மொழிபெயர்ப்பின் மூலக் கட்டுரையை இங்கே காணலாம்

நேற்று, பிரான்ஸ் முழுவதும் எரிவாயு நிலையங்களில் தட்டுப்பாடு பெருகியதால், பிரதம மந்திரி எலிசபெத் போர்ன் தேசிய சட்டமன்றத்தில் எஸ்ஸோ (Esso) சுத்திகரிப்பு ஆலைகளில் வேலைநிறுத்தம் செய்பவர்கள் மீது பணித்துறை செயல்முறை ஆணையை (requisition) தனது அரசாங்கம் பிறப்பிக்கப்போவதாக அறிவித்தார். இதன் மூலம் வேலைநிறுத்தத்தை முறியடிக்கவும், மறியல் போராட்டத்தில் ஈடுபட்டவர்களைத் தாக்கவும், அவர்களை வேலைக்குத் திரும்ப செய்ய வற்புறுத்தவும் கலகத் தடுப்புப் பொலிஸை அனுப்ப அரசு தயாராகி வருகிறது.

சில மணிநேரங்களுக்கு முன்பு, Port-Jérôme-Gravenchon மற்றும் Fos-sur-Mer சுத்திகரிப்பு ஆலைகளில் உள்ள எஸ்ஸோ தொழிலாளர்கள் வேலைநிறுத்தத்தைத் தொடர வாக்களித்தனர். நேற்று, வேலைநிறுத்தத்தில் இல்லாத கடைசி பிரெஞ்சு சுத்திகரிப்பு ஆலை, டோங்கஸில் உள்ள டோட்டல் (Total) சுத்திகரிப்பு நிலையமும், வேலைநிறுத்தத்தில் இணைந்தது. பிரான்சின் அனைத்து சுத்திகரிப்பு ஆலைகளிலும் உள்ள தொழிலாளர்கள் இப்போது வேலைநிறுத்தத்தில் ஈடுபட்டுள்ளனர், அவர்கள் பணவீக்கத்தை எதிர்கொண்டு ஊதிய உயர்வுகளை கோருகின்றனர், அதே நேரத்தில் எஸ்ஸோ மற்றும் டோட்டல் இரண்டும் எரிசக்தி விலைகள் அதிகரித்துள்ளதால் பல்லாயிரக்கணக்கான யூரோக்கள் இலாபம் ஈட்டியுள்ளன.

இந்த வேலைநிறுத்தம் அதிகரித்து வரும் பணவீக்கத்தால் உந்தப்பட்ட வர்க்கப் போராட்டத்தின் பரந்த சர்வதேச வெடிப்பின் மத்தியில் வந்துள்ளது. பிரிட்டன் மற்றும் தென்னாபிரிக்காவில் துறைமுக மற்றும் போக்குவரத்துத் தொழிலாளர்கள், ஆபிரிக்காவின் பெரும்பகுதி முழுவதும் விமானப் போக்குவரத்துக் கட்டுப்பாட்டாளர்கள், ஜேர்மனி மற்றும் நோர்வேயில் இருந்து சேர்பியா, கொசோவோ மற்றும் கிரீஸ் வரை ஆசிரியர்கள் போராட்டத்தில் ஈடுபட்டுள்ளனர். அமெரிக்காவில், வாகன மற்றும் இரயில் துறையில் தொழிலாளர்களின் கோபம் அதிகரித்து வருகிறது, மேலும் நாடு தழுவிய இரயில் வேலைநிறுத்தத்திற்கான சாத்தியக்கூறுகள் அதிகரித்து வருகின்றன.

சுத்திகரிப்பு ஆலை வேலைநிறுத்தத்தை நசுக்குவதற்கான போர்னின் அச்சுறுத்தல் பிரான்சில் உள்ள தொழிலாளர்களுக்கு ஒரு எச்சரிக்கையாகும், ஆனால் சர்வதேச அளவிலும், வர்க்கப் போராட்டத்தின் பாரிய விரிவாக்கம் நடந்து கொண்டிருக்கிறது. உக்ரேனில் நேட்டோ-ரஷ்யா போருக்கு மத்தியில், வங்கிப் பிணை எடுப்பு மற்றும் இராணுவ செலவினங்களுக்காக ஆளும் உயரடுக்குகள் டிரில்லியன் கணக்கான யூரோக்களை வீணடிக்கும்போது, அது அணுவாயுதப் போராக அதிகரிக்கும் அச்சுறுத்தலைக் கொண்டுள்ளது. உலகம் முழுவதும் உள்ள முதலாளித்துவ அரசாங்கங்களும் தொழிலாள வர்க்கத்தின் மீது போரை அறிவிக்கின்றன. திவாலாகிப்போன தேசிய தொழிற்சங்க அதிகாரத்துவங்களுடன் முறிவை செய்ய தொழிலாளர்கள் ஒரு சர்வதேச மூலோபாயத்தை பின்பற்றாமல், பணவீக்கம் மற்றும் போருக்கு எதிராக போராட முடியாது.

அவரது பணித்துறை செயல்முறை ஆணை உத்தரவை நியாயப்படுத்த, எஸ்ஸோ மற்றும் பிரெஞ்சு ஜனநாயக தொழிலாளர் கூட்டமைப்பு (CFDT) தொழிற்சங்கத் தலைவர்களுக்கு இடையே பேச்சுவார்த்தை நடத்தப்பட்ட ஒப்பந்தத்தை போர்ன் பாராட்டினார். ஸ்ராலினிச தொழிலாளர் பொதுக் கூட்டமைப்பை (CGT) சுட்டிக்காட்டி, “சில அமைப்புகள் வேலைநிறுத்தத்தைத் தொடர விரும்புகின்றன. அதை எங்களால் ஏற்க முடியாது” என்றார்.

ஒரு ஒப்பந்தத்திற்கு CFDT ஒப்புதல் அளித்தால் வேலைநிறுத்தம் முடிவுக்கு வர வேண்டும் என்று போர்ன் கூறினார்: '“சமூக உரையாடல் என்பது பெரும்பான்மை தோன்றியவுடன் முன்னோக்கி நகர்வதைக் குறிக்கிறது. இவை அன்பான ஒப்பந்தங்கள் அல்ல. நிர்வாகம் உண்மையான சலுகைகளை அளிக்கிறது. எனவே, [எஸ்ஸோ] சுத்திகரிப்பு நிலையங்களின் செயல்பாட்டிற்கு அத்தியாவசியமான பணியாளர்களை பணியமர்த்துவதற்கான நடைமுறையை சட்டம் அனுமதிக்கும் படி தயார் செய்யுமாறு காவல்துறை அதிகாரிகளுக்கு நான் உத்தரவிட்டுள்ளேன்.

டோட்டல் நிறுவனத்தால் இயக்கப்படும் பிரான்சின் மற்ற சுத்திகரிப்பு ஆலைகளில் உள்ள தொழிலாளர்களையும் அவர் அச்சுறுத்தினார்: 'இந்த நீட்டப்பட்ட கையை தொழிற்சங்கங்கள் பிடிக்கும் என நான் நம்புகிறேன். … இது தோல்வியுற்றால், நிலைமையை சீர்செய்ய அரசாங்கம் அங்கும் செயல்படும்.' 1936 பிரெஞ்சு பொது வேலைநிறுத்தத்தின் போது தொழிலாளர்களின் அதிகாரத்திற்கான போராட்டத்தை நிராகரித்ததை நியாயப்படுத்த, ஸ்ராலினிச பிரெஞ்சு கம்யூனிஸ்ட் கட்சியின் தலைவரான மொரிஸ் தொரேஸின் இழிவான முழக்கத்தை அவர் மேற்கோள் காட்டினார்: 'திருப்தி அடைந்தவுடன் ஒரு வேலைநிறுத்தத்தை எப்படி முடிவுக்கு கொண்டுவருவது என்பதை ஒருவர் அறிந்திருக்க வேண்டும்.'

இது ஒரு சிடுமூஞ்சித்தனமான பொய் மட்டுமே, ஏனெனில் தொழிலாளர்கள் தங்கள் ஊதியக் கோரிக்கைகளில் கூட திருப்தி அடையவில்லை. 2022ல் பிரான்சில் பணவீக்கம் 7 சதவீதமாக இருக்கையில், 2023ல் 10 முதல் 15 சதவீதமாக இருக்கும் என்று கணிக்கப்பட்டுள்ளது, ஆனால் ஒப்பந்தம் 2022 இல் 4.2 சதவீதமும், 2023 இல் 6.5 சதவீதமும் மட்டுமே அதிகரிக்க முன்மொழிகிறது. எனவே CFDTயின் ஒப்பந்தம், வாங்கும் சக்தியில் பெரும் இழப்பைச் சுமத்துகிறது. சுத்திகரிப்பு தொழிலாளர்களுக்கான ஊதியம், ஐரோப்பா முழுவதும் உள்ள அனைத்து தொழில்களிலும் உள்ள தொழிலாளர்களுக்கு எதிராக வங்கிகள் உண்மையில் பின்பற்றும் ஒரு மூலோபாயமாகும்.

CFDT அதிகாரத்துவம் ஒரு தொழிற்சங்கமாக செயல்படவில்லை, மாறாக வங்கிகள் அதன் உறுப்பினர்களை வறுமையில் ஆழ்த்துவதற்கு உடந்தையாக இருக்கும் ஒரு பிற்போக்குத்தனமான மஞ்சள் அமைப்பாக செயல்படுகிறது என்பதை இது காட்டுகிறது. எவ்வாறாயினும், வர்க்கப் போராட்டத்தின் கசப்பான அனுபவம், CGT போன்ற தொழிற்சங்க அதிகாரத்துவங்கள் தொழிலாளர்களுக்கு வேறு எந்த மாற்றையும் வழங்கவில்லை என்பதையும் காட்டுகிறது: அவை தொழிலாளர்களின் போர்க்குணத்தில் மட்டுமே அமர்ந்து அடக்குமுறை அபாயத்திற்கு எதிராக தொழிலாளர்களை அணிதிரட்டுவதைத் தடுக்கின்றன.

CGT அதிகாரத்துவம் சாமானிய தொழிலாளர்களிடையே அதிகரித்து வரும் கோபத்தை சிடுமூஞ்சித்தனமாக எதிரொலிக்க முயல்கிறது. 'போலி தொழிற்சங்கங்கள் ஒரு சில போனஸுக்கு ஈடாக வேலைநிறுத்தத்தைக் காட்டிக் கொடுத்துள்ளன, ஆனால் CGT இன் போராட்டம் ஊதியத்தை உயர்த்துவதை தொடர்கிறது' என்று கூறும் துண்டுப் பிரசுரங்களை அது வெளியிட்டுள்ளது. பிரான்சின் இரண்டு பெரிய துறைமுகங்களான Marseille மற்றும் Le Havre இல் உள்ள CGT கூட்டமைப்புகள், சுத்திகரிப்பு ஆலை வேலைநிறுத்தத்திற்கு தங்கள் ஒற்றுமையை அறிவித்ததுடன், பொலிஸ் அடக்குமுறை தொடங்கினால் 'ஒற்றுமையுடனும் பதிலளிக்கக்கூடியதாகவும்' உள்ளதாக உறுதியளித்தன.

எவ்வாறாயினும், CGT அதிகாரத்துவத்தின் பங்கு எல்லாவற்றிற்கும் மேலாக தொழிலாளர்களை அணிதிரட்டுவதும் தூங்க வைப்பதும் ஆகும், அதே நேரத்தில் போர்ன் மற்றும் ஜனாதிபதி இமானுவல் மக்ரோன் அடக்குமுறைக்கு தீவிரமாக சதி செய்கிறார்கள்.

La Mède இல் உள்ள டோட்டல் சுத்திகரிப்பு ஆலையில், CGT பிரதிநிதி ஃபாபியான் கிரொஸ், பணித்துறை செயல்முறை ஆணை மூலம் வேலைநிறுத்தம் செய்பவர்களுக்கு போர்னின் அச்சுறுத்தல் மற்றும் சுத்திகரிப்பு நிலையங்களை விடுவிப்பது என்பதன் அர்த்தம் என்னவென்று தனக்குப் புரியவில்லை என்று கூறினார். கிராஸ் கூறினார், “சுத்திகரிப்பு நிலையங்களைத் தடுக்கவா? ஆனால் நாங்கள் சுத்திகரிப்பு நிலையங்களை முற்றுகையிடவில்லை, வேலைநிறுத்தம் செய்கிறோம். சரி, அவர்கள் உள்ளே வந்து இயந்திரங்களைத் தாங்களாகவே செயல்பட வைக்க விரும்பினால்... இந்தக் கோரிக்கையின் சட்டபூர்வ வரையறைகள் எனக்குப் புரியவில்லை, இது தற்போது எங்களை விட எஸ்ஸோவை இலக்காகக் கொண்டுள்ளது.

போர்னின் அச்சுறுத்தலைப் புரிந்து கொள்ள, ஜனாதிபதி நிக்கோலா சார்க்கோசியின் ஓய்வூதிய வெட்டுக்களுக்கு எதிராக பிரெஞ்சு சுத்திகரிப்பு நிலையங்களின் 2010 கோரிக்கையை தாக்கியதை ஒருவர் நினைவுபடுத்த வேண்டும். பெட்ரோலின் தட்டுப்பாடு பொருளாதாரத்தில் பேரழிவை ஏற்படுத்திய நிலையில், பிரான்சுக்கு வெளியில் இருந்து சுத்திகரிக்கப்பட்ட எரிவாயு விநியோகம், தொழிற்சங்கங்கள் வேலைநிறுத்த ஊதியம் வழங்காத வேலைநிறுத்தக்காரர்கள் மீதான நிதி அழுத்தங்கள், தொழிற்சங்க கூட்டமைப்புகளுக்கு இடையேயான பிளவுகள் மற்றும் இறுதியாக நேரடி போலீஸ் அடக்குமுறை ஆகியவற்றை ஒருங்கிணைத்து சார்க்கோசி வேலைநிறுத்தத்தை உடைத்தார். சார்க்கோசி பணித்துறை செயல்முறை ஆணையை பயன்படுத்தி சுத்திகரிப்பு வேலைநிறுத்தக்காரர்களை வேலைக்கு செல்ல கோரினார், மறியல் போராட்டங்களைத் தாக்க காவல்துறையை அனுப்பினார், அவர்களை வேலைக்குத் திரும்பக் கட்டாயப்படுத்துவதற்காக வேலைநிறுத்தம் செய்வதற்கான அவர்களின் உரிமையை மிதித்தார்.

2010 இல் இருந்ததை விட இன்று நிலைமை மிகவும் வெடிக்கும் வகையில் உள்ளது. வங்கி பிணையெடுப்புகள் மற்றும் உடைமை வர்க்கங்களின் செல்வத்தைக் காப்பாற்ற வழங்கப்பட்ட மகத்தான பொதுப் பணம் மற்றும் உக்ரேனில் நேட்டோ-ரஷ்யா போரால் உலகத் தொழில்துறையின் ஒழுங்கற்ற தன்மை ஆகியவற்றால் உந்தப்பட்ட பணவீக்கத்தின் தாக்கத்தால் ஐரோப்பிய மற்றும் உலகப் பொருளாதாரம் தத்தளித்துக் கொண்டிருக்கிறது. நேட்டோ மற்றும் மாஸ்கோ இரண்டும் அணு ஆயுதங்களைப் பயன்படுத்த அச்சுறுத்துகின்றன, இது உலகின் பேரழிவுக்கு வழிவகுக்கும் என்று அமெரிக்க ஜனாதிபதி பைடென் ஒப்புக்கொண்டுள்ளார்.

மக்ரோன் நிர்வாகம், முதலாளித்துவத்தின் மரண நெருக்கடிக்கு மத்தியில் அது பரவலாக இழிவுபடுத்துவதை அறிந்து, தொழிற்சங்க அதிகாரத்துவங்களின் திவால்நிலையில், 2010ல் இருந்ததை விடவும் கூடுதலான பொறுப்பற்ற நடவடிக்கைகளை எடுக்கத் தயாராக உள்ளது. 2010ல், CGT சுத்திகரிப்பு நிலையங்கள் மீதான பொலிஸ் தாக்குதலை அடையாளமாக எதிர்ப்பதற்காக 'விளையாட்டுத்தனமான' போராட்டங்களைத் தவிர வேறு எதையும் நடத்த மறுத்துவிட்டது. தற்போது CGT அதிகாரத்துவத்தினர் சுத்திகரிப்பு நிலையங்கள் மற்றும் துறைமுகங்களுக்கு இடையே பெரிய அளவில் ஒற்றுமை பற்றி பேசினால், அவர்கள் அதை ஒழுங்கமைக்க எதுவும் செய்யவில்லை, இந்த முயற்சியை மக்ரோன் மற்றும் போலீஸ்காரர்களின் கைகளில் விட்டுவிடுகிறார்கள்.

கிரோண்ட்புய் சுத்திகரிப்பு ஆலையில் பணிபுரியும் அலெக்சி, உலக சோசலிச வலைத் தளத்திடம், சுத்திகரிப்பு நிலையம் நேற்று வேலைநிறுத்தம் செய்ததாகவும், அந்த இடத்தை விட்டு எந்த எரிபொருளும் வெளியேறவில்லை என்றும் கூறினார். நேற்றிரவு, இந்த வேலைநிறுத்தத்தை ஏற்பாடு செய்த தொழிற்சங்க நிர்வாகிகள் கோரிக்கையின் ஆபத்து குறித்து மௌனமாக இருந்ததையும் அவர் உறுதிப்படுத்தினார். 'தற்போதைக்கு, அது குறித்து எங்களுக்கு எந்த தகவலும் இல்லை,' என்று அவர் கூறினார்.

WSWS, மார்சையில் துறைமுகத் தொழிலாளி டேவிட்டிடம் பேசியது, துறைமுக தொழிற்சங்க அதிகாரத்துவங்களும் ஒரு சுத்திகரிப்புக் கோரிக்கைக்கு உறுதியான தயாரிப்புகள் எதையும் செய்யவில்லை என்று கூறினார். துறைமுகத் தொழிலாளர்கள் சுத்திகரிப்பு ஆலை வேலைநிறுத்தம் பற்றி பேசுகிறார்கள், டேவிட் கூறினார், 'அவர்கள் வேலைநிறுத்தம் செய்வது சரி என்று அவர்கள் கூறுகிறார்கள்.' எவ்வாறாயினும், சுத்திகரிப்பு நிலையங்களில் பணித்துறை செயல்முறைை ஆணையை எதிர்கொள்ளும் வேலைநிறுத்தக்காரர்களைப் பாதுகாக்க, ஆதரவைத் திரட்ட தொழிற்சங்க அதிகாரத்துவத்தினர் எந்த நடவடிக்கையும் எடுக்கவில்லை என்று டேவிட் மேலும் கூறினார்.

“யாரும் எங்களிடம் எதுவும் சொல்லவில்லை. தொழிற்சங்கங்கள் பொதுக் கூட்டத்தையோ அல்லது வாக்கெடுப்பையோ நடத்தினால் எங்களுக்கு ஒரு செய்தி வரும், இதுவரை எங்களுக்கு எதுவும் கிடைக்கவில்லை. கூட்டங்கள் எதுவும் நடக்கவில்லை,” என்று அவர் மேலும் கூறினார், “அவ்வாறான விவாதங்கள் ஏதேனும் இருந்தால், அது அநேகமாக துறைசார் தொழிற்சங்கக் கூட்டமைப்பு மட்டத்தில் இருக்கலாம், முழு நேர தொழிற்சங்க நிர்வாகிகள் எஸ்ஸோவின் முழுநேர தொழிற்சங்க அதிகாரிகளைச் சந்தித்திருக்கலாம்.”

தொழிலாள வர்க்கத்தின் சக்திவாய்ந்த, வளர்ந்து வரும் இயக்கம், வாங்கும் சக்தியின் சரிவையும், அணுஆயுத போரை நோக்கிய முதலாளித்துவத்தின் உந்துதலையும் நிறுத்த முடியும். எவ்வாறாயினும், இதற்கு தொழிற்சங்க அதிகாரத்துவங்களைச் சாராமல், அவர்களின் அழிவுகரமான செல்வாக்கை உடைத்து, ஒரு சண்டைக்குத் தயார்படுத்த, சாமானிய தொழிலாளர் குழுக்கள் தேவைப்படுகின்றன. சாமானிய தொழிலாளர்கள் குழுக்களின் சர்வதேச கூட்டணியை கட்டியெழுப்புதல் மற்றும் பணவீக்கம், ஏகாதிபத்திய போருக்கு எதிரான போராட்டம் ஆகியவை மக்ரோனிடமிருந்து சுத்திகரிப்பு வேலைநிறுத்தத்தை பாதுகாக்கும் போராட்டத்தை வழிநடத்தக்கூடிய அரசியல் அச்சை வழங்குகிறது.