மொழிபெயர்ப்பின் மூலக் கட்டுரையை இங்கே காணலாம். 

புதனன்று, ரஷ்ய மற்றும் பிரெஞ்சு பாதுகாப்பு மந்திரிகளான செர்ஜி ஷோய்கு மற்றும் செபஸ்டியன் லெகோர்னு ஆகியோர் தொலைபேசி மூலம் பேசினர், ஷோய்கு உக்ரேனில் போரை முடிவுக்குக் கொண்டுவர பேச்சுவார்த்தைகளை முன்மொழிந்தார் மற்றும் அந்நாட்டிற்கு துருப்புக்களை அனுப்பும் பிரெஞ்சு திட்டங்களை விமர்சித்தார். மாஸ்கோவில் உள்ள குரோகஸ் நகர மண்டபத்தில் மார்ச் 22 பயங்கரவாத தாக்குதலில் பிரெஞ்சு தொடர்பு குறித்தும் ஷோய்கு லெகோர்னுவுக்கு அழுத்தம் கொடுத்தார். 

பிரெஞ்சு மற்றும் ரஷ்ய ஆதாரங்கள் இந்த அழைப்புக்கு கடுமையாக முரண்பட்ட தகவல்களைக் கொடுத்தாலும், பிரெஞ்சு அதிகாரிகள் ரஷ்யாவின் சமாதானப் பேச்சு வார்த்தைகளை சந்தேகத்திற்கு இடமின்றி நிராகரித்தனர். அதன் நேட்டோ நட்பு நாடுகளின் ஆதரவுடன், பாரிஸ் உக்ரைனுக்கு துருப்புக்களை அனுப்பும் திட்டத்தைத் தொடர்கிறது, இது அணு ஆயுத அரசுகளுக்கு இடையே போருக்கு மட்டுமே வழிவகுக்கும். 

தொலைபேசி அழைப்பில் ரஷ்ய பாதுகாப்பு அமைச்சக அறிக்கையின்படி, “உக்ரேன் மீது பேச்சுவார்த்தை நடத்த ஒரு குறிப்பிடத்தக்க விருப்பம் இருந்தது. ... அமைதிக்கான இஸ்தான்புல் முன்முயற்சியே இதற்கான தொடக்கப் புள்ளியாக இருக்கக்கூடும்.” 

ஷோய்கு எந்த முன்முயற்சியை கருதினார் என்பதில் முரண்பட்ட அறிக்கைகள் இருந்தன. கடந்த மாதம் உக்ரேனிய ஜனாதிபதி வொலோடிமிர் ஜெலென்ஸ்கி துருக்கிக்கு விஜயம் செய்தபோது, துருக்கிய ஜனாதிபதி ரெசெப் தயிப் எர்டோகன் முன்வைத்த சமாதான பேச்சுவார்த்தைகளுக்கான முன்மொழிவை ரஷ்ய ஆதாரங்கள் குறிப்பிட்டன. ஏப்ரல் 2022 இல் துருக்கியில் ரஷ்ய மற்றும் உக்ரேனிய பேச்சுவார்த்தையாளர்களுக்கு இடையிலான சமாதான ஒப்பந்தத்தை பிரெஞ்சு ஆதாரங்கள் சுட்டிக்காட்டின, இந்த ஒப்பந்தத்தை அப்போதைய பிரிட்டிஷ் பிரதமர் போரிஸ் ஜோன்சன் உக்ரேனிய அதிகாரிகளை கைவிட கட்டாயப்படுத்தினார். 

ரஷ்ய தகவல்களின்படி, பாரிஸ் உக்ரைனுக்கு துருப்புக்களை அனுப்பினால், “அது பிரான்சுக்கே பிரச்சனைகளை உருவாக்கும்” என்று ஷோய்கு லெகோர்னுவை எச்சரித்தார். 

குரோகஸ் சிட்டி ஹால் தாக்குதல் குறித்து ஷோய்கு லெகோர்னுவிடம் கூறுகையில், ரஷ்ய விசாரணையாளர்களிடம் உக்ரேனிய ஈடுபாடு இருப்பதற்கான ஆதாரம் உள்ளது என்று கூறியதுடன், “கியேவ் ஆட்சி அதன் மேற்கத்திய மேற்பார்வையாளர்களின் ஒப்புதல் இல்லாமல் எதையும் செய்யவில்லை. இந்த விடயத்தில், பிரெஞ்சு சிறப்பு சேவை பிரிவுகள் இதன் பின்னால் இல்லை என்று நாங்கள் நம்புகிறோம்,” என்றார். 

பிரெஞ்சு அதிகாரிகள் உடனடியாக உக்ரேன் சமாதானப் பேச்சுக்களில் எந்த ஆர்வமும் இல்லை என்று மறுத்தனர். பிரெஞ்சு அதிகாரிகள் உடனடியாக உக்ரேனில் சமாதானப் பேச்சுக்களில் ஆர்வம் காட்டவில்லை என்று மறுத்தனர். ஷோய்கு “உக்ரைன் மீதான பேச்சுவார்த்தையை மீண்டும் தொடங்க தயாராக இருந்தார்” என்று பிரெஞ்சு பாதுகாப்பு அதிகாரிகள் ஏ.எஃப்.பி செய்தி நிறுவனத்திடம் தெரிவித்தனர், ஆனால் உக்ரைன் குறித்து “பிரான்ஸ் எதையும் ஏற்கவோ அல்லது முன்மொழியவோ இல்லை”. ரஷ்ய பாதுகாப்பு மந்திரிக்கு அவர் செய்த தொலைபேசி அழைப்பைப் பற்றி அவர் பேசுகையில் கூட, பிரெஞ்சு பாதுகாப்பு அமைச்சகம் Le Monde பத்திரிகைக்கு அப்பட்டமாக இவ்வாறு அறிவித்தது: “இந்த அழைப்பை ரஷ்யர்களுடன் மீண்டும் தொடர்பு கொள்ளும் ஒரு முயற்சியாக பார்க்கக்கூடாது”.  

ஆயினும்கூட, ரஷ்ய மற்றும் பிரெஞ்சு அறிக்கைகளின்படி, பிரான்சின் அவசர வேண்டுகோளின் பேரில் இந்த அழைப்பு தொடங்கப்பட்டது. “இந்த தொலைபேசி அழைப்பு ஏற்படுத்தக்கூடிய தொந்தரவுகள் குறித்து நனவுபூர்வமாக, பிரெஞ்சு பாதுகாப்பு அமைச்சகம் அந்த அழைப்பு குறித்து அதன் ஐரோப்பிய சமதரப்பினர் பலரை எச்சரித்ததுடன், அது முடிந்த பின்னர், குறிப்பாக கையாளளுக்கான ரஷ்ய முயற்சிகளைத் தவிர்ப்பதற்காக, அவர்களைத் தொடர்பு கொண்டது,” என்று Le Monde  குறிப்பிட்டது. 

“பயங்கரவாதத்திற்கு எதிரான போராட்டமானது அரசாங்கத்தின் முன்னுரிமையாகும், அதற்கும் உக்ரைனுக்கும் எந்த தொடர்பும் இல்லை” என்று பிரெஞ்சு பாதுகாப்பு அதிகாரிகள் தெரிவித்தனர். மாஸ்கோவில் இஸ்லாமிய அரசு-கொராசான் (ஐஎஸ்-கே) குழுவுக்கு விசுவாசமானதாகக் கூறப்படும் தஜிக் இனத்தவர்களால் நடத்தப்பட்ட கொடூரமான தாக்குதலை அவர்கள் சுட்டிக்காட்டினர், அதில் 144 பேர் கொல்லப்பட்டனர் மற்றும் 551 பேர் காயமடைந்தனர். 

பயங்கரவாத எதிர்ப்பு நடவடிக்கைகள் மீது ரஷ்யாவுடன் “ஒரு தீவிர பரிமாற்றத்திற்கு பிரான்ஸ் தயாராக உள்ளது” என்று லெகோர்னு மீண்டும் வலியுறுத்தினார், மேலும் “இந்த தாக்குதலை உக்ரேனுடன் தொடர்புபடுத்த பிரான்சிடம் எந்த தகவலும் இல்லை” என்று ஷோய்குவிடம் தெரிவித்தனர். 

குரோகஸ் சிட்டி தாக்குதலை “சுரண்டுவதற்கான அனைத்து முயற்சிகளையும்” மாஸ்கோ நிறுத்த வேண்டும் என்றும் லெகோர்னு கோரினார் என்றும் அவர்கள் கூறினர். 

குரோகஸ் சிட்டி தாக்குதலின் அரசியல் விளைவுகள் குறித்து லெகோர்னு கவலை கொண்டிருப்பதாக ரஷ்ய பாதுகாப்பு அமைச்சக அறிக்கை உறுதிப்படுத்தியது. “உக்ரைன் மற்றும் மேற்கத்திய நாடுகள் பயங்கரவாத தாக்குதலில் ஈடுபடவில்லை என்று லெகோர்னு தொடர்ந்து கூறி வந்தார், தாக்குதலுக்கு ISIS தான் பொறுப்பு என்று கூறினார்.”  ISIS (Islamic State of Iraq and Syria- ஈராக் மற்றும் சிரியாவின் இஸ்லாமிய அரசு) என்பது இஸ்லாமிய அரசு குழுவின் முன்னாள் பெயர் ஆகும். 

ஷோய்கு-லெகோர்னு அழைப்பானது, உக்ரேனில் நேட்டோவிற்கும் ரஷ்யாவிற்கும் இடையிலான போர் தீவிரமடையும் உடனடி அபாயம் குறித்த ஒரு எச்சரிக்கையாகப் பார்க்கப்பட வேண்டும். இந்த ஆபத்து பிரதானமாக ரஷ்ய ஜனாதிபதி விளாடிமீர் புட்டினின் சோவியத்துக்குப் பிந்தைய முதலாளித்துவ ஆட்சியில் இருந்து வரவில்லை, மாறாக பிரான்ஸ் மற்றும் அதன் நேட்டோ கூட்டாளிகளிடம் இருந்து வருகிறது. ஷோய்குவின் சமாதான பேச்சுவார்த்தைகளுக்கான முன்மொழிவை பிரான்ஸ் நிராகரித்தமையானது, ரஷ்யாவை ஐரோப்பா முழுவதற்கும் ஒரு அச்சுறுத்தலாக சித்தரிக்கும் பிரச்சாரத்தை மறுதலிப்பதுடன், மாஸ்கோ அல்ல, நேட்டோவே போரை உந்துகிறது என்பதைக் காட்டுகிறது. 

பிரெஞ்சு அரசாங்கமானது, பொய்கள் மற்றும் திரித்தல்களின் அடிப்படையில், மக்களின் முதுகுக்குப் பின்னால் ரஷ்யாவுடன் போருக்குத் தயாரிப்பு செய்து வருகிறது. உக்ரைன் குறித்து லெகோர்னு என்ன சொன்னார் என்பதை பாரிஸில் யாரும் வெளிப்படுத்தவில்லை. உக்ரைன் குறித்து லெகார்னு என்ன குறிப்பிட்டார் என்பதை பாரிஸில் யாரும் வெளியிடவில்லை. எவ்வாறிருப்பினும், உக்ரேனிய போரில் ரஷ்யாவின் ஈடுபாடு —அதன் விளைவாக, பிரெஞ்சு இராணுவம் அங்கு நிலைநிறுத்தப்பட்டால் அதை இலக்கு வைப்பதற்கான சாத்தியமான நடவடிக்கைகள் மீது— அதிகாரம் கொண்டுள்ள ஷோய்குவை லெகோர்னு தொடர்பு கொண்டார் என்பதை நம்புவது கடினம் ஆகும்.

எவ்வாறாயினும், உத்தியோகபூர்வ பிரெஞ்சு அறிக்கைகளின் அடிப்படையில், மாஸ்கோ பயங்கரவாத தாக்குதல் பற்றிய விவாதம் ஏற்றுக்கொள்ள முடியாதது என்பதே புட்டினுக்கு பாரிஸ் அனுப்பும் முக்கிய செய்தியாகத் தோன்றுகிறது. 

லிபியா மற்றும் சிரியாவில் 2011 இல் நேட்டோ தொடங்கிய போர்களின் போது பிரான்ஸ் பகிரங்கமாக இஸ்லாமிய போராளிகள் குழுக்களுக்கு ஆயுதமளித்தது. ஆனால் இஸ்லாமிய பயங்கரவாதிகள் 2015 இல் பாரிஸில் இரண்டு இரத்தந்தோய்ந்த தாக்குதல்களை நடத்திய பின்னர் பிரெஞ்சு அதிகாரிகளும் ஊடகங்களும் இந்த தொடர்புகளைக் குறைத்துக் காட்டினர். மக்ரோனுக்கு முன்பிருந்த ஜனாதிபதியான பிரான்சுவா ஹாலண்ட், இரண்டாண்டு கால அவசரகால நிலையைத் திணித்தார், அது அடிப்படை ஜனநாயக உரிமைகளை இடைநிறுத்தியது, இஸ்லாமிய வெறுப்பு நவ-பாசிசவாத சக்திகளைப் பலப்படுத்தியது, அத்துடன் வேலைநிறுத்தங்கள் அல்லது போராட்டங்களில் ஈடுபட்ட தொழிலாளர்களைத் தாக்குவதற்கும் சிறையில் அடைப்பதற்கும் இப்போது பயன்படுத்தப்படும் பொலிஸ் அதிகாரங்கள் பரந்தளவில் கட்டியெழுப்பப்படுவதற்கு இட்டுச் சென்றது. 

நேற்று, மக்ரோன், ஹாலண்ட் மற்றும் பிற பிரெஞ்சு அதிகாரிகள், பிரான்சுக்கும் மாஸ்கோ தாக்குதலுக்கும் இடையே ஒரு சாத்தியமான தொடர்பை பரிந்துரைத்ததற்காக ஷோய்குவை கண்டனம் செய்தனர். France Inter  பொது வானொலியில், ஹாலண்ட் ரஷ்யாவுடனான உறவுகளை முறித்துக் கொள்ள அழைப்பு விடுத்தார். அவர் பின்வருமாறு கூறினார்: “ரஷ்யா இந்த வகையான விவாதங்களை எவ்வாறு கருவியாக்குகிறது என்பதை நீங்கள் பார்த்திருக்கிறீர்கள், மேலும் மாஸ்கோவில் நடந்த தாக்குதல்களை பிரான்ஸ் ஆதரித்திருக்கக்கூடும் என்று கூட தெரிவிக்கிறது (...) ரஷ்யாவுடன் தொடர்பு வைத்துக் கொள்ளக் கூடாது என்பதே எனது பரிந்துரை” என்றார். 

இந்தக் கோடைகால ஒலிம்பிக் போட்டிகளுக்கான நீச்சல் தடாகத்தில் நடந்த பத்திரிகையாளர் கூட்டத்தில் ஷோய்குவின் கருத்துக்களை “வினோதமானது மற்றும் அச்சுறுத்துவது” என்று மக்ரோன் தாக்கினார். 2024 ஒலிம்பிக்கை ரஷ்யா “குறிவைக்கும்” என்று எந்த ஆதாரமும் இல்லாமல் கூறிய மக்ரோன், மாஸ்கோவின் தாக்குதல் குறித்து இவ்வாறு கூறினார்: “இது அபத்தமானது, பிரான்ஸ் பின்னால் இருக்கலாம், உக்ரேனியர்கள் பின்னால் இருக்கிறார்கள் என்று சொல்வது ... இது எந்த அர்த்தமும் இல்லை. ஆனால் இது தகவல்களின் கையாளுதலாகும், இது இன்று ரஷ்யாவால் பயன்படுத்தப்படும் போரின் ஆயுதக் களஞ்சியத்தின் ஒரு பகுதியாகும்.” 

யதார்த்தத்தில், அமெரிக்க அதிகாரிகளின் சொந்த அறிக்கைகளே மாஸ்கோ தாக்குதலில் நேட்டோ சம்பந்தப்பட்டிருக்கும் சாத்தியம் குறித்த கேள்வியை எழுப்புகின்றன: அதாவது அவர்கள் உடனடியாக, எந்த விசாரணையும் இல்லாமல், உக்ரேன் சம்பந்தப்படவில்லை என்று கூறியதுடன், IS-K (கொராசான் இசுலாமிய அரசு ) மீது பழிபோட்டனர். ஆனால் IS-K ஆனது தலிபான்களை எதிர்த்துப் போராடிய நேட்டோ சார்பு ஆப்கான் ஆட்சியின் பல சிப்பாய்களையும் உளவாளிகளையும் நியமித்தது, மேலும் 2021 இல் தாலிபான்கள் காபூலைக் கைப்பற்றியபோது தலைமறைவாகினர். ஆப்கானிஸ்தானில் நேட்டோ ஆக்கிரமிப்பில் பங்கு பெற்ற பிரெஞ்சு இரகசியப் பிரிவுகள் அத்தகைய சக்திகளிடையே பரந்த தொடர்புகளைக் கொண்டுள்ளன. 

குரோகஸ் நகர அரங்க தாக்குதலுடன் பிரான்சை தொடர்புபடுத்தி கிரெம்ளின் எந்தவொரு உறுதியான குற்றச்சாட்டையும் முன்வைப்பதற்கு முன்னரே கூட, ஹாலண்டும் மக்ரோனும் உக்ரேன் மற்றும் இஸ்லாமிய குழுக்களுடனான அவர்களின் தொடர்புகள் குறித்த அம்பலப்படுத்தல்களில் இருந்து வரும் அரசியல் விளைவுகளை முன்கூட்டியே தடுக்க முயன்று வருகின்றனர். அணு ஆயுதப் போர் அபாயத்தை ஏற்படுத்தினாலும் கூட, ரஷ்யாவைத் தாக்குவதற்கான திட்டங்களை அவைகள் இரட்டிப்பாக்கி வருகின்றன. 

இது, ரஷ்ய முதலாளித்துவ ஆட்சி வழமையாக அதன் “மேற்கத்திய பங்காளிகள்” என்று அழைக்கும் நேட்டோ ஏகாதிபத்திய சக்திகளுடன் ஒரு உடன்பாட்டை பேரம்பேசுவதற்கு உக்ரேனில் அதன் தற்போதைய போர்க்கள மேலாதிக்கத்தைப் பயன்படுத்துவதற்கான அதன் முயற்சியின் திவால்நிலையை அம்பலப்படுத்துகிறது. 

புட்டின் சர்வதேச நிதியாளர்கள் மற்றும் அரசியல்வாதிகளை பேச்சுவார்த்தைக்காக சந்திக்கும் வால்டாய் கிளப்பின் (Valdai Club) ஒரு அதிகாரியான டிமோஃபெய் போர்டாச்சேவ் (Timofei Bordachev), கிரெம்ளின் ஆதரவு செய்தி தளமான வ்ஸ்க்லியாட் (Vzglyad ) க்கு இந்த வாய்ப்பை முன்வைத்தார். லெகோர்னு உடனான ஷோய்குவின் அழைப்பை அவர் பாராட்டினார், அவர் இவ்வாறு கூறினார்: “இந்த உள்ளடக்கத்தில், சமீபத்தில் அவற்றின் அறிக்கைகளால் ஒரு மோசடியை ஏற்படுத்திய நாடுகளுடன் கூட, ஆக்கபூர்வமான பேச்சுவார்த்தையில் ஈடுபடுவதற்கான அதன் விருப்பத்தை ரஷ்யா முழுமையாக எடுத்துக்காட்டுவது முக்கியமாகும்.” 

ஷோய்குவின் சமாதான முயற்சிகளின் தோல்வியானது, ஏகாதிபத்தியத்துடன் எந்த “ஆக்கபூர்வமான உரையாடலும்” இல்லை என்பதைக் காட்டுகிறது, அது உரையாடலை நாடவில்லை, மாறாக போரையும் உலக மேலாதிக்கத்தையும் நாடுகிறது. 1991 இல் சோவியத் ஒன்றியத்தைக் கலைத்த ஸ்ராலினிச ஆட்சியின் “ஏகாதிபத்தியத்துடன் சமாதான சகவாழ்வு” என்ற தோல்வியுற்ற கருத்துருவின் ஒரு திருத்தப்பட்ட பதிப்பைப் பயன்படுத்தி, புட்டின் ஆட்சி ஒரு முட்டுச்சந்தில் உள்ளது. நேட்டோ ஆதரவிலான உக்ரேனிய ஆட்சிக்கு எதிரான போர்க்களத்தில் அதன் வெற்றிகள், நேட்டோ கூட்டணியுடனான வெளிப்படையான போருக்கு நெருக்கமாக மட்டுமே அதை கொண்டு வருகின்றன. 

தொழிலாள வர்க்கத்தின் வெகுஜன எதிர்ப்பை அணிதிரட்டுவதே யுத்தத்தை நிறுத்துவதற்கான ஒரே வழியாகும். 68 சதவீத பிரெஞ்சு மக்களும், 80 சதவீத ஜேர்மனியர்களும், 90 சதவீத போலந்து மக்களும் உக்ரைனுக்கு படைகளை அனுப்புவதை எதிர்க்கின்றனர் என்று கருத்துக் கணிப்புகள் தெரிவிக்கின்றன. தொழிலாள வர்க்கத்தில் —நேட்டோ நாடுகளிலும், ரஷ்யா மற்றும் உக்ரேனிலும்— ஒரு சர்வதேச, சோசலிச போர்-எதிர்ப்பு இயக்கத்தைக் கட்டியெழுப்புவதன் மூலம் இந்த உணர்வு அணித்திரட்டப்பட வேண்டும்.