරෝධය පා ප්‍රතික්ෂේප කර ඇත. 

මේවා සෞඛ්‍ය කම්කරුවන්, අධ්‍යාපනඥයින්, ප්‍රවර්ධන කම්කරුවන් හා කම්කරු පන්තියේ අනෙකුත් කොටස් ඇතුලත් කරගන්නා, කම්කරු පන්තික කෝපයේ හා විරෝධයේ ආරම්භක ප්‍රකාශනවලින් කිහිපයක් පමනයි.

එක්සත් ජනපදය යනු, චීනයට එරෙහි ව යුද්ධයට තර්ජනය කරන හා නරේන්ද්‍ර මෝදිගේ දක්ෂිනාංශික ආන්ඩුවට තීරනාත්මක සහයෝගය දුන් ට්‍රම්ප් හා බයිඩන් පරිපාලනයන් ඇතුලු, සෑම රටක් තුල ම ප්‍රතිගාමීත්වයට සහයෝගී පවුරක් ලෙස ක්‍රියා කරන ඇමරිකානු අධිරාජ්‍යවාදය පමනක් නෙවෙයි. එහි ලොව පුරා කම්කරුවන්ගේ ස්වභාවික මිත්‍රයින් වන ඇමරිකානු කම්කරු පන්තිය ද සිටිනවා. 

පසුගිය අවුරුද්දේ අත්දැකීම් කල් පවත්නා බලපෑමක් ඇති කිරීමට නියමිත යි. වසංගතයට පාලක පන්තිය දක්වන ප්‍රතිචාරය මහා පරිමාන මරන හා සමාජ කාලකන්නි භාවයට උපත දෙනවා පමනක් නොවෙයි එය විප්ලවය සඳහා තිඹිරිගෙයද වෙනවා.

කම්කරුවන්ගේ ජාත්‍යන්තර ක්‍රියාකාරී කමිටු සන්ධානය සඳහා, හතරවැනි ජාත්‍යන්තරයේ ජාත්‍යන්තර කමිටුව ආරම්භකත්වය දියත් කර තිබෙන්නේ මෙම ඉදිරි දර්ශනය මත පදනම් වෙමින්. එම ක්‍රියාකාරී කමිටු සන්ධානය තැනීම නිවේදනය කරමින් අප නිකුත් කල ප්‍රකාශය තුල, ජාත්‍යන්තර කමිටුව මෙසේ විස්තර කලා: “පාලක පන්තියට හා කෝපරේට්වාදී වෘත්තීය සමිතිවලට විරුද්ධ ව විවිධ කම්හල්, කර්මාන්ත හා රටවල් තුල” කම්කරු පන්තියේ “අරගල සම්බන්ධීකරනය කල” හැකි නව යාන්ත්‍රනයක් නිර්මානය කිරීම මෙහි ඉලක්කය යි. 

කම්කරුවන්ගේ ජාත්‍යන්තර ක්‍රියාකාරී කමිටු සන්ධානය, “වෛරසය පැතිරී යාම නැවැත්වීමට අවශ්‍ය කරන, අනාරක්ෂිත කම්හල් හා අත්‍යවශ්‍ය නො වන නිෂ්පාදන වසා දමමින්, කම්කරුවන් සඳහා ආරක්ෂාව ඉල්ලා සිටීමට, ලොව පුරා කම්කරුවන්ට තොරතුරු බෙදා හදා ගනිමින් එක්සත් අරගලයක් සංවිධානය කිරීමේ මාධ්‍යයක්” වෙනවා.

මෙම සන්ධානයේ වර්ධනය ගෝලීය පරිමානයක් ගත යුතු වන්නේ, වසංගතය හා ධනවාදය විසින් නිර්මිත ගැටලුවලට විරුද්ධ ව සටන් කල හැක්කේ, ලොව පුරා සියලු කම්කරුවන්ගේ එක්සත් ව්‍යාපාරයක් හරහා පමනක් වන නිසා.

සියල්ලට ඉහලින් කම්කරු පන්තියේ ප්‍රතිප්‍රහාරයට, විප්ලවවාදී නායකත්වයක් ගොඩනැගීම අවශ්‍ය යි. ලෝක ට්‍රොට්ස්කිවාදී ව්‍යාපාරය වන හතරවැනි ජාත්‍යන්තරයේ ජාත්‍යන්තර කමිටුවට පිටතින්, මෙම නායකත්වය ගොඩනගන ව්‍යාපාරයක් නැහැ.

හජාජාක පදනම් වන්නේ යෝධ ඓතිහාසික සම්ප්‍රදායක් මත යි. එම සම්ප්‍රදාය, මාක්ස් හා එංගල්ස් විසින් විද්‍යාත්මක සමාජවාදය ගොඩනැගීම, 1917 රුසියානු විප්ලවය, ස්ටැලින්වාදයට එරෙහිව ට්‍රොට්ස්කිගේ නායකත්වයෙන් ගෙන ගිය අරගලය දක්වා ආපස්සට දිව යන්නක්.

එම සම්ප්‍රදාය ජාත්‍යන්තර සමාජවාදී විප්ලවයේ ඉදිරි දර්ශනය සඳහා අශමනීය ලෙස සටන් වැදී ඇති සම්ප්‍රදායක්.

ලෝක සමාජවාදී විප්ලවයේ පක්ෂය ලෙස හජාජාක ගොඩනැගීමේ අත්‍යවශ්‍ය තීරනාත්මක සංරචකයක් ලෙස, ශ්‍රී ලංකාව තුල සමාජවාදී සමානතා පක්ෂය ගොඩනැගීමටත්, ඉන්දියාව තුල හජාජාක ශාඛාවක් වර්ධනය කිරීමටත්, සම්බන්ධ වීමේ තීන්දුව ගන්නා ලෙස මෙම රැස්වීමට සහභාගි වන සියලු දෙනාගෙන් මම ඉල්ලා සිටිනවා.