மொழிபெயர்ப்பின் மூலக் கட்டுரையை இங்கே காணலாம்

வடகிழக்கு உக்ரேனில் ரஷ்ய இராணுவம் ஒரு பெரிய இராணுவ தோல்வியை சந்தித்த பத்து நாட்களுக்குப் பின்னர், ரஷ்யா ஆக்கிரமித்த பிரதேசத்தின் பத்தில் ஒரு பகுதியிலிருந்து துருப்புக்கள் தப்பி ஓடிய நிலையில், கிரெம்ளின் மோதலின் குறிப்பிடத்தக்க விரிவாக்கத்திற்கு தயாராகி வருவதற்கான அறிகுறிகள் உள்ளன.

செவ்வாயன்று நேரலையில் ஒளிபரப்பப்பட்ட அமர்வில், ரஷ்ய நாடாளுமன்றத்தின் (டுமா) பெரும்பான்மையானவர்கள், இரண்டாவது மற்றும் மூன்றாவது வாசிப்புகளில் ஒரு புதிய மசோதாவுக்கு ஒப்புதல் அளித்தனர், இது முதல் முறையாக, ரஷ்ய குற்றவியல் குறியீட்டில் 'அணிதிரட்டல்', 'இராணுவச் சட்டம்' மற்றும் 'போர் காலம்' என்ற சொற்களை அறிமுகப்படுத்தும்.

இந்த மசோதாவின் அடிப்படையில், இராணுவச் சட்டத்தின் நிலைமைகளின் கீழ், சேமப்படையாக உள்ள ரஷ்யர்கள் இப்போது இராணுவ சேவையைத் தவிர்த்தால் அல்லது வெளியேறினால் குற்றவியல் வழக்குக்கு உட்படுத்தப்படுவார்கள். பொதுமக்களைப் பொறுத்தவரை, இந்த மசோதா 'அணிதிரட்டல் காலத்தில் அல்லது இராணுவச் சட்டத்தின் நிலைமைகளின் கீழ், [மற்றும்] போர் காலங்களில்' செய்யப்படும் எந்தவொரு குற்றத்திற்கும் ஒரு புதிய, மோசமான சூழ்நிலையைச் சேர்க்கிறது.”

மேலும், இந்த மசோதா போர்க் கைதிகளாக தங்களை தானாக முன்வந்து விட்டுக்கொடுக்கும் படையினருக்கான சிறைத் தண்டனைகளை கணிசமாக அதிகரிக்கிறது —அவர்கள் 3 முதல் 10 ஆண்டுகள் வரை சிறைத்தண்டனை அனுபவிப்பார்கள்— மற்றும் போர் நேரத்தில் கொள்ளையடித்ததற்காக, 15 ஆண்டுகள் வரை சிறைத்தண்டனை விதிக்கப்படும். தங்களின் இராணுவத் தளபதிகளின் உத்தரவுகளை பின்பற்றத் தவறும் போரில் உள்ள வீரர்கள் 2 முதல் 3 ஆண்டுகள் வரை சிறைத்தண்டனை அனுபவிப்பார்கள். பாதுகாப்பு உற்பத்திக்கான அரசு உத்தரவுகளை நிறைவேற்றத் தவறுவது, அத்துடன் அரசு ஒப்பந்தங்களை மீறுவது ஆகியவற்றுக்கு 10 ஆண்டுகள் வரை சிறைத்தண்டனை விதிக்கப்படும்.

இந்த மசோதா, ஆளும் ஐக்கிய ரஷ்யா கட்சி, தீவிர வலதுசாரி லிபரல் ஜனநாயகக் கட்சி, 'புதிய மக்கள்' கட்சி, அத்துடன் இரண்டு முக்கிய விசுவாசமான எதிர்க்கட்சிகளான ரஷ்யா மற்றும் ரஷ்ய கூட்டமைப்பின் ஸ்ராலினிச கம்யூனிஸ்ட் கட்சி ஆகியவற்றின் பிரதிநிதிகளின் கூட்டணியால் செப்டம்பர் 19 திங்கள் அன்று முதன்முதலில் அறிமுகப்படுத்தப்பட்டது.

ரஷ்ய கூட்டாட்சி கவுன்சில் செப்டம்பர் 21 புதன்கிழமை இந்த மசோதா மீது வாக்களிக்கும், பின்னர் அது சட்டத்தில் கையெழுத்திட ஜனாதிபதி விளாடிமிர் புட்டினுக்கு அனுப்பிவைக்கப்படும், இது ஒரு சில நாட்களுக்குள் முடிக்கப்படும்.

இந்த மசோதா ரஷ்ய வர்ணனையாளர்களால் கிரெம்ளின் இராணுவச் சட்டத்தின் பிரகடனத்தையும் அணிதிரட்டலையும் தயாரிக்கிறது என்பதற்கான அடையாளமாக விளக்கப்பட்டுள்ளது. புட்டினின் முதல் ஜனாதிபதி நிர்வாகத்தில் பணியாற்றிய ஒரு அரசியல் நிபுணரான டிமிட்ரி ஜுரவ்லேவ், 'ஒரு அணிதிரட்டல் மிக விரைவில் எதிர்காலத்தில் அறிவிக்கப்படும்' என்று மசோதா சுட்டிக்காட்டுகிறது என கூறினார். மசோதாவின் இரண்டாவது மற்றும் மூன்றாவது வாசிப்பில் பிரதிநிதிகள் திருத்தங்களை உடனடியாக ஏற்றுக்கொண்டனர் என்பது அவர்கள் அவசரமாக இருப்பதைக் குறிக்கிறது.”

ஒரு அணிதிரட்டலை ரஷ்ய ஜனாதிபதியால் மட்டுமே பிரகடனப்படுத்தப்பட முடியும் மற்றும் அது நாட்டின் முழு அல்லது ஒரே பகுதியிலும் திணிக்கப்படலாம்.

பெப்ரவரியில் உக்ரேன் படையெடுப்பிற்குப் பின்னர், ரஷ்யாவின் பொது மக்களின் முன்னே, நடப்பது ஒரு போர் அல்ல, மாறாக 'சிறப்பு இராணுவ அணிதிரட்டல்' என்று கிரெம்ளின் வலியுறுத்தியது. உக்ரேனிய மண்ணில் நேட்டோவிற்கும் ரஷ்யாவிற்கும் இடையே இன்னும் வெளிப்படையாகவும் நேரடியாகவும் நடந்த போராக மாறியுள்ளபோதும், 'போர்' என்ற சொல் ஊடகங்கள் மற்றும் பொது விவாதங்களில் இருந்து தடைசெய்யப்பட்டுள்ளது. ரஷ்ய இராணுவத்தின் ஒரு சிறிய பகுதியே உக்ரேனுக்கு அனுப்பப்பட்டுள்ளது, மேலும் சண்டையிடும் அனைவரும் தானாக முன்வந்து அங்கு இருப்பதாக கிரெம்ளின் தொடர்ந்து வலியுறுத்தியுள்ளது.

எவ்வாறாயினும், உக்ரேனின் வடகிழக்கில் ரஷ்ய பாதுகாப்புகள் சரிந்ததை அடுத்து, கடந்த வாரம் தன்னலக்குழுவுக்குள் கசப்பான மோதல்கள் வெடித்தன. பீட்டர்ஸ்பேர்க்கில் அமெரிக்க-சார்பு தாராளவாத அரசியல்வாதிகள் 'தேச துரோகத்தின்' அடிப்படையில் புட்டினை பதவி நீக்கம் செய்ய ஒரு மனுவைத் தொடுத்த போது, முன்னணி கிரெம்ளின் சார்பு அரசியல்வாதியான பரம-ஸ்ராலினிஸ்டும் ரஷ்ய கூட்டமைப்பின் கம்யூனிஸ்ட் கட்சியின் தலைவருமான ஜெனடி ஜியுகனோவ் ஒரு அணிதிரட்டல் மற்றும் ஒரு போர் உண்மையில் நடக்கிறது என்பதை பகிரங்கமாக ஒப்புக்கொள்ள அழைப்பு விடுத்தார். பதிலுக்கு, கிரெம்ளின் ஒரு பொது அணிதிரட்டல் என்பது அரசாங்கத்தில் விவாதப் பொருளாகக் கூட இல்லை என்று வலியுறுத்தியது.

ஆயினும்கூட, ரஷ்ய ஊடகங்கள் பொது அணிதிரட்டல் என்னவாக இருக்கும் என்பது பற்றிய கட்டுரைகளால் நிரப்பப்பட்டுள்ளன. பல பிராந்திய ஆளுநர்களும், வடக்கு காகசஸின் பிராந்தியத் தலைவர் ரம்ஜான் கதிரோவின் ஒரு 'சுய அணிதிரட்டலை' செயல்படுத்துவதற்கான முன்மொழிவுக்கு ஆதரவை வெளிப்படுத்தியுள்ளனர்.

மோதலின் குறிப்பிடத்தக்க விரிவாக்கத்திற்கு மாஸ்கோ தயாராகி வருகிறது என்பதற்கான மற்றொரு அறிகுறியாக, இந்த மசோதா பற்றிய செய்தி வெளியான சிறிது நேரத்திலேயே, கிரெம்ளின் செப்டம்பர் 23 முதல் 27 வரை கிழக்கு மற்றும் தென்கிழக்கு உக்ரேனில் ஆக்கிரமிக்கப்பட்ட லுகான்ஸ்க், டொனெட்ஸ்க், சாபோரிஜ்ஜியா மற்றும் கெர்சன் பகுதிகளில் ரஷ்ய கூட்டமைப்பில் சேருவது குறித்து வாக்கெடுப்பு நடத்தப்போவதாக அறிவித்தது.

இந்த வாக்கெடுப்புகள் சந்தேகத்திற்கு இடமின்றி, பிப்ரவரியில் இருந்து கிரெம்ளின் என்ன இராணுவ ஆதாயங்களைப் பெற்றாலும் ரஷ்ய துருப்புக்களின் நலிவடைந்து வரும் மன உறுதியை வலுப்படுத்துவதற்கான ஒரு முயற்சியாகும்.

அவரது டெலிகிராம் சேனலில், முன்னாள் ஜனாதிபதியும் பாதுகாப்பு கவுன்சிலின் துணைத் தலைவருமான டிமிட்ரி மெட்வெடேவ், வாக்கெடுப்புகள் இந்த பிராந்தியங்களை ரஷ்ய பிரதேசத்தின் ஒரு பகுதியாக மாற்றும் என்று கூறினார். அவர்கள் இன்னும் தாக்கப்பட்டால், ரஷ்ய இராணுவம் அணு ஆயுதங்களை நிலைநிறுத்துவதற்கான உரிமையை வைத்திருக்கும்.

தெளிவாக, கிரெம்ளின் தன்னலக்குழுவின் திவாலான கணக்கீடு என்னவென்றால், இது உக்ரேனில் ஏகாதிபத்திய பினாமி போர் இராணுவம் தாக்குவதைத் தடுக்கலாம் என்பதுதான். ஆனால் அது மேற்கத்திய ஏகாதிபத்தியம் மற்றும் உக்ரேனிய தன்னலக்குழு மற்றும் இராணுவத்தில் உள்ள அதன் கைக்கூலிகளால் போரை மேலும் அதிகரிக்கச் செய்ய பற்றிக்கொள்ளப்படும் என்பதில் எந்த சந்தேகமும் இல்லை.

ஏற்கனவே, அமெரிக்கா மற்றும் கியேவ் ஆகிய இரண்டும் உடனடியாக வாக்கெடுப்பு நடத்தப்படுவதை கண்டித்து, அவற்றை 'போலி வாக்கெடுப்பு' என அழைத்தன. உக்ரேனிய வெளியுறவு மந்திரி டிமிட்ரி குபேலா, 'உக்ரேனுக்கு அதன் பிரதேசங்களை விடுவிக்க முழு உரிமையும் உண்டு, ரஷ்யா என்ன சொன்னாலும் அவர்களை விடுவித்துக்கொண்டே இருக்கும்' என்று வலியுறுத்தினார்.

கிரெம்ளினின் சமீபத்திய நகர்வுகள், எல்லாவற்றிற்கும் மேலாக, புட்டின் ஆட்சிக்கு மட்டுமல்ல, முழு ரஷ்ய ஆளும் வர்க்கத்தின் ஆழமான அரசியல் நெருக்கடியின் அறிகுறிகளாகும். கிரெம்ளினில் நிலவும் திசைதிருப்பலின் ஒரு தெளிவான அறிகுறியாக, பொது வாக்கெடுப்புகள் குறித்து புட்டின் ஆற்றிய தேசத்திற்கான உரை மாஸ்கோ நேரப்படி செவ்வாய்கிழமை இரவு திடீரென அறிவிக்கப்பட்டது, பின்னர் புதன்கிழமை அதிகாலை வரை திடீரென்று ஒத்திவைக்கப்பட்டது.

ரஷ்ய தன்னலக்குழுவின் நெருக்கடி, போரைப் போலவே, இறுதியில் ஸ்ராலினிச அதிகாரத்துவத்தால் சோவியத் ஒன்றியத்தை பேரழிவுகரமாக கலைத்ததன் விளைவாகும், அதில் இருந்துதான் ஆளும் தன்னலக்குழுக்கள் எழுந்தது. அதன் அனைத்துப் பிரிவுகளும், வெளியுறவுக் கொள்கை மீதான கசப்பான சர்ச்சைகளால் கிழிந்திருந்தாலும், இறுதியில் ஏகாதிபத்தியத்தைச் சார்ந்து இருக்கின்றன, மேலும் தொழிலாள வர்க்கத்திற்குள் ஒரு இயக்கத்தைத் தவிர வேறொன்றுக்கும் அது அஞ்சுவதில்லை.

உக்ரேன் மீதான கிரெம்ளினின் பிற்போக்குத்தனமான ஆக்கிரமிப்பு, ஏகாதிபத்திய சக்திகளை பேச்சுவார்த்தை மேசைக்கு கட்டாயப்படுத்த புட்டின் ஆட்சியின் அவநம்பிக்கையான முயற்சியாகும். இந்த முயற்சி பேரழிவை ஏற்படுத்தியிருக்கிறது. கிரெம்ளின் இந்தப் போருக்கு அடிப்படையாகக் கொண்ட 'தேசியப் பாதுகாப்பின்' முழு மூலோபாயமும், நம்பமுடியாத அளவிற்கு ஆக்கிரோஷமான விரிவாக்கம் மற்றும் அனைத்து ஏகாதிபத்திய சக்திகளின் போரின் நேரடித் தலையீடு ஆகியவற்றால் அடித்து நொறுக்கப்பட்டுவிட்டது.

இந்தியப் பிரதமர் நரேந்திர மோடியின் போர் குறித்த கண்டனத்திற்கு பதிலளிக்கும் விதமாக, திட்டமிட்டபடி போர் நடக்கவில்லை என்று தனது முதல் பொது ஒப்புதலில், புட்டின் கடந்த வாரம் வலியுறுத்தினார், 'இதை விரைவில் நிறுத்த எங்களால் முடிந்த அனைத்தையும் செய்வோம்.' 'துரதிர்ஷ்டவசமாக, எதிர்தரப்பு, உக்ரேனின் தலைமை', 'இராணுவ வழிகளில் அதன் இலக்குகளை அடைய' உறுதியாக இருப்பதாகவும், பேச்சுவார்த்தைகளை எதிர்த்ததாகவும் அவர் கூறினார்.

ஆனால் இந்த மோதலில் கியேவ் மற்றும் ரஷ்யாவின் எதிர்ப்பாளரின் பின்னால் உள்ள முக்கிய சக்தி, நிச்சயமாக, நேட்டோ ஆகும். வடகிழக்கில் தாக்குதல் நேட்டோவால் முன்மொழியப்பட்டு நேரடியாக தயாரிக்கப்பட்டது. அதைச் செயல்படுத்தும் உக்ரேனிய துருப்புக்கள் வாஷிங்டனால் ஆயுதம் ஏந்தப்பட்டு, பயிற்சியளிக்கப்பட்டு இயக்கப்பட்டன. இந்தத் தாக்குதல், இப்போது நடந்து கொண்டிருக்கும் போரின் விரிவாக்கத்தை துல்லியமாகத் தூண்டிவிடுவதை நோக்கமாகக் கொண்டது. பைனான்சியல் டைம்ஸின் வார்த்தைகளில், அது 'கிரெம்ளினை கயிற்றில் நிறுத்தியது, மேலும் படையெடுப்பு தொடங்கியதில் இருந்து ரஷ்ய ஜனாதிபதி தவிர்க்க முயற்சித்த படைத் தேர்வுகள்.'

புட்டின் ஆட்சியின் வீழ்ச்சியைக் கொண்டுவருவதற்கும், உண்மையில் ரஷ்யாவையே சிதைப்பதற்கும் போரை விரிவுபடுத்துவதற்கும், துரிதப்படுத்துவதற்கும் தங்களால் இயன்ற அனைத்தையும் செய்வதே ஏகாதிபத்திய சக்திகளின் மூலோபாயமாகும். இது அதன் பொறுப்பற்ற தன்மையில் திடுக்கிடவைக்கும் ஒரு உத்தியாகும், மேலும் அணு ஆயுதங்களுடன் போரிடும் ஒரு முழு உலகப் போராக நேரடியாக ஆபத்தில் ஆழ்த்துகிறது.

கடந்த இரண்டு வாரங்களின் நிகழ்வுகள், புட்டின் ஆட்சியும் அது தங்கியுள்ள பல்வேறு தன்னலக்குழு மற்றும் தேசியவாத சக்திகளும் இந்த ஆபத்துக்கு முற்றிலும் முற்போக்கான பதிலைக் கொண்டிருக்கவில்லை என்பதைத் தெளிவுபடுத்தியுள்ளன. ஏகாதிபத்தியத்தால் ஒரு மூலையில் தள்ளப்பட்ட, ரஷ்ய தன்னலக்குழுக்களின் முக்கிய அக்கறை அணுசக்தி அழிப்பு அச்சுறுத்தல் அல்ல, மாறாக சமூகப் புரட்சியின் வாய்ப்பாகும். அவர்கள் தங்கள் பிரதான எதிரியை ஏகாதிபத்தியத்தில் அல்ல மாறாக தொழிலாள வர்க்கத்தில் காண்கிறார்கள்.

சர்வதேச தொழிலாள வர்க்கம் தான், உண்மையில், இந்த பேரழிவுப் போருக்கு முற்றுப்புள்ளி வைக்கக்கூடிய ஒரே சமூக சக்தியாகும். அது தனது போராட்டத்தை ஒரு புரட்சிகர, சோசலிச மற்றும் சர்வதேசிய அடிப்படையிலும், ஏகாதிபத்தியம் மற்றும் ரஷ்யா மற்றும் உக்ரேன் உட்பட அனைத்து முதலாளித்துவ அரசாங்கங்களுக்கு எதிராகவும் தனது போராட்டத்தை நடத்த வேண்டும்.