கடந்த இருபத்தைந்து ஆண்டுகளில் நிலைமைகள் எவ்வளவுதான் மாறியிருப்பினும், இந்த அறிக்கையில் குறிக்கப்படும் பொதுக்கோட்பாடுகள் ஒட்டுமொத்தத்தில் என்றும்போல் இன்றும் சரியானவையே. இங்கும் அங்கும் சிற்சில விபரங்களைச் செம்மை செய்யலாம். அறிக்கையே கூறுவதுபோல், இந்தக் கோட்பாடுளை நடைமுறையில் கையாளுதல், எங்கும் எக்காலத்திலும் அவ்வப்போது இருக்கக்கூடிய வரலாற்று நிலமைகளைச் சார்ந்ததாகவே இருக்கும். இந்தக் காரணத்தால்தான், இரண்டாம் பிரிவின் இறுதியில் முன்மொழியப்படும் புரட்சிகர நடவடிக்கைகள் தனிமுறையில் வலியுறுத்திக் கூறப்படவில்லை. அந்தப்பகுதியின் வாசகத்தை இன்று வேறுவிதமாய் வரையவேண்டியிருக்கும். கடந்த இருபத்தைந்து ஆண்டுகளில் நவீன தொழிற்துறை பெருநடை போட்டுப் பிரமாதமாய் முன்னேறி இருக்கின்றது. இதனுடன் கூடவே தொழிலாள வர்க்கத்தின் கட்சி நிறுவன ஒழுங்கமைப்பும் மேம்பாடுற்றும் விரிவடைந்தும் உள்ளது. இவற்றையும், மற்றும் முதலில் பெப்பரவரிப் புரட்சியிலும் பிறகு இன்னும் முக்கியமாய், முதன்முதலாய் பாட்டாளி வர்க்கம் முழுதாய் இருமாதங்களுக்கு அரணியல் ஆட்சியதிகாரம் வகித்த பாரிஸ் கம்யூன் (5) மூலம் கிடைத்த நடைமுறை அனுபவத்தையும் கணக்கில் எடுத்துக்கொள்வேமாயின், இந்த வேலைத்திட்டம் சில விவரங்களில் காலங்கடந்ததாகி விடுகிறது. கம்யூனானது முக்கியமாய் ஒன்றை நிரூபித்துக் காட்டிற்று. அதாவது "ஏற்கனவே பூர்த்தியான தயார் நிலையிலுள்ள அரசுப் பொறியமைவை தொழிலாள வர்க்கம் அப்படியே கைப்பற்றித் தனது சொந்தக் காரரியங்களுக்காகப் பயன்படுத்திக்கொள்ள முடியாது" என்பதை நிரூபித்துக்காட்டிற்று. (பார்க்கவும்: பிரான்சில் உள்நாட்டுப்போர். அகிலத் தொழிலாளர் சங்கப் பொது அவையின் பேருரை. ஜேர்மன் பதிப்பு, பக்கம் 19. இந்த விபரம் மேலும் விளக்கமாய் அங்கே பரிசீலிக்கப்படுகின்றது.) தவிரவும், சோசலிச இலக்கியத்தைப்பற்றிய விமர்சனம் இன்றைய நிலைவரத்துக்குப் பற்றாக் குறையானது என்பதைக் கூறத்தேவையில்லை. ஏனெனில் 1847ம் ஆண்டு வரையிலான நிலைவரம் மட்டும்தான் இந்த விமர்சனத்தில் இடம்பெறுகின்றது. அத்தோடு, பற்பல எதிர்க்கட்சிகள் சம்பந்தமய் கம்யூனிஸ்ட்டுகளுடைய உறவுநிலை பற்றிய குறிப்புகள் (நான்காம் பிரிவு) கோட்பாடு அளவில் இன்னும் பிழையற்றவையே என்றாலும்கூட, நடைமுறையில் காலம் கடந்தவை என்பதும் தெளிவு. ஏனென்றால் அரசியல் நிலைமை முற்றிலும் மாறியிருக்கிறது. வரலாற்றின் முன்னேற்றமானது அப்பிரிவில் குறிக்கப்படும் அரசியல் கட்சிகளில் மிகப்பெரும்பாலானவற்றை புவிப்பரப்பிலிருந்து துடைத்து அகற்றியிருக்கின்றது.

ஆனால் இந்த அறிக்கை வரலாற்று ஆவணமாகிவிட்டது. இனி இதைத் திருத்த எங்களுக்கு உரிமை இல்லை. 1847 க்கும் இன்றைக்கும் உள்ள இந்த இடைவெளியை நிரப்பும் ஒரு முன்னுரையோடு பிற்பாடு ஓரு பதிப்பு வெளிவரலாம். தற்போது இந்த மறுபதிப்பு எதிர்பாராத முறையில் வெளியாவதால் இதைச் செய்ய எங்களுக்கு அவகாசம் கிடைக்கவில்லை.

கார்ல் மார்க்ஸ், பிரெடெரிக் எங்கெல்ஸ்
லண்டன்,1872 ஜுன் 24

3) இங்கு குறிக்கப்படுவது 1848 ஜூன் 23-26 ல் நடைபெற்ற பாரிஸ் பாட்டாளி வர்க்க எழுச்சி. 1848, 1849ஆம் ஆண்டுகளில் ஐரோப்பா முழுவதும் வெடித்தெழுந்த புரட்சியின் உச்ச நிலையைக் குறித்தது இந்த எழுச்சி. [Top]