மொழிபெயர்ப்பின் மூலக் கட்டுரையை இங்கே காணலாம்

புதன் மாலை, பிரெஞ்சு பிரதம மந்திரி எலிசபெத் போர்ன் முந்தைய நாள் அச்சுறுத்தியபடி, Le Havre க்கு அருகில் உள்ள Port Jérome-Gravenchon இல் உள்ள எஸ்ஸோ (Esso) சுத்திகரிப்பு ஆலையில் நான்கு வேலைநிறுத்தக்காரர்கள் மீது பிரெஞ்சு போலீஸ் பணித்துறை செயல்முறை ஆணையை விதித்தது. அவர்கள் ஆறு மாத சிறைத்தண்டனை அல்லது 10,000 யூரோக்கள் அபராதத்தை எதிர்கொள்கின்றனர். எரிபொருள் விநியோகத்தை மீண்டும் தொடங்க, புதன்கிழமை மாலை இரண்டு தொழிலாளர்களும், மேலும் இருவர் வியாழன் காலைக்கும் பணித்துறை செயல்முறை ஆணையை பெற்றுள்ளனர்.

டன்கேர்க்கில் உள்ள எஸ்ஸோ எரிபொருள் சேமிப்பு நிலையத்தின் தொழிலாளர்களும் வேலைநிறுத்தத்தில் ஈடுபட்டுள்ளனர். செவ்வாயன்று போர்னின் அச்சுறுத்தல்களுக்கு விடையிறுக்கும் வகையில், புதன்கிழமை காலை வேலைநிறுத்தம் பரவியது, ஏனெனில் டோன்ஜ் (Donges) சுத்திகரிப்பு ஆலை தொழிலாளர்கள் மற்றும் ஐந்து அணு உலைகளின் பராமரிப்பு தொழிலாளர்கள் வெளிநடப்பு செய்தனர். இப்போது பிரான்சின் ஏழு எண்ணெய் சுத்திகரிப்பு ஆலைகளில் ஆறு வேலைநிறுத்தத்தில் உள்ளன. புதன்கிழமை இரவுக்குள், பிரான்சில் உள்ள 30.8 சதவீத பெட்ரோல் நிலையங்களில் எரிபொருள் இருக்காது.

மக்ரோன் அரசாங்கத்தின் நடவடிக்கை, வேலைநிறுத்தம் செய்வதற்கான ஜனநாயக உரிமையின் மீதான ஒரு முன்னணி தாக்குதல் ஆகும். இரண்டாம் உலகப் போரின்போது வர்க்கப் போராட்டத்தை முறையாக சட்டவிரோதமாக்கிய நாஜி-ஒத்துழைப்பு விச்சி ஆட்சியின் வீழ்ச்சிக்குப் பின்னர் பிரெஞ்சு அரசியலமைப்பில் இந்த உரிமைக்கு உத்தரவாதம் அளிக்கப்பட்டது.

தொழிற்சங்க அதிகாரத்துவங்களால் தனிமைப்படுத்தப்பட்ட வேலைநிறுத்தங்களை இறுதியில் நசுக்க, சார்க்கோசி அரசாங்கம் 2010 இல் சுத்திகரிப்பு தொழிலாளர்களுக்கு எதிராக பணித்துறை செயல்முறை ஆணை உத்தரவை பயன்படுத்திய முன்னுதாரணத்தை இந்த நடவடிக்கை பின்பற்றுகிறது. இன்று, மக்ரோன் அரசாங்கம் உலக முதலாளித்துவ நெருக்கடியின் மிகவும் வளர்ச்சியடைந்த கட்டத்தில் தொழிலாள வர்க்கத்திற்கு எதிராக ஒரு பாரிய தாக்குதலை முன்னெடுத்து வருகிறது.

மக்ரோனின் ஆக்ரோஷமான நடவடிக்கைகள், பொலிஸ்-அரசு எந்திரத்திற்கும் தொழிலாள வர்க்கத்திற்கும் இடையே ஒரு வெடிக்கும் மோதலை உருவாக்குகிறது. பணவீக்கத்திற்கு எதிரான வேலைநிறுத்தங்கள், சுத்திகரிப்பு நிலையங்கள் மற்றும் தொழிலாளர்களின் வேலைநிறுத்தங்களை மிகவும் பரந்த அளவில் ஒடுக்குவதை அரசு நோக்கமாகக் கொண்டுள்ளது. பணவீக்கம், எரிசக்தி பற்றாக்குறை, தொற்றுநோயின் மீள் எழுச்சி மற்றும் உக்ரேனில் நேட்டோவிற்கும் ரஷ்யாவிற்கும் இடையே அதிகரித்துவரும் போரின் பேரழிவுகரமான எழுச்சிக்கு மத்தியில் பிரான்சிலும் சர்வதேச அளவிலும் போராட்டங்களின் அலை வெடிக்கிறது.

இந்த வகையான அரச அடக்குமுறையை எதிர்கொள்வதில் பிரெஞ்சு சுத்திகரிப்பு தொழிலாளர்கள் தனியாக இல்லை. அமெரிக்காவில், இரயில் தொழிலாளர்கள் பைடென் நிர்வாகத்தால் மீண்டும் பணிக்குத் திரும்ப உத்தரவிடப்பட்டுள்ளனர், அதே நேரத்தில் பிரிட்டிஷ் இரயில் தொழிலாளர்கள் ஊதியக் குறைப்புக்கள் மற்றும் சீரழிந்து வரும் வேலை நிலைமைகளுக்கு எதிராக தொடர்ச்சியாக நடந்து வரும் வேலைநிறுத்தப் போராட்டங்களில் இதேபோன்ற அச்சுறுத்தல்களை எதிர்கொள்கின்றனர்.

விநியோகங்களை உடனடியாக மறுதொடக்கம் செய்ய வேண்டும் என்ற எஸ்ஸோ இன் கோரிக்கைக்கு ஏற்ப, நான்கு தொழிலாளர்கள் அரசாங்கத்தால் பணித்துறை செயல்முறை ஆணை மூலம் வேலைசெய்ய கட்டாயப்படுத்தப்பட்டுள்ளனர். செப்டம்பர் 27 அன்று சுத்திகரிப்பு வேலைநிறுத்தங்கள் தொடங்கியதில் இருந்து, சுத்திகரிப்பு செயல்முறையுடன் பதப்படுத்தப்பட்ட எண்ணெயின் விநியோகமும் நிறுத்தப்பட்டது, பிரெஞ்சு பெட்ரோ கெமிக்கல் தொழிலுக்கு ஒரு நாளைக்கு எட்டு மில்லியன் யூரோக்கள் செலவாகிறது.

மக்ரோன் அரசாங்கம் வரவிருக்கும் நாட்களில் எஸ்ஸோ மற்றும் டோட்டல் தொழிலாளர்களின் பரந்த பிரிவுகளைத் தாக்குவதை நோக்கமாகக் கொண்டுள்ளது. முதல் கோரிக்கைகளைத் தொடர்ந்து, பிரெஞ்சு அரசாங்கத்தின் செய்தித் தொடர்பாளர் ஒலிவியே வெரோன் (Olivier Véran), வேலைநிறுத்தத்தில் ஈடுபட்டுள்ள டோட்டல் தொழிலாளர்கள் மீதும் பணித்துறை செயல்முறை ஆணைக்கான போர்னின் அச்சுறுத்தல்களை எதிரொலித்தார். பிரெஞ்சு பெட்ரோ கெமிக்கல் விநியோகச் சங்கிலியில் ஒரு முக்கியமான இணைப்பான டன்கேர்க்கில் உள்ள எஸ்ஸோ எரிபொருள் சேமிப்பு நிலையத்தில் வேலைநிறுத்தம் செய்யும் தொழிலாளர்களையும் வெரோன் சுட்டிக்காட்டினார்.

பிரான்சில் போராட்டத்தில் ஈடுபட்டுள்ள தொழிலாளர்கள் எதிர்கொள்ளும் முக்கியமான கேள்வி, தொழிற்சங்க அதிகாரத்துவங்களில் இருந்து விடுபட்டு, அரசாங்கம், பெருநிறுவனங்கள் மற்றும் முதலாளித்துவ அமைப்புமுறைக்கு எதிராகப் போராடுவதற்கு அவர்களது சொந்த சாமானிய தொழிலாளர்களின் நடவடிக்கை குழுக்களை உருவாக்குவதாகும். வேலைநிறுத்தம் தொழிற்சங்க அதிகாரத்துவங்களின் கட்டுப்பாட்டின் கீழ் இருந்தால், அது அரசியல் ரீதியாக கழுத்தை நெரிக்கும்.

CFDT மற்றும் CFE-CGC தொழிற்சங்கங்களின் தலைவர்கள் ஏற்கனவே செவ்வாயன்று வேலைநிறுத்தத்தை விற்க முயன்றனர், அரசாங்க ஆதரவு ஒப்பந்தத்தில் 5.5 சதவீத ஊதிய உயர்வுடன் கையெழுத்திட்டனர், பணவீக்கம் கிட்டத்தட்ட 7 சதவிகிதம் இது ஊதியக் குறைப்பைக் குறிக்கிறது. இருப்பினும், வேலைநிறுத்தத்தை முடிவுக்குக் கொண்டுவருவதற்கான அவர்களின் முயற்சிகள் தோல்வியடைந்தன, ஏனெனில் புதன்கிழமை காலை வெளிநடப்பு தொடர்ந்தது.

CFE-CGC மற்றும் CFDT இன் வேலைநிறுத்தத்தை முடிவுக்குக் கொண்டுவரும் முயற்சிகளுக்கு சாமானிய தொழிலாளர்களின் கோபமான பதிலைக் கண்ட CGT, அரசாங்கத்திற்கு எதிராக போராடும் என்று வலியுறுத்துகிறது. புதனன்று ஒரு அறிக்கையில், CFE-CGC மற்றும் CFDT ஆகியவற்றை 'போலித் தொழிற்சங்கங்களின்' நடவடிக்கை என்று CGT கண்டனம் செய்தது மற்றும் அவர்களது உறுப்பினர்களை காட்டிக் கொடுத்ததை விமர்சித்தது.

எவ்வாறாயினும், மக்ரோன் மற்றும் அவரது மந்திரிகளுடன் 'சமூக உரையாடல்' என்ற அதன் நீண்டகால கொள்கையை CGT தனிப்பட்ட முறையில் தொடர்கிறது. மூடிய கதவுகளுக்குப் பின்னால், CGT தலைவர் பிலிப் மார்டினேஸ், தொழிற்சங்கத்தின் உறுப்பினர்கள் மீது திணிக்கப்படக்கூடிய சலுகைகள் ஒப்பந்தத்தை அரசாங்கத்துடன் பேச்சுவார்த்தை நடத்த தீவிர முயற்சியில் ஈடுபட்டுள்ளார். மார்டினேஸ் வெள்ளிக்கிழமை போர்னுடனும் திங்களன்று எரிசக்தி அமைச்சர் அன்னியேஸ் பன்னியே-ருனாச்சேருடனும் தனிப்பட்ட தொலைபேசி உரையாடல்களை நடத்தினார்.

வேலைநிறுத்தம் செய்யும் தொழிலாளர்களை 'ஆதரிப்பதற்காக' புதன்கிழமை இரவு போர்ட் ஜெரோம் தளத்தில் சுற்றுப்பயணம் செய்த பின்னர், மார்டினேஸ் அறிவித்த ஒரே நடவடிக்கை, பணித்துறை செயல்முறை ஆணைக்கு எதிரான சட்டரீதியான சவாலாகும். மார்டினேஸ் கூறினார், 'வேலைநிறுத்தம் செய்யும் தொழிலாளர்கள் மீது பணித்துறை செயல்முறை ஆணையை நடைமுறைப்படுத்துவது ஒரு உரையாடலை நடத்துவதற்கான சிறந்த வழி என்று நான் நினைக்கவில்லை.'

வேலைநிறுத்தங்களை முடக்கி, இறுதியில் மக்ரோனுடன் ஒரு ஒப்பந்தத்தை எட்டத் துடிக்கும் தொழிற்சங்க அதிகாரத்துவத்தின் ஒரு அடுக்குக்காகப் பேசும் மார்டினேஸை, வாங்கு சக்தியின் சரிவால் கோபமடைந்து, போரைப் பற்றி பெருகிய முறையில் அக்கறை கொண்ட தொழிலாள வர்க்கத்திலிருந்து ஒரு வர்க்க இடைவெளி பிரிக்கிறது.

தொழிலாளர்கள் பொருளாதார அழிவையும் நேட்டோ-ரஷ்யா மோதலில் அணு ஆயுதங்களைப் பயன்படுத்துவதற்கான அச்சுறுத்தலையும் எதிர்கொள்கையில், வேலைநிறுத்தம் செய்வதற்கான உரிமை பிரான்சில் நேரடி தாக்குதலுக்கு உள்ளாகி வருகிறது. எரிசக்தி சுத்திகரிப்பு தொழிலாளர்களின் வேலைநிறுத்தத்தின் தாக்கம், தொழிலாள வர்க்கத்தின் மகத்தான சக்தியை நிரூபித்துள்ளது. இந்த நிலைமைகளுக்கு மத்தியில், பரவலாக வெறுக்கப்பட்ட மக்ரோன் அரசாங்கத்தை வீழ்த்துவதற்காக, CGT தனது 700,000 உறுப்பினர்களை அணிதிரட்ட முடியும், அவர்களில் பலர் பிரான்சின் பொருளாதாரத்திற்கு முக்கியமான தொழில்களில் உள்ளனர்.

இருப்பினும், அதிகாரத்துவம் அத்தகைய நடவடிக்கையை எடுக்காது, அது உண்மையில் எதிர்க்கிறது. ஏனெனில் சுத்திகரிப்புத் தொழிலாளர்கள் எதிர்த்துப் போராடும் பெருநிறுவனங்களின் அதீத இலாபங்களால் அதிகாரத்துவத்தின் சலுகைகள் உறுதிப்படுத்தப்படுகின்றன. பொருளாதார அடிப்படையில்தான், முதலாளித்துவ வர்க்கத்தின் போர்க் கொள்கை, பெருநிறுவனங்களுக்கு பல டிரில்லியன் யூரோ பிணை எடுப்பு மற்றும் தொழிலாள வர்க்கத்திற்கு பாரிய சிக்கன நடவடிக்கை ஆகியவற்றை தொழிற்சங்கங்கள் ஆதரிக்கின்றன.

மக்ரோனுக்கு எதிரான போராட்டத்தை நடத்துவதற்கு தொழிற்சங்க அதிகாரத்துவங்களுடன் ஒரு தீர்க்கமான முறிவு தேவைப்படுகிறது மற்றும் தொழிலாளர்களின் கட்டுப்பாட்டில் உள்ள, சாமானிய தொழிலாளர்களின் நடவடிக்கை குழுக்களை அமைக்க நடவடிக்கை எடுக்க வேண்டும். சாமானிய தொழிலாளர்கள் குழுக்களின் சர்வதேச கூட்டணியை கட்டியெழுப்புவதன் மூலம் உலகெங்கிலும் உள்ள பல தொழில்களில் உள்ள போராட்டங்களுடன் இது ஒருங்கிணைக்கப்பட வேண்டும்.