மொழிபெயர்ப்பின் மூலக் கட்டுரையை இங்கே காணலாம்

பிரிட்டன் முதல் பால்கன் வரை, வரலாறு காணாத வறட்சி ஐரோப்பாவை பேரழிவிற்கு உட்படுத்துகிறது. ஐரோப்பிய ஒன்றியம் மற்றும் கிரேட் பிரிட்டனில் 60 சதவீதத்திற்கும் அதிகமானோர் வறட்சி நிலைமைகளை எதிர்கொள்கின்றனர் என்று ஐரோப்பிய வறட்சி ஆய்வகம் தெரிவித்துள்ளது, ஐரோப்பிய ஒன்றிய ஆணைய விஞ்ஞானி ஒருவர் 500 ஆண்டுகளில் ஐரோப்பாவின் மிக மோசமான வறட்சி என்று அழைத்தார். முக்கிய ஆறுகள் மற்றும் ஏரிகள் வறண்டு வருகின்றன, விவசாயிகள் முன்னோடியில்லாத பயிர் இழப்புகளை எதிர்கொள்கின்றனர், மேலும் முன்னெப்போதும் இல்லாத வெப்பம் மற்றும் மழையின்மைக்கு மத்தியில் எரிசக்தி விநியோகம் சரிந்து வருகிறது.

2022 ஆம் ஆண்டின் கோடை காலமானது, வெப்பம், காட்டுத்தீ மற்றும் இப்போது ஐரோப்பாவில் வறட்சி ஆகியவற்றிற்கான முன்னைய பதிவுகளை முறியடித்தது, உலகளாவிய காலநிலை மாற்றத்தை கையாள்வதற்கான அவசர அவசியத்தை தெளிவுபடுத்தியுள்ளது. அது இப்போது மிகப் பரந்த அளவை எட்டியுள்ளது, உடனடி மற்றும் பெரிய அளவிலான நடவடிக்கை இல்லாவிடின், மனித வாழ்க்கைக்கு முக்கியமான சமூகத்தின் அடிப்படை செயல்பாடுகளான தண்ணீர், உணவு, மின்சாரம் மற்றும் பாதுகாப்பான வீடுகளை வழங்கும் திறன் போன்றவற்றை அச்சுறுத்தும்.

இந்த ஆண்டு ஐரோப்பாவில் மிகக் குறைந்த மழைப்பொழிவு மற்றும் அடுத்தடுத்த வெப்ப அலைகளால் இந்த கோடையின் தீவிர வறட்சி ஏற்பட்டது, இதில் ஜூலை வெப்ப அலை உட்பட வெப்பநிலை பதிவுகளை சிதைத்தது. தீவிர வெப்பம் மற்றும் வறட்சி ஆகியவை காட்டுத்தீக்கு வழிவகுத்தன, இந்த ஆண்டு ஐரோப்பா முழுவதும் 615,341 ஹெக்டர் எரிந்துள்ளது — ஆகஸ்ட் நடுப்பகுதியில் இதுவரை இல்லாத எண்ணிக்கை. உக்ரேனில் நேட்டோ-ரஷ்யா போரால் ஏற்கனவே குறைமதிப்பிற்கு உட்படுத்தப்பட்ட முக்கிய உணவு மற்றும் எரிசக்தி விநியோகத்தை வறட்சி சீர்குலைத்து வருகிறது, தற்போதைய பணவீக்க நெருக்கடிக்கு மத்தியில் அத்தியாவசிய பொருட்களுக்கான விலைகள் இன்னும் அதிகமாக உள்ளது.

ரைன் ஆற்றில், குறைந்த நீர்மட்டம் காரணமாக 25 சதவீத கொள்ளளவில் கப்பல்கள் பொருட்களை ஏற்றிச் செல்கின்றன. நீர்மட்டம் இப்போது 40 சென்டிமீட்டரில் உள்ளது, ஆனால் சுமார் 30 செ.மீ வரை குறையும் என்று கணிக்கப்பட்டுள்ளது, இது ஆற்றில் போக்குவரத்தை முற்றிலுமாக நிறுத்தக்கூடும். 2018 ஆம் ஆண்டில் இத்தகைய நிறுத்தங்கள் ஜேர்மன் பொருளாதாரத்திற்கு 5 பில்லியன் டாலர் செலவானது என மதிப்பிடப்பட்டுள்ளது.

கடந்த வாரம், பிரான்ஸ் தனது மின்சாரத்தில் 70 சதவீதத்தை உற்பத்தி செய்யும் அணுமின் நிலையங்களை குறைந்த திறனில் செயல்பட கட்டாயப்படுத்தியது: அதிக வெப்பநிலை குளிரூட்டி நீரை மிகக் குறைந்த அளவில் இருக்கும் ஆறுகளில் வெளியிடுவது சுற்றுச்சூழல் அபாயமாகும். எவ்வாறாயினும், தற்போதைய எரிசக்தி நெருக்கடிக்கு மத்தியில், பிரான்ஸ் எரிசக்தி நிறுவனம், தாவரங்கள் மற்றும் விலங்குகள் உட்பட சுற்றுச்சூழலுக்கு ஏற்படும் சேதம் எதுவாக இருந்தாலும், ஆலைகளை முழு கொள்ளளவிற்கு திரும்பும்படி கட்டளையிட்டுள்ளது. பிரான்சின் 96 நிலப்பகுதித் துறைகளில், 86 வறட்சி எச்சரிக்கையில் உள்ளன. பிரான்சின் இரண்டாவது பெரிய லுவார் (Loire) நதியின் நீளத்தின் பெரும்பகுதியை கால்நடையாக கடக்க முடியும்.

ஐரோப்பாவின் மிக நீளமான டானூப் (Danube) நதியின் நீர்மட்டம் தற்போது 43 சென்டிமீட்டராக உள்ளது, இது பதிவுகள் தொடங்கியதிலிருந்து மிகக் குறைந்த அளவாகும். சேர்பியா, பல்கேரியா மற்றும் ருமேனியாவில், பால்கன் உணவு மற்றும் எரிசக்தி விநியோகங்களுக்கு முக்கியமான ஆற்றில் கப்பல்கள் செல்லக்கூடியதாக இருக்க, அகழ்வு முயற்சிகள் நடந்து வருகின்றன. தெற்கு ஜேர்மனியில், ஆற்றின் நீர் வெப்பநிலை 25°C ஐ தாண்டியது மற்றும் மாத இறுதியில் கரீபியன் கடலின் அதே வெப்பநிலையான 27°c ஐ எட்டும் என்று எதிர்பார்க்கப்படுகிறது.

ஐரோப்பா முழுவதும், அதிக நீர் வெப்பநிலை மற்றும் குறைந்த ஆக்ஸிஜன் உள்ளடக்கத்தால் மீன்கள் அச்சுறுத்தப்படுகின்றன. சேர்பியாவில் உள்ள கோனோப்லிஜான்க்சோ (Conopljankso) நீர்த்தேக்கத்தின் முழு மீன்வளமும் முற்றிலும் வறண்டுபோனதால் இறந்தது.

போலந்துக்கும் ஜேர்மனிக்கும் இடையே ஓடும் ஓடர் (Oder) ஆற்றின் மேற்பரப்பு இப்போது இறந்த மீன்களால் மூடப்பட்டுள்ளது. போலந்து அதிகாரிகள் ஆற்றின் கடுமையான தொழில்துறை மாசுபாடு பற்றிய அறிக்கைகளை எதிர்த்திருந்தாலும், ஆற்று நீரின் அளவு மிகக் குறைந்த அளவிற்கு சரிந்ததால், தொழில்துறை மாசுபாடுகளின் செறிவுகள் உயர்ந்துள்ளன என்பது தெளிவாகிறது.

முக்கிய தானியங்களின் உற்பத்தி இத்தாலியில் 30 முதல் 40 சதவிகிதம் மற்றும் பிரான்சில் கிட்டத்தட்ட 20 சதவிகிதம் ஆகியவற்றுடன் ஐரோப்பிய விவசாயிகள் பாரிய பயிர் தோல்விகளை எதிர்கொள்கின்றனர். ஸ்பெயினின் ஆலிவ் எண்ணெய் பயிர், உலக ஏற்றுமதியில் ஏறக்குறைய பாதியைக் கொண்டுள்ளது, இது கடந்த ஐந்து ஆண்டுகளில் உற்பத்தி செய்யப்பட்ட சராசரியில் கால் பங்காக இருக்கும் என்று எதிர்பார்க்கப்படுகிறது.

வடக்கு இத்தாலியின் போ பள்ளத்தாக்கில் (Po Valley), விவசாயிகள் பயிர் பாசனத்திற்கு உள்ளூர் நதிகளைப் பயன்படுத்த முடியாததால், இந்த ஆண்டு 60 சதவீத பயிர்கள் இழக்கப்பட்டுள்ளன. இது ஏற்கனவே குறைந்தது 6.2 பில்லியன் யூரோக்கள் சேதத்தை ஏற்படுத்தியுள்ளது. இத்தாலியின் உணவு விநியோகத்தில் 30 முதல் 40 சதவீதத்தை உற்பத்தி செய்யும் இப்பகுதியில், இந்த ஆண்டு மழை பெய்யவில்லை. போ முகத்துவாரத்திற்கு அருகில், நீர்மட்டம் மிகவும் குறைவாக இருப்பதால், அட்ரியாடிக் கடலில் இருந்து உப்பு நீர் 30 கிலோமீட்டர்கள் மேல் பாய்ந்து, இதுவரை வறட்சியில் இருந்து தப்பிய ஆற்றின் கரைக்கு அருகிலுள்ள பயிர்களைக் கொன்றது.

மிலான் மற்றும் தூரின் உட்பட போ பள்ளத்தாக்கில் உள்ள ஒவ்வொரு நகரத்திலும் குடிநீர் விநியோகம் மிகவும் குறைவாக உள்ளது. வடக்கு இத்தாலியில் உள்ள கார்டா ஏரியின் பிரபலமான சுற்றுலாத் தலம் உட்பட, இப்பகுதியில் உள்ள ஏரிகளில் உள்ள நீர் நிலைகளும் வரலாற்றுக் குறைவில் உள்ளன, அவை கிட்டத்தட்ட முற்றிலும் வறண்டுவிட்டன.

ஐரோப்பாவின் வடக்கு மற்றும் ஈரமான பகுதிகள் கூட பாதிக்கப்பட்டுள்ளன. நோர்வேயின் நீர்த்தேக்கங்களில் குறைந்த நீர்மட்டம் அதன் நீர்மின் உற்பத்தி திறனைக் குறைக்கிறது. இது எரிசக்தி ஏற்றுமதியை குறைக்க வேண்டும் என்ற எச்சரிக்கைகளுக்கு வழிவகுத்தது, ரஷ்ய எரிவாயுவுக்கு பணம் செலுத்த மறுக்கும் நேட்டோ அச்சுறுத்தல்கள் மற்றும் விநியோகத்தை துண்டிக்க ரஷ்ய அச்சுறுத்தல்கள் எரிசக்தி நெருக்கடியை மேலும் அதிகப்படுத்துகிறது. தலைநகர் இலண்டன் உட்பட எட்டு இங்கிலாந்து பிராந்தியங்கள் வறட்சி நிலைமைகளை எதிர்கொள்கின்றன.

இந்த நிகழ்வுகள் புவி வெப்பமடைதலின் விளைவுகளை நிறுத்துவதற்கும் நிவர்த்தி செய்வதற்கும் சர்வதேச அளவில் ஒருங்கிணைந்த பிரச்சாரத்தின் அவசர அவசியத்தை சுட்டிக்காட்டுகின்றன. உலகம் மனிதகுலத்திற்கு வாழக்கூடியதாக இருப்பதை உறுதிசெய்ய உயர் தொழில்நுட்பம், முக்கிய உள்கட்டமைப்பு, நீர்ப்பாசன தொழில்நுட்பம், சுத்தமான எரிசக்தி உற்பத்தி, உணவு பாதுகாப்பு திட்டங்கள் மற்றும் பிற முயற்சிகளில் டிரில்லியன் கணக்கான யூரோக்கள் முதலீடு செய்யப்பட வேண்டும்.

இதை நிறைவேற்றுவதற்கு முதலாளித்துவ அமைப்பு மற்றும் அதன் ஊழல் நிறைந்த நிதியப் பிரபுத்துவத்தின் செல்வம் மற்றும் சலுகைகள் மீது நேரடித் தாக்குதல் தேவைப்படுகிறது. COVID-19 தொற்றுநோய் வெடித்ததைத் தொடர்ந்து பங்குச் சந்தை வீழ்ச்சிக்கு மத்தியில் டிரில்லியன் கணக்கான யூரோக்கள் ஒரே இரவில் கண்டுபிடிக்கப்பட்டன. ஆயினும்கூட, இந்தச் செல்வமானது ஐரோப்பாவில் மட்டும் 1.6 மில்லியனுக்கும் அதிகமான உயிர்களைக் கொன்ற வைரஸை அகற்றுவதற்காகவோ அல்லது முக்கியமான உள்கட்டமைப்பு முதலீடுகளுக்கு நிதியளிப்பதற்காகவோ செல்லவில்லை, மாறாக யாருக்கும் பதிலளிக்க தேவையில்லாத செல்வந்த முதலீட்டாளர்களின் ஒரு சிறிய உயரடுக்கை பிணை எடுப்பதற்காகச் சென்றது.

தொற்றுநோயைப் போலவே, புவி வெப்பமடைதலை எதிர்த்துப் போராடுவதற்குத் தேவையான நடவடிக்கைகள் விஞ்ஞானிகளுக்கும் அரசாங்க அதிகாரிகளுக்கும் ஒரே மாதிரியாக நன்கு தெரியும், ஆனால் முதலாளித்துவ தேசிய-அரசு அமைப்பின் சர்வதேச நிறுவனங்கள் ஒரு ஒருங்கிணைந்த பதிலை ஒழுங்கமைக்கத் தவறிவிட்டன. மாறாக, அவர்கள் போரில் ஆழமாக மூழ்கியுள்ளனர். ஐரோப்பிய ஒன்றிய அரசாங்கங்கள் இராணுவ செலவு அதிகரிப்பில் நூற்றுக்கணக்கான பில்லியன் யூரோக்களுக்கு உறுதியளிக்கின்றன, உக்ரேனில் ரஷ்யா மீது நேட்டோ நடத்தி வரும் போரை தீவிரப்படுத்த தயாராகி வருகின்றன.

தற்போதைய வறட்சியானது, மிகவும் மோசமான 2015 பாரிஸ் உடன்படிக்கைகளை அம்பலப்படுத்துகிறது, இது புவி வெப்பமடைதலை நூற்றாண்டின் இறுதிக்குள் தொழில்துறைக்கு-முந்தைய மட்டங்களிலிருந்து 2°c ஆக மட்டுப்படுத்த முற்படுகிறது. புவி வெப்பமடைதலின் வெறும் 1.2°c காரணமாக ஏற்படும் தீவிர வானிலை, ஏற்கனவே பேரழிவை ஏற்படுத்துகிறது. இன்று ஐரோப்பாவில் ஏற்பட்டுள்ள பேரழிவைப் பார்க்கும்போது, ஒருவர் கேட்க வேண்டும்: முதலாளித்துவ அரசாங்கங்கள் பாரிஸ் உடன்படிக்கைகளை செயல்படுத்தினாலும், ஐரோப்பாவின் ஆறுகள் எத்தனை வறண்டு போகும், அதன் விவசாய நிலங்கள் எவ்வளவு தரிசாகிப் போகும்?

பூகோள வெப்பமயமாதலின் பேரழிவு, முழு ஆளும் உயரடுக்கிற்கும் எதிராக, ஐரோப்பிய மற்றும் சர்வதேச தொழிலாள வர்க்கத்தில் அதைத் தடுக்க ஒரு இயக்கம் கட்டமைக்கப்படும் வரை தொடரும். இதற்கு ஐரோப்பாவின் அரசியல் ஸ்தாபகத்தின் முன்னணி 'சுற்றுச்சூழலியல்' கட்சி என்று கூறப்படும் ஜேர்மன் பசுமைக் கட்சியை மட்டும் பார்த்தால் போதும்: அவர்கள் ஐரோப்பிய ஒன்றிய மறு ஆயுதமாக்கல் பிரச்சாரத்திற்கு தலைமை தாங்குகிறார்கள், அதே நேரத்தில் போர்க்கால எரிசக்தி நெருக்கடிக்கு மத்தியில், மின் உற்பத்திக்கு அதிக மாசுபடுத்தும் நிலக்கரியை மீண்டும் பயன்படுத்த ஒப்புதல் அளித்துள்ளனர்.

புவி வெப்பமடைதலை எதிர்த்துப் போராட விரும்பும் இளைஞர்களும் தொழிலாளர்களும் ஆளும் உயரடுக்கின் நடவடிக்கை எடுக்க மறுப்பதிலிருந்தும், புதிய உலகப் போரை நோக்கிய அதன் தற்கொலை உந்துதலிலிருந்தும் தேவையான முடிவுகளை எடுக்க வேண்டும். நாகரிகத்திற்கான இந்த அச்சுறுத்தல்களைக் முறியடிக்க, அராஜக இலாபகர முறைக்கு முடிவுகட்டுவதோடு விஞ்ஞான ரீதியாக திட்டமிடப்பட்ட, சோசலிச உலகப் பொருளாதாரத்தால் மாற்றியமைக்கப்பட வேண்டும். இதற்கு நிதி பிரபுத்துவத்தின் கைகளில் இருந்து உலகப் பொருளாதாரத்தை கட்டுப்படுத்துவதற்கு தொழிலாள வர்க்கத்தில் ஒரு வெகுஜன போர் எதிர்ப்பு மற்றும் சோசலிச இயக்கத்தை கட்டியெழுப்ப வேண்டும், மேலும் அதை தனியார் இலாபத்திற்கு அல்ல, சமூக தேவைக்கு அடிபணியச் செய்ய வேண்டும்.